Par ane wachni: David riembo mtoka e taon moro ma ok ong’eyo maber. Kong’iyo sains mogur e bath ndara, oneno ka kama entieno nyiso ni ok en e yo ma tere kama nodhiye. Ofwenyo ni kare oselal. Nyaka bed ni ne obaro e yo ma ok owinjore.

Ka dine bed ni in David, ditimo nang’o?

Samoro inyalo yiero mar:

1. Penjo joma iromogo.

2. Ng’iyo map mondo item fwenyo ka be pod in e yo maber.

3. Dhi adhiya nyime gi riembo kigeno ni samoro ibiro mana chopo kuma idhiyeno.

Onge kiawa ni paro mar C ok kony kata matin.

Paro mar B bende ber moloyo mokwongo. Map en gima inyalo gen nikech in kode kinde duto nyaka ichop kuma idhiye.

Muma bende nyalo konyi mana kaka map nyalo konyo dereva molal.

Muma nyalo konyi:

• sama inyagori gi pek mag ngima

• ng’eyo ni in ng’at ma chalo nade kod kaka inyalo medo bedo gi kido mabeyo

• ng’eyo kaka inyalo dak e ngima maberie moloyo

Ka ne wachako achaka wuoyo ni i, ne wachako bedo gi penjo kaka:

• Ang’o momiyo polo en rambulu?

• ulwe nolos gi ang’o?

Bang’e, ne wachako bedo gi penjo e wi gik ma timore e piny kaka:

• Ang’o momiyo gik maricho timore?

• Ang’o momiyo ji tho?

To nade ka ifwenyo ni dwoko mag penjogo osebedo e Muma kuom higni duto?

Ji mang’eny wacho ni Muma opong’ mana gi sigendni manono mochuogi, ni en mana buk ma nyachon, kata ni winjo weche man e iye tek ma ok nyalre. Kata kamano, be Muma en kamano adier? Koso gik ma giparo ni ging’eyo e wi Muma e ma guenyogi?

Kuom ranyisi, ji paro ni Muma wacho ni Nyasaye e ma chiko gik ma timore e pinyni. Be mano en adier? Par ane, gik ma timore e pinyni oduwore mokalo apima! Piny opong’ gi lit kod chandruok, tuoche kod tho to ok wachi, dhier kod masiche bende ng’eny. Ere kaka Nyasaye ma jahera nyalo chiko gik marichogo?

Be diher yudo dwoko mar penjono? Muma wacho gimoro ma nyalo kawi gi wuoro!

Samoro bang’ somo brosuani, ifwenyo ni paro mabeyo ma ochiw e iye owuok e Muma. Joneno mag Jehova oyie ni Muma oting’o puonj mabeyo ma nyalo konyo ahinya e ngimawa. Muma ne ‘okudh gi much Nyasaye kendo okonyo kuom puonjo ji, kuom siemo ji, kendo kuom rieyo gik moko.’ (2 Timotheo 3:16, 17) Donge in bende inyalo kawo thuolo mondo isomie Muma ka ipuonjori matut weche ma yudore e iye!