KORO en Tich Ang’wen gotieno, kendo ndalo ariyo osekalo. Yesu kod jootene 12 obiro e ot malachni mantiere e gorofa malo mondo gicham chiemb Pasaka. Ng’ama ineno ka weyogino en Judas Iskariot. Odhi mondo onyis jodolo kaka ginyalo mako Yesu.

E odiechieng’ motelo, Judas ne odhi mopenjogi ni: ‘En ang’o ma ubiro miya ka akonyou mako Yesu?’ Ne giwachone ni: ‘Ng’inje piero adek mag fedha.’ Kuom mano, koro Judas dhi romo kod jodologi, mondo otergi ir Yesu. Donge mano en tim marach?

Sawo mar Pasaka orumo. Kata kamano, Yesu koro chako nyasi mar chiemo machielo makende. Ochiwo makate ni jootene kowacho ni: ‘Chamuru mae, nikech mani e ranyisi mar ringrena ma ibiro chiwo nikech un.’ Bang’e, omiyogi kikombe mar divai kowacho kama: ‘Madhuru mae, nikech mani en ranyisi mar remba mibiro chwero nikech un.’ Muma luongo mae ni ‘chiemb odhiambo mar Ruoth’ kata ‘sap Ruoth.’

Jo-Israel ne chamo Pasaka mondo gipar kaka malaika mar Nyasaye ne ‘okalo ewi’ utegi ka gin Misri, to malaikano ne onego nyithindo makayo e ute Jo-Misri. Kata kamano, Yesu to koro dwaro mondo jolupne opare kod kaka ne ochiwo ngimane nikech gin. Mani e momiyo onyisogi ni mondo gipar, kendo gitim nyasino higa ka higa.

Bang’ chamo Chiemb Odhiambo mar Ruoth, Yesu nyiso jootene ni mondo gibed gi chir, kendo gibed motegno e yie. Mogik, giwero wende ni Nyasaye, kendo bang’e gia. Seche koro olewo, nyalo bedo ni osekalo dier odiwuor. We mondo wane kama gidhiye.