Achishinganyekenu muli nakumona lunga umwe natwame hamavu, kaha mujimba wenyi wosena uli namahute najimbandu. Lunga kana nalinongamina, nakopama kumahye, natwame ukawenyi kaha nawa keshi nangolo jakuhanga vajiji vaze vali nakuwila hajimbandu jenyiko. Natwame muuto kulumbununa nge ali nakulishona, kaha ali nakulipala nachipanga. Ou lunga kana najimbalisa vyuma vyavivulu, kaha vanalumbilisa. Kaha nawa masepa jenyi, navakwavo muchitungilo, navausoko wenyi vanamumbu nyima. Vanyike nawa vali nakumusekeleka. Ou lunga kana ashinganyekele ngwenyi Yehova Kalunga kenyi namukenyukila, oloze vishinganyeka kana vyapwile vyakuhenga.—Yopa 2:8; 19:18, 22.

Lunga kana apwile Yopa. Kalunga ahanjikile hali ikiye ngwenyi: “Kakweshi mutu weka wakufwana nge ikiye hamavuko.” (Yopa 1:8) Numba tuhu hahichile myaka yayivulu, Yehova amwenenga lika Yopa kupwa lunga wakwoloka chikuma.—Ezekele 14:14, 20.

Kutala nayenu mwajimbalisaho lyehi vikumba tahi? Mujimbu waYopa naumivendejeka chikuma. Naumikafwa mwivwishise ovyo chapwila chachilemu vangamba jaKalunga vakushishika kupwa vakulonga. Vatu veji kupwanga lika vakulonga kachi nge navatwalaho lika kulinga mwaya muchima waKalunga chamokomoko naukalu navamona. Tulinangulenu jino vyavivulu kuli Yopa.

Chasolola nge omu alingile Yopa nafu lyehi, Mose uze apwile lunga wakushishika asonekele mujimbu kutalisa kuli Yopa. Mose kahanjikile kaha havyuma vyasolokele kuli Yopako, oloze vamuhwiminyinyine nawa asoneke vyuma vyasokele mwilu.

Kumaputukilo amujimbu waYopa, vasolola nge Yopa apwile nakuyoya kanawa kaha nawa mukuwahilila. Apwile lunga waluheto chikuma, wakuya fuma kaha nawa vamuvumbikilenga kuvatu vamulifuchi lyaUze lize lyapwilile kunote yaAlavya. Apwilenga namuchima wakuhana kaha nawa azakaminenga vaka-kuhutwa. Yopa napuwenyi vapwile navana 10 kaha nawa apwile nausoko wakukola naYehova. Azachilenga nangolo mangana evwise Yehova kuwaha ngana muze alingilenga Apalahama, naIsaka, naYakova, naYosefwe. Ngana muze valingilenga vakakuluka jenyi, Yopa naikiye azachilenga mulimo waupilishitu hakuhanyinako vana venyi mawana akulumba.—Yopa 1:1-5; 31:16-22.

Oloze nakushimbula chikuma vyuma vyalumukile mukuyoya chaYopa. Tweji kutanganga vyuma vyasolokele mwilu, nakulinangula nawa vyuma vize Yopa katachikijileko. Halwola luze vangelo jaYehova vakushishika valikungulwilile kumeso aKalunga, Satana naikiye ejile. Hakuwana nge Yehova atachikijile ngwenyi Satana alumbilishile lunga wakwoloka Yopa, ngocho Kalunga alwezele Satana ngwenyi, Yopa apwile wakulonga. Oloze Satana amukumbulwile ngwenyi: “Unamono ngwove Yopa akwivwa ove Kalunga woma wanganavene tahi? Uno kawamukingile nakukinga nawa zuvo yenyi navyuma vyosena ali navyoko numba?” Satana ahunga vatu vakulonga. Kachi nge vatu vali nakuzachila Yehova Kalunga namuchima wavo wosena, veji kusololanga hatoma nge Satana katwama nazangiko. Satana ahanjikile ngwenyi, Yopa azachililenga Kalunga mwomwo yavyuma vyamwaza amulingililile. Shikaho Satana ambile ngwenyi, kachi nge Yopa mwajimbalisa vyuma vyosena, kaha mwangula Yehova.—Yopa 1:6-11.

