A C E F H I J K L M N P S T U V W Y Z

A

• Aja.

  MuVisoneka VyachiHelase vyaVaka-Kulishitu, yapwa lijina lyangalila yavaLoma yize yawezelako nachihanda chakumulauko chalifuchi vavuluka makumbi ano ngwavo Turkey, namatungu amwe akungenge yakalungalwiji akufwana nge Samose naPatamu. Efwesu yikiko yapwile nganda yaAja. (Vil 20:16; Kus 1:4)—Tala Chihande B13.

• Akaya.

  MuVisoneka VyachiHelase vyaVaka-Kulishitu, yapwile ngalila yavaLoma yakusulo yaHelase yize yapwile nanganda yayo Kolinde. MuAkaya mwapwile nangalila yosena yaPeloponese nangalila yayinene yaHelase. (Vil 18:12)—Tala Chihande B13.

• Alafwa naOmenga.

  Alafwa hisona watete, kaha Omenga hisona wamakumishilo muvasopelo vachiHelase. Kaha vawazachisa mapapa katatu mumukanda waKusoloka kupwa vulukiso yaKalunga. Muvisoneka kanevi, mazu kana alumbununa ‘wakulivanga, wakukuminyina,’ ‘maputukilo, makumishilo.’—Kus 1:8; 21:6; 22:13.

• Alamangetone.

  Lizu kana lyafuma kulizu lyachiHepeleu Har Meghid·dohnʹ, lize lyalumbununa “Pili yaMengito.” Eli lizu kana valipandamisa “kujita yahalikumbi lyalinene lyaKalunga Wangolo Josena” lize “vamyangana vahamavu hosena” navakalikungulwila hamwe nakulwa jita naYehova. (Kus 16:14, 16; 19:11-21)—Tala LUYANDO LWALUNENE.

• Alamayiki.

  Lilimi lyakulifwana nachiHepeleu, lize lyazachisa vasopelo vovamwe. Hakavanga valihanjikilenga kuli vaAlame, oloze lyapwile jino lilimi vazachishilenga chikuma muwangana waAsulya naMbavilone. Lyapwile nawa lilimi vetavishile kuzachisa muWangana wavaPeleja. (Eza 4:7) Tupetulu vamwe vaEzela, naYelemiya, naNdanyele vavasonekele muchiAlamayiki.—Eza 4:8–6:18; 7:12-26; Yel 10:11; Nda 2:4b–7:28.

• Alambashite.

  Lyapwa lijina lyasaji yayindende yamaji. Eyi saji yamaji yapwile yalilolwa lyakutota kumalolwa akwakamwihi naAlambashitone muEjipitu. Saji kana yapwile yakunyengetela kushingo mangana chipwenga chachashi kufwikako kuchina maji nawahita. Lilolwa lize vatotele nalikiko valivulukilenga ngwavo alambashite.—Mak 14:3.

• Alame; vaAlame.

  Vaka-tanga yaAlame mwanaSheme vaze vatwaminenga mungalila jaJipili jaLevanone namusali yaMesopotamya nakuJipili jaTalause kunote swi nakuNdamashiku nakuvihela vyakwakusuku kusulo. Eyi ngalila yosena vayivulukilenga muchiHepeleu ngwavo Alame, kaha kutwala muze vayivulukilenga ngwavo Sulya. Kaha vatu vatwaminengamo vavavulukilenga ngwavo vaSulya.—Kup 25:20; Lus 26:5; Hoz 12:12.

• Alamote.

  Hilizu lyavaka-kwimba myaso lize lyalumbununa ngwavo “Vana vaMapwevo,” kaha lyatalisa pamo kumazu akutezuka avana vamapwevo. Lizu kana valizachishilenga mangana vasolole nge mwaso vatelele kuwimba nachivumo chakutezuka.—1Mi 15:20; Ji 46:Maz.

• Amene.

  “Chipwenga vene ngocho.” Eli lizu lyafuma kulizu lyachiHepeleu ʼa·manʹ, lize lyalumbununa “kushishika, kufwelela.” Lizu “Amene” valihanjikilenga hakulikasa chivwasano, nahakulomba, nahakushika chuma. Mumukanda waKusoloka, “Amene” yapwa vulukiso yaYesu.—Lus 27:26; 1Mi 16:36; Kus 3:14.

• Aselengeya.—

  Tala VILINGA VYAKUZUNGUMA.

• Ashatolete.

  Apwa kalunga kavaKanane wapwevo, kalunga wajita nalusemo, kaha nawa pwevo lyaMbale.—1Sa 7:3.

• Atale.

  Lijina lyakakweji wakusokesa 12 wavaYuleya wakalenda yajila, kaha nawa hilijina lyakakweji wakusokesa 6 wakalenda yavaka-mafuchi eka, lize vazachishilenga vatu omu vafumine muufunge muMbavilone. Lwola kana lwaputukile hakachi kakakweji waFebruary nakuheta hakachi kakakweji waMarch. (Ese 3:7)—Tala Chihande B15.

• Ave.

  Lijina lyakakweji wamuchitanu wavaYuleya wakalenda yajila, kaha nawa hilijina lyakakweji wakusokesa 11 wakalenda yavaka-mafuchi eka, lize vazachishilenga vatu omu vafumine muufunge muMbavilone. Lwola kana lwaputukile hakachi kakakweji waJuly nakuheta hakachi kakakweji waAugust. Lijina kana kavalivuluka muMbimbiliyako, oloze valivuluka kaha ngwavo “kakweji wamuchitanu.” (Kla 33:38; Eza 7:9)—Tala Chihande B15.

• Avive.

  Lijina lyatete lyakakweji wakulivanga wavaYuleya wakalenda yajila, kaha nawa hilijina lyakakweji wakusokesa 7 wakalenda yavaka-mafuchi eka. Lijina kana lyalumbununa “Mitwe yaManona aUvisu,” kaha lwola kana lwaputukile hakachi kakakweji waMarch nakuheta hakachi kakakweji waApril. Omu vaYuleya vafumine muMbavilone, kakweji kana vamuvulukilenga ngwavo Nyisane. (Lus 16:1)—Tala Chihande B15.

• Azazele.

  Lizu lyachiHepeleu lize lyalumbununa ngwavo “Pembe Uze Nalelangana.” HaLikumbi lyaKulinga chaKufwika haShili, pembe uze vasakwilile Azazele vamusuwile ayenga mupambo. Echi chapwile chinjikizo chakusolola nge ambachile jishili javatu jamwaka unakumu.—Lev 16:8, 10.

C

• Chakufwika hashili.

  MuVisoneka VyachiHepeleu, eyi hanjikiso kana vayipandamisa kukuhana vimuna vakuvatula vaze vatu vahanyinenga mangana vapandame kuli Kalunga nakumulemesa. MuJishimbi jaMose, vatu vahanyinenga vimuna vakuvatula haLikumbi lyaKulinga chaKufwika haShili mumwaka mangana vavawanyise naKalunga chamokomoko najishili valingilenga vatu chipwe lifuchi lyosena. Vaze vimuna vakuvatula venyikilile kuwana waYesu uze ahanyine mangana afwike hajishili javatu kamwe kaha kunahu. Echi chakafwile vatu vavawanyise naYehova.—Lev 5:10; 23:28; Kol 1:20; Hep 9:12.

•  Chifwiko chakufwika hashili.

  Chifwiko chakuchikasha chalushiko, kuze kapilishitu wakulitulaho asapwililenga manyinga amawana akufwika hashili haLikumbi lyaKufwika haShili. Eli lizu lyachiHepeleu lyafuma kulizu lize lyalumbununa “kufwika (shili)” chipwe “kujimbangana (shili).” Chifwiko kana chapwile chaulu, kaha kujisongo jacho jivali valamikileko vakeluve vavali. Hamwe nahamwe vachivuluka kaha ngwavo “chifwiko.” (Klo 25:17-22; 1Mi 28:11; Hep 9:5)—Tala Chihande B5.

• Chihela chajila.

  Chihela chize vasakwile chakulemesela Kalunga. Kakavulu chatalishile kutavanaku chipwe kutembele muYelusalema. Mazu kana atalisa nawa mwilu muze atwama Kalunga.—Klo 15:17; 1Mi 22:19; Kus 15:8.

• Chihela chakulunduka.

  Chihela chakulemesela chize chapwililile hakaumbu, hapili chipwe hautenda vatungile vatu. Numba tuhu vihela vyakulunduka shimbu jimwe vavizachishile kukulemesa Kalunga, oloze kakavulu vavipandamisa kukulemesa tulunga vamakuli vavaka-mafuchi eka.—Kla 33:52; 1My 3:2; Yel 19:5.

• Chijikilo.

  Chuma chize muka-kulevana ahanyine kuli muka-kumulevanyisa chakumufwelelesa nge mwakakindulwisa vyuma nalevana. MuJishimbi jaMose mwapwile jindongi jakutalisa kuchijikilo mangana jikinge vaka-kuhutwa mulifuchi navaze vazenekele wakuvakafwa.—Klo 22:26; Eze 18:7.

• Chijiva chakakahya.

  Chihela chachifwanyisa chize “chakwata kakahya nasulufulu,” kaha vachivuluka nawa ngwavo “kufwa chamuchivali.” Vaka-shili vaze vakana kupihilila nakwalumuka, naLiyavolo, nakufwa naFuka (chipwe Hetese), navakavambila muchijiva kana. Hakwamba ngwavo navakambilamo Liyavolo, nakufwa, naHetese, vyuma vize kavyeshi kuhasa kuwema nakakahyako, chasolola hatoma nge chijiva kana chapwa kaha chachifwanyisa. Kachemanyinako kuyekelesa vatu mukakahya haya myaka yosenako nduma, oloze chemanyinako kunongesa chahaya myaka yosena.—Kus 19:20; 20:14, 15; 21:8.

• Chikamwino chavinyo.

  Mena avali akutota mumalolwa, umwe wapwilile helu, ukwavo heshi, kaha vatotele kapila kakunungasana mena kana. Omu valyatangilile mihako yamivinyo muwina wahelu, mwemwe yamihako kana yahingunukililenga muwina waheshi. Lizu kana valizachisa nawa muchifwanyisa kwinyikilako kusopesa chaKalunga.—Isa 5:2; Kus 19:15.

• Chikapa vanatanduula minwe.

  Chipimo chakusuhwa kufuma kumunwe washina nakuheta kumunwe wakusongo wakulivoko nge nayitanduula. Chikapa kana chapwile jisendimita 22.2 hakuchilava kuzachisa kuvite yajisendimita 44.5. (Klo 28:16; 1Sa 17:4)—Tala Chihande B14.

• Chikapa.

  Chipapa chalilambu, chipwe chipapa vatungile navyuma vyakufwana nge wama watunyama, chipwe mateve, chipwe mangona. Hakachi kachikapa hakiko vahakilenga chakwashisa, kakavulu lilolwa. Songo yachikapa yimwe vayikashililile kulivoko, kaha songo yikwavo vayikwachile mulivoko. Kaha hakwasa, vahwingishile chize chikapa nakutusula songo yachikapa yize vakwachile mulivoko. Mafuchi akushikulu azachishilenga vikapa kujita.—Kuy 20:16; 1Sa 17:50.

• Chikasha chalushiko.

  Echi hichikasha chamutondo wamukesha chize vashilile ulu. Chikasha kana vachilaminyinenga muze Mwajila Chikuma mutavanaku, kaha kufumaho vachihakile muze Mwajila Chikuma mutembele yize atungile Solomone. Chapwile nachifwiko chaulu chize chapwile navakeluve vavali vaze valitalile. Mukachi mwapwile malolwa avali aJishimbi Likumi. (Lus 31:26; 1My 6:19; Hep 9:4)—Tala Chihande B5 na B8.

• Chikeleyi.

  Lihina lyakukalambata lize vatongelenga jinjeke najingonga jakukwachila mbuto jamanona. Chikeleyi vachitungilenga namangona alauluka avapembe, kaha nawa wapwile uvwalo uze vavwalilenga vatu hakulishona.—Kup 37:34; Luk 10:13.

• Chikukulwishi chakatwamino kamyaka.

  Lwola lwakutwala kukukuma chakatwamino kamyaka, chipwe kukukuma chavilinga vyamukuyoya chavatu vayula kuli Satana. Lwola kana lwatambukila hamwe nalwola lwakupwako chaKulishitu. Yesu mwakalweza vangelo “vakahandunune vaka-kuhuka kuli vaka-kwoloka” nakuvanongesa. (Mat 13:40-42, 49) Tumbaji twaYesu vasakile kutachikiza lwola kanelu ‘lwachikukulwishi.’ (Mat 24:3) Shimbu kanda Yesu akinduluke mwilu, alwezele vaka-kumukavangiza ngwenyi mwapwanga navo palanga nakulwola kanelu.—Mat 28:20.

• Chikungulwilo.

  Lizavu lyavatu vaze vanalikungulwila hamwe mangana valinge chuma chimwe, chipwe vazate mulimo umwe. MuVisoneka VyachiHepeleu, lizu kana lyatalisa kumuyachi wavaIsalele. Kaha muVisoneka VyachiHelase vyaVaka-Kulishitu, lyatalisa kuchikungulwilo hichikungulwilo chavaka-Kulishitu, oloze kakavulunyi lyatalisa kuvikungulwilo vyaVaka-Kulishitu vyosena.​—1My 8:22; Vil 9:31; Lom 16:5.

• Chilolo.

  Lunga uze apwile nachihela chaheshi hakumwesekesa kuli satalape mufulumende yaMbavilone. MuMbimbiliya, vilolo vapwile nangolo hali vaka-mangana kuchipango chakusopela muMbavilone. Kaha nawa vilolo muvapwilenga namuchiyulo chaNdaliu mwangana wavaMete.—Nda 2:48; 6:7.

• Chimbalwila.

  Vyuma vize vahakilenga kumuunga chipwe kuvyuma vyameya mangana visave nakufutunuka. Chikumanyi chapwile chihanda chamuunga wakufutunuka vaseleho kufuma kumuunga ukwavo. MuMbimbiliya lizu kana lyemanyinako shili chipwe kupola, kaha valizachisa nawa kutalisa kuchuma chize chili nakukola chakuzeneka vatu kuchitachikiza.—Klo 12:20; Mat 13:33; Nga 5:9.

