E ndalo Ezra, ne nitie Ja-Israel moro ma ne nyinge Nehemia. Ne otiyo e od Ruoth Artashasta e taon mar Shushan e alwora mar Persia. Owadgi Nehemia nobiro ire kowuok Juda mokelone wach kama: ‘Joma nodok Jerusalem ok dhi maber. Ohinga mag Jerusalem kod rangeyene ma Jo-Babulon nomuko pok olosi.’ Wachno nochando chuny Nehemia ahinya. Ne ogombo dhi Jerusalem mondo okony tich kuno, omiyo, nolemo mondo ka ruoth oyie to omiye rusa mar dhi.

Chieng’ moro, ruoth ne oneno ka Nehemia okuyo. Ne openje kama: ‘Pok anenoga ka ikuyo kama. Dibed ni nitie gima rach?’ Nehemia nowacho kama: ‘Onge kaka dabed mamor to Jerusalem dalawa odong’ gunda!’ Ruoth nopenje niya: ‘Diher ni akonyi nade?’ Gikanyono, Nehemia nolemo gi chunye. Kae to nonyiso ruoth kama: ‘Akwayi ni iyiena adhi Jerusalem mondo ager ohingage.’ Ruoth Artashashta ne oyie ne Nehemia dhi, kendo ruoth ne ochiwore konye e wuoth ma raborano. Ruoth noketo Nehemia mondo obed gavana ma Juda, kendo nomiye bepe ma ne odhi gerogo dho rangeye.

Ka ne Nehemia ochopo Jerusalem, ne orango kuonde ma ne okethore e ohinga. Kae to ne ochoko jodolo kod jotelo monyisogi niya: ‘Gik moko oduwore kae marach. Onego wachak tich mapiyo.’ Ji ne oyie, kendo ne gichako loso ohinga.

Kata kamano, jowasik Israel ne jarogi ka wacho niya: ‘Ohinga ma ugeroni yom yom ma kata mana bwe nyalo muko.’ Chuny jogedo ne ok onyosore, kendo ne gidhi nyime gi tijgi. Ohinga nomedo dhi malo, kendo bedo motegno.

Jowasik Israel ne ochano monjo joma ne gedo. Ka ne Jo-Yahudi owinjo wachno, luoro ne omakogi. Kata kamano, Nehemia ne ojiwogi kama: ‘Kik uluor. Jehova ni kodwa.’ Nehemia ne oketo chwo moko mondo orit joma ne gedo, mondo jowasigu kik monjgi.

 Ne otiek ger ohinga mag Jerusalem kod rangeyene mana bang’ ndalo 52 kende. Ka ne ochopo sa mar walo hekalu, Nehemia ne ochoko Jo-Lawi duto Jerusalem. Ne opogo Jo-Lawigo e grube ariyo mag jower. Ne giwer ka gilworo ohinga mag Jerusalem ka giluwo rangach ma nong’ere kaka Ranga Soko, ka grup achiel pangore kochomo koracham to machielo korachwich. Ne gipako Jehova ka gigoyo turmbeta kod gik mamoko mag goyo thum. Ezra ne odhi gi grup moro, to Nehemia bende ne odhi gi machielo. Ne gilworo dalano ma giromo e hekalu. Ji duto moriwo chwo, mon, kod nyithindo ne ochiwo ne Jehova misengni, kendo ne gitimo nyasi. Dwondgi ne nyalo winjore gi kama bor ahinya nikech ne gimor sidang’.