1, 2. Wanyalo yudo kar buok kanye ndalogi?

KAW ane ni iwuotho e wang’yo, to en odiechieng’ ma yamo makelo koth ng’eny. Kor polo bedo rateng’. Polo mil kendo mor, bang’ mano koth maduong’ chako chwe. Iringo matek mondo iyud kama inyalo buokie. E bath yo, ineno gimoro moger kaka ot ma inyalo buokie. Ogere motegno, kendo en ka ma otwo ma igombo donjoe. Mano kaka imor bedo kanyo!

² Wadak e kinde machal gi mar yamo mager makelo koth. Ngima e piny medo bedo marach moloyo. Kata kamano, nitie kar buok ma wanyalo pondoe, kendo yudo ritruok kuom gimoro amora manyalo hinyowa marach. Kar buokno, en ang’o? Ne gima Muma puonjo: “Natwag kuom Jehova niya, En e kar geng’ruokna, gi dalana mar ohinga; Nyasacha ma an ageno.”—Zaburi 91:2.

3. Jehova nyalo bedonwa kar buok e yo mane?

³ Par ane mano! Jehova, ma en Jachwech kendo Jaloch e polo gi piny, nyalo bedo kar buokwa ma geng’o gik manyalo hinyowa. Onyalo ritowa, nikech en gi teko moloyo ng’ato  ang’ata kata gimoro amora manyalo hinyowa. Kata kaponi gimoro ohinyowa, Jehova nyalo golo lit moro amora mabiro nikech hinyruok. Jehova nyalo bedonwa kar buok e yo mane? Onego waket geno marwa kuome. E wi mano, Wach Nyasaye jiwowa kama: “Ritreuru e hera mar Nyasaye.” (Juda 21) Ee, dwarore ni wasik e hera mar Nyasaye, ka wabedo gi tudruok mar hera gi Wuonwa manie polo. Ka watimo mano, wanyalo bedo gi adier ni en ema en kar buok marwa. Kata kamano, ere kaka wanyalo bedo gi tudruok machalo kamano?

4, 5. Yore moko ma Jehova osenyisowago hera gin kaka mage?

⁴ Mondo wasiki e hera mar Nyasaye, onego wang’e yore ma Jehova osenyisowago hera. Par ane puonj moko mag Muma ma isepuonjori kokalo kuom bugni. Kaka Jachwech, Jehova osemiyowa pinyni kaka kar dak maber ahinya. Osepong’o pinyni gi chiemo kod pi, lowo maber, le mang’eny mamorowa, kod gik moko maber neno. Kaka Jachiw paro mondiki ei Muma, Jehova osefwenyonwa nyinge kaachiel kod kite. E wi mano, Muma nyisowa ni ne ooro Wuode mohero e piny, kendo ne oweyo Yesu mondo osandre, kendo mondo otho nikech wan. (Johana 3:16) To michno konyowa nade? Omiyowa geno mar yudo ngima maber e ndalo mabiro.

⁵ Wabedo gi geno mar kinde mabiro bende nikech gimoro machielo ma Nyasaye osetimo. Jehova osechungo sirkal moro e polo ma en Pinyruodh Mesia. E kinde mabiro machiegni, pinyruodhno biro tieko chandruok duto, kendo obiro miyo piny obed paradis. Par ane! Wanyalo dak e paradis gi kuwe koda mor nyaka chieng’. (Zaburi 37:29) Gie sani, Nyasaye osemiyowa puonj manyalo konyowa dak e yo maber ahinya kindegi. Osemiyowa bende mich mar lamo, ma en e yo ma wanyalo wuoyogo kode ka wan thuolo. Mago gin mana moko kuom yore ma Jehova osenyisogo dhano duto hera, kendo in bende osenyisi herano.