• Chimbumbe chakwanukila.

  Chihela chize veji kufundanga mujimba wamufu. Eli lyapwa hilizu lyachiHelase mne·meiʹon lize lyafuma kulizu “kwanukisa,” kusolola nge mutu uze nafu veji kumwanukanga.—Yow 5:28, 29.

• Chinjikizo.

  Chuma chipwe chinyikilo chakutachikijilaho vyuma vyoholyapwa chipwe vyakulutwe.—Kup 9:12, 13; 2My 20:9; Mat 24:3; Kus 1:1.

• Chipango.

  Chihela chakutavanaku chize vashichile chipato jingulwishi ndo, kutwala muze chapwile hichihela chakutembele chize vajingilikile kembwe jingulwishi ndo. Lijiko lyakulumbila mawana valitungile muchipango chatavanaku, namuchipango chatembele chamukachi. (Tala Chihande B5, B8, na B11.)  Mbimbiliya yavuluka nawa navipango vize vyapwilenga kujizuvo javatu nakujizuvo javamyangana.—Klo 8:13; 27:9; 1My 7:12; Ese 4:11; Mat 26:3.

• Chipwiko chahatulo.

  Chuma avwalilenga kapilishitu wamulemu wavaIsalele hatulo yenyi omu engililenga muze Mwajila. Vachivulukilenga ngwavo “chipwiko chakusopesa chahatulo” mwomwo chapwilenga naUlime naTumime, vize vazachishilenga hakusolola kusopesa chaYehova. (Klo 28:15-30)—Tala Chihande B5.

• Chishimo.

  Mazu amangana, chipwe mujimbu wawihi uze naunangula mutu, chipwe kulumbununa muchano mukavatu. Chishimo chamuMbimbiliya chinahase kupwa ndangwishi chipwe kashimutwiji. Chishimo cheji kupwanga namuchano vanahanjika namazu amashi, kakavulu vazachisa vifwanyisa. Jihanjikiso jimwe vajizachishilenga chikuma hakutoleka chipwe kusaula vatu vamwe.—Kwa 12:9; 2Pe 2:22.

• Chisoneka (Visoneka).

  Mazu ajila vasoneka muMazu aKalunga. Lizu kana lyatwama kaha muVisoneka VyachiHelase vyaVaka-Kulishitu.—Luk 24:27; 2Ch 3:16.

• Chitondo chakuyanjishila.

  Vulukiso yakufuma kulizu lyachiHelase stau·rosʹ, kulumbununa chitondo chakwimika, chakufwana nge chize vasukikilile Yesu. Kakweshi unjiho wakusolola nge lizu lyachiHelase lyalumbununa kulusuko, nge yize vazachishilenga vaka-mafuchi eka kupwa chifwanyisa chamukwitava shimbu kanda Kulishitu asemuke. “Chitondo chakuyanjishila” hivulukiso yize yasolola ulumbunwiso uvene walizu lyachiHelase, mwomwo Yesu naikiye azachishile lizu stau·rosʹ hakulumbununa kuyanda nasonyi navakevwa vaka-kumukavangiza. (Mat 16:24; Hep 12:2)​—Tala CHITONDO.

• Chitondo.

  Chitondo chakwimika chize vasukikilengako vatu. Mumafuchi amwe, mutu chipwe chivimbi vamusukikile kuchitondo mangana chipwenga chakutalilaho kuvatu, chipwe kumusawisa kuvatu. VaAsulya vaze valwilenga jijita jajipi, vajihilenga vafunge hakuvasukika kuvitondo. Vavatuvilenga vitondo mumajimo vize vyalovokelele mumahye. Oloze kweseka najishimbi javaYuleya, vatu vaze vawanyine namilonga yayinene yakufwana nge kuhanjika mazu akusaula chipwe kulemesa makombelo, chatete vavajihilenga hakuvasa malolwa chipwe kuzachisa jila yeka. Kaha mijimba yavo vayisukikilenga havitondo mangana chipwenga chakutalilaho kuvatu. (Lus 21:22, 23; 2Sa 21:6, 9) Lwola lumwe, vaLoma vakashilililenga mutu kuchitondo, kahomu mwahichile makumbi mutu kana afwile mwomwo yakwivwa kukola, nalipwila, nazala, namusana. Hamwe nahamwe, nge muze chapwile kuli Yesu, vapapalilenga mavoko namahinji amutu kuchitondo. (Luk 24:20; Yow 19:14-16; 20:25; Vil 2:23, 36)​—Tala CHITONDO CHAKUYANJISHILA.

• Chitwamo chaKusopela.

  Utenda wakuzandama vatungile haweluka uze vanyinyinenga najindondelo, uze vatwaminenga vaka-kuyula mangana valweze mazavu avatu omu vanayulu. Hanjikiso yakwamba ngwavo “chitwamo chaKalunga chakusopela,” “chitwamo chaKulishitu chakusopela,” vyemanyinako jila alongesa Yehova yakusopesa vatu.—Lom 14:10; 2Ko 5:10; Yow 19:13.

• Chivwasano.—

  Tala LUSHIKO.

• Chiwanyino chaJimbolo Jakuzeneka Chimbalwila.

  Chiwanyino chakulivanga haviwanyino vyavinene vitatu vyavaIsalele vize valingilenga mumwaka. Chiwanyino kana chaputukilenga halikumbi lyakusokesa 15, halikumbi lyakavangijile Paseka, kaha chambachile makumbi 7. Valilenga kaha mbolo yakuzeneka chimbalwila mangana vanukenga likumbi valovokele muEjipitu.—Klo 23:15; Mak 14:1.

• Chiwanyino chaKukunjika Tembele.

  Lyapwile likumbi valikungulwilenga hamwaka kamwe mangana vatomese tembele omu valingile hivanayipihisa lyehi kuli Antiochus Epiphanes. Chiwanyino kana chaputukile halikumbi lyakusokesa 25 mukakweji waKishileve, kaha chambachile makumbi 8.—Yow 10:22.

• Chiwanyino chaKwaha; Chiwanyino chaVyalumingo.—

  Tala PENDEKOSETA.

• Chiwanyino chaVisakila.

  Vachivuluka nawa ngwavo Chiwanyino chaJitavanaku, chipwe Chiwanyino chaKukungulula Jimbuto. Chiwanyino kana chapwilengako halikumbi lyakusokesa 15 nakuheta ku 21 mukakweji waEtanyime. VaIsalele valingilenga chiwanyino chakwaha kusongo yamwaka, lwapwile nawa lwola lwakuwahilila nakumusakwilila Yehova hakuvakisula hajimbuto avahanyine. Hamakumbi valingilenga chiwanyino, vatu vatwamine muvisakila, chipwe mutupundo mangana vanuke omu valovokele muEjipitu. Echi chapwile chiwanyino chimwe haviwanyino vitatu vize malunga vasakiwilenga kuya kuYelusalema nakulingilako chiwanyino.—Lev 23:34; Eza 3:4.

E

• Echopa.

  Lifuchi lyakushikulu lize lyapwililile kusulo yaEjipitu. Ngiza yalyo yambachile chimbwa chachinene chakusulo yalifuchi lyaEjipitu yamakumbi ano, nachimbwa chakunote yalifuchi lyaSundane. Lizu kana shimbu jimwe veji kulizachisanga hakuvuluka kaHepeleu “Kushe.”—Ese 1:1.

• Efwalime.

  Lijina lyamwanaYosefwe wamuchivali. Kutwala muze lijina kana valilukile muyachi umwe hamiyachi yavaIsalele. Omu yalihandunwine miyachi yavaIsalele, eli lijina Efwalime lyemanyinyineko wangana wosena wamiyachi likumi.—Kup 41:52; Yel 7:15.

• Elule.

  Lijina lyakakweji wakusokesa 6 wavaYuleya wakalenda yajila, kaha nawa hilijina lyakakweji wakusokesa 12 wakalenda yavaka-mafuchi eka, lize vazachishilenga vatu omu vafumine muufunge muMbavilone. Lwola kana lwaputukile hakachi kakakweji waAugust nakuheta hakachi kakakweji waSeptember. (Neh 6:15)—Tala Chihande B15.

• Etanyime.

  Lijina lyakakweji wakusokesa 7 wavaYuleya wakalenda yajila, kaha nawa hilijina lyakakweji wakulivanga wakalenda yavaka-mafuchi eka. Lwola kana lwaputukile hakachi kakakweji waSeptember nakuheta hakachi kakakweji waOctober. Omu vaYuleya vakindulukile kufuma kuMbavilone, kakweji kana vamuvulukilenga ngwavo Tishili. (1My 8:2)—Tala Chihande B15.

• Etome.

  Lijina likwavo valukile Esau, mwanaIsaka. Vana vaEsau (Etome) vatambwile ngalila yaSeile, ngalila yajipili yize yapwilile hakachi kaKalungalwiji waKufwa naChijiva chaAkava. Ngalila kana vayivulukilenga jino ngwavo Etome. (Kup 25:30; 36:8)—Tala Chihande B3 na B4.

 F

• Fuka.

  Kachi nge eli lizu vanalisoneka muvasona vavandende, kaha lili nakutalisa kuchimbumbe. Oloze nge sona wakulivanga vanamutohwesa, kaha lizu kana lili nakutalisa kufuka yavatu vosena, yize yikwechi ulumbunwiso umwe nalizu lyachiHepeleu “Sheyole” nalizu lyachiHelase “Hetese.” Lizu kana valilumbununa muMbimbiliya kupwa kuchihela chachifwanyisa kuze kakweshi milimo chipwe kushinganyekako.—Kup 47:30; Kwa 9:10; Vil 2:31.

• Fwalo.

  Vulukiso yavamyangana javaEjipitu. MuMbimbiliya vavulukamo vafwalo vatanu (Shishake, naSo, naChilihaka, naNeko, naHofwola), oloze veka kavavavuluka majinako, kuhakilako navamyangana vaze vazachililenga hamwe naApalahama, naMose, naYosefwe.—Klo 15:4; Lom 9:17.

• Fwatome.

  Chipimo chakupimisa kukunama chameya. Chipimo kana chapwile jimita 1.8. (Vil 27:28)—Tala Chihande B14.

• Fwilishite; VaFwilishite.

  Yapwa ngalila yakuchikulo kusulo yaIsalele yize vavulukilenga jino ngwavo Fwilishite. Kaha matunduke vakuKelete vaze vatwaminenga kuze vavavulukile ngwavo vaFwilishite. Ndavichi avafungulwile, oloze vachipwile nakuliyula vavene, kaha vapwilenga lika vaka-kole javaIsalele. (Klo 13:17; 1Sa 17:4; Amo 9:7)—Tala Chihande B4.

H

• Helase.

  Lyapwa lilimi vahanjika vatu vamuHelase. Omu mukiko nawa vavulukilenga mutu wamuHelase chipwe uze akwechi tanga yenyi yafumine mulifuchi kana. MuVisoneka VyachiHelase vyaVaka-Kulishitu, lizu kana valizachisa mujijila jajivulu, lyatalisa kuvatu vosena vaze kavapwile vaYuleyako chipwe vaze valinangwile lilimi lyachiHelase nachisemwa chavo.—Ywe 3:6; Yow 12:20.

• Helemese.

  Apwa kalunga kavaHelase, mwanaZeuse. Vatu muLusutala vamwene ngwavo Paulu ikiye Helemese, kalunga kavo uze apwa muluwa watulunga twavo, kaha nawa kalunga wakuhanjika nakukunyula.—Vil 14:12.

• Helote.

  Lijina vahanyinenga mutu wamutanga yawangana uze wayulilenga vaYuleya hakumutongola kuli vaLoma. Watete apwile Helote Wamunene uze afumakana mwomwo yakutungulula tembele muYelusalema nakuhana lushimbi lwakujiha vana vavandende mangana vajihe naYesu. (Mat 2:16; Luk 1:5) Helote Alekelau naHelote Andepa vaze vapwile vana vaHelote Wamunene vavasakwile vatwaminyine jingalila jimwe muwangana wasevo. (Mat 2:22) Andepa apwile nguvulu, kaha vamuvulukilenga kakavulu ngwavo “mwangana.” Andepa ikiye ayulilenga halwola Kulishitu azachilenga mulimo wenyi hamyaka yitatu nachimbwa, swi nakulwola lwamijimbu yatwama mumukanda waVilinga kapetulu 12. (Mak 6:14-17; Luk 3:1, 19, 20; 13:31, 32; 23:6-15; Vil 4:27; 13:1) Kufumaho, Helote Angalipa I, muzukulu lyaHelote Wamunene, ayulile kaha katando kakandende, kaha vamujihile kuli kangelo kaKalunga. (Vil 12:1-6, 18-23) Mwanenyi Helote Angalipa II amuswanyine, kaha ayulile kuheta nakulwola valikangile vaYuleya kuli vaLoma.—Vil 23:35; 25:13, 22-27; 26:1, 2, 19-32.

• Hepeleu.

  Vulukiso vahanyine chatete Apalama (Apalahama), mangana vamuhandunune kuli vaAmole vaze alihachile navo. Kutwala muze, vulukiso kana vayizachishilenga hakuvuluka vaka-tanga yaApalahama kuhichila muli muzukulu lyenyi Yakova nakuvuluka nawa lilimi lyavo. Mulwola lwaYesu, lilimi lyachiHepeleu lyapwile namazu amavulu amulilimi lyachiAlamayiki, kaha likiko ahanjikilenga Kulishitu natumbaji twenyi.—Kup 14:13; Klo 5:3; Vil 26:14.

• Hetese.

  Lizu lyachiHelase lize lyalitombola nalizu lyachiHepeleu “Sheyole.” Valyalumuna ngwavo “Fuka” (lizu lize vanatohwesa sopelo watete) mangana lihane ulumbunwiso wafuka yavatu vosena.—Tala FUKA.

• Hine.

  Chipimo chavyuma vyameya, kaha nawa chesekelo vazachishilenga hakuwapima. Chapwile jilita 3.67 nge kutesa nomu ahanjikile Josephus ngwenyi, hine yatesekele hamwe navyesekelo vyakowe vivali vyavaka-Atene. (Klo 29:40)—Tala Chihande B14.

