IGINI ariyo kalo, to Josef podi ni e jela. Wi jalos divai podi owil kode. Bang’e, otieno moro, Farao bedo gi lek ariyo makende ahinya, kendo owuoro gima tiendgi en. Be inyalo nene kanyo konindo? Okinyi maluwe, Farao ne oluongo joge mariek kendo ne opimonegi lekgo. Kata kamano, loko tiend lekgo ne otamogi.

Koro, jalos divai paro Josef. Onyiso Farao kama: ‘Kane an e jela, ne nitie ng’ato kuro ma ne nyalo loko tiend lek.’ Piyo piyo nono, Farao oro mondo okel Josef koa e jela.

Farao pimo ni Josef lekne: ‘Ne aneno dhok abiriyo machwe kendo mabeyo. Bang’e achako aneno dhok abiriyo ma odhero ahinya ma chokegi neno. To dhok ma odheroka ne ochamo dhok machwe.

‘E lekna mar ariyo, ne aneno wiye cham abiriyo ma opong’ ka dongo e tiang’ achiel. Kendo achako aneno wiye abiriyo ma odhero kendo motwo mag cham. Kendo wiye abiriyo ma odheroka ne ochako muonyo wiye abiriyo mabeyo.’

Josef wacho ne Farao niya: ‘Tiend lek ariyogo en gimoro achiel. Dhok abiriyo machwego kod wiye abiriyo ma opong’ gi cham ochung’ne higini abiriyo, kendo dhok abiriyo kod wiye abiriyo mag cham ma odhero ochung’ne higini abiriyo moko. Higini abiriyo dhi betie ma chiemo biro bedo mang’eny ahinya e piny Misri. Bang’e, higini abiriyo moko ma chiemo nobed matin ahinya.’

Kuom mano, Josef nyiso Farao kama: ‘Yier ng’ato achiel mariek kendo ikete jachung’ mar tij choko chiemo e higini abiriyo mabeyogo. Kendo ji ok bi denyo e higini abiriyo mag kech mabiro luwe.’

Farao mor gi parono. Kendo oyiero Josef mondo ochok chiemogo kendo mondo okan-gi. Josef bedo jalup Farao kaka jatend Misri.

Higini aboro bang’e, e kinde mag kech, Josef neno jomoko ka biro. Be ing’eyo ni gin jo mage? Gin owetene 10 madongo! Jakobo wuon-gi oorogi Misri, nikech chiemo ne rumonegi Kanaan. Josef fwenyo owetene, gin to ok gifwenye. Be ing’eyo gimomiyo? En nikech Josef osebedo maduong’, kendo orwako lewni ma kitgi opogore.

Josef paro lek ma ne oleko ka podi otin, ni owetene ne dhi kulorene. Donge inyalo paro ni ne isomo wachno? Kuom mano, Josef neno ni Nyasaye ema ne oore Misri, kendo nitie gima ber ma ne omiyo otimo kamano. Iparo ni Josef biro timo ang’o? We mondo wane.