1, 2. Ang’o monego wang’e e wi Satan kod jochiendene?

 NGIMA e piny manyien biro bedo maber ahinya. Gikone, wabiro dak mana kaka Nyasaye ne dwaro ni wadag. Kata kamano, sani wadak e piny ma itayo gi Satan kod jochiendene. (2 Jo-Korintho 4:4) Kata obedo ni ok wanyal nenogi, gintie kendo gin gi teko mang’eny.

² E sulani, wadwaro puonjore kaka wanyalo siko ka wan machiegni gi Jehova kod gik ma wanyalo timo mondo Satan kik hinywa. Jehova osingo ni obiro konyowa. Kata kamano, onego wang’e yore ma Satan kod jochiendene tiyogo e wuondowa kendo monjowa.

3. Jachien dwaro timonwa ang’o?

³ Satan wachoga ni dhano lamo Jehova nikech gik momiyogi kendo ni gibiro weyo tiyone ka giyudo chandruoge. (Som Ayub 2:4, 5.) Sama ng’ato gombo ng’eyo Jehova, Satan gi jochiendene nenoga mano kendo gitemoga tame timo kamano. Gibedoga gi mirima seche ma ng’ato ochiwore ne Jehova mi obatise. Muma pimo Jachien gi ‘sibuor ma ruto ma manyo ng’at ma dongam.’ (1 Petro 5:8) Satan  dwaro ketho winjruok ma wan-go gi Jehova.​—Zaburi 7:1, 2; 2 Timotheo 3:12.

4, 5. (a) Ang’o ma Satan ok nyal timonwa? (b) Ang’o ma wanyalo timo mondo ‘wakwed Jachien’?

⁴ Ok onego waluor Satan gi jochiendene. Nitie gik ma Jehova ok nyal yienegi mondo gitimwa. Jehova singo ni “oganda moro mang’ongo” mar Jokristo madier biro tony e “masira maduong’.” (Fweny 7:9, 14) Onge gima Jachien nyalo timo mondo ogeng’ wachno nikech Jehova rito jotichne.

 ⁵ Ka wasiko ka wan machiegni gi Jehova, Satan ok nyal ketho winjruokwa kode. Wach Nyasaye singonwa kama: “Jehova ni kodu mana ka umakoru kode.” (2 Weche mag Ndalo 15:2; som 1 Jo-Korintho 10:13.) Jotich Jehova machon kaka Habil, Enok, Noa, Sara, kod Musa nokwedo Jachien nikech ne gibedo machiegni gi Jehova. (Jo-Hibrania 11:4-40) Wan be wanyalo timo kamano. Wach Nyasaye singonwa kama: “Kweduru Jachien, mi noringu.”​—Jakobo 4:7.

6. Ere kaka Satan monjowa?

⁶ Kata obedo ni Satan ong’eyo ni nitie gik ma Jehova ok oyiene timonwa, pod obiro temo matek ketho winjruokwa gi Jehova. E kindegi, Satan monjowa kotiyo gi yore mopogore opogore ma osebedo kotiyogo kuom higni mang’eny. Moko kuom yorego gin mage?

7. Ang’o momiyo Satan monjo jotich Jehova?

⁷ Jaote Johana nondiko kama: “Piny duto ni e teko mar ng’at marach.” (1 Johana 5:19) Satan chiko pinyni kendo doher ni ochik jotich Jehova bende. (Mika 4:1; Johana 15:19; Fweny 12:12, 17) Jachien ong’eyo ni odong’ gi ndalo matin, omiyo, otemo matek wuondowa mondo wawe tiyo ne Nyasaye. Seche moko otiyo gi yo ma achiel kachiel to kinde moko otiyo gi yore mopondo.

8. Jakristo ka Jakristo onego ong’e wach mane?

⁸ Jo-Efeso 6:12 wacho niya: “Wakedo gi . . . teko mar oganda mar jochiende manie kor polo.”  Jakristo ka Jakristo nyaka ked gi Jachien kod jochiendene. Nyaka wang’e ni ji duto mochiwore tiyo ne Jehova kedo e lwenyni. Ka ne Paulo ndiko ne jo Efeso, nojiwogi nyadidek mondo ‘gichung’ motegno.’​—Jo-Efeso 6:11, 13, 14.

9. Ang’o ma Satan kod jochiendene temo timonwa?

⁹ Satan kod jochiendene temo wuondowa ka gitiyo gi yore mang’eny. Bedo ni wasekwedo Satan e yo moro ok nyis ni koro ok onyal makowa kotiyo gi yore mamoko. Jachien temoga mondo ong’e nyawowa mondo oti kodgi e makowa. Kata kamano, ok ochuno ni omakwa nikech Muma nyisowa riekni motiyogo. (2 Jo-Korintho 2:11; som Weche Momedore namba 31.) Achiel kuom yore motiyogo en tudruok gi jochiende.