Yopa katachikijile chuma kanako, oloze Yehova atachikijile chikupu ngwenyi, Yopa mwasolola Satana kupwa muka-makuli. Ngocho Yehova etavishile Satana atambule Yopa vyuma vyosena apwile navyo, oloze kamwitavishile kukwata hamujimba wenyiko. Shikaho Satana aputukile kuyanjisa Yopa. Mulikumbi lyangongo Yopa amwene ukalu wakulikavasana. Halikumbi lyolimwe vangombe, navimbulu, namikoko, navangamela jaYopa vosena vafwile, kuhakilako vene natufunga vosena. Kaha kanganda umwe ejile nakulweza Yopa ngwenyi “kakahya kaKalunga” kakiko kanavajihi. Shimbu kanda Yopa akumise kulishona hakufwa chavangamba jenyi nakushinganyeka ngwenyi napu jino chihutu, kwasolokele cheka ukalu weka. Omu vana venyi 10 valikungulwilile muzuvo yandumbwavo wamukulwane kwahuhwile peho yanyamanganda, kaha zuvo yavashiukilile nakuvajiha vosena.—Yopa 1:12-19.

Chikupu vene, chinahase kutukaluhwila kwivwishisa omu apwile nakwivwa Yopa. Yopa apulile uvwalo wenyi, nakuteula jikambu jenyi nakutwama mumavu. Ambile ngwenyi, Kalunga anguhanyine, kaha nangutambula. Chikupu vene, Satana alingishile ukalu kana usoloke nge uli nakufuma kuli Kalunga. Chipwe ngocho, Yopa kangwile Kalunga ngana muze ashinganyekele Satanako. Oloze ambile ngwenyi: “Lijina lyaYehova valyalisenga lika.”—Yopa 1:20-22.

Numba tuhu Satana apwile namatoto, oloze kalitwaminyineko. Ejile cheka kuli Yehova omu vangelo valikungulwile kumeso aKalunga. Kaha Yehova alishile cheka Yopa mwomwo yakulonga chenyi chamokomoko naukalu uze amunehelele Satana. Satana ambile cheka ngwenyi: “Chikova nachikova ndwa. Vyeshovyo ali navyo mutu mwavihana hamwono wenyi. Oloze acholole livoko lyove, ukwate havifuwa vyenyi nahanyama yenyi, tumone numba nge keshi kukwangula hatomako.” Satana ashinganyekele ngwenyi, kachi nge Yopa mwaviza chikuma, kaha mwangula Kalunga. Hakuwana nge Yehova afwelelele chikuma Yopa, ngocho etavishile satana akwate hamujimba wenyi, oloze amulwezele ngwenyi kanda kumujihako.—Yopa 2:1-6.

Nakushimbula chiku, Yopa aputukile kuviza. Achishinganyekenu kupihya evwile pwevo lyaYopa hakufwisa vana venyi 10, nakumona nawa lunga lyenyi ali nakuviza misongo yakufwa nakuyoya. Alishonene chikuma nakulila ngwenyi: “Uchili nakulama lika kulonga chove tahi? Mutukane Kalunga ufwenga.” Mazu kana kavatelele kuwahanjika kuli pwevo lyaYopako. Oloze Yopa ambile ngwenyi, puwenyi ahanjikile mazu kana mwomwo yakulishona chikuma. Chipwe ngocho, Yopa akanyine kwangula Kalunga kaha nawa kahanjikile mazu amapiko.—Yopa 2:7-10.

