Eyo. Mbimbiliya yafuma kuli “Kalunga uze eji kuvendejekanga vaze vanahombo.” (Wavaka-Kolinde 2, 7:6) Numba tuhu Mbimbiliya kayapwa himukanda uze wahanjika hamusongo wakuwongo. Oloze yinahase kukafwa vatu vavavulu vahone kulijiha. Kaha nawa yinahase kumikafwa chikuma nayenu.

•  Uno Mbimbiliya yinahase kumikafwa ngachilihi?

•  Uno Mbimbiliya yahanjika havatu vaze vasakile kufwa tahi?

•  Uno visoneka muka vize vinahase kumikafwa muhonesa vishinganyeka vyakulijiha?

•  Nyi ngachilihi nge sepa lyenu mwahanjika ngwenyi, “Ngunakusaka kufwa”?

•  Nyi ngachilihi nge kunyima ngwasakile kulijiha?

• ● Lwezenuko vakwenu omu muli nakwivwa.

   Vyuma Yahanjika Mbimbiliya: “Sepa wamwenemwene eji kuzanganga sepa lyenyi shimbu yosena, kaha napu nge hindumbwenyi uze mwamukafwa mulwola lwavihuli.”—Vishimo 17:17.

   Mwalumbunukila Mazu Kana: Twasaka kutukafwa kuli vakwetu nge tunahombo.

   Kachi nge namuhona kulwezako vakwenu ukalu mulimo nakumona, kaha nachipwa kwijiva nge munambate chiteli chachilemu ukawenu. Oloze kachi nge namulwezako vakwenu, kaha namwivwa nakumuchima hwo, nakukehesako kuhomba.

   Lingenu Vyuma Vino: Lwezenuko kausoko kenu chipwe mutu weka uze mwafwelela chikuma. Munahase nawa kusoneka ukalu wenu.

• ● Yenu kuchipatela vamikafwe.

   Vyuma Yahanjika Mbimbiliya: “Vatu vavakangule kaveshi kusakiwa chimbukeko, kuvanga vaka-kuviza kaha.”—Mateu 9:12.

   Mwalumbunukila Mazu Kana: Twasaka kutuka nge tunaviji.

   Kupwa navishinganyeka vyakusaka kulijiha hijila yimwe yakusolola nge mutu naviji muwongo. Shikaho nge tuli naukalu kana, kaha twatela kuhanjika ngana muze tweji kuhanjikanga nge tunaviji misongo yeka. Misongo yakuwongo namisongo yeka vanahase kuyuka.

   Lingenu Vyuma Vino: Yenu washi kuli vandotolo vamikafwe.

• ● Tachikizenu ngwenu Kalunga amizakama.

   Vyuma Yahanjika Mbimbiliya: “Kutala tujilili vatanu kaveshi kuvalanda natujimbongo tuvali twachicheleko numba? Chipwe ngocho, naumwe wauchi navavulyama kuli Kalunga. . . . Enu mwapwa muvavalemu kuhambakana tujilili vavavulu.”—Luka 12:6, 7.

   Mwalumbunukila Mazu Kana: Kalunga amimona kupwa muvavalemu chikuma.

   Shimbu jimwe munahase kwivwa nge kakweshi mutu amizakamako, oloze anukenu ngwenu Kalunga natachikiza ukalu wenu wosena. Amizakama chikuma numba tuhu muli nakushinganyeka ngwenu nakufwa chinawahe. Hali Samu 51:17 vatulweza ngwavo: “Ove Kalunga, kaweshi kukana muchima wakuhokoka, wakuchikikako.” Kalunga asaka muyoyenga lika mwomwo amizanga chikuma.

   Lingenu Vyuma Vino: Kekesenu vyuma yahanjika Mbimbiliya vize vyasolola nge Yehova amizanga. Chakutalilaho, talenu mukanda wakumikafwa kulilongesa Mbimbiliya wakwamba ngwavo, waPandama kuli Yehova, kapetulu 24.