10. (a) Tudruok gi jochiende oriwo timo ang’o? (b) Jehova neno nade tim mar tudruok gi jochiende?

¹⁰ Tudruok gi jochiende oriwo timo gik moko ma dhano ok nyal timo gi tekone owuon kaka koro wach, timbe juok, loko dhoch, kata temo wuoyo gi jomotho. Muma nyisowa ni tudruok gi jochiende en tim ma Nyasaye osin-go. Ok wanyal dhi nyime lamo Nyasaye ka konchiel to watudore gi jochiende. (Rapar mar Chik 18:10-12; Fweny 21:8) Jokristo ok onego otudre gi jochiende e yo moro amora.​—Jo-Rumi 12:9.

11. Ang’o manyalo timorenwa ka wahero gik motudore gi jochiende?

¹¹ Satan ong’eyo ni ka wahero gik motudore gi jochiende, mano nyalo bedone mayot ywayowa. Tudruok  gi jochiende e yo moro amora biro ketho winjruokwa gi Jehova.

12. Ere kaka Satan temo chocho pachwa?

¹² Satan temo chocho pach ji. Oketo kiawa kuom ji mosmos mondo gipar ni “gima ber rach to gima rach ber.” (Isaya 5:20) Jachien temo wacho ni puonj mag Muma ok nyal tiyo e ngimawa kendo wanyalo dak e ngima mamor ka ok waluw chike Nyasaye.

13. Ere kaka Satan osetemo miyo ji obed gi kiawa?

¹³ Achiel kuom yore madongo ma tiyone Satan maber en miyo ji obed gi kiawa. Osebedo kotiyo gi yorno kuom kinde malach. Notimo kamano e puodho mar Eden ka ne openjo Hawa niya: “Be en adier ni Nyasaye nowacho ni kik ucham olemb yath moro amora manie puodho?” (Chakruok 3:1) Bang’e e kinde Ayub, Satan nopenjo Jehova e nyim malaike niya: “Be iparo ni Ayub diluori ka onge gima oyudo kuomi?” (Ayub 1:9) Bang’ ka ne osebatis Yesu, Satan nonyise kama: “Ka in wuod Nyasaye, nyis ane kitegi mondo olokre chiemo.”​—Mathayo 4:3.

14. Ere kaka Satan nyalo miyo ji obed gi kiawa ni tudruok gi jochiende ok en gima rach ahinya?

¹⁴ E kindegi, Satan pod miyo ji bedo gi kiawa. Otemo miyo ji obed gi kiawa ka be tudruok gi jochiende en gima rach ka oketo moko kuom yorego mondo onenre ka gima ok giricho ahinya. Moko kuom Jokristo osedonjo e obadhono. (2 Jo-Korintho 11:3) Omiyo, ang’o ma wanyalo timo mondo  kik wadonj e obadhono? Ang’o ma wanyalo timo mondo Satan kik wuondwa gi rieknige? We wanon ane yore moko ariyo ma onyalo wuondowago ma gin: yore mag manyo mor kod weche thieth.

15. Ere kaka yorewa mag manyo mor nyalo miyo watudre gi jochiende?

¹⁵ E kindegi, thoth gik ma yudore e sinembe, vidio, programbe mag TV, tuke mag kompyuta kod Intanet opong’ gi gik jochiende kod timbe juok. Ji mang’eny neno ni gigo ok nyal hinyogi kendo ok ging’eyo rach mar tudruok gi jochiende. Ng’ato nyalo tudore gi jochiende kuom koro wach kotiyo gi sulwe, ng’iyo lwet ng’ato kae to onyise gik mabiro timorene, tiyo gi kad mag timbe juok kod gik moko ma kamago. Jachien pando rach ma ng’ato nyalo yudo kotimo gik ma kamago to oketogi mondo ginenre ka gik ma miyo ji bedo mamor. Ng’ato nyalo kata paro ni onge rach ka oneno sinembe kata vidio motudore gi jochiende tek mana ni en owuon ok otim gigo. Ang’o momiyo paro ma kamano rach?​—1 Jo-Korintho 10:12.