• Hingayone.

  Lizu lyakusolola mwakwimbila mwaso. Hali Samu 9:16, lizu kana lyasolola chivumo chamwaza chachinene chakalyalya chize chili nakuya nakutula, chipwe lwola lwakuhola kulu lwakushinganyeka.

• Holeve; Pili yaHoleve.

  Ngalila yajipili yize yajingilika Pili yaShinai. Vayivuluka nawa ngwavo Pili yaShinai. (Klo 3:1; Lus 5:2)—Tala Chihande B3.

• Homele.

  Chesekelo chakupimina vyuma vyaumu chakuteseka hamwe nachesekelo chakole. Chesekelo kana vachilavilenga kuzachisa chesekelo chambate, kaha chapwile jilita 1.22. (Lev 27:16)—Tala Chihande B14.

• Husope.

  Kamutondo kakwechi mitango namafwo yize vazachishilenga hakusapwila manyinga chipwe meya hachilika chakutomesa. Husope wapwa muyachi umwe wambuto yimwe vavuluka ngwavo manjolame (Origanum maru; Origanum syriacum). Husope vazachisa hali Yowano 19:29 yapwile pamo manjolame yize vakashilile kuchisachi chamuyachi wamasa (Sorghum vulgare), mwomwo yapwile nachisachi chachisuku chize vakashililile chiponja chize vambwichikile muvinyo vingangamina nakuhaka kukanwa kaYesu.—Klo 12:22; Ji 51:7.

I

• Ilulikume.

  Ngalila yavaLoma yakumulauko waHelase. Paulu mumulimo wenyi wakwambulula akahetele kungalila kana, oloze Mbimbiliya kayavuluka numba nge ambulwilile namuIlulikume nyi akaheteleko kaha. (Lom 15:19)—Tala Chihande B13.

• Isalele.

  Lijina lize Kalunga alukile Yakova. Kaha lijina kana valizachishilenga hakuvuluka vaka-tanga yenyi vosena. Vaka-tanga yavana vaYakova 12 vavavulukilenga ngwavo vana vaIsalele, chipwe vaze vakuzuvo yaIsalele, chipwe malunga vavaIsalele, chipwe vaIsalele. Lizu Isalele valizachishilenga nawa hakuvuluka wangana wakunote wamiyachi likumi uze wahandunukile kuwangana wakusulo. Kutwala muze, valizachishilenga nawa hakuvuluka vaka-Kulishitu vawavisa vaze vapwa “vaIsalele jaKalunga.”—Nga 6:16; Kup 32:28; 2Sa 7:23; Lom 9:6.

 J

• Jikuli.

  Vyuma vazachishilenga hakuzangamisa vatu. Jikuli jimwe japwilenga jakwingisa mahinji, oloze jikwavo japwilenga jakwingisa mahinji, namavoko, nashingo nakulingisa mutu azembame mwamupi.—Yel 20:2; Vil 16:24.

• Jila.

  MuVisoneka, lizu kana valizachisa mujila yachifwanyisa kutalisa kuvilinga vize Yehova etavisa chipwe vize akanyisa. Vatu vaze vakavangijilenga Yesu Kulishitu vavavulukilenga ngwavo “Jila,” kulumbununa nge kuyoya chavo chapendaminyine hakupwa nalufwelelo muli Yesu Kulishitu nakukavangiza chakutalilaho chenyi.—Vil 19:9.

• Jiloma.

  Mihako yakulifwana najiapo, yize yatwama namukamo wajitemo mumuchinji. Jatwama nachiyau chakukola, mukachi mwatwama tumikoswa tuchila chipwe tuchiluluka tuze twatwama namwemwe. Jiloma jamalengeso vajitungilile kwishi yachikuto chakuzeneka mavoko chilauluka chakapilishitu wakulitulaho. Kaha vajitungilile nawa kumitwe yajipanda jaYakine naMbowaze jize japwile kulutwe lwatembele.—Klo 28:34; Kla 13:23; 1My 7:18.

• Jimanya.

  Vinoma vyaulu vize vazachishilenga kutavanaku nakutembele vyakujimisa milangi kumanongo.—Klo 37:23.

• Jimbinga jakulijiko lyakulumbila.

  Misomo yakufwana nge jimbinga yize yatutukile mujimbango jiwana jamajiko amwe akulumbila. (Lev 8:15; 1My 2:28)—Tala Chihande B5 na B8.

• Jimbolo jakuhana Kalunga.

  Jimbolo 12 jize vatepele hakachi nakujilumbika mumilumba yivali hamesa muze Mwajila mutavanaku namutembele. Kaha vajivuluka nawa ngwavo “jimbolo jakulumbika,” “jimbolo jakutumbika kumeso aKalunga.” Halikumbi lyaSambata, jimbolo kaneji vajishishishile najimbolo jeka jajihya. Kaha jimbolo jize vafumishile, vajililenga kuli vapilishitu kaha. (2Mi 2:4; Mat 12:4; Klo 25:30; Lev 24:5-9; Hep 9:2)—Tala Chihande B5.

• Jimbolo jakutumbika kumeso aKalunga.—

  Tala JIMBOLO JAKUHANA KALUNGA.

• Jimbuto jakulivanga.

  Japwa jimbuto jakulivanga kuhya mungonde yakwaha, chipwe vyuma vyakulivanga kufuma kuvyuma vimwe. Yehova asakile vaIsalele vamuhanenga vatwatwa javo, vapwa vatu chipwe vimuna. Asakile nawa vamuhanenga jimbuto jakulivanga mumande avo. VaIsalele vahanyinenga vyuma vyakulivanga kuli Kalunga haChiwanyino chaJimbolo Jakuzeneka Chimbalwila, nahaPendekoseta. Lizu “jimbuto jakulivanga” valizachishile nawa mujila yachifwanyisa hakuvuluka Yesu navaka-kumukavangiza vaze vawavisa.—1Ko 15:23; Kla 15:21; Vis 3:9; Kus 14:4.

• Jinganda jakuswamamo.

  Japwile jinganda javaLevi jakuchinyina mutu uze najihi mukwavo chakuzeneka kuchisakula. Mutu kana achinyine muka-kulinga sambanjinga. Eji jinganda 6 vajitongwele kuli Mose, kutwala muze kuli Yoshuwa nge kutesa nomu avalwezele Yehova, kaha japwile muLifuchi lyaLushiko lyosena. Mutu uze achinyinyine kunganda kana, alwezele vakulwane chihande chenyi kuchikolo changanda kaha vamutambwile namavoko avali. Mutu kana vamumbachile nakumukindulwisa kunganda kuze ajihililile mukwavo mangana vakakekese numba nge keshi namulongako. Valingilenga ngocho mangana vatu vahone kujiha vakwavo chamujihila. Kachi nge kavamuwanyine namulongako, kaha vakindulukile nenyi kunganda yakuswamamo. Kaha atwaminengamo hamakumbi akuyoya chenyi osena, chipwe palanga nakukufwa chakapilishitu wakulitulaho.—Kla 35:6, 11-15, 22-29; Yos 20:2-8.

• Jishimbi jaMose.

  Jishimbi jize Yehova ahanyine vaIsalele kuhichila muli Mose mupambo yaShinai mu 1513 B.C.E. Mikanda yitanu yakulivanga yamuMbimbiliya vayivuluka nawa ngwavo Jishimbi.—Yos 23:6; Luk 24:44.

• Jishimbi.

  Kachi nge sona wakulivanga vanamutohwesa, kaha lizu kana lili nakutalisa kuJishimbi jaMose chipwe kumikanda yakulivanga yitanu yamuMbimbiliya. Oloze nge eli lizu vanalisoneka muvasona vavandende, kaha lili nakutalisa kulushimbi lumwe nalumwe lwamuJishimbi jaMose, chipwe kuchishina chamujishimbi.—Kla 15:16; Lus 4:8; Mat 7:12; Nga 3:24.

• Jituku javinyo jamalambu.

  Jituku jamalambu jize vatungilenga namalambu avimuna vakufwana nge vapembe chipwe mikoko jize valaminyinenga vinyo. Vinyo vavihakilenga mujituku jamalambu jajihya mwomwo omu vinyo vyasavilenga, vyalowelenga peho yacarbon dioxide yize yalingishilenga jize jituku jifutunuke. Jituku jamalambu jajihya jeji kufutunukanga, oloze jituku jamwaka jeji kupulikanga kachi nge munazale peho.—Yos 9:4; Mat 9:17.

• Jive.

  Lijina livene lyakakweji wamuchivali wavaYuleya wakalenda yajila, kaha nawa hilijina lyakakweji wakusokesa 8 wakalenda yavaka-mafuchi eka. Lwola kana lwaputukile hakachi kakakweji waApril nakuheta hakachi kakakweji waMay. Kakweji kana vamuvuluka ngwavo Iyale muTelumundi yavaYuleya namumikanda yeka vasonekele omu vaYuleya vakindulukile muufunge muMbavilone. (1My 6:37)—Tala Chihande B15.

K

• Kalama.

  Lunga uze atwama namulimo wakulama vaze vali muchikungulwilo nakuvafunga. Lizu lyachiHelase e·piʹsko·pos likwechi ulumbunwiso wakukinga vyuma. Mazu akwamba ngwavo “kalama,” “namukulwane” (pre·sbyʹte·ros) atalisa kuchihela chochimwe chamuchikungulwilo chavaka-Kulishitu. Lizu “mukulwane” lyatalisa kuvilinga vyakuhya vyalunga vanatongola, kaha lizu “kalama” lyashindakanya hamilimo mwazata mutu vanatongola.—Vil 20:28; 1Ch 3:2-7; 1Pe 5:2.

• Kalateya; vaKalateya.

  Hakavanga yapwile ngalila navatu vaze vatwaminenga mungalila yaChingilise nayeyi yakukalwiji Yufwalate. Kutwala muze mazu kana vawazachishile hakuvuluka Mbavilone yosena navatu jayo. Lizu “vaKalateya” lyatalisa nawa kuvatu vakunanguka vaze valinangwile sayasi, namijimbu yakunyima, namalimi, navyuma vyamumelu. Valingilenga nawa visava nakutahisa vatanganyika.—Eza 5:12; Nda 4:7.

• Kaliuka kakuhanduka.

  Lizavu lyavatu vaze vakwechi kunangula chavo chipwe vakwechi twamina yavo. Vulukiso kana vayizachisa kumazavu amalemu avali akwitava chavaYuleya, vaFwaliseu navaSatuse. Vatu  vaze kavapwile vaka-Kulishituko vavulukilenga vaka-Kulishitu ngwavo “kaliuka kakuhanduka,” chipwe ngwavo “kaliuka kakuhanduka kavaka-Nazaleta.” Vavavulukile ngocho, mwomwo vashinganyekele ngwavo vahandukile kukwitava chavaYuleya. Kutwala muze, muchikungulwilo chavaka-Kulishitu mwaputukile kupwa tumauka twakuhanduka. Kaha mumukanda waKusoloka vavulukamo “kaliuka kakuhanduka kaNyikolaita.”—Vil 5:17; 15:5; 24:5; 28:22; Kus 2:6; 2Pe 2:1.

• Kalumbu-kalisano.

  Pwevo wamuchivali, kaha kakavulu apwilenga ndungo.—Klo 21:8; 2Sa 5:13; 1My 11:3.

• Kalunga wamuchano.

  Vulukiso yachiHepeleu yize yatalisa kuli “Kalunga.” Vulukiso kaneyi yasolola Yehova kupwa ikiye kaha Kalunga wamuchano nakumuhandununa kutulunga vamakuli. Eyi vulukiso yakwamba ngwavo “Kalunga wamuchano” yasolola ulumbunwiso uvene wachiHepeleu muvisoneka muze vayizachisa.—Kup 5:22, 24; 46:3; Lus 4:39.

• Kambukungulu.

  Musongo uze weji kukwatanga vyuma vyakusoka hamavu vyavivulu. Vamwe vamba ngwavo kambukungulu vavuluka muMbimbiliya kapwa shingwe yilava (Puccinia graminis).—1My 8:37.

• Kanane.

  Muzukulu lyaNowa, kaha nawa mwanaHame wamuchiwana. Miyachi 11 yize yafumine kuli Kanane yatwaminenga kungalila yakuMendetelenya yakumututuko, mukachi kaEjipitu naSulya. Ngalila kana vayivulukilenga ngwavo “lifuchi lyaKanane.” (Lev 18:3; Kup 9:18; Vil 13:19)—Tala Chihande B4.

• Kangelo wakulitulaho.

  Kulumbununa “mukulwane wavangelo.” Kaha lizu “wakulitulaho” lyalumbununa “mukulwane” chipwe “wamulemu.” Hakuwana nge muMbimbiliya vulukiso yakwamba ngwavo “kangelo wakulitulaho” yatalisa kumutu umwe, echi chili nakulumbununa nge kwatwama kangelo wakulitulaho umwe kaha. MuMbimbiliya, ou kangelo wakulitulaho apwa ikiye Mikayele.—Nda 12:1; Yut 9; Kus 12:7.

• Kapilishitu wakulitulaho.

  MuJishimbi jaMose, apwile kapilishitu wamulemu uze emanyinyinengako vatu kuli Kalunga nakutetekela vakwavo vapilishitu. Kaha vamuvulukile nawa ngwavo “kapilishitu wamukulwane.” (2Mi 26:20; Eza 7:5) Kapilishitu kana ikiye kaha vetavishile kwingila muze Mwajila Chikuma, mukapete kamukachi chikuma kamutavanaku, namutembele. Engililengamo kamwe kaha mumwaka haLikumi lyaKulinga chaKufwika haShili. Lizu “kapilishitu wakulitulaho” valizachisa nawa hakuvuluka Yesu Kulishitu.—Lev 16:2, 17; 21:10; Mat 26:3; Hep 4:14.

• Kapilishitu wamukulwane.

