Be ineno joma nie pichani?— Gin Mathayo, Mariko, Luka, Johana, Petro, Jakobo, Juda, gi Paulo. Jogi duto nodak kinde ma ne Yesu nie piny kendo giduto ne gindiko e wi Yesu. We wanon ane weche moko e wigi.

Adek kuomgi ne gin joote ma nolendo gi Yesu. Be ing’eyo joote adekgo?— Gin Mathayo, Johana, kod Petro. Jaote Mathayo gi jaote Johana nong’eyo Yesu maber ahinya kendo moro ka moro kuomgi nondiko buk e wi  ngima Yesu. Bende, jaote Johana nondiko buk miluongo ni Fweny kaachiel gi barupe moko adek miluongo ni Johana Mokwongo, Johana mar Ariyo, kod Johana mar Adek. Jaote Petro bende nondiko barupe ariyo ma yudore e Muma. Iluongogi ni Petro Mokwongo gi Petro mar Ariyo. E barupe mar ariyo, Petro ne ondiko e wi kinde ma Jehova nowuoyo ka en e polo kowacho niya e wi Yesu: ‘Ma en Wuoda. Ahere kendo amor kode.’

Jomamoko e pichani bende puonjowa e wi Yesu e buge ma ne gindiko. Achiel kuomgi en Mariko. Nenore ni ne en kaachiel gi Yesu kane imako Yesu kendo noneno gik moko duto ma ne otimore. Ng’at machielo en Luka. Ne en laktar kendo nenore ni nobedo Jakristo bang’ tho Yesu.

Jondik Muma ariyo mamoko manie pichani gin owete Yesu ma ne luwo bang’e. Be ing’eyo nyingegi?— Iluongogi ni Jakobo gi Juda. Mokwongo, ne ok giyie kuom Yesu. Nitie kata kinde ma ne giparo ni wi Yesu ne dwa biro marach. Kata kamano, bang’e ne giketo yie kuom Yesu ma gibedo Jokristo.

Jandik Muma mogik mineno e pichano en Paulo. Kane pok obedo Jakristo, niluonge ni Saulo. Ne ok odwar Jokristo kata matin kendo ne osandogi ahinya. Be ing’eyo gima nomiyo Paulo obedo Jakristo?— Chieng’ moro kane Paulo wuotho e ndara, nowinjo ka dwol moro wuoyo kode koa e polo. Yesu e ma ne wuoyo kode! Yesu nopenjo Paulo niya: ‘Ang’o momiyo isando joma oyie kuoma?’ Bang’ mano, Paulo nolokore mobedo Jakristo. Paulo nondiko buge 14 mag Muma, chakre bug Jo Rumi nyaka bug Jo Hibrania.

Wajosomo Muma pile, donge?— Kuom somo Muma wapuonjore weche mang’eny e wi Yesu. Donge diher puonjori weche momedore e wi Yesu?—