16. Ang’o momiyo onego wakwed yore mag manyo mor motudore gi timbe juok?

¹⁶ Satan ok nyal ng’eyo gik ma waparo. Kata kamano, onyalo nono yiero ma watimo e ngimawa moriwo nyaka yorewa mag manyo mor, kae to ong’eyo gik ma wagombo gi ma waparo. Ka sinembe ma waneno, wende ma wawinjo, kata buge ma  wasomo opong’ gi joma tudore gi jomotho, joma loko ne ji dhoch, ajuoke, joma madho remb ji, kod gik moko ma kamago, Satan gi jochiendene biro fwenyo ni wagombo ng’eyo wechegi. Ginyalo kata mana temo soyowa mondo wadonj e timbe juok gi wiwa te.​—Som Jo-Galatia 6:7.

17. Ere kaka Satan nyalo tiyo marach gi gombo ma wan-go mar bedo gi ngima maber?

¹⁷ Satan bende nyalo tiyo marach gi gombo ma wan-go mar bedo gi ngima maber. E kindegi, ji mang’eny tuore. Samoro ng’ato nyalo temo yore  mathoth mag thieth to pod ok ochang. (Mariko 5:25, 26) Chunye nyalo kata nyosore mi oyie tiyo gi yor thieth moro amora moyudore. Kata kamano, nikech wan Jokristo, nyaka wabed motang’ mondo kik wayier yor thieth motudore gi “timbe juok.”​—Isaya 1:13.

18. Gin yore mage mag thieth ma Jakristo onego okwed?

¹⁸ E piny Israel machon, nitie joma ne ohero “timbe juok.” Jehova nonyisogi niya: “Kata ka uting’o lweteu malo, to anapandnu wang’a. Kata ka ulemo ding’eny, to ok anawinju.” (Isaya 1:15) Parie ni Jehova ne ok nyal kata winjo lamogi! Ok dwaher timo gimoro amora manyalo ketho winjruokwa gi Jehova kendo manyalo mone konyowa to ahinya ahinya sama watuo. (Zaburi 41:3) Omiyo, nyaka wanon ka yor thieth ma wadwaro tiyogo otudore gi timbe juok kata jochiende. (Mathayo 6:13) Ka po ni otudore gi timbe juok, nyaka wakwede!​—Som Weche Momedore namba 32.

19. Ere kaka Jachien osemiyo ji obedo gi luoro?

¹⁹ Kata obedo ni jomoko paro ni Jachien kod jochiendene onge, jomoko to ong’eyo ni gintie nikech gik ma jochiendego osetimonegi. Ji mang’eny oluoro jochiende kendo gimakore gi timbe juok. Jomamoko to bwogo ji kuom lando ne jomoko gik malich ma jochiende timo ne dhano. Kinde mang’eny, mbeknigo moro ji kendo gigomboga nyiso jowetegi. Mbekni ma kamano miyo ji luoro Jachien.

20. Ere kaka wanyalo lando miriambo mag Satan?

 ²⁰ Par ane wachni; Satan dwaro ni ji oluore. (2 Jo-Thesalonika 2:9, 10) En jamiriambo mong’eyo ywayo pach joma ohero gik motudore gi jochiende mondo giyie gi gik ma samoro ok gin adier. Joma kamago nyalo nyisowa mbekni moko ma giparo apara ni ne gineno kata winjo. Kaka ji medo lando mbeknigo e kaka gimedo medo chumbi kuomgi. Ok dwaher konyo Satan e miyo ji luoro kuom goyo mbeknigo.​—Johana 8:44; 2 Timotheo 2:16.

21. Kar goyo mbekni mag jochiende, ang’o ma wanyalo nyiso jomamoko?

²¹ Ka jochiende ne osechando jatich Jehova moro, ok onego osik ka ogoyo mbakano ne jomamoko mondo omorgigo. Jotich Jehova ok onego oluor Jachien kod jochiendene. Kar mano, onego gichom wang’gi kuom Yesu kendo ging’e ni Jehova osemiye teko duto. (Jo-Hibrania 12:2) Yesu ne ok ogoyo ne jopuonjrene mbekni mag jochiende. Ne oketo pache e wach Pinyruoth kod “tije madongo mag Nyasaye.”​—Tich Joote 2:11; Luka 8:1; Jo-Rumi 1:11, 12.

22. Ing’ado mar timo ang’o?

²² Wiwa kik wil ni dwaro maduong’ mar Satan en ketho winjruokwa gi Jehova. Obiro timo gimoro amora mondo ochop dwacheno. Kata kamano, wang’eyo riekni motiyogo kendo wang’ado e chunywa ni ok wabi tudore kata matin gi jochiende. Ok wabi ‘miyo Jachien thuolo’ mar dwokowa chien. (Som Jo-Efeso 4:27.) Ee, ka wakwedo Satan, ok obi makowa kendo Jehova biro ritowa.​—Jo-Efeso 6:11.