  MuVisoneka VyachiHepeleu, eyi yapwa vulukiso yikwavo “yakapilishitu wakulitulaho.” Oloze muVisoneka VyachiHelase vyaVaka-Kulishitu, vulukiso yakwamba ngwavo “kapilishitu wamukulwane” yatalisa kumalunga vavalemu vaze vazachilenga milimo yaupilishitu, pamo kuhakilako navaze vapwilenga vapilishitu vakulitulaho, navatwamina vamazavu avapilishitu 24.—2Mi 26:20; Eza 7:5; Mat 2:4; Mak 8:31.

• Kapilishitu.

  Lunga vatongwele uze emanyinyinengako Kalunga kuli vatu vaze azachilililenga, nakuvanangula vyaKalunga najishimbi jenyi. Vapilishitu vemanyinyinengako nawa vatu kuli Kalunga, vahanyinenga vimuna vakuvatula, nakuvalembelelangako. Shimbu kanda Jishimbi jaMose, mutwe watanga emanyinyinengako tanga yenyi kupwa nge kapilishitu. MuJishimbi jaMose, malunga vakutanga yaAlone vakumuyachi wavaLevi vakiko vazachilenga mulimo waupilishitu. Kaha vaLevi vamalunga vosena vapwilenga vaka-kuvakafwa. Omu lwaputukile lushiko lwaluhya, vaIsalele vakushipilitu vapwile jino muyachi wavapilishitu, kaha Yesu Kulishitu apwile Kapilishitu Wakulitulaho.—Klo 28:41; Hep 9:24; Kus 5:10.

• Kapolofweto.

  Apwa mutu uze vazachishilenga kwambulula vyuma ajinyine Kalunga. Vapolofweto vapwilenga vaka-kumuhanjikilako Kalunga. Kavambulwilenga kaha vyuma navikasoloka kulutweko, oloze vambulwilenga nawa kunangula chaYehova, najishimbi jenyi, nakusopesa chenyi.—Amo 3:7; 2Pe 1:21.

• Kaposetolo.

  Lizu kana lyalumbununa “mutu uze vanatumu.” Valizachisa kutalisa kuli Yesu nakuli veka vaze vatumine kuzachila vakwavo. Kakavulunyi, valizachisa kutalisa kutumbaji twaYesu 12 vaze asakwile ivene kupwa vaka-kumwimanyinako.—Mak 3:14; Vil 14:14.

• Kasha.

  Vyuma vize vafumishile kuviyau vyamutondo wakasha (Cinnamomum cassia), uze walifwana namutondo wakinamone. Kasha vayizachishilenga kupwa maji alivumba lyamwaza, kaha nawa vayihakilenga kumaji akuwavisa ajila.—Klo 30:24; Ji 45:8; Eze 27:19.

• Katachikijilo.

  Chinoma chakuhakisa chinjikizo (chikumanyi haunonga chipwe hasela) chakusolola mwenyachuma, chipwe chakusolola nge chuma vanahanjika chinapu chamwenemwene, chipwe chakuzamisa chivwasano. Tutachikijilo twakushikulu twapwile twakukola (twapwile twamalolwa, chimwe mazo avanjamba, chipwe vitondo), kaha vasoneneho vasona chipwe vifwanyisa muufutanyima. Katachikijilo vakazachisa nawa mujila yachifwanyisa hakusolola nge chuma vanahanjika chinapu chamwenemwene, chipwe hakusolola mwenyachuma, chipwe chinjikizo chavyuma vyakusweka.—Klo 28:11; Neh 9:38; Kus 5:1; 9:4.

• Katwamino kamyaka (Tutwamino twamyaka).

  Lizu lyachiHelase ai·onʹ lize lyatalisa kuchiyoyelo, chipwe kuvyuma vili nakulingiwa halwola lumwe, chipwe kumyaka, chipwe kuchisemunwino. Kaha “katwamino kamyaka” vavuluka muMbimbiliya katalisa kuvyuma omu vili mukaye nachiyoyelo chavatu. (2Ch 4:10) Kuhichila mulushiko lwamuJishimbi, Kalunga ahakileko katwamino kamyaka kaze vavuluka kuvatu vamwe ngwavo lwola lwavaIsalele chipwe lwavaYuleya. Kalunga azachishile Yesu Kulishitu kuhichila mundando yenyi yakusokola mangana ahakeko katwamino keka kamyaka, chikumanyi kutalisa kuchikungulwilo chavaka-Kulishitu vaze vawavisa. Aha hakiko haputukilile lwola lwaluhya lwavyuma vavulukile mulushiko lwamuJishimbi. Kachi nge vanambe ngwavo “tutwamino twamyaka,” kaha vali nakutalisa kukatwamino kamulwola lwakulisezaseza, chipwe kuvyuma vili nakuzachiwa halwola lwakulisezaseza, numba lupwa lwola lwakunyima chipwe lwakulutwe.—Mat 24:3; Mak 4:19; Lom 12:2; 1Ko 10:11.

• Kave.

  Chesekelo chakupimina vyuma vyaumu chakuheta kujilita 1.22 chize valavile kuzachisa chesekelo chambate. (2My 6:25)—Tala Chihande B14.

•  Kazeya kakatachikijilo.

  Katachikijilo kaze vavwalilenga kumunwe, chipwe vakashililile hamukole, uze pamo vasukikile mushingo. Katachikijilo kapwile nawa chinjikizo chakusolola ngolo apwilenga najo twamina chipwe chilolo wamufulumende. (Kup 41:42)—Tala KATACHIKIJILO.

• Kemoshe.

  Apwa kalunga wamunene wavaMowave.—1My 11:33.

• Kesale.

  Lijina lyatanga yavaLoma, kaha lyalumukile jino kupwa vulukiso yavamyangana javaLoma. Angusutu, naChivelyu, naKolochiu vakivo vavuluka majina avo muMbimbiliya. Nelo kavamuvuluka halijinako, oloze naikiye vamuvuluka navulukiso kaneyi. MuVisoneka VyachiHelase vyaVaka-Kulishitu, lizu “Kesale” lyemanyinako nawa vaka-kuyula chipwe fulumende.​—Mak 12:17; Vil 25:12.

• Kilomita.

  Chipimo chakwijivilaho kusuhwa chatunda chize vasoneka kamwe kaha mumikanda yakulivanga yaVisoneka VyachiHelase vyaVaka-Kulishitu hali Mateu 5:41. Kilomita kana pamo yatesekele hamwe nakilomita yavaLoma yize yasuhwile jimita 1,479.5. Kaha “kilomita” vavuluka hali Luka 24:13, naYowano 6:19, naYowano 11:18 yatesekele hamwe nakilomita yize yakweseka nashitandeya yakushikulu yamuvisoneka vyakulivanga.—Tala Chihande B14.

• Kishileve.

  Lijina lyakakweji wakusokesa 9 wavaYuleya wakalenda yajila, kaha nawa hilijina lyakakweji wamuchitatu wakalenda yavaka-mafuchi eka, lize vazachishilenga vatu omu vafumine muufunge muMbavilone. Lwola kana lwaputukile hakachi kakakweji waNovember nakuheta hakachi kakakweji waDecember. (Neh 1:1; Zek 7:1)—Tala Chihande B15.

• Kolale.

  Chuma chimwe chakukola, chakufwana nge lilolwa chize cheji kulitunganga kuvifuwa vyatunyama vamwe vavandende vamukalungalwiji. Kolale yeji kuwanyiwanga mukalungalwiji, kaha yeji kupwanga muulombo wakulisezaseza, weka uchila, weka utoma, weka wilava. Kolale yavulilenga chikumanyi muKalungalwiji Uchila. Mulwola vyasolokelenga vyuma vasoneka muMbimbiliya, kolale yichila yapwilenga nandando yayinene, kaha vatengelengako usanga navimbilingwa vyeka.—Vis 8:11.

• Kole.

  Chipimo chavyuma vyaumu navyevi vyameya. Chesekelo kana chapwile jilita 220, kaha vachilavile kuzachisa chesekelo chambate. (1My 5:11)—Tala Chihande B14.

• Kuhuhwojola.

  Chapwa kunonojola jimbuto vanaseze vaka-kwaha muwande. Jishimbi jaMose jakanyishile vatu kwaha jimbuto josena jakujisongo jamande chipwe kwaha jilive josena chipwe mivinyo. Kalunga etavishile vaka-kuhutwa, navaka-kukalikiza, navamwiza, navanginga, navatuliwe kuhuhwojola jimbuto jize jasalilenga mumande.—Lut 2:7.

• Kujihana.

  Chapwa kwenga muvumbo wakuusonyi walunga. Kujihana chapwile lushimbi vahanyine Apalahama navana venyi, oloze kalwapwa lushimbi kuli vaka-Kulishituko. Lizu kujihana valizachisa mujijila jajivulu muvisoneka.—Kup 17:10; 1Ko 7:19; Fwi 3:3.

• Kujila.

  Vilinga atwama navyo Yehova; hitwamiso yitoma, yajila. (Klo 28:36; 1Sa 2:2; Vis 9:10; Isa 6:3) Lizu livene lyachiHepeleu lyalumbununa kuhandula, kufumisa, chipwe kujilila Kalunga wajila. Lyalumbununa nawa kuhandula chuma vachizachise kumulimo waYehova. Lizu kana lyazata nakuli vatu (Klo 19:6; 2My 4:9), nakutunyama (Kla 18:17), nakuvyuma (Klo 28:38; 30:25; Lev 27:14), nakuvihela (Klo 3:5; Isa 27:13), nakulwola (Klo 16:23; Lev 25:12), nakumilimo (Klo 36:4). MuVisoneka VyachiHelase vyaVaka-Kulishitu, lizu “kujila,” nalikiko lyalumbununa chuma chize vanahandwila Kalunga. Kaha lyalumbununa nawa twamiso yitoma.—Mak 6:20; 2Ko 7:1; 1Pe 1:15, 16.

• Kukwata ufunge.

  Chapwa kufumisa mutu mulifuchi lyenyi chipwe kwimbo lyenyi nakumutwala kweka. MuchiHepeleu, lizu kana lyalumbununa “kuya.” VaIsalele vavakwachile ufunge kavali. Vatu vamuwangana wakunote wamiyachi likumi vavakwachile ufunge kuli vaAsulya, kaha ava vamuwangana wakusulo wamiyachi yivali vavakwachile ufunge kuli vaMbavilone. Vasalaho vamumiyachi yosena yivali vavakindulwishile kulifuchi lyavo muchiyulo chaKuluse, twamina wavaPeleja.—2My 17:6; 24:16; Eza 6:21.

• Kulihana, katachikijilo kajila.

  Kalilata kakuvyakuma kaulu wakutomesa kaze vasonekele muchiHepeleu ngwavo, “Kujila chapwa chakuli Yehova.” Vakahakile haluholo, halihina lyakujinga kumutwe wakapilishitu wakulitulaho. (Klo 39:30)—Tala Chihande B5.

• Kulijilika kulya.

  Kulitwamina kulya vyakulya vyosena hatando yimwe. VaIsalele valijilikilenga kulya haLikumbi lyaKulinga chaKufwika haShili, nahalwola lwavihuli, nahalwola vasakile Kalunga avalweze mwakulingila. VaYuleya valijilikilenga kulya mapapa kawana mumwaka mangana chivanukise vihuli vamwenenga mukuyoya chavo. Vaka-Kulishitu kavasakiwa kulijilika kulyako.—Eza 8:21; Isa 58:6; Luk 18:12.

• Kulikanga kuli Kalunga.

  Hanjikiso kana yafuma kulizu lyachiHelase (a·po·sta·siʹa) lize lyalumbununa “kusosoloka.” Hanjikiso kana yalumbununa nawa “kuseza chipwe kulitwamina.” MuVisoneka VyachiHelase vyaVaka-Kulishitu, hanjikiso “kulikanga kuli Kalunga” vayizachisa chikumanyi kuvatu vaze veji kufumanga kukulemesa chamuchano.​—Vis 11:9; Vil 21:21; 2Te 2:3.

• Kulishitu.

  Vulukiso yaYesu yize yafuma kulizu lyachiHelase Khri·stosʹ. Vulukiso kana yalifwana nayeyi yachiHepeleu valumuna ngwavo “Meshiya,” chipwe “Ou Vawavisa.”—Mat 1:16; Yow 1:41.

• Kulishona.

  Chapwa kusolola chinyengo nge mutu nafwisa chipwe nge ali muvihuli. Mulwola vyasolokelenga vyuma vasoneka muMbimbiliya, vatu valishonenenga hatando yayisuku. Vaka-kulishona valililenga jimbimbi, vavwalilenga uvwalo wakulipwila, valikwichilenga uto kumitwe yavo, vapulilenga uvwalo wavo, kaha valivetelenga hajitulo javo. Shimbu jimwe vakambilenga navaka-kulishona vakukuluka malambu.—Kup 23:2; Ese 4:3; Kus 21:4.

• Kulya chaMwata chaChingoloshi.

  Kulya chambolo yakuzeneka chimbalwila navinyo, vize vyemanyinako mujimba waKulishitu namanyinga enyi. Chapwa kwanuka kufwa chaYesu. Vachivuluka nawa ngwavo “Kwanuka Kufwa chaMwata,” mwomwo Visoneka vyalweza vaka-Kulishitu valamenga chiwanyino kanechi.—1Ko 11:20, 23-26.

• Kumweka chakakweji.

  Likumbi lyakulivanga lyakakweji hikakweji wakalenda yavaYuleya, lize vajilililile kupwa hilikumbi lyakulikungulula, lyakulijilika kulya,  nakuhana vimuna vakuvatula. Kutwala muze, likumbi kana lyapwile hilikumbi lyalilemu lize vatu valingilenga chiwanyino mulifuchi lyosena, kaha kavazachilenga milimo halikumbi kanako.—Kla 10:10; 2Mi 8:13; Kol 2:16.

• Kunangika mavoko.

  Mavoko vawanangikilenga hamutu hakumutongola mangana azate milimo yakulipwila, chipwe hakumukisula, chipwe hakumuka, chipwe hakumuhana wana washipilitu yajila. Shimbu jimwe, vanangikilenga mavoko havimuna shimbu kanda vavalumbe.​—Klo 29:15; Kla 27:18; Vil 19:6; 1Ch 5:22.

• Kupanda.