6. Ang’o ma inyalo timo nikech hera ma Jehova osenyisi?

 ⁶ Penjo maduong’ ma onego ipenjri en mae: Ang’o ma abiro timo nikech hera ma Jehova nyisa? Ng’eny ji nyalo wacho ni, “Adier, an bende onego aher Jehova nikech ohera.” Be mano e kaka in bende iparo? Yesu ne owacho ni chik maduong’ moloyo duto en ma: “Her Ruoth Nyasachi gi iyi duto, kendo gi chunyi duto, kendo gi riekoni duto.” (Mathayo 22:37) Nitie gik mang’eny momiyo onego iher Jehova Nyasaye. Kata kamano, be hero Jehova gi chunyi, gi iyi kod riekoni duto en mana gima ng’ato winjo ei chunye?

7. Be hero Nyasaye en mana gima ng’ato winjo ei chunye koso nitie gima chielo madwarore? Ler ane gima omiyo iwacho kamano.

⁷ Mana kaka Muma nyiso, hero Nyasaye ok en mana gima ng’ato winjo ei chunye kende. Kuom adier, kata obedo ni en gima ber mondo ng’ato owinj ei chunye ni ohero Jehova, mano en mana chakruok mar bedo gi hera mar adier kuome. Mondo yath manyago olemo obedie, koth olemono dwarore. Kata kamano, kapo ni idwaro olemo, be inyalo bedo mamor ka ng’ato omiyi mana kothe? Ooyo! Kamano bende, winjo ei chunyi ni ihero Jehova Nyasaye en mana chakruok. Muma puonjo kama: “Nimar hero Nyasaye en mako chikne, to chikne ok tek.” (1 Johana 5:3) Hera mar Nyasaye nyaka nyag olembe mabeyo ka en hera madier. Nyaka nyise gi tim.—Mathayo 7:16-20.

8, 9. Ere kaka wanyalo nyiso ni wahero Nyasaye, kendo ni wagoyone erokamano?

⁸ Wanyiso ni wahero Nyasaye ka warito chikene, kendo ka watiyo gi puonjne. Timo kamano ok en gima tek ahinya. Kar bedo gima tek, chike Jehova olosi mondo okonywa dak e ngima maber, kendo gimiyo chunywa bedo mamor. (Isaiah 48:17, 18) Ka wadak kaluwore gi puonj ma Jehova miyowa, wanyiso Wuonwa manie polo ni wagoyo erokamano nikech gik moko  duto ma osetimonwa. Gima lit en ni, ji manok ahinya e pinyni ema timo kamano. Ok wadwar bedo joma ok nyis erokamano kaka jomoko ma ne odak e kinde ma Yesu ne nitie e piny. Yesu ne ochango ji apar ma ne nigi tuwo mar dhoho, to ng’at achiel kende ema ne oduogo mondo ogone erokamano. (Luka 17:12-17) Kuom adier, wadwaro bedo kaka ng’at ma ne ogoyo erokamano, to ok kaka ji ochiko ma ne ok otimo kamano!

⁹ To koro, chike mag Jehova monego waluw gin mage? Wasewuoyo e wi moko kuomgi ei bugni, to kata kamano, we mondo wachak wang’i ane moko kuom chikego e yo machuok. Ka warito chike Nyasaye, mano biro konyowa siko e hera mar Nyasaye.

10. Ang’o momiyo en gima duong’ mondo wadhi nyime gi puonjruok e wi Jehova Nyasaye?

¹⁰ Puonjruok e wi Jehova en gima dwarore ahinya mondo ng’ato osud machiegni kode. En gima onego bed ni dhi nyime ma onge giko. Kapo ni ioyo mach gotieno seche ma piny ng’ich ahinya, be inyalo weyo mondo majno  osim? Ooyo. Ibiro medo yien mondo majno omed liel maber. Mano en nikech, majno ema nyalo reso ngimani! Mana kaka yien miyo mach odhi nyime gi liel, e kaka “rieko ming’eyogo Nyasaye” miyo hera marwa kuom Jehova bedo motegno.—Ngeche 2:1-5.

