Vatu vamwe vanahase kushinganyeka ngwavo kwalumuna chakukavangiza lizu hilizu nachikafwa muka-kutanga atachikize ulumbunwiso wapwile mumalimi avene akulivanga. Kakavulu chuma kana kacheshi kuhana ulumbunwiso uveneko, mwomwo yavyuma vino:

• Lilimi hililimi lyalihandununa mukuhanjika, namazu akuzachisa, namwakuhanjikila mikuku yamazu. Lunga umwe uze alinangula chikuma chiHepeleu, S. R. Driver ambile ngwenyi, malimi “kawalihandununa kaha mukuhanjikako, oloze alihandununa namumazu akuzachisa hakuhanjika mikuku.” Lilimi hililimi lyatwama najila yalyo yakuhanjikilamo vyuma. Lunga kana ambile cheka ngwenyi, “ngocho jila navahanjikilamo mukuku mulilimi limwe yalihandununa nomu navahanjikilamo mulilimi likwavo.”

• Mazu amumalimi amakumbi ano najila vawahanjikilamo alihandununa namuze vahanjikilenga malimi vasonekele Mbimbiliya achiHepeleu, nachiAlamayiki, nachiHelase. Ngocho nge Mbimbiliya navayalumuna hakukavangiza lizu hilizu, vatu kaveshi kuyivwako, kaha nawa yinahase kuhana ulumbunwiso wakuhenga.

• Ulumbunwiso walizu chipwe wamazu unahase kulihandununa kweseka nachihande vali nakushimutwila.

Muka-kwalumuna nahase kukavangiza mazu nge muze vawasonekele mumalimi akulivanga hamwe nahamwe, oloze atela kuzangama hakulinga ngocho.

Talenu vyakutalilako evi navisolola omu kukavangiza lizu hilizu chinahase kuhana ulumbunwiso wakuhenga:

•   Visoneka vyazachisa lizu “kusavala” hakuvuluka kusavala tulo nakusavala tulo twakufwa. (Mateu 28:13; Vilinga 7:60) Kachi nge eli lizu vanalizachisa muvisoneka vize vili nakuhanjika hakufwa, kaha vaka-kwalumuna Mbimbiliya vazachisa mazu akufwana nge “kusavala tulo twakufwa,” mangana mutu mwatanga Mbimbiliya ahone kushinganyeka mujila yakuhenga.—Wavaka-Kolinde 1, 7:39; Wavaka-Tesolonyika 1, 4:13; WaPetulu 2, 3:4.

• Mazu azachishile kaposetolo Paulu hali Wavaka-Efwesu 4:14 nge navawalumuna lizu hilizu, vanahase kuwalumuna ngwavo “kuhema mbonjo kuli malunga.” Aka hikashimutwiji kakushikulu kaze kasolola tato yakwonganga vatu hakuhema mbonjo. Mumalimi amavulu, mazu kana nge navawalumuna lizu hilizu kaweshi kulumbunukila kanawa vatuko. Oloze jila yamwaza yize nayihana ulumbunwiso wakwoloka shina kwalumuna ngwavo “tufuta twavatu.”

• Mazu achiHelase vazachisa hali Wavaka-Loma 12:11, kuwalumuna lizu hilizu alumbununa “shipilitu yakusava.” Hanjikiso kana, muLuvale kayeshi kuhana ulumbunwiso uveneko, ngocho muMbimbiliya yino vanayalumuna ngwavo “savenu nashipilitu.”

• MuChihande ChahaPili, Yesu azachishile mazu aze valumuna vavavulu ngwavo, “Vanatokwava vanasuvala mujishipilitu javo.” (Mateu 5:3, Luvale Bible, 1970) Oloze mumalimi amavulu, mukuku kana kawalumbunuka kanawa kuvatuko. Kwalumuna mazu kana hakukavangiza lizu hilizu chinahase kulumbununa nge vaze “vanasuvala mujishipilitu” kavashinganyeka kanawako, chipwe kavatwama nangolo chipwe twimako. Oloze Yesu hano apwile nakunangula vatu ngwenyi kuwahilila chavo kachapendamina hakupwa navyuma vyasakiwa kumijimbako, oloze hakutachikiza nge vasakiwa Kalunga avatwaminyinenga. (Luka 6:20) Ngocho, jila yamwaza yize nayihana ulumbunwiso wakwoloka kweseka namazu amulilimi lyakulivanga shina kwamba nge “vaze vejiva ngwavo vasaka vyuma vyakushipilitu,” chipwe “vaze vejiva ngwavo vasakiwa Kalunga avatwaminyine.”—Mateu 5:3; The New Testament in Modern English.

• Muvisoneka vyavivulu, lizu lyachiHepeleu lize valumuna ngwavo “lisungu,” likwechi ulumbunwiso woumwe namuLuvale. Lyalumbununa kupihilila napwevo chipwe nalunga lyamutu uze nahono kushishika, kaha lyalumbununa nawa kwivwila mutu lushiushiu haluheto lwenyi. (Vishimo 6:34; Isaya 11:13) Oloze lizu lyachiHepeleu lyolimwe lyatwama naulumbunwiso ukwavo nawa. Chakutalilaho,  linahase kutalisa ‘kutwima’ chipwe kumuchima atwama nawo Yehova wakufwila kukinga vangamba jenyi, chipwe ‘wakusaka vatu valihanenga kuli ikiye namichima yavo yosena.’ (Kulovoka 34:14; Vamyangana 2, 19:31; Ezekele 5:13; Zekaliya 8:2) Linahase kutalisa nawa ‘kutwima’ yize vatwama nayo vangamba jaKalunga yakumuzachila nakumulemesa, chipwe ‘yakulihana kuli ikiye namuchima wosena.’—Samu 69:9; 119:139; Kulava 25:11.