  Chapwa kufwelela nge vashipilitu vavafu kaveshi kufwako, kaha nawa ngwavo vafu vanahase kuhanjika navatu vavatonyi, chikumanyi kuhichila muli muka-kutaha. Lizu lyachiHelase lize valumuna ngwavo “kupanda” lyapwa phar·ma·kiʹa, kaha lyalumbununa “kuzachisa vitumbo.” Lizu kana valipandamisa kukupanda mwomwo kushikulu, vatu vazachishilenga vitumbo hakusangumuna vandemone mangana vatahe.—Nga 5:20; Kus 21:8.

• Kupanda.

  Kuzachisa ngolo jakufuma kuli vashipilitu vakuhuka.—2Mi 33:6.

• Kupihilila nakwalumuka.

  MuMbimbiliya, mazu kana alumbununa kwalumuna vishinganyeka hakwivwila kupihya chiyoyelo chamwaka, navilinga vyavipi, chipwe vyuma nahono kulinga mutu. Kupihilila nakwalumuka chamwenemwene cheji kulingisa mutu alovole mihako yamwaza nakuseza vilinga vyavipi.​—Mat 3:8; Vil 3:19; 2Pe 3:9.

• Kupihya.

  Lizu kana linahase kutalisa kumajilo akumujimba chipwe kukuhokola jishimbi jakatwamino katoma. Oloze muMbimbiliya kakavulu valizachisa kuvyuma vize kavetavisako, chipwe vize kavyatomeneko kweseka naJishimbi jaMose. (Lev 5:2; 13:45; Mat 10:1; Vil 10:14; Efw 5:5)—Tala KUTOMA.

• Kupwako.

  Hajivesi jimwe jamuVisoneka VyachiHelase vyaVaka-Kulishitu, lizu kana lyalumbununa kupwako chaYesu Kulishitu kufuma halwola vamuswanyishile kupwa Mwangana wauMeshiya palanga nakumakumbi akukuminyina akatwamino kamyaka yino. Kupwako chaKulishitu kachapwa kukinduluka washi hamavu hanyima yakuya mwiluko, oloze chapwa chatando yayisuku.—Mat 24:3.

• Kusanguka.

  Chapwa kuhinduka kuvafu. Lizu kana muchiHelase lyapwa a·naʹsta·sis, kulumbununa “kuhinduka” chipwe “kukatuka.” MuMbimbiliya vavulukamo mijimbu 9 yakusanguka, kuhakilako namujimbu waYesu vasangwile kuli Yehova Kalunga. Numba tuhu vafu vamwe vavasangwile kuli Elija, naElisha, naYesu, naPetulu, naPaulu, oloze Kalunga ikiye avahanyine ngolo jakulinga vinjikizo kana. Kusanguka “chavaka-kwoloka navaka-kuhenga” vaze navakatwama hano hamavu chapwa chachilemu mwomwo nachikatesamo vyuma ajina Kalunga. (Vil 24:15) Mbimbiliya yavuluka nawa kusanguka chavaze navakayoyela mwilu, chize vavuluka ngwavo kusanguka “chatete” chipwe “chakulivanga” chavandumbwaYesu vaze vawavisa nashipilitu.—Fwi 3:11; Kus 20:5, 6; Yow 5:28, 29; 11:25.

• Kutoma.

  MuMbimbiliya, lizu kana kalyatalisa kukulitomesa kaha kumujimbako, oloze lyatalisa nawa kukulama vyuma chipwe kuviwahisa vizeneke kupwa nakatenga, chipwe namajilo. Kaha lyatalisa nawa kukulihenda kuchuma chize nachenyeka vilinga vyamutu, chipwe kumupihisa kushipilitu. MuJishimbi jaMose, lizu kana lyatalisa kukulitomesa kweseka najishimbi.—Lev 10:10; Ji 51:7; Mat 8:2; 1Ko 6:11.

• Kuvite.

  Chipimo chize chasuhwile kafwe kufuma kumunguza nakuheta kusongo yamunwe wahakachi. Kuvite vazachishilenga chikuma vaIsalele yapwile jisendimita 44.5, oloze vazachishilenga nawa kuvite yikwavo yajisendimita 51.8, yize yasuhwilileko kafwe chikapa chalivoko chimwe. (Kup 6:15; Luk 12:25)—Tala Chihande B14.

• Kuwavisa.

  Lizu lyachiHepeleu lize lyalumbununa “kukwita maji.” Maji vawakwichilenga mutu chipwe chuma mangana vipwenga vyakuzachisa kumulimo wakulipwila. Kaha muVisoneka VyachiHelase vyaVaka-Kulishitu, lizu kana valizachisa kukuhingunwina shipilitu yajila hali vaze vasakula kupwa nalutalililo lwamwilu.—Klo 28:41; 1Sa 16:13; 2Ko 1:21.

• Kuzombwojoka jishimbi.

  Chapwa kuhokola jishimbi jize vahakako. Eyi hivulukiso yikwavo yamuMbimbiliya yize yalumbununa “shili.”—Ji 51:3; Lom 5:14.

• Kuzungula; kuChizungwilo.

  Kuzungula chapwa kufumisa muzungu kumanona, kaha kuchizungwilo kwapwa kuchihela kuze veji kuzungwilanga. Vazungwilenga manona namavoko kuzachisa chitondo, oloze nge manona anavulu, kaha vazachishilenga vinoma vyakulipwila vyakufwana nge chileyi chakuzungwisa chize vakokelenga kuvimuna. Chileyi vachihichishilenga hamanona aze vahakile hachizungwilo chize chapwililile hachihela chize chazandamine mangana peho yihuhwileho.—Lev 26:5; Isa 41:15; Mat 3:12.

• Kwangula.

  Chapwa kwivwisa mutu woma, chipwe kumushinga chipwe kushinga chuma. Kwangula chalihandununa nakusaula, chipwe kwivwa matoto. Kwangula chapwa kuhanjika vyuma vyavipi kuli mutu, chipwe kumuvulukila lupi luze nalukamuwana. Kachi nge changu kana chinafumu kuli Kalunga chipwe kuli mutu uze vetavisa, kaha chuma kana chinapu upolofweto waulemu, wangolo.—Kup 12:3; Kla 22:12; Nga 3:10.

• Kwoloka.

  MuVisoneka lizu kana lyalumbununa vyuma vyakwoloka kweseka nomu amona Kalunga vyuma vyakwoloka navyevi yakuhenga.—Kup 15:6; Lus 6:25; Vis 11:4; Zef 2:3; Mat 6:33.

L

• Lahave.

  Lizu lize vazachisa mujila yachifwanyisa mumukanda waYopa, naJisamu, naIsaya (ou keshi nge Lahave, pwevo uze vavuluka mumukanda waYoshuwako.) Mumukanda waYopa, Lahave vamuvuluka kupwa hikanyama wamunene wamukalungalwiji. Kaha muvisoneka vikwavo nawa, kanyama kana emanyinako Ejipitu.—Yop 9:13; Ji 87:4; Isa 30:7; 51:9, 10.

• Lavona.

  Ulilila waumu uze vafumishile kumitondo nakuviputa vyamuyachi umwe wamutondo waBoswellia. Lavona yalowelenga livumba lyalupengopengo omu vayochelenga. Kaha yapwilenga muvyuma vyajila vyalivumba lyamwaza vize vazachishilenga kutavanaku nakutembele. Lavona vayihanyinyine kumwe nawana wamanona, kaha vayihakile helu yamulumba himulumba wajimbolo jakuhana Kalunga jamuze Mwajila.—Klo 30:34-36; Lev 2:1; 24:7; Mat 2:11.

•  Leputa.

  Mulwola vyasolokele vyuma vasoneka muVisoneka VyachiHelase vyaVaka-Kulishitu, leputa yapwile kalumbongo kachichele kapalata. MujiMbimbiliya jimwe, lizu kana valyalumuna ngwavo “mite.” (Mak 12:42; Luk 21:2; kwinyikila chamwishi.)—Tala Chihande B14.

• Levi; vaLevi.

  MwanaYakova wamuchitatu uze asemene napwevo lyenyi Leya. Lijina kana lyapwa nawa muyachi uze valuka lijina lyenyi. Vana vaLevi vatatu vakiko vaputukile milimo vazachilenga mumikana yayinene yitatu vavuluka ngwavo milimo yaupilishitu yavaLevi. Shimbu jimwe, lizu “vaLevi” lyatalisa kumuyachi wosena, kufumisako tanga yaAlone yavapilishitu. Muyachi waLevi kawatambwile uswana wamavu muLifuchi lyaLushikoko, oloze vauhanyine jinganda 48 mujingalila jize vahanyine miyachi yikwavo.—Lus 10:8; 1Mi 6:1; Hep 7:11.

• Levyatane.

  Kanyama uze eji kuyoyelanga mumeya. Hali Yopa 3:8 na 41:1, kanyama kana pamo apwa ngandu chipwe kanyama weka wamunene, wangolo wamulwiji. Kaha hali Samu 104:26, nahase kupwa linyama-mukeka. Muvisoneka vyeka, lizu kana valizachisa mujila yachifwanyisa, kaha kalyatalisa kukanyamako.—Ji 74:14; Isa 27:1.

• Lifwa.

  Chipimo chavyuma vyaumu, kaha nawa chesekelo vazachishilenga hakupima manona. Chapwile jilita 22, kaha chatesekele hamwe nachesekelo chambate chakupimina vyuma vyameya. (Klo 16:36; Eze 45:10)—Tala Chihande B14.

• Lihina lyakujinga kumutwe.

  Lihina lize vajingile kumutwe kupwa nge chitambala. Kapilishitu wakulitulaho alijingilenga lihina kaneli lyawanda wamwaza kumutwe, kaha kuluholo ahakilengako kalilata kaulu vakashile nalungoji lulauluka. Mwangana nawa alijingile lihina kaneli kumutwe nakuvwala jino muchama. Yopa afwanyishile chiyulo chenyi kulihina lyakujinga kumutwe.—Klo 28:36, 37; Yop 29:14; Eze 21:26.

• Lihina lyakuvatasana.

  Lihina lyamwaza vasonene vakeluve lize lyahandunwine muze Mwajila namuze Mwajila Chikuma mutavanaku namutembele. (Klo 26:31; 2Mi 3:14; Mat 27:51; Hep 9:3)—Tala Chihande B5.

• Lihongo lyakupimisa.

  Lihongo kana lyasuhwile jikuvite 6. Lihongo kana lyapwile jimita 2.67 kweseka nakuvite vazachishilenga chikuma vatu. Kaha lyapwile jimita 3:11 kweseka nakuvite yayisuku. (Eze 40:3, 5; Kus 11:1)—Tala Chihande B14.

• Lijiko lyakulumbila.

  Valitungile nge utenda, valitungishile mavu, chipwe malolwa, chipwe vitondo nakwalaho ulu chipwe palata. Halijiko kana hakiko valumbililenga vimuna vakuvatula chipwe vyuma vyalivumba lyamwaza hakulemesa Kalunga. Mukapete kakulivanga kamutavanaku namutembele mwapwile “lijiko lyakulumbila lyaulu” lyalindende lize valumbililenga vyuma vyalivumba lyamwaza. Valitungile navitondo nakwalaho ulu. “Lijiko lyakulumbila lyaunengu” lyalinene lize valumbililenga vimuna vakuvatula lyapwilenga haweluka muchipango. (Klo 27:1; 39:38, 39; Kup 8:20; 1My 6:20; 2Mi 4:1; Luk 1:11)—Tala Chihande B5 na B8.

• Likoji lyalinene.

  Kufuma kulizu lyachiHelase lize lyatalisa chikumanyi kuchuma chize vetavila, nachize vevwila kuwaha. Kakavulu lizu kana lyatalisa kuwana walikoji, chipwe kukuhana chuma mujila yalikoji. Kachi nge lizu kana nalivuluka vyalikoji lyalinene lyaKalunga, kaha lili nakulumbununa wana wakanyombo wakufuma kuli Kalunga uze navazeneka kukindulwisa. Ngocho lyatalisa kumuchima waKalunga wakuhana nazangi yenyi yayinene eji kusolwelanga vatu. Lizu kaneli lyachiHelase valyalumuna nawa ngwavo “uselewa,” chipwe “wana walikoji.” Lyapwa likoji lyakufuma kumuchima, lize navasolwela mutu uze kalingile chuma chimwe chakutela kumusolwela likojiko.—2Ko 6:1; Efw 1:7.

• Likombelo; Kulemesa makombelo.

  Likombelo lyapwa kaponya, chipwe chifwanyisa chachuma chimwe chize chatwamako chipwe chakutaka kaha, chize veji kuzachisanga vatu hakulemesa Kalunga. Kulemesa makombelo chapwa kuvumbika, chipwe kuzanga, chipwe kwalisa likombelo.—Ji 115:4; Vil 17:16; 1Ko 10:14.

• Likumbi lyaKulinga chaKufwika haShili.

  Likumbi lyajila, lyalilemu chikuma kuli vaIsalele lize vavulukile nawa ngwavo Yomu Kipule (kufuma kulizu lyachiHepeleu ngwavo yohm hak·kip·pu·rimʹ, kulumbununa “likumbi lyakufwika”), lize lyapwilengako ha 10 mukakweji waEtanyime. Eli likiko kaha likumbi lize kapilishitu wakulitulaho engililenga muze Mwajila Chikuma mutavanaku mumwaka. Omu engililengamo, ahanyinenga manyinga avimuna vakuvatula vakufwika jishili jenyi najeji javakwavo vaLevi, najishili javatu. Lwapwile lwola lwakukunguluka chajila nakulijilika kulya, kaha nawa lyapwile likumbi lyasambata, lyakulitwamina kuzata milimo yahakumbi hakumbi.—Lev 23:27, 28.

• Likumbi lyaKulongesa Vyuma.

  Lijina vavulukile likumbi lyakukokela kuSambata, lize vaYuleya valongeselenga vyuma. Likumbi kana lyakumine hakulauka chalikumbi vavuluka makumbi ano ngwavo lyaChitanu, mwomwo hakiko yaputukile Sambata. Likumbi lyavaYuleya lyaputukile nachingoloshi nakuheta kuchingoloshi chikwavo.—Mak 15:42; Luk 23:54.

• Likumbi lyaKusopesa.