Kutala mwatachikiza ngwenu mujimbu waYopa wakwata nahali yenu tahi? Tachikizenu ngwenu Satana kavangijikilile kaha Yopako, oloze avangijikilile vatu vosena. Ambile ngwenyi: “Vyeshovyo ali navyo mutu mwavihana hamwono wenyi.” Mujila yikwavo Satana apwile nakwamba ngwenyi, mutu keshi kuhasa kupwa lika wakushishika kuli Kalungako. Satana eji kuhanjikanga ngwenyi vatu kavazanga Kalungako, ngocho vanahase kuseza Kalunga nakufwila kulwila myono yavo. Chapwile kwijiva nge Satana apwile nakwamba ngwenyi, twalizanga etu vavene nganomu apwa ikiye. Uno munahase kumupayisa tahi? Tuvosena tunahase kulinga ngocho. (Vishimo 27:11) Tutalenu jino haukalu weka uze amwene Yopa.

Omu malunga vatatu vaze vavuluka muMbimbiliya ngwavo vapwile masepa jaYopa vevwile ngwavo sepa lyavo ali muukalu, vakatukile nakuya mangana vakavendejeke sepa lyavo. Omu vamumwene hahasuku, kavatachikijile ngwavo ikiyeko. Yopa apwile mumisongo yayinene, kaha chikova chenyi chelavile mwomwo yakuviza. Ngocho kapwile nakusoloka ngana muze asolokelenga hakavangako. Omu ava malunga vatatu, Elifwaze, naMbilitate, naZofwale vamumwene vaputukile kulila namazu akukanguka nakulishikila mavu kumitwe yavo. Vatwamine kwakamwihi naYopa, kaha kavahanjikile lizu numba limweko. Vatwamine haze chalumingo chamuundu chakuhona kuhanjika numba lizu limwe. Katwatela kushinganyeka ngwetu kuhola chavamalunga chapwile nakulumbununa nge vapwile nakuvendejeka Yopa chipwe kulinangula vyuma vimweko, oloze vatachikijile kaha ngwavo Yopa apwile mumisongo.—Yopa 2:11-13; 30:30.

Kutwala muze, Yopa aputukile kuvahanjikisa. Hakuwana nge Yopa apwile nakwivwa kukola chikuma, ngocho angwile likumbi lize asemukile. Kaha nawa asolwele hatoma vyuma vyamulingishilenga ahombe. Ashinganyekele ngwenyi Kalunga ikiye apwile nakumunehela ukalu amwenenga. (Yopa 3:1, 2, 23) Numba tuhu Yopa apwile lika lunga walufwelelo, oloze asakiwile kumuvendejeka. Omu vaze masepa jenyi vaputukile kuhanjika, Yopa amwene ngwenyi kachi valiholelele kwavo.—Yopa 13:5.

Elifwaze uze apwile mukulwane hali vosena kuhakilako naYopa, ikiye aputukile kuhanjika. Kutwala muze, vaze malunga veka vavali navakiko vaputukile kuhanjika. Shikaho tunahase kwamba ngwetu, vakavangijile vyuma vyamokomoko apwile nakuhanjika Elifwaze. Vyuma vimwe vahanjikile vaze malunga vyasolokele nge vyapwile kanawa. Chakutalilaho, vahanjikile ngwavo Kalunga apwa wakulitulaho, eji kuzangamisanga vatu vavilinga vyavipi, kaha nawa eji kufwetanga vatu vilinga vyamwaza. Mazu vahanjikile kumaputukilo asolwele nge kavahanjikile naikiye mujila yalikojiko. Elifwaze ahanjikile ngwenyi, Kalunga apwa wamwaza kaha nawa eji kuzangamisanga vatu vavilinga vyavipi. Shikaho Yopa naikiye vali nakumuzangamisa pamo nalingi vyuma vyavipi.—Yopa 4:1, 7, 8; 5:3-6.

Yopa ketavilile vishinganyeka vyakuhenga vapwile navyo ava malungako. (Yopa 6:25) Ava malunga vatatu vafwelele chikupu ngwavo, Yopa apwile nakulinga shili mukusweka, kahechi chikiko chamulingishile vamuzangamise mujila kana. Elifwaze avangijikilile Yopa ngwenyi, apwile wakazamuzamu, mutu wakuhuka, kaha nawa kevwilenga Kalunga womako. (Yopa 15:4, 7-9, 20-24; 22:6-11) Zofwale alwezele Yopa ngwenyi, echenga kulinga shili. (Yopa 11:2, 3, 14; 20:5, 12, 13) Mbilitate naikiye ahanjikile mazu amapi chikuma. Ahanjikile ngwenyi, vana vaYopa pamo valingile shili, shikaho chapwile chakutamo kufwa mujila kana.—Yopa 8:4, 13.