• ● Lombenu kuli Kalunga.

   Vyuma Yahanjika Mbimbiliya: “Mbilenu kulizakamina chenu chosena hali [Kalunga], mwomwo amizakama.”—WaPetulu 1, 5:7.

   Mwalumbunukila Mazu Kana: Kalunga ali nakusaka mumulwezenga vishinganyeka vyenu vyosena.

   Kalunga nahase kumikafwa mupwenga vakuunda muvishinganyeka nakumihana nangolo mangana mumike. (Wavaka-Fwilipi 4:6, 7, 13) Ngocho Kalunga eji kuzamikisanga vaze veji kumulombanga namuchima wavo wosena.—Samu 55:22.

   Lingenu Vyuma Vino: Lombenunga kuli Kalunga. Zachisenunga lijina lyenyi nakumulweza omu muli nakwivwa. (Samu 83:18) Mulombenu amikafwe mumike.

• ● Shinganyekenunga halutalililo lwakulutwe luze vatufwelelesa muMbimbiliya.

   Vyuma Yahanjika Mbimbiliya: “Elu lutalililo tuli nalwo lunapu nge chikungo chawato chakwimikisa kuyoya chetu, lunapu lwamwenemwene, lwakuzama mbe.”—WavaHepeleu 6:19, kwinyikila chamwishi.

   Mwalumbunukila Mazu Kana: Numba tuhu shimbu jimwe munahase kuhomba, oloze lutalililo vavuluka muMbimbiliya lunahase kumikafwa muzame.

   Lutalililo kana keshi lwakuhumikiza kahako, oloze lwazama hajishiko jize Yehova atushika jakukafumisako kukola.—Kusoloka 21:4.

   Lingenu Vyuma Vino: Linangulenu vyavivulu halutalililo vahanjika muMbimbiliya hakutanga chilongesa 5 chamumbuloshuwa yaMujimbu Wamwaza Wakufuma Kuli Kalunga.

• ● Lingenu vyuma vize mwazanga chikuma.

   Vyuma Yahanjika Mbimbiliya: “Muchima wakuwahilila unapu nge vitumbo vyamwaza.”—Vishimo 17:22.

   Mwalumbunukila Mazu Kana: Kachi nge natulinga vyuma vize twazanga, kaha natupwanga vakuwahilila muvishinganyeka.

   Lingenu Vyuma Vino: Lingenunga vyuma vize mwazanga. Chakutalilaho, munahase kwivwilila kumyaso, chipwe kutanga mijimbu yize yinahase kumikolezeza, chipwe kulinga vyuma vyeka vize mwazanga. Kaha nawa munahase kupwa vakuwahilila chikuma, kachi nge namulingilako vakwenu vyuma vimwe numba vyuma kana navipwa vyavindende.—Vilinga 20:35.

• ● Pwenunga vakulikangula kumujimba.

   Vyuma Yahanjika Mbimbiliya: “Kulilongesa kumujimba cheji kunganyalisanga.”—WaChimoteu 1, 4:8.

   Mwalumbunukila Mazu Kana: Kulinyuka kumujimba, nakusavala lwola lwakutamo, nakulya vakulya vyamwaza cheji kunganyalisanga.

   Lingenu Vyuma Vino: Tambwojokenunga numba vene haminyutu 15.

• ● Anukenu ngwenu omu muli nakwivwa oholyapwa navyuma vyeka vinahase kwalumuka mukuyoya.

   Vyuma Yahanjika Mbimbiliya: “Kamwatachikijile munachipwa kuyoya chenu hameneko.”—WaYakova 4:14.

   Mwalumbunukila Mazu Kana: Kala ukalu uze muli nakumona mukuyoya chenu unahase kukuma kuhakila vene naukalu uze munashinganyeka ngwenu kamweshi kuhasa kuukumisako.

   Numba tuhu ukalu wenu nautohwa ngachilihi, oloze uhase kukuma. Shikaho, fwilenu kuwana jijila jize najimikafwa mumike muukalu wenu. (Wavaka-Kolinde 2, 4:8) Kutwala muze, pamo ukalu wenu unahase kukakuma, oloze nge namulijiha, ukalu wenu kaweshi kukumako.

