Esta ne en Nya-Yahudi ma nodak Shushan e piny Persia. Higni moko mang’eny ma ne osekalo, Nebukadnezar notero wedene e tuech. Ne odongo e lwet owadgi ma bathe ma nyinge Mordekai, ma ne en jatich e od Ruoth Ahasuerus ma Persia.

Nitie kinde moro ma Ruoth Ahasuerus ne dwaro kendo dhako machielo. Jotichne nokelone nyiri mabeyo ma ne nitie e alwora mar Persia. Achiel kuomgi ne en Esta. Kuom nyirigo duto, ruoth ne oyiero Esta. Mordekai ne onyiso Esta ni kik onyis ng’ato ni en nyar Jo-Yahudi.

Ne nitie ng’at moro ma noket jatelo e wi jotelo mamoko duto. Nyinge ne en Haman. Nodwaro ni ji duto okulrene. Kata kamano, Mordekai to ne otamore. Mano ne omiyo Haman iye owang’ kendo ne odwaro nego Mordekai. Ka ne Haman owinjo ni Mordekai ne en Ja-Yahudi, ne otimo chenro mar nego Jo-Yahudi te. Haman ne onyiso ruoth kama: ‘Jo-Yahudi gin joma richo ahinya; onego neggi te.’ Ahasuerus nonyise kama: ‘Tim kodgi kaka ineno ni berni.’ Nomiyo Haman teko mar loso chik ma nodwarono. Haman ne oloso chik ma ne nyiso ji mondo gineg Jo-Yahudi duto tarik 13, e dwe mar Adar. Jehova ne neno gigo duto.

Esta ne ok ong’eyo ni ne oseket chik mar nego Jo-Yahudi. Mordekai ne oorone kopi mar barua ma ne oting’o chikno, kendo nokwayo Esta kama: ‘Dhi mondo iwuo gi ruoth.’ Esta ne odwoko niya: ‘Ng’ato ang’ata ma odhi ir ruoth ka ruoth ok oluonge, inego. Ruoth pok oluonga kuom ndalo 30! Kata kamano, abiro dhi adhiya ire. Ka orieyona ludhe, ok bi nega. To ka ok otimo kamano, ng’e ni adhi tho.’

Esta nodhi ir ruoth. Ka ne ruoth onene, norieyone ludhe. Esta ne odhi but ruoth kendo ruoth ne openje kama: ‘Esta, ang’o midwaro ni atimni?’ Esta ne odwoke kama:  ‘Daher rwaki kaachiel gi Haman e nyasi ma adhi loso.’ Ka ne gin e nyasino, Esta ne ochako orwakogi e nyasi machielo ma ne dhi bedo kinyne. E nyasi machielono, ruoth ne ochako openjo Esta niya: ‘Ang’o midwaro ni atimni?’ Esta ne owachone kama: ‘Nitiere ng’ato ma dwaro nega kaachiel gi ogandana. Kiyie to ireswa.’ Ruoth ne openje kama: ‘Mano to ng’a ma dwaro negino?’ Esta ne odwoke niya: ‘En Haman ng’at marachni.’ Mirima ne omako Ahasuerus mi ogolo chik mondo oneg Haman sano sano.

Kata kamano, onge ng’ama ne nyalo loko chik ma ne Haman oketo mar nego Jo-Yahudi duto. Kata mana ruoth ne ok nyal loko chikno. Omiyo, ruoth ne oketo Mordekai mondo obed jatelo e wi jotelo mamoko duto, mi omiye teko mar loso chik machielo manyien. Mordekai ne oloso chik ma ne oyie ne Jo-Yahudi kedo gi joma ne dhi monjogi tarik 13, dwe mar Adar. Ka ne chieng’no ochopo, Jo-Yahudi ne oloyo jowasikgi. Chakre kindeno, ne gitimoga nyasi mar paro odiechieng’no higa ka higa.