Nduma. Jimanyusikilipiti jakushikulu jasolola nge muMbimbiliya kavalumunamo vyuma vimweko chamokomoko nakuvula chamyaka yize vanungulwilenga mazu kufuma havyuma vize vyalyenyekelenga.

 Makombakaji ajimanyusikilipiti jakushikulu jaMbimbiliya jajivulu vanajiwane. Ngocho jimanyusikilipiti jimwe jasolola vyuma vahengesele vaze vanungulwile mazu. Kaha vyuma vimwe vahengesele kavyalumuna ulumbunwiso uveneko. Chipwe ngocho, vyuma vahengesele vaze vanungulwile mazu, vyasolola nge vaka-kunungulula mazu valingililemo kaha mangana valumuneko vyuma vimwe muMbimbiliya. Tutalenu havyakutalilaho vino vivali:

1.   Hali WaYowano 1, 5:7, mujiMbimbiliya jimwe jamwaka mwatwama mazu akwamba ngwavo: “Mwilu mwatwama, Tata, Lizu, naShipilitu Yajila, kaha evi vitatu vyapwa chuma chimwe.” Oloze jimanyusikilipiti jivene jasolola nge awa mazu kana kawapwile mumikanda yakulivangako. Mazu kana valingile akuhakilako kaha. * Ngocho mazu kana vanawafumisa mujiMbimbiliya jize vali nakwalumuna makumbi ano.

2.   Lijina lyaKalunga lyasoloka mapapa kakavulu mujimanyusikilipiti jakushikulu jaMbimbiliya. Oloze mujiMbimbiliya jajivulu valifumisamo nakulishishisa najivulukiso jakwamba ngwavo “Mwata” chipwe “Kalunga.”

 Makumbi ano, jimanyusikilipiti jajivulu jinatukafwe tuwane vyuma vahengesele vaze vanungulwile mazu, nakwijiva jino mazu apwile mumikanda yakulivanga. * Uno echi chinasolola ngachilihi nge Mbimbiliya yamakumbi ano yapwa yakwoloka?

•   Muka-kulinangula umwe, William H. Green ahanjikile kutalisa kuVisoneka vyachiHepeleu (vize vavuluka nawa ngwavo Tesetamende Yamwaka) ngwenyi: “Chinatemo kwamba ngwetu kakweshi visoneka vyeka vyakushikulu vanungulula mujila yakwoloka nge vinoko.”

•   Mutu umwe alinangula vyaMbimbiliya, F. F. Bruce ahanjikile kutalisa kuVisoneka VyachiHelase vyaVaka-Kulishitu, vize vavuluka nawa ngwavo Tesetamende Yayihya ngwenyi: “Unjiho wakusolola nge Tesetamende Yayihya yapwa yamwenemwene wauvulu chikuma kuhambakana wamikanda yayivulu vasoneka vatu vamwe, kaha unjiho kana naumwe wauchi mwahasa kuuhamika.”

•   Mutu umwe alinangula vyajimanyusikilipiti jakushikulu jaMbimbiliya walijina lyaFrederic Kenyon ambile ngwenyi, mutu “nahase kumbata Mbimbiliya mulivoko lyenyi chakuzeneka woma chipwe kukakasana nakwamba ngwenyi Mbimbiliya chikupu yapwa hiMazu aKalunga amuchano yize yinayovoka hamyaka yayivulu kufuma vene kushikulu.”

•   VaYuleya navaka-kunungulula mazu vanalamenga mijimbu yize yasolola vyuma vyakuhenga valingilenga vatu jaKalunga. * (Kulava 20:12; Samwele 2, 11:2-4; Wavaka-Ngalesha 2:11-14) Chochimwe nawa, mijimbu yimwe yahanjika hakulikanga chavaYuleya, kaha nawa yasolola hatoma jishimbi javatu. (Hozeya 4:2; Malaki 2:8, 9; Mateu 23:8, 9; WaYowano 1, 5:21) Vaka-kunungulula vasolwele hatoma nge mazu aKalunga apwa ajila hakunungulula mijimbu kana mujila yakwoloka.

•   Hakuwana nge Mbimbiliya yafuma kuli Kalunga, ngocho nayilame nakuyilingisa yipwenga lika yakwolokako. * (Isaya 40:8; WaPetulu 1, 1:24, 25) Kasakile kunganyalisa vatu kushikulu kahako, oloze yitunganyalise nayetu makumbi ano. (Wavaka-Kolinde 1, 10:11) Mbimbiliya yamba ngwayo: “Vyuma vyosena vize vasonekele hakavanga vavisonekelele kutunangula etu, mangana kuhichila mukukakachila chetu namukuvendejeka chamuVisoneka tuhase kupwa nalutalililo.”—Wavaka-Loma 15:4.

•   Yesu navaka-kumukavangiza vahanjikilenga mazu amuVisoneka VyachiHepeleu chakuzeneka kulizakamina numba nge mazu kana apwile akwoloka nyi chiku.—Luka 4:16-21; Vilinga 17:1-3.