  Likumbi livene chipwe tando yize Kalunga mwakasopesa vatu vamwe, chipwe vaka-mafuchi, chipwe vatu vamuchivulu. Lunahase kupwa lwola lwakujiha vaze vavanasopesa lyehi, chipwe lwola lwakulwila vatu vamwe mangana vapwenga nakuyoya chahaya myaka yosena. Yesu Kulishitu navaposetolo jenyi vavulukile ‘vyaLikumbi lyaKusopesa’ lyakulutwe lize navakasopesa vatu vavatonyi navaze vafwile lyehi.—Mat 12:36.

• Lilolwa lyakuchekesa unga.

  Lilolwa lize vahakilenga helu yalilolwa likwavo, kaha valichekeselenga manona mangana kufume unga. Lyapwilenga nawa lilolwa lize vengishilenga hakachi kalilolwa lyakwishi mangana hanyengumukile lilolwa lyahelu. Mulwola vyasolokelenga vyuma vasoneka muMbimbiliya, mapwevo hamembo vazachishilenga malolwa akuchekela unga. Jishimbi jaMose jakanyishile kutambula, chipwe kukwachilamo lilolwa lyamutu lyakuchekela unga kupwa chijikilo mwomwo kulya chavatu chapendaminyinenga  hamalolwa kana. Kaha malolwa akufwana ngana amanene vawanyengumwinenga natunyama.—Lus 24:6; Mak 9:42.

• Lilolwa lyamumbango.

  Lilolwa lize vahakile mumbango yazuvo muze mwaliwanyina jimbango jivali mangana lizamikise nakuwanyisa hamwe jize jimbango. Lilolwa lyalinene lyamumbango valyalile kupwa hililolwa lyamumbango lyachihela chazuvo. Hakutunga jizuvo jasanga najikembwe janganda, vasakwilenga lilolwa lyakukola chikuma. Lizu kana valizachisa mujila yachifwanyisa hakuvuluka omu valile chihela chamavu. Kaha Yesu vamuvuluka ngwavo ikiye “lilolwa lyamumbango lyachihela chazuvo” yachikungulwilo chavaka-Kulishitu, chize vavuluka kupwa zuvo yakushipilitu.—Efw 2:20; Yop 38:6.

• Lilungu lyakakahya.

  Chihela chakuyengunwina malolwa chipwe vikungo. Chihela kana chikiko vochelelenga milondo, navyuma vyeka vyauma. Mulwola vyasolokelenga vyuma vasoneka muMbimbiliya, malungu akakahya apwile akutunga natumenga chipwe namalowla. Lilungu lyakwochela milondo navitenga vyeka vyauma, napemba valivuluka nawa ngwavo wondo.—Kup 15:17; Nda 3:17; Kus 9:2.

• Lipunu.

  Hiuvwalo vavwalilenga vapilishitu. Kapilishitu wakulitulaho avwalilenga lipunu lyakulipwila, kaha helu vakashililileho chipwiko chahatulo chize chapwile namalolwa andando yayinene 12. (Klo 28:4, 6)—Tala Chihande B5.

• Litemba.

  Chuma chatufumbo vavali chize vakokelenga tuvalu chikumanyi kujita.—Klo 14:23; Kuy 4:13.

• Litota.

  Lizu kana lyatwama naulumbunwiso umwe ‘natanganyika wachimene.’ Apwa tanganyika wamakumishilo kututuka kuvatanganyika vosena vakumututuko shimbu kanda likumbi litutuke. Ngocho ikiye eji kusololanga nge likumbi likwavo linaputuka.—Kus 22:16; 2Pe 1:19.

• Liyavolo.

  Lijina lyaSatana muVisoneka VyachiHelase vyaVaka-Kulishitu, lize lyalumbununa “Muka-lusongi.” Satana vamulukile ngwavo Liyavolo mwomwo apwa muka-lusongi, kaha nawa muka-kuvangijikila Yehova. Apihishile mazu aKalunga nalijina lyenyi lyajila.—Mat 4:1; Yow 8:44; Kus 12:9.

• Lizavu lyavatu jaHelote.

  Vavavuluka nawa ngwavo vaka-Helote. Vapwile lizavu lyavaka-mapolitiki lize lyakundwijilenga vyuma asakile Helote muchiyulo chavo chize vavahanyine kuli vaLoma. Chasoloka nge vaSatuse vamwe vapwile mulizavu kaneli. Vaka-Helote valifutwile hamwe navaFwaliseu mangana vafumbukile Yesu.—Mak 3:6.

• Longo.

  Chesekelo chachindende chakupimina vyuma vyameya chize vavuluka muMbimbiliya. Telumundi YavaYuleya ngwayo longo yimwe yapwile 1/12 yahine. Kachi nge mukiko, kaha longo yimwe yapwile jilita 0.31. (Lev 14:10)—Tala Chihande B14.

• Lumbapachiso; Kumbapachisa.

  Lizu kana lyalumbununa “kumbwichika,” chipwe kujimika mumeya. Yesu alingishile lujimiko kupwa chuma chize chasakiwa kuli vaka-kumukavangiza. Visoneka vyavuluka nawa lumbapachiso lwaYowano, nakumbapachisa nashipilitu yajila, nakumbapachisa nakakahya, nalumbapachiso lweka nawa.—Mat 3:11, 16; 28:19; Yow 3:23; 1Pe 3:21.

• Lumbinga.

  Lwapwa lumbinga lwakanyama luze vazachishilenga kupwa chuma chakunwina, chakukwachila maji, naulombo, navyuma vyakulikwita kumeso. Valuzachishilenga nawa kukwimba myaso. (1Sa 16:1, 13; 1My 1:39) Kakavulu lizu “lumbinga” valizachisa mujila yachifwanyisa kwimanyinako ngolo chipwe kufungulula.—Lus 33:17; Mik 4:13; Zek 1:19.

• Lumele.

  Chesekelo chakupimina vyuma vyaumu chakuheta kujilita 2.2, chipwe chakuheta muchimbwa chimwe chakusokesa muvimbwa 10 vyalifwa. (Klo 16:16, 18)—Tala Chihande B14.

• Luneta.

  Chuma chachikungo chize vazachishilenga hakutambika vatu, nahakwimba myaso. Hali Kulava 10:2, Yehova ahanyine jindongi jamwakutengela jineta japalata jivali jize vazachishilenga hakwimba vivumo vyakulisezaseza. Kwapwilenga chivumo chakukungulula lizavu, chakututuka hachilombo, nachakuvilika jita. Jineta kaneji pamo japwile jakusungama, kaha jalihandunwine ‘najimbinga’ jakuzembama jize vasongele kufuma kujimbinga javangombe. Kwapwilenga nawa jineta jeka jize vazachishile hamwe navisaji vyeka kutembele. Kakavulu chivumo chajineta vachivuluka mujila yachifwanyisa kutalisa kuluvila lwakusopesa chaYehova, chipwe kuvyuma vyeka vyavinene vyakufuma kuli Kalunga.—2Mi 29:26; Eza 3:10; 1Ko 15:52; Kus 8:7–11:15.

• Lungungu.

  Myaso yakwimba namazu chipwe navisaji yakusolola ushona wakufwana nge uze mwevwa mutu uze nafwisa sepa lyehi chipwe kausoko kenyi.—2Sa 1:17; Ji 7:Maz.

• Lunyishe.

  Lilolwa lyandando yamweseke, lilolwa lyakukola lyamuyachi wakulifwana nalyangate, chipwe nakalekindone. Lilolwa lyalunyishe lyapwa lyaulombo utoma, uze walisowasana naulombo wilava, nawou usweuluka, nawou uchila, nawou waungonyi, nawou wamafwo amatamba. Valizachishile kuuvwalo wakulipwila wakapilishitu wakulitulaho.—Klo 28:9, 12; 1Mi 29:2; Yop 28:16.

• Lushiko.

  Lunapu chivwasano mukachi kaKalunga navatu, chipwe mukachi kavatu navakwavo, chize navalikasa mangana valinge chuma chimwe, chipwe valihende kukulinga chuma chimwe. Shimbu jimwe, mutu umwe kaha ikiye apwile nachilika chakutesamo lushiko. Oloze shimbu jikwavo, vosena vaze valikashile chivwasano vapwile nachilika chakutesamo lushiko lwavo. MuMbimbiliya kavavulukamo kaha jishiko jize Kalunga ashikile vatuko, oloze vavulukamo najishiko jize valikashile vatu, namiyachi, namafuchi, namazavu avatu. Jishiko jajilemu chikuma shina jize Kalunga ashikile Apalahama, naNdavichi, namuyachi waIsalele (lushiko lwamuJishimbi), navaIsalele jaKalunga (lushiko lwaluhya).—Kup 9:11; 15:18; 21:27; Klo 24:7; 2Mi 21:7.

• Lushiko.

  Lwapwa mazu aze mutu nashiki Kalunga akulinga vyuma vimwe, chipwe kuhana mawana, chipwe kuzata milimo yimwe, chipwe kulihenda kuvyuma vimwe vize kavyapwa vyakuhenga kweseka najishimbiko. Kulishika lushiko chalifwanyine nakulishinga.—Kla 6:2; Kwa 5:4; Mat 5:33.

• Lushingo.

  Mazu akulishinga akusolola nge vyuma vanahanjika vyamuchano, chipwe mazu mwalishinga mutu akulitavila ngwenyi mwalinga chuma, chipwe  keshi kuchilingako. Lushingo kana kakavulu vatu veji kulishingalwo kuli mutu wamulemu, chikumanyi kuli Kalunga. Yehova azamishile lushiko ashikile Apalahama hakulishinga lushingo.—Kup 14:22; Hep 6:16, 17.

• Luyando lwalunene.

  Lizu lyachiHelase valumuna ngwavo “luyando” lyalumbununa lamba chipwe kuyanda chize cheji kwizanga mwomwo yakuhita muvyuma vimwe vyavipi. Yesu ahanjikile ‘haluyando lwalunene’ luze kanda luchisolokengaho lyehi, luze lwapwile nakwiza haYelusalema naluze nawa luli nakwiza kulutwe kupandama kukwiza chenyi ‘muupahu.’ (Mat 24:21, 29-31) Paulu avulukile luyando kana kupwa hichuma chakwoloka kuli Kalunga, ngwenyi Kalunga mwakazangamisa “vaze vazeneka kutachikiza Kalunga, navaze vanakane kwononoka kumujimbu wamwaza” wakuvuluka Yesu Kulishitu. Kaha nawa mukanda waKusoloka kapetulu 19 wasolola Yesu ali nakutwaminyina mayongomena amwilu aze ali nakwiza nakuzangamisa “chisuma navamyangana vahamavu namaswalale javo.” (2Te 1:6-8; Kus 19:11-21) “Liyongomena lyalinene” valisolola linayovoka muluyando kana. (Kus 7:9, 14)—Tala ALAMANGETONE.

M

• Mahalate.

  Lizu lize lyatalisa kumyaso, lize lyatwama hamazu akujimbula ahali Jisamu 53 na 88. Lizu kana lyalifwanako nalizu lyachiHepeleu lize lyalumbununa “kuzeya; kuviza.” Echi chasolola nge eyi myaso yivali vayimbile nalizu lyakulishona, lyakuhomba.

• Mahongo.

  Apwa muyachi umwe wamwila uze weji kusokanga muvihela vyameya. Kaha muyachi wamahongo vazachisa muvisoneka shina waArundo donax. (Yop 8:11; Isa 42:3; Mat 27:29; Kus 11:1)—Tala LIHONGO LYAKUPIMISA.

• Makumbi akukuminyina.

  Hanjikiso kaneyi vayizachisa muMbimbiliya hakwinyikila kulwola luze navikatesamo vyuma vize vavulukile kushikulu. (Eze 38:16; Nda 10:14; Vil 2:17) Lwola kana lunahase kuhihya chipwe kusuhwa kweseka nomu uli upolofweto kana. Kakavulu Mbimbiliya yazachisa lizu kaneli kutalisa “kumakumbi akukuminyina” akatwamino kamyaka yino, mulwola lwakupwako chaYesu chize katwamona namesoko.—2Ch 3:1; Yak 5:3; 2Pe 3:3.

• Malakame.

  Apwa kalunga wamunene wavaAmone, kaha pamo ikiye vavuluka nawa ngwavo Moleke. (Zef 1:5)—Tala MOLEKE.

• Mana.

  Kulya valilenga vaIsalele hamyaka 40 vapwilenga mupambo. Yehova ikiye avahanyinengayo. Kulya kana chaholokelelenga hamavu mujila yakukomwesa, kaha lyume lyafwikilenga helu. Mana yapwilengako hamakumbi osena nachimene, kufumisako kaha halikumbi lyaSambata. Omu vaIsalele vamwene eyi mana halwola lwatete, vambile ngwavo, “Vyuma mukaze evi?” MuchiHepeleu ngwavo,“man huʼ?” (Klo 16:13-15, 35) Muvisoneka vyeka mana vayivuluka ngwavo “kulya chamanona chamwilu” (Ji 78:24), “kulya chakufuma mwilu” (Ji 105:40), “kulya chavaka-ngolo” (Ji 78:25). Yesu azachishile nawa lizu mana mujila yachifwanyisa.—Yow 6:49, 50.

• Masakile.

  Lizu lyachiHepeleu lize lyasoloka hamazu akujimbula aze atwama hajisamu jakuheta ku 13, oloze lizu kana kavalitachikiza kanawa omu lyalumbunukilako. Kaha lyalumbununa pamo “mwaso wakwimba nakushinganyeka.” Vatu vamwe vashinganyeka ngwavo lizu kana lyatwama naulumbunwiso umwe nalizu lize valumuna ngwavo ‘kuzata namuchima wakunangakana.’—2Mi 30:22; Ji 32:Maz.

• Masetonya.

  Ngalila yakunote yaHelase yize yapwile nangolo muchiyulo chaAlekesande Wamunene, kaha yalimanyinyine lika palanga nomu vejile nakuyifungulula kuli vaLoma. Omu kaposetolo Paulu ayile kuYulopu halwola lwatete, Masetonya yapwile ngalila yavaLoma. Paulu ayile kungalila kana mapapa katatu. (Vil 16:9)​—Tala Chihande B13.

