Eyo, mwomwo kukafwa chosena cheji kufumanga kuli “Kalunga uze eji kuvendejekanga vaze vanahombo.”—Wavaka-Kolinde 2, 7:6.

•   Ngolo. Kalunga ‘eji kumivendejekanga’ hakukumbulula kulomba chenu nakumihana ngolo jakumikafwa mumike, keshi hakukumisa ukalu wenu wosenako. (Wavaka-Fwilipi 4:13) Mwatela kufwelela ngwenu Kalunga mwevwilila kukulomba chenu, mwomwo Mbimbiliya yahanjika ngwayo: “Yehova ali hakamwihi navaze vali nakulyonyinga mumuchima. Kaha eji kulwilanga vaze vanahombo.” (Samu 34:18) Kalunga eji kutachikizanga vyuma munakusaka kulomba numba nge munahono kumulumbunwina kanawa omu muli nakwivwa.—Wavaka-Loma 8:26, 27.

•   Vyakutalilaho vyamwaza. Muka-kusoneka Mbimbiliya umwe alombele kuli Kalunga ngwenyi: “Ngweji kukusanyikanga kufuma kwishi yakalungalwiji.” Ou muka-kwimba jisamu ahonesele kuhomba, hakutachikiza ngwenyi Kalunga eji kutukonekelanga hamilonga yetu. Kaha ambile kuli Kalunga nawa ngwenyi: “Kachi nge weji kulamanga jishili, ove Yehova, kachi iya mwemana kumeso ove? Mwomwo ove wapwa umuka-kukonekela, mangana vakwivwenga woma.”—Samu 130:1, 3, 4.

•   Lutalililo. Kalunga eji kutuvendejekanga oholyapwa, kaha kulutwe nawa mwakafumisako ukalu wosena uze weji kutuhombesanga. Omu mwakatesamo lushiko kana, ‘vyuma vyakunyima katweshi kukavyanuka chekako, chipwe kuvivezuka mumichima yetuko.’—Isaya 65:17.

 Nyingililenu: Hakuwana nge twetavila ngwetu Kalunga eji kutukafwanga, ngocho Vinjiho jaYehova navakiko veji kulisakwilanga jila yakuvokilamo musongo wakuhomba. (Mako 2:17) Chipwe ngocho, katweshi kusakwila mutu jila yakumukilamoko, oloze mutu himutu akwechi lisesa lyakulisakwila jila yakumukilamo.