Ava malunga valingile cheka chuma chachipi chikuma. Kavahanjikile kaha ngwavo, Yopa kapwile wakushishika kuli Kalungako, oloze vambile nawa ngwavo kachapwa chachilemu mutu kupwa wakushishika kuli Kalungako. Mumazu amaputukilo aze ahanjikile Elifwaze, asolola nge amwene mutu wakushipilitu. Kaha mazu amakumishilo ahanjikile Elifwaze kutalisa kuchakumwenesa kana apwile amapi chikuma. Ambile ngwenyi: “Kalunga kafwelela vangamba jenyiko, kaha eji kuwanyinanga vangelo jenyi tutenga.” Mazu kana alumbunwine nge vatu kaveshi kuhasa kwivwisa Kalunga kuwahako. Kutwala muze, Mbilitate naikiye ambile ngwenyi, Kalunga kamwene kulonga chaYopa kupwa chachilemuko ngana muze kamwene kulema chakulonga chalivunuko.—Yopa 4:12-18; 15:15; 22:2, 3; 25:4-6.

Uno mwesekaho lyehi kuvendejeka mutu uze ali nakuhita muukalu waunene tahi? Kachapwa chachashi kuvendejeka mutuko. Oloze tunahase kulinangula vyavivulu kuli masepa jaYopa vamakuli kutalisa kuvyuma vize katwatela kuhanjikako. Numba tuhu vyuma vyosena vize vahanjikile ava malunga vyasolokele nge vyapwile vyamangana, oloze kavamuvendejekeleko kaha nawa kavamuvulukile nahalijina lyenyiko. Hakuwana nge kavevwishishile kukola apwile nakwivwa Yopako, ngocho kavashinganyekele ngwavo vatelelele kumuvendejeka mujila yayivwovuko. * Shikaho kachi nge mutu uze mwazanga nahombo, kaha mwatela kumuvendejeka mujila yamwaza yalikoji. Mwatela kufwila kukafwa mutu kana azamise lufwelelo lwenyi, nakumukafwa afwelele muli Kalunga nakufwelela nawa ngwenyi apwa walikoji, wakeke, kaha nawa wachiyulo. Omu keshi mukiko alingile Yopa kachi nge vaze masepa jenyi vakiko vapwile muukalu uze apwilemo ikiye. (Yopa 16:4, 5) Uno Yopa alingile ngachilihi omu vesekele kulonga chenyi?

Halwola luze masepa jaYopa vaputukile kuhanjika mazu amapi, Yopa apwile hanahombo lyehi. Kufuma vene kumaputukilo Yopa etavilile ngwenyi mazu ahanjikilenga apwile “mazu amapi” kaha nawa “mazu amuka-kukalikiza.” (Yopa 6:3, 26) Tunejiva ovyo ahanjikilile ngocho. Mazu ahanjikile asolwelenga omwo apwile nakwivwa kumuchima wenyi. Kaha nawa asolwelenga nge kevwishishile kanawa ovyo apwile nakuyanjilako. Hakuwana nge ukalu uze wasolokelele Yopa natanga yenyi wejile mukukasumuna kaha nawa mujila yakukomwesa, ngocho ashinganyekele ngwenyi, Yehova ikiye apwile nakumunehelawo. Kwapwile nawa vyuma vyavilemu vize Yopa katachikijileko, ngocho vyuma vimwe vize ashinganyekelenga vyapwile vyakuhenga.