   Lingenu Vyuma Vino: Tangenunga mijimbu yamuMbimbiliya yize yahanjika havatu vaze vahombele nakusaka kufwa nakumona omu kuyoya chavo chalumukile nakupwa jino kanawa kuhambakana muze vashinganyekele. Talenu havyakutalilaho vino.

 Eyo. Mbimbiliya yatulweza, vatu vamwe vaze vahanjikile ngwavo, “Ngunakusaka kufwa.” Kalunga kavatenukilileko, oloze avakafwile. Ngocho nahase kulinga mwomumwe nakuli yenu.

Elija

•  ● Apwile mutu wakufwana ngachilihi? Apwile kapolofweto wakuhamuka. Naikiye nawa ahombelenga. Kaha mukanda WaYakova 5:17 wamba ngwayo, “Elija evwilenga nganomu tweji kwivwanga nayetu.”

•  ● Mwomwo ika asakile kufwa? Halwola lumwe Elija alivwile kwijiva nge ali ukawenyi, nakwivwa woma chikuma nakulivwa nawa nge wamokomoko. Ngocho alembelelele Yehova ngwenyi: “Ove Yehova ngujihe.”—Vamyangana 1, 19:4.

•  ● Vyuma muka vyamukafwile? Elija alwezele Kalunga ukalu wenyi wosena. Uno Kalunga amukolezezele ngachilihi? Kalunga amuzakamine nakumusolwela omu jazata ngolo jenyi. Kaha nawa, afwelelesele Elija ngwenyi, apwile lika wamulemu kuli ikiye, ngocho amuzakamine nakumuhana mutu wakumukafwa.

•  ▸ Tangenu mujimbu waElija: Vamyangana 1, 19:2-18.

Yopa

•  ● Apwile mutu wakufwana ngachilihi? Apwile lunga waluheto chikuma uze apwile natanga yenyi, kaha nawa apwile muka-kulemesa Kalunga wamuchano.

•  ● Mwomwo ika asakile kufwa? Yopa amwene ukalu waunene chikuma mukuyoya chenyi, uze wasolokelenga mukukasumuna. Atokesele vikumba vyenyi vyosena, kaha nawa, vana venyi vosena vafwile. Ikiye nawa avijile musongo wakutekeleka. Kutwala muze, vamuvangijikilile ngwavo ikiye alingishile numba ukalu amwenenga umusolokele. Chipwe ngocho, Yopa ambile ngwenyi: “Ngunahungu kuyoya chami. Kangweshi nakusaka kuyoya likako.”—Yopa 7:16.

•  ● Vyuma muka vyamukafwile? Yopa alombelenga kuli Kalunga nakulwezako vakwavo omu apwile nakwivwa. (Yopa 10:1-3) Kaha sepa lyenyi Elihu amukolezezele nakumukafwa amone ukalu wenyi mujila yakulihandununako. Chachinenenyi Yopa etavililile kukafwa chakufuma kuli Yehova nakumuhuhumuna.

•  ▸ Tangenu mujimbu waYopa: Yopa 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mose

•  ● Apwile mutu wakufwana ngachilihi? Apwile twamina yavaIsalele, kaha nawa apwile kapolofweto wakushishika.

•  ● Mwomwo ika asakile kufwa? Mose vamuhanyine mulimo waunene chikuma, kaha nawa vamukokojweselenga, ngocho azeyelenga chikuma. Shikaho alwezele Kalunga ngwenyi: “Ngujihe hahano vene.”—Kulava 11:11, 15.

•  ● Vyuma muka vyamukafwile? Mose alwezele Yehova omu evwilenga. Ngocho Kalunga akafwile Mose akeheseko milimo mangana ahone kuhomba chikuma.

•  ▸ Tangenu mujimbu waMose: Kulava 11:4-6, 10-17.