Ndalo apar bang’ ka Yesu ne osedok e polo, jopuonjrene noyudo roho maler. Mano notimore chieng’ Pentekost ma higa 33. Ji moa kuonde mopogore opogore nodhi Jerusalem e nyasino. Jopuonjre Yesu 120 ne ochokore e od gorofa moro. Apoya nono, gimoro miwuoro ne otimore. Gik ma liel ka mach ne odiedo e wi moro ka moro kuom jopuonjrego, kendo jopuonjrego ne ochako wacho dhok mopogore opogore. Koko moro ma chalo gi yamo mager ne owinjore e odno.

Welo ma nobiro Jerusalem koa e pinje mamoko ne owinjo kokono ma giringo gidonjo e ot ma ne jopuonjre ochokoree mondo gine ni ang’o ma ne timore. Ne giwuoro ahinya ka ne giwinjo ka jopuonjre Yesu wacho dhok mopogore opogore. Ne giwacho kama: ‘Yawa, donge magi Jo-Galili? Obet nade ni giwacho dhowa?’

Kae to Petro gi joote mamoko ne ochung’ e nyim ji. Petro ne onyisogi kaka ne oneg Yesu, kendo ni Jehova ne ochiere. Petro ne owacho kama: ‘Sani Yesu ni e polo, kendo obet e bad Nyasaye korachwich. Bende,  oseoronwa roho maler mana kaka ne osingonwa. Mano e momiyo uneno gik ma timoregi.’

Weche ma ne Petro owacho chieng’no ne omulo chuny joma ne ni kanyo, kendo ne gipenjo kama: “Ang’o monego watim?” Petro ne odwokogi kama: ‘Lokuru chunyu ua e richo mondo otisu e nying Yesu, kendo uyud roho maler.’ E odiechieng’no, notis ji 3,000 kama. Chakre kanyo, kwan mag jopuonjre ne ochako medore Jerusalem e okang’ mamalo. Roho maler ne okonyo joote e chako kanyakla momedore, mondo gipuonj ji weche ma Yesu ne ochikogi.