Chipwe ngocho, Yopa apwile lunga walufwelelo chikuma. Lufwelelo lwenyi lwasoloka hatoma muvyuma ahanjikile kuli masepa jenyi vatatu. Avalwezele mazu amuchano, amwaza, kaha nawa aze anahase kutukolezeza nayetu makumbi ano. Omu apwile nakuhanjika havyuma vyakutenga, Yopa alishile Kalunga mujila yize etu vatu katweshi kuhasa kutachikizako chakuzeneka kutukafwa kuli Kalunga. Chakutalilaho, ambile ngwenyi Yehova ikiye atengele ‘mavu aze azezalala halengelenge’ chishina chize vejile nakwitavila vaka-sayasi omu mwahichile myaka yayivulu. * (Yopa 26:7) Omu Yopa apwile nakuhanjika halutalililo lwenyi lwakulutwe, ahanjikile namuchima wakukunyuka ngana muze valingile malunga veka valufwelelo. Shikaho Yopa afwelelele chikupu ngwenyi numba nge mwafwa, Kalunga mwakamwanuka nakukamusangula kulutwe.—Yopa 14:13-15; WavaHepeleu 11:17-19, 35.

Nyi ngachilihi hachihande chakupwa vakulonga? Elifwaze navaze masepa jenyi vavali vambile ngwavo, Kalunga kamona kulonga chamutu kupwa chachilemuko. Uno Yopa etavilile vishinganyeka kana tahi? Nduma. Yopa atachikijile ngwenyi, Kalunga amona kulonga chamutu kupwa chachilemu. Ahanjikile hali Yehova ngwenyi: “Mwamona kulonga chami.” (Yopa 31:6) Yopa amwene ngwenyi, vishinganyeka vyavipi vyavaze vaka-kuvendejeka vamakuli, vyasolwele hatoma nge vyapwile nakweseka kulonga chenyi. Shikaho echi chalingishile Yopa ahanjike mazu amwe aze alingishile vaze malunga vahone vyakuhanjika.

Yopa atachikijile ngwenyi atelele kusolola kulonga chenyi muvyuma alingilenga hakumbi hakumbi. Ngocho alumbunwine vyuma alingilenga mangana apwenga lika wakulonga kuli Kalunga. Chakutalilaho, alihendelenga kukulemesa makombelo, nakusolwela vakwavo likoji nakuvavumbika, nakupwa navilinga vitoma, nakuvumbika ulo wenyi, kaha chuma chachilemunyi atwalileho lika kupwa wakushishika hakuzachila Kalunga wamuchano Yehova. Echi chikiko chalingishile Yopa ahanjike mazu chakufuma kumuchima ngwenyi: “Kangweshi kuseza kulonga chamiko palanga nomu nangufwa.”—Yopa 27:5; 31:1, 2, 9-11, 16-18, 26-28.

Uno nayenu mwamona kulonga kupwa chachilemu ngana muze achimwene Yopa tahi? Yopa kahanjikilenga kaha ngwenyi apwile wakulongako, oloze alingilenga vyuma vize vyasolwele nge amwene kulonga kupwa chachilemu. Tunahase kusololanga ngwetu tweji kuzachilanga Yehova namuchima wetu wosena hakumwononoka nakulinga vyuma vyakwoloka mukuyoya chetu chamokomoko naukalu uze natumona. Nge natulinga vyuma kana, kaha natwivwisa Yehova kuwaha ngana muze alingile Yopa nakwivwisa kupihya muka-kole yenyi Satana. Eyi yikiko jila yamwaza tunahase kulondezezelamo lufwelelo lwaYopa.

Mujimbu waYopa kawakuminyine aha kahako. Kupwa muukalu chalingishile Yopa alimone kupwa mutu wakulonga chikuma nakuhona kuhakwila Kalunga. Shikaho asakiwile kumwolola nakumukafwa amone vyuma nganomu avimona Yehova. Kaha nawa asakiwile kumuvendejeka chikuma omu apwile nakulishona mwomwo yaukalu wamisongo. Vyuma muka alingile Yehova kuli ou mutu walufwelelo wakulonga? Chihande chinakavangizaho nachikumbulula chihula kana.