11. Puonj mag Yesu ne omiyo jolupne owinjo nade?

¹¹ Yesu ne dwaro ni mondo jolupne omed hera margi kuom Jehova kaachiel gi hero Wachne maber ma en adier, mondo omi herano obed hera motegno. Bang’ chier, Yesu ne opuonjo ariyo kuom jopuonjrene, weche moko mag jonabi ma yudore e Ndiko mag Dho-Hibrania ma ne otimore e ngimane. Mano ne omiyo giwinjo nade? Ne giwacho bang’e ni: “A ok chunywa mor koso, kowuoyo kodwa e yo, kendo koelonwa Ndiko? ”—Luka 24:32.

12, 13. (a) Be timbe ji mang’eny modak ndalogi nyiso ni gihero Nyasaye koda Muma? (b) Ang’o ma wanyalo timo mondo hera marwa kik bed mang’ich ?

¹² Kane ikwongo ng’eyo gima Muma puonjo kuom adier, be ne iwinjo ka chunyi opong’ gi mor, ka in gi ilo mar tiyoni Nyasaye, kendo ka in kod hera kuome? Nyaka bed ni ne iwinjo kamano. Ji mang’eny osewinjo kamano. Tich maduong’ koro mantie, en miyo herano odhi nyime, kendo mondo omed dongo. Ok wadwar bedo gi timbe kaka mag ji modak e piny ndalogi. Yesu ne okoro wach niya: “Hera mar ji mang’eny nodok mang’ich.” (Mathayo 24:12) Ang’o minyalo timo mondo hera mari kuom Jehova kod Muma kik bed mang’ich?

¹³ Med puonjori e wi Jehova Nyasaye kod Yesu Kristo. (Johana 17:3) Par matut kuom weche mipuonjori e Wach Nyasaye, ka ipenjori ni: ‘Ang’o ma wach masomoni puonja e wi Jehova Nyasaye? E wi mano, wachni konya nade neno gima omiyo onego amed hero Nyasaye gi chunya duto, pacha duto, koda gi riekona duto? ’ (1 Timotheo 4:15) Bedo gi paro matut e yo ma kamano biro miyo imed hero Jehova ahinya.

14. Wuoyo gi Jehova e lamo nyalo konyowa nade mondo hera marwa kuom Jehova kik rum?

¹⁴ Yo moro machielo ma nyalo miyo herani kuom Jehova  kik rum en wuoyo kode e lamo pile ka pile. (1 Jo Thessalonika 5:17) E Sula mar 17 ei bugni, ne wapuonjore ni lamo en mich maber ahinya moa kuom Nyasaye. Mana kaka winjruok e kind dhano ma osiepe bedo maber ka gin thuolo e wuoyo e kindgi, e kaka winjruok gi Jehova bende bedo maber, kendo mamor ka wawuoyo kode e lamo pile ka pile. En gima duong’ mondo lamo marwa kik bed ma iwacho awacha, tiende ni weche ma wawacho ka wanuoyo to ok wuog ei chunywa kata ma onge gi tiendgi. Onego wawuo gi Jehova mana kaka nyathi matin nyalo wuoyo gi wuoro mohero. Wadwaro nyiso luor ka wawuoyo gi Nyasaye, ka wan thuolo, ka wawacho adier, kendo ka wawacho gik mawuok ei chunywa. (Zaburi 62:8) Ee, puonjruok Muma ma watimo ka wan kendwa wawegi, kaachiel kod wuoyo gi Nyasaye e lamo mawuok ei chunywa, gin gik madongo ma konyowa siko e hera mar Nyasaye.

15, 16. Ang’o momiyo wanyalo neno tij lando wach mar Pinyruoth kaka tich maber, kendo kaka mwandu?