• Mateve.

  Apwa vyuma vyakusoka mumeya vize vyalifwana namahongo, kaha veji kuvizachisanga hakutunga mitonga, jimbango, namato. Mateve vawazachishile nawa hakutunga vyuma vyakusonekaho vyakufwana nge mapapilo, kaha vavizachishilenga hakutunga mikanda yakuvunga yayivulu.—Klo 2:3.

• Mato akuTalashishe..

  Hakavanga vulukiso kana vayizachishilenga hakuvuluka mato aze ayilenga kuTalashishe (makumbi ano kukiko kuSpain). Kutwala muze, vulukiso kana vayizachishilenga kumato amanene aze atambukilenga jitunda jajisuku. Solomone naYehoshafwate vazachishilenga mato kana mukusekasana chavo.​—1My 9:26; 10:22; 22:48.

• Mawana akutetela.

  Mawana vahanyinenga akukafwa vatu vaze vanakalikiza. Mawana kana kavawavulukile hatoma muVisoneka VyachiHepeleuko, oloze Jishimbi jasolwele vyuma vatelele kulinga vaIsalele kuli vaka-kuhutwa.—Mat 6:2.

• Mazu akujimbula.

  Mazu akumaputukilo akujimbula samu aze asolola muka-kuyisoneka, chipwe kuhana mijimbu yeka, chipwe visaji vazachishile, chipwe kusolola vyuma vasonekela samu kana.—Tala mazu akujimbula ahali Jisamu 3, 4, 5, 6, 7, 30, 38, 60, 92, 102.

• Mbalaka yakuliwanyina.

  Vulukiso kana vayizachisa hakuvuluka mbalaka yaMose natavanaku yajila yize vajikile mupambo.—Klo 33:7; 39:32.

• Mbale.

  Kalunga wavaKanane uze vamwenenga kupwa nge mwenyautangatanga, muka-kuhana vula nalusemo. “Mbale” lyapwile nawa lijina vazachishilenga hakuvuluka tulunga vamulifuchi vaze kavapwile vavalemu chikumako. MuchiHepeleu, eli lizu lyalumbununa “Mwenyachuma; Mwata.”​—1My 18:21; Lom 11:4.

• Mbate.

  Chipimo chavyuma vyameya chakuheta kujilita 22, kweseka navyuma vawanyine vaka-kuvumbwojola, vize vyatwama nalijina kana. Vyesekelo vyavivulu vyavyuma vyaumu navyevi vyameya vavuluka muMbimbiliya vavilavile kuzachisa vyesekelo vyambate. (1My 7:38; Eze 45:14)—Tala Chihande B14.

• Mbelezembule.

  Lizu kana lyatalisa kuli Satana uze apwa mwangana chipwe muka-kuyula vandemone. Pamo lyafuma kulizu Mbale-zevuve, Mbale uze valemeselenga vaFwilishite kuEkelone.—2My 1:3; Mat 12:24.

•  Mbolo yakuzeneka chimbalwila.

  Yatalisa kumbolo yize kavahakile chimbalwilako.—Lus 16:3; Mak 14:12; 1Ko 5:8.

• Mbule.

  Lijina lyakakweji wakusokesa 8 wavaYuleya wakalenda yajila, kaha nawa hilijina lyakakweji wamuchivali wakalenda yavaka-mafuchi eka. Lizu kana lyafuma kulizu “kwima; kulovola,” kaha lwola kana lwaputukile hakachi kakakweji waOctober nakuheta hakachi kakakweji waNovember. (1My 6:38)—Tala Chihande B15.

• Mbumba; Muka-mbumba.

  Musongo waupi wachikova. MuVisoneka, mbumba kayalumbununa kaha nge muze twayitachikijila makumbi anoko nduma, mwomwo kayeshi kukwata kaha vatuko, oloze nauvwalo, najizuvo. Mutu uze ali nambumba vamuvuluka ngwavo muka-mbumba.—Lev 14:54; Luk 5:12.

• Mbwechi.

  Chitondo chipwe mukombo uze vambachilenga kuli mwangana kupwa chinjikizo chawata.—Kup 49:10; Hep 1:8.

• Melotake.

  Apwa kalunga wamunene wamunganda yaMbavilone. Omu Hammurabi, mwangana waMbavilone, kaha nawa muka-kutunga jishimbi atongwele Mbavilone kupwa nganda yayinene, Melotake (chipwe Malanduki) afumakanyine chikuma. Kutwala muze, tulunga veka vakwavo vanowele kaha ikiye apwile jino kalunga wamunene wavatu vavalemu muMbavilone. Kufumaho lijina Melotake (chipwe Malanduki), valishishishile navulukiso yakwamba ngwavo “Mbelu” (“Mwenya chuma”), kaha Melotake vamuvulukilenga ngwavo Mbele.—Yel 50:2.

• Meshiya.

  Lizu lize lyafuma kulizu lyachiHepeleu lyalumbununa ngwavo “vawavisa” chipwe “ou vawavisa.” Kaha muchiHelase valivuluka ngwavo “Kulishitu.”—Nda 9:25; Yow 1:41.

• Mikitame.

  Lizu lyachiHepeleu lize lyasoloka hamazu akujimbula aze atwama hajisamu jakuheta ku 6, (Ji 16, 56-60). Hilizu lyakujiminyina lize kavatachikiza kanawa mulyalumbunukilako, oloze lyalifwanako nalizu “kusoneka.”

• Mila.

  Ulilila walivumba lyamwaza uze vafumishilenga kuviputa vyamingonga, chipwe kutumitondo tumwe twaCommiphora. Mila vayihakilenga kumaji akuwavisa ajila. Vayihakilenga kuuvwalo chipwe hatuhela mangana yilovole livumba lyalupengopengo. Vayihakilenga nakumaji akunyachikisa mujimba, nakumaji akulikwita mumujimba. Mila vayizachishilenga nawa hakuwahisa mijimba yavafu mangana vavafunde.—Klo 30:23; Vis 7:17; Yow 19:39.

• Milambu.

  Fweto yize lifuchi limwe lyahanyine lifuchi likwavo, chipwe fweto yize twamina umwe ahanyine twamina mukwavo kupwa chinjikizo chakuliluula mangana vanehe kuunda, chipwe vavakinge. (2My 3:4; 18:14-16; 2Mi 17:11) Lizu kana valizachisa nakumitelo vateleselenga vatu.—Neh 5:4; Lom 13:7.

• Milikome.

  Apwa kalunga uze valemeselenga vaAmone, kaha vamuvuluka nawa ngwavo Moleke. (1My 11:5, 7) Kumakumishilo achiyulo chenyi, Solomone atungilile kalunga kanou wamakuli vihela vyakulunduka.—Tala MOLEKE.

• Mina.

  Vayivuluka nawa ngwavo mane mumukanda waEzekele. Mina yapwa chipimo, chipwe ndando yajimbongo. Kweseka nomu vahanjika vaka-kuvumbwojola ngwavo mina yimwe yatesekele hamwe najishekele 50, kaha shekele yimwe yapwile jingalamu 11.4, ngocho mina kaneyi vavuluka muVisoneka vyachiHepeleu yapwile jingalamu 570. Chasoloka nge kwapwile nawa mina yavamyangana, nge omu yapwile kuvite. MuVisoneka VyachiHelase vyaVaka-Kulishitu, mina yimwe yatesekele hamwe najindalakima 100. Yalemene jingalamu 340. Kaha jimina 60 jatesekele hamwe natalende yimwe. (Eza 2:69; Luk 19:13)—Tala Chihande B14.

• Moleke.

  Apwa kalunga kavaAmone. Kaha vamuvuluka nawa ngwavo Malakame, chipwe Milikome, chipwe Moloke. Lizu kana kalyapwa lijinako, oloze lyapwa kaha vulukiso. Jishimbi jaMose jetavishile kujiha mutu uze ahanyinenga vana venyi kuli Moleke kupwa wana wakulumba.—Lev 20:2; Yel 32:35; Vil 7:43.

• Moloke.—

  Tala MOLEKE.

• Muchima wakuzachila Kalunga.

  Chapwa kwivwa woma Yehova Kalunga, nakumulemesa, nakumuzachila, nakulyononona kuwata wenyi.—1Ch 4:8; 2Ch 3:12.

• Mujimbu wamwaza.

  MuVisoneka VyachiHelase vyaVaka-Kulishitu, mujimbu wamwaza wapwa himujimbu waWangana waKalunga nawou waulwilo mwomwo yakufwelela muli Yesu Kulishitu.—Luk 4:18, 43; Vil 5:42; Kus 14:6.

• Muka-kole waKulishitu.

  Eli lizu lyachiHelase likwechi ulumbunwiso uvali. Watete walumbununa muka-kole, chipwe muka-kwimanyina Kulishitu. Wamuchivali walumbununa Kulishitu wamakuli, uze nemanyinako kupwa nge Kulishitu. Vatu chipwe mauka, chipwe mazavu avaze valivuluka kupwa vaka-kwimanyinako Kulishitu, chipwe vaze valivuluka kupwa Meshiya, chipwe vaze valikanga kuli Kulishitu nakuli tumbaji twenyi vavavuluka ngwavo vaka-kole jaKulishitu.—1Yo 2:22.

• Muka-kulama.

  Mutu uze eji kulamanga vatu chipwe luheto, kakavulunyi naufuku, kuchina kuliwa. Kaha eji kulwezanga nawa vatu nge kuli ukalu. Vaka-kulama vemanyinenga hajikembwe jajinganda, nahatuposhi mangana vamone vatu hahasuku shimbu kanda vahete kwakamwihi nanganda. Kwapwilenga nawa vaka-kulama vapwilenga maswalale vaze valaminenga chilombo. Mujila yachifwanyisa, vapolofweto vapwilenga vaka-kulama mwomwo valaminenga lifuchi lyaIsalele nakuhuhumuna vatu vyakunonga chapwile nakwiza.—2My 9:20; Eze 3:17.

• Muka-kulweza vyuma vyakulutwe.

  Mutu uze alivuluka ngwenyi atwama nangolo jakulweza vatu vyuma navikasoloka kulutwe. Vapilishitu vaka-visava, navaka-kutahisa vashipilitu, navaka-kuzachisa vatanganyika, navatu veka vangachize vavavuluka muMbimbiliya kupwa vaka-kulweza vyuma vyakulutwe.—Lev 19:31; Lus 18:11; Vil 16:16.

• Muka-kumona vyakulutwe.

  Mutu uze vakafwilenga kuli Kalunga amone mwayile muchima waKalunga. Kalunga asokwelele meso enyi amone, chipwe kumona mwalumbunukila vyuma vize kavatachikijile vatuko. Lizu lyachiHepeleu vazachisa, lyafuma kulizu lize lyalumbununa “kumona.’ Echi chapwile kumona chivene, chipwe kumona mujila yachifwanyisa. Vatu vaze vamwenenga ukalu vayilenga  kuli muka-kumona vyakulutwe avalweze vyakulinga.—1Sa 9:9.

• Muka-kusoneka.

  Mutu uze anungulwilenga Visoneka VyachiHepeleu. Halwola luze Yesu apwile hano hamavu, lizu kana lyatalikishile kulizavu lyamalunga vaze valinangwile Jishimbi. Malunga kana vemanyinyine Yesu nakole.—Eza 7:6; Mak 12:38, 39; 14:1.

• Muka-kutahisa vashipilitu.

  Mutu uze eji kwambanga ngwenyi eji kuhanjikanga navafu.—Lev 20:27; Lus 18:10-12; 2My 21:6.

• Muka-kutahisa vatanganyika.

  Mutu uze alinangula omu lyeji kutambukanga likumbi nakakweji navatanganyika mangana atachikize vyuma vyakulutwe.—Nda 2:27; Mat 2:1.

• Muka-kuwanyisa.

  Mutu uze eji kuwanyisanga vatu chipwe mazavu avatu avali. Mose naYesu vavavuluka muVisoneka ngwavo vaka-kuwanyisa. Mose apwile muka-kuwanyisa walushiko lwamuJishimbi, Yesu nawa apwile muka-kuwanyisa walushiko lwaluhya.—Nga 3:19; 1Ch 2:5.

• Muka-kuzachila.

  Lizu lyachiHelase di·aʹko·nos, lize valumuna ngwavo “muka-kuzata” chipwe “ngamba.” “Muka-kuzachila” apwa mutu uze eji kukafwanga lizavu lyavakulwane kuzata milimo yamuchikungulwilo. Lunga kana atela kukavangiza jishimbi jamuMbimbiliya numbanyi atengamo kuzata mulimo kanou.—1Ch 3:8-10, 12.

• Muka-Nazaleta.

  Lijina lyaYesu mwomwo afumine kunganda yaNazaleta. Chasoloka nge lizu kana lyalifwanako nalizu lyachiHepeleu vazachisa hali Isaya 11:1 ngwavo “muketengo.” Kutwala muze, lizu kana valivulukilile navaka-kumukavangiza Yesu.—Mat 2:23; Vil 24:5.

• Mukanda wachilambu.

  Wapwa mukanda wachilambu chamukoko, chipwe chapembe, chipwe chamwanangombe muze vasonekelenga. Mukanda kana wapwile wakukola kuhambakana wamateve, kaha vauzachishile kutunga mikanda yakuvunga yaMbimbiliya. Mikanda yamalambu yize Paulu alwezele Chimoteu mangana amuneheleyo yapwile pamo yaVisoneka vyachiHepeleu. Mikanda yaKuvunga YamuKalungalwiji waKufwa yimwe vayisonekele hamalambu.—2Ch 4:13.

• Mukanda wakuvunga.

  Chuma chachisuku chakutunga nalilambu chipwe namateve chakuya muusuku, chize vasonekele kusali yimwe nakuchivungila kuchitondo. Visoneka vavisonekelenga nakuvinungulwila hamikanda yakuvunga, mikanda yize yapwilengako halwola luze vasonekelenga Mbimbiliya.—Yel 36:4, 18, 23; Luk 4:17-20; 2Ch 4:13.

• Muka-ujila.