• Lizu lyachiHepeleu lize vazachisa kutalisa kulivoko lyamutu, lyatwama naulumbunwiso wauvulu. Vanahase kulyalumuna ngwavo “wangana,” “likoji,” chipwe “ngolo,” kweseka navyuma vali nakuhanjika. (Samwele 2, 8:3; Vamyangana 1, 10:13; Vishimo 18:21) Lizu kaneli vanalyalumuna mujijila jakulisezaseza muMbimbiliya yaVisoneka vyaKaye Kakahya.

Kweseka navyuma evi tunashimutwila, kwalumuna Mbimbiliya chatwama namulimo, keshi nge kwalumuna kaha mazu amumalimi akulivanga mujila yoyimweko. Muka-kwalumuna atela kupezalisa kanawa vyuma nakusakula mazu amulilimi lyenyi aze nawahana ulumbunwiso wamulilimi lyakulivanga. Atela nawa kusoneka mikuku kweseka najishimbi jakusokelamo lilimi lyenyi, mangana chipwenga chachashi kutanga vyuma nalumuna.

Kaha nawa muka-kwalumuna katela kusoneka mikuku yamazu kweseka nomu nashinganyekako. Nge muka-kwalumuna mwalumbununa mukavatu Mbimbiliya kweseka nomu nashinganyeka, kaha nahase kutangisa ulumbunwiso uli muMbimbiliya. Mujila muka? Muka-kwalumuna nahase kuhakilako vishinganyeka vyenyi vize kavyeshi mumazu amulilimi lyakulivangako, chipwe kusezaho vishina vimwe vyavilemu. Numba tuhu Mbimbiliya vanalumbununa mukavatu yinahase kupwa yayashi kuyitanga, oloze kwalumuna mujila kaneyi nachilingisa muka-kutanga ahone kutachikiza muchano uvene wapwile mumazu amulilimi lyakulivanga.

Kunangula chamakuli chinahase kuhungumwisa nawa muka-kwalumuna. Chakutalilaho, hali Mateu 7:13 vamba ngwavo: “Jila yakuhweka [yili] nakutwala kukunonga.” Vaka-kwalumuna vamwe, vaze pamo vahungumwisa nakunangula chamakuli vazachisa lizu “helo,” muchishishisa chalizu lyachiHelase lize lyalumbununa “kunonga.”

Muka-kwalumuna Mbimbiliya atela kutachikiza ngwenyi Mbimbiliya vayisonekele mulilimi lyalyashi kwivwa lize vahanjikilenga vatu hakumbi hakumbi, vatu vakufwana nge vanjimi, natufunga, navaka-kuta ishi. (Nehemiya 8:8, 12; Vilinga 4:13) Ngocho Mbimbiliya yize vanalumuna kanawa yatela kupwa yayashi kwivwa kuvatu vaze vali  nakusaka kulinangula chamokomoko nokwo vafuma. Atela kuzachisa mazu awenyembo, amashi kwivwa, kuhambakana kuzachisa mazu aze kavazachisa kuvatuko.

Vaka-kwalumuna jiMbimbiliya vavavulu vanafumisa lijina lyaKalunga, Yehova mujiMbimbiliya jamakumbi ano, numba tuhu mujimanyusikilipiti jakushikulu jaMbimbiliya lijina kana mulyapwilenga. (Tala Chihande Chakuhakilako A4.) MujiMbimbiliya jajivulu, lijina lyaKalunga valishishisa navulukiso yakwamba ngwavo “Mwata,” kaha jeka jasolola nge Kalunga katwama nalijinako. Chakutalilaho, mujiMbimbiliya jimwe mazu akulomba chaYesu aze vasoneka hali Yowano 17:26, vawalumuna ngwavo: “Ngunakujimbula kuli vakiko,” kaha hali Yowano 17:6 ngwavo, “Ngunakusolola lyehi kuli vaze wanguhanyine.” Oloze jila yakwoloka yakwalumwinamo kulomba chaYesu shina: “Ami ngunalingisa lijina lyove valitachikize,” kaha nawa ngwenyi, “Ami ngunajimbula lyehi lijina lyove kuvatu ava wanguhanyine.”

Mumazu akujimbula amuMbimbiliya yaVisoneka vyaKaye Kakahya yaChingeleshi yakulivanga vambile ngwavo: “Katwalumbunwine mukavatu Visonekako. Tuneseka chikupu kukavangiza mazu amumalimi akulivanga hakwalumuna, kachi nge mazu kana akwechi ulumbunwiso wakutamo muChingeleshi, kaha nawa nge kukavangiza mazu kana kachatangishile muchanoko.” Ngocho, Komiti yaKwalumuna Mbimbiliya yaVisoneka vyaKaye Kakahya yinapezalisa kanawa vyuma mangana yizachise mazu aze nawahana ulumbunwiso wamumalimi akulivanga, nakuzeneka nawa kusoneka mikuku yamazu yayikalu kutanga, chipwe yize nayisweka muchanoko. Echi nachilingisa muka-kutanga atange kanawa Mbimbiliya, nakufwelela ngwenyi mazu ayo vahwima vanawalumuna kanawa mukwoloka.—Wavaka-Tesolonyika 1, 2:13.