¹⁵ Puonjruok Muma ma itimo ka in kendi iwuon kaachiel kod wuoyo gi Nyasaye e lamo, gin gik ma wanyalo timo kar kendwa. Kata kamano, we mondo wang’i ane gimoro ma bende watimo e lela ka watiyo ni Jehova. Mano en wuoyo gi ji mamoko e wi puonj ma wayiego. Bende iseyudo thuolo mar nyiso jomoko adiera mag Muma ma isepuonjori? Ka en kamano, kara isebedo gi mor mar tiyo tich maber. (Luka 1:74) Seche ma wanyiso jomoko adiera ma wasepuonjore e wi Jehova Nyasaye, watimo tich maduong’ ma ne omi Jokristo duto madier—tij lando wach maber mar Pinyruodh Nyasaye.—Mathayo 24:14; 28:19, 20.

¹⁶ Jaote Paulo ne neno tich ma ne otimo mar lendo kaka tich maber ahinya, kendo ne oluongo tijno ni mwandu ma nengone tek. (2 Jo Korintho 4:7) Wuoyo gi ji e wi Jehova Nyasaye kod dwaro mage, e tich maber moloyo tije duto ma inyalo timo. Mano en tiyo ni Jatend tich maber moloyo, kendo wayudo  gweth mang’eny ahinya. Seche ma itimo tijno, ikonyo joma chunygi ni kare e sudo machiegni gi Wuoro manie polo, kendo mondo gichak wuotho e yo ma dhi e ngima mochwere! Be nitie tich manyalo kelo mor moloyo tijni? E wi mano, wuoyo e wi Jehova kaachiel gi Wachne, en gima medo gero yie  mari, kendo tego hera mari kuom Jehova. Kendo Jehova mor gi kinda mitimo. (Jo Hibrania 6:10) Timo tijni ma ok iwe konyi siko e hera mar Nyasaye.—1 Jo Korintho 15:58.

17. Ang’o momiyo tich ma omi Jokristo mar lando wach en tich ma dwarore ni mondo otim mapiyo e ndalogi?

¹⁷ Ber mondo wang’e ni tij lando wach Pinyruoth en tich madwarore ni mondo otim piyo ahinya. Muma wacho ni: “Yal Wach Nyasaye, kendo dhi mana kode nyime kinde duto.” (2 Timotheo 4:2) Ang’o momiyo dwarore mondo otim tijno mapiyo ahinya ndalogi? Wach Nyasaye nyisowa kama: ‘Ndalo maduong’ mar Jehova chiegni. Ochiegni kendo oruyore piyo.’ (Zefania 1:14) Ee, kinde okayo machiegni ahinya ma Jehova biro kelo giko mar gik matimore e pinyni duto. Ji onego omi siem! Dwarore ni mondo ji ong’e ni mani e kinde monego giyier Jehova kaka Jalochgi. Giko ‘ok noriwre.’—Habakkuk 2:3.

18. Ang’o momiyo onego walam Jehova e lela ka wan kaachiel gi Jokristo madier?

¹⁸ Jehova dwaro ni mondo walame e lela ka wan kaachiel gi Jokristo madier. Mano e momiyo Wachne wacho kama: “Kendo ng’ato ka ng’ato opar owadgi mondo wami hera gi timbe mabeyo omedre. Kik waweuru chokruokwa kaachiel, kaka jo moko timo, to wajiwreuru ng’ato gi ng’ato, moloyo to ka koro uneno ni Chieng’no sudo machiegni.” (Jo Hibrania 10:24, 25) Seche ma waromo gi Jokristo wetewa e chokruoge mag Jokristo, wabedo gi thuolo maber ahinya mar pako, kendo lamo Nyasachwa ma wahero ahinya. Bende wagerore, kendo wajiwore ng’ato gi ng’ato.

19. Ang’o ma wanyalo timo mondo wajiw hera mar ng’ato gi ng’ato ei kanyakla mar Jokristo?

¹⁹ Ka wabedo machiegni gi jowetewa malamo Jehova, mano biro jiwo hera kod osiep ei kanyakla. Ber mondo wane kido mabeyo ei ng’ato gi ng’ato, mana kaka Jehova bende neno kido mabeyo ma wanyiso. Kik ipar ni joweteni ma Jokristo gin joma kare chuth. Ng’e ni waduto wamedo dongo e wach Nyasaye e okang’ mopogore opogore, kendo ni waduto wan joketho. (Jo Kolosai 3:13) Mak osiep machiegni gi jogo  mohero Jehova ahinya, to ibiro neno ka idongo kaka Jakristo. Ee, lamo Jehova ka in kod oweteni kod nyimineni ma Jokristo biro konyi siko e hera mar Nyasaye. Jehova gwedho nade jogo ma lame e yo makare, kendo ma siko e hera mare?

20, 21. “Ngima maradier” en ang’o, kendo ang’o momiyo en ngima maber ahinya?

²⁰ Jehova gwedho jotichne makare gi ngima. Kata kamano, en ngima machalo nade? Penjori kama, be angima sani adier? Joma ng’eny kuomwa nyalo wacho ni ee, donge wangima. Donge wayueyo, wachiemo, kendo wametho. Kuom adier, mano nyiso ni wangima. Kendo e seche ma wamor e ngima, wanyalo wacho ni, ‘Mani e ngima adier! ’ Kata kamano, Muma nyiso ni, onge dhano ma nigi ngima maradier e ndalogi.

²¹ Wach Nyasaye jiwowa mondo wamak matek “ngima ma en ngima maradier.” (1 Timotheo 6:19) Wechego nyiso ni “ngima maradier” en gima wageno yudo ndalo mabiro. Ee, kinde ma wabiro bedo joma kare chuth ma onge richo moro amora kuomwa, wabiro bedo mangima e yo maradier, nikech wabiro bedo ka wadak e yo ma Nyasaye ne dwaro ni mondo wadag-go. E kinde ma wabiro dak e paradis e piny ka, ka wangima maonge midekre moro amora, ka wan gi kuwe, kendo ka wamor, mano biro bedo “ngima maradier”—ngima mochwere. (1 Timotheo 6:12) Donge mano en ngima maber ahinya?

22. Inyalo mako matek “ngima ma en ngima maradier” e yo mane?

²² Wanyalo mako matek “ngima ma en ngima maradier” e yo mane? E ndikono, Paulo ne ojiwo Jokristo mondo “gibed jo ma timo maber,” kendo ni “gibed jomwandu mag timbe mabeyo.” (1 Timotheo 6:18) Mano nyiso malong’o ni, kaka watiyo gi adiera ma wasepuonjore ei Muma e gima duong’. Kata kamano, be Paulo ne nyiso ni wayudo “ngima maradier” kaka chudo bang’ timo timbe mabeyo? Ooyo, nikech gweth mabeyo kaka mago, biro kuom “ng’wono mar Nyasaye.”  (Jo-Rumi 5:15) To kata kamano, Jehova yudo mor e gwedho jogo matiyone kare. Ogombo neno ni iyudo “ngima maradier.” Jogo ma osiko e hera mar Nyasaye nyalo bedo gi geno mar dak e ngima machalo kamano, ngima ma nigi mor, kuwe, kendo ma nyaka chieng’.

23. Ang’o momiyo siko e hera mar Nyasaye en gima dwarore?

²³ Ng’ato ka ng’ato kuomwa onego openjre niya, ‘Be alamo Nyasaye e yo ma owacho ei Muma? ’ Ka wanonre gi penjono pile ka pile, ma wanwang’o ni watimo kamano kuom adier, to kare wan e yo makare. Wanyalo bedo gi adier ni, Jehova en kar buok marwa. E kinde giko mag ndalo marumogi, kendo mopong’ gi chandruok, Jehova biro rito joge mochung’ motegno. Jehova bende biro konyowa donjo e piny manyien mabiro, ma koro okayo machiegni. Wabiro mor ahinya chopo e kindeno! To mano kaka wabiro bedo mamor ahinya ni ne wayiero timo gik makare e kindegi mag giko! Ka iyiero timo kamano gie sani, ibiro bedo mamor yudo “ngima maradier,” ma en ngima ma chakre chon, Jehova Nyasaye ne dwaro mondo obedie nyaka chieng’!