  Mutu uze eji kulinganga ujila, chikumanyi mangana awanyineho jimbongo. (Lizu lyachiHelase “muka-ujila,” porʹne, lyafuma kulizu lize lyalumbununa ngwavo “kulanjisa.”) Lizu kana lyazata chikumanyi kuli pwevo, numba tuhu malunga vaka-ujila navakiko vavavuluka muMbimbiliya. Ujila vaukanyishile muJishimbi jaMose, kaha jimbongo vondelenga vaka-ujila kavajitavishile kujihana kupwa wana muchihela chajila chaYehovako. Oloze vaka-mafuchi eka vazachishilenga vaka-ujila vakutembele mangana vawanyinengaho jimbongo. (Lus 23:17, 18; 1My 14:24) Mbimbiliya yazachisa nawa lizu kana mujila yachifwanyisa hakuvuluka vatu, namafuchi, namauka aze eji kulemesanga makombelo okunyi ngwavo vapwa vaka-kulemesa Kalunga. Chakutalilaho, “Mbavilone Yayinene,” vayivuluka mumukanda waKusoloka ngwavo muka-ujila mwomwo yinalikate navatwamina vakaye mangana vayihane ngolo naluheto.—Kus 17:1-5; 18:3; 1Mi 5:25.

• Mukulwane wavaka-kwimba.

  Mumukanda waJisamu, eli lizu lyachiHepeleu lyatalisa kuli mutu uze awahishilenga myaso, nakutumbula myaso hakwimba, kaha anangwilenga vaLevi vaka-kwimba nakulihitulwisa navo mumyaso. Shimbu jimwe atetekelelenga vakwavo halwola vapwilenga nakwimba myaso kulizavu. MujiMbimbiliya jimwe, lizu kana valyalumuna ngwavo “muka-kwimba wamunene,” chipwe “muka-kutumbula myaso.”—Ji 4:Maz; 5:Maz.

• Mukulwane.

  Lunga wakukola, oloze muVisoneka apwile lunga uze vahanyine wata namulimo wakulama vatu mundandanda chipwe mulifuchi. Lizu kana valizachisa kutalisa nawa kuli vaka-kuyoya vamwilu vavuluka mumukanda waKusoloka. Lizu lyachiHelase pre·sbyʹte·ros, valyalumuna ngwavo “mukulwane” hakuvuluka vaze veji kutwaminyinanga muchikungulwilo.—Klo 4:29; Vis 31:23; 1Ch 5:17; Kus 4:4.

• Mulimo wajila.

  Mulimo wajila uze wapandama kukulemesa Kalunga.—Lom 12:1; Kus 7:15.

• Mumba.

  Wapwa chikungo chakusongoloka chize vahakilenga kumutongo uze vazachishilenga vanjimi hakutembula vimuna. Mumba vaufwanyisa kumazu amuka-mangana aze eji kulingisanga uze nawevu akavangize vyuma vanamulweze. Hanjikiso yakwamba ngwavo ‘kwasa lihinji kumyumba’ vayifumisa kungombe wamanya uze ashilenga lihinji lyenyi kumumba uze vamuchokelenga. Chuma kana chamulingishile alilemeke ivene.—Vil 26:14; Kuy 3:31.

• Musongo wachihita.

  Musongo uze weji kutandanga washiwashi nakusambukila vatu vavavulu chikuma, kaha unahase kujiha vatu. Musongo kana watalisa kakavulu kukusopesa chaKalunga.—Kla 14:12; Eze 38:22, 23; Amo 4:10.

• Mute-lavene.

  Lizu lize lyatwama hamazu akujimbula ahali Samu 9. Lizu kana valizachishilenga “kutalisa kukufwa chamwana walunga.” Vatu vamwe vamba ngwavo lyapwile lijina, chipwe pamo mazu akuputukilako hakusaka kwimba samu kaneyi.

• Mutondo wakutachikijila kuwaha nakupihya.

  Mutondo uze wapwile mumilemba yaEtene uze Kalunga azachishile kupwa chinjikizo chakusolola ngolo jenyi jakuhana vatu jishimbi jakutachikiza “kuwaha nakupihya.”—Kup 2:9, 17.

• Mutondo wakuyoya.

  Mutondo uze wapwile mumilemba yaEtene. Mbimbiliya kayalumbununa nge mutondo kana wapwile namihako yakuneha kuyoyako, oloze wemanyinyineko lushiko lwaKalunga lwakuhana kuyoya chahaya myaka yosena kuli vaze etavishile kulya kumihako yawo.—Kup 2:9; 3:22.

• Mutu wakulihehwa; Mutu wakusokoka.

  Muchiyulo chavaLoma, “mutu wakulihehwa” apwile uze asemukile wakulihehwa, uze apwile nalisesa lyakupwa mwenyalifuchi. Oloze “mutu wakusokoka” apwile uze vasokwele muundungo. Mutu uze vasokwele kweseka najishimbi vamuhanyine lisesa lyakupwa mwenyalifuchi  lyavaLoma, oloze kavamwitavishile kupwa havihela vyakuyula lifuchiko. Nge mutu vamusokwele muundungo chakuzeneka kukavangiza jishimbi, kaha mutu kana kavamuhanyine lisesa lyakupwa mwenyalifuchiko.—1Ko 7:22.

• Mutwe.

  Chuma chize vahakile helu lyapanda. Jipanda jivali jize vavuluka ngwavo Yakine naMbowaze vajimikile kulutwe lwatembele yaSolomone. (1My 7:16)—Tala Chihande B8.

• Muze Mwajila Chikuma.

  Kapete kamukachi chikuma kamutavanaku namutembele muze valaminyinenga chikasha chalushiko. Kuhakila kuli Mose, kapilishitu wakulitulaho ikiye kaha vetavishile kwingila muze Mwajila Chikuma, kaha engililengamo kamwe mumwaka haLikumbi lyaKulinga chaKufwika haShili.—Klo 26:33; Lev 16:2, 17; 1My 6:16; Hep 9:3.

• Muze Mwajila.

  Kapete kakulivanga kakanene katavanaku chipwe katembele, kaze kalihandununa namuze Mwajila Chikuma, mukapete kamukachi chikuma. Jino mukapete kamutavanaku kaze vavuluka ngwavo Muze Mwajila, mwapwile chitumbikilo chamanongo chaulu, nalijiko lyaulu lyakulumbila vize vyalivumba lyamwaza, namesa vahakilenga jimbolo jakuhana Kalunga, navinoma vyaulu. Kaha mukapete kamutembele kaze vavuluka ngwavo muze Mwajila mwapwile lijiko lyaulu lyakulumbila, navitumbikilo 10 vyamanongo, najimesa 10 vahakilenga jimbolo jakuhana Kalunga. (Klo 26:33; Hep 9:2)—Tala Chihande B5 na B8.

• Muzungu.

  Wapwa vihwahwa vize veji kufumisanga kumanona hakuzungula chipwe hakupekula. Muzungu vauzachisa nawa kupwa chinjikizo chavyuma vize vyapwa vyamokomoko, vyaufwefwelekete.—Ji 1:4; Mat 3:12.

• Mwaji.

  Mitondo yayisasu chikuma, yalivumba chikuma. MuMbimbiliya, lizu mwaji valizachisa mujila yachifwanyisa hakulumbununa vyuma vyavipi vyeji kufumanga hakulinga ujila, nakuhengesa chiyulo, nakulikanga kuli Kalunga. Hali Kusoloka 8:11, lizu “mwaji” lyemanyinako vyuma vyavisasu chikuma, vyaulembe, kaha vavivuluka nawa ngwavo usungu.—Lus 29:18; Vis 5:4; Yel 9:15; Amo 5:7.

• Mwaka waKusokoka.

  Mwaka himwaka wakusokesa mumyaka 50, kufuma haze vaIsalele vengililile muLifuchi lyaLushiko. Mumwaka kana, kavatumbilenga jimbutoko, kaha nawa vandungo vavaYuleya vavasokwelenga. Mavu auswana aze valanjishile vawakindulwishile kuli venyawo. Mwaka waKusokoka wapwile mwaka wakulinga chiwanyino, mwaka wakulihehwa uze vaIsalele valivwishilenga kuwaha nge muze chapwilenga hakavanga omu avasakwile Kalunga.—Lev 25:10.

• Mwanakalwiji.

  Chinema chipwe muhongi uze weji kupwanga nameya mungonde yavula, kaha hinauma mujingonde jeka. Lizu kana linahase kutalisa nawa kumwanakalwiji ivene. Vana vatulwiji vamwe kavominengako mwomwo meya avo afuminenga kutuselwoke. Muvisoneka vimwe, vazachisa “chinema” kutalisa kumwanakalwiji.—Kup 26:19; Kla 34:5; Lus 8:7; 1My 18:5; Yop 6:15.

• Mwanamutu.

  Lizu lize lyasoloka mapapa kafwe 80 muMikanda yaMujimbu Wamwaza. Vulukiso kana yatalisa kuli Yesu Kulishitu, kaha yasolola nge omu asemukile, apwile mutu keshi nge muka-kuyoya wakushipilitu uze alyalumwine nakupwa namujimba wautuko. Yasolola nawa nge Yesu mwakatesamo upolofweto uze vasoneka hali Ndanyele 7:13, 14. MuVisoneka vyachiHepeleu, vulukiso kana vayizachishile hakuvuluka Ezekele naNdanyele, kaha yasolola chihandwa chapwile hali ava vatu vapwile nakuhanjikilako Kalunga, naKalunga ivene uze mwenyamazu vambulwilenga.—Eze 3:17; Nda 8:17; Mat 19:28; 20:28.

• MwanaNdavichi.

  Lizu lize vazachisa hakuvuluka Yesu, lyakusolola nge apwa Swana walushiko lwaWangana vashikile kukaswana kuli mutu umwe wakutanga yaNdavichi.—Mat 12:23; 21:9.

• Mwangana waMwilu waPwevo.

  Vulukiso vahanyine kalunga wapwevo uze valemeselenga vaIsalele vakulikanga mumakumbi aYelemiya. Vamwe vamba ngwavo pamo apwile Ishita (Ashitate), kalunga wapwevo wavaka-Mbavilone. Lijina lyakalunga wakulivanga wavaka-Samelya, Inana, lyalumbununa ngwavo “Mwangana waMwilu waPwevo.” Kalunga kana apwile nawa kalunga walusemo. Ashitate vamuvuluka nawa ngwavo “Mwanapwevo waMwilu” mumikanda yavaka-Ejipitu.—Yel 44:19.

• Mwaso waVaka-kukanduka kuNganda.

  Mazu akujimbula aze atwama hali Jisamu 120 nakuheta ku 134. Mazu kana atwama naulumbunwiso wauvulu, oloze vatu vavavulu vamba ngwavo eji jisamu 15 vajimbilenga kuli vaIsalele vaze vawahilililenga ‘hakukanduka’ kuYelusalema nakulemesa Kalunga. Yelusalema yapwililile helu kujipili jaYuta, kaha vakandukilenga kuze hakuya kuviwanyino vyavinene vitatu vyamumwaka.

• Mwono.

  Lizu lize lyafuma kulizu lyachiHepeleu neʹphesh nakulizu lyachiHelase psy·kheʹ. Mbimbiliya yazachisa lizu kaneli mujijila jakulisezaseza, kaha linahase kutalisa (1) kuvatu, (2) kutunyama, chipwe (3) kukuyoya chamutu chipwe chakanyama. (Kup 1:20; 2:7; Kla 31:28; 1Pe 3:20; tala nawa vinyikilo vyamwishi.) Mukwitava chachivulu, lizu “mwono” valilumbununa mujijila jeka. Oloze Mbimbiliya yasolola ngwayo lizu neʹphesh napsy·khe,ʹ lyatalisa kuchuma chize chikwechi mujimba, chipwe chize navamona nakukwata, chipwe kuchuma chize cheji kufwanga. MuMbimbiliya yino, awa mazu achiHepeleu nachiHelase, vanawazachisa kweseka nomu analumbunukila muvesi, kaha vanazachisa mazu akufwana nge “kuyoya,” “vyuma vyakuyoya,” “mutu,” “ami” “mwono wami.” Kaha mujivesi jajivulu, mazu akwinyikila chamwishi anasolola ulumbunwiso ukwavo walizu “mwono.” Heshoho vanavuluka lizu “mwono,” numba lipwa muvesi chipwe mumazu akwinyikila chamwishi, lyatela kumihana ulumbunwiso nge ou tunavuluka lyehi. Oloze nge vanalizachisa kukuzata chuma namwono wosena, kaha linalumbununa kuzata chuma kana namuchima wosena, chipwe kuchizata nakuyoya chamutu chosena. (Lus 6:5; Mat 22:37) Kaha mujivesi jikwavo nawa, mazu kana vanahase kuwazachisa kuchipepa chipwe kuvyuma chafwila chuma chakuyoya. Anahase kutalisa nawa kumufu chipwe kumujimba wakufwa.—Kla 6:6; Vis 23:2; Isa 56:11; Han 2:13.

N

•  Najili.

  Lizu lize lyafuma kulizu lyachiHepeleu lize lyalumbununa ngwavo “Mutu Uze Vasakula,” “Mutu Uze Alihana,” “Mutu Uze Alihandula.” Kwapwile miyachi yivali yavaNajili. Umwe wapwile wavaze valihanyine vavene, kaha ukwavo wapwile wavaze vatongwele kuli Kalunga. Lunga chipwe pwevo alishingile ivene kuli Yehova mangana apwenga Najili hatando yimwe. Vaze valihanyine vavene kupwa vaNajili valaminenga jishimbi jino jitatu: Kavanwinenga wala chipwe kulya vyuma vize vyafumine kumihako yamivinyo, chipwe kuteula jikambu javo, chipwe kukwata mujimba wamufuko. VaNajili vaze atongwele Kalunga vatelele kupwa vanajili mukuyoya chavo chosena, kaha Yehova avahanyine jishimbi jize vatelelele kukavangiza.—Kla 6:2-7; Kuy 13:5.

• Nalatu.

  Maji achiluluka alivumba lyamwaza andando yayinene, aze vafumishile kutumitondo twanalatu (Nardostachys jatamansi). Hakuwana nge maji analatu apwile andando yayinene, vatu vawafutwilenga namaji eka amokomoko. Kaha lwola lumwe vatu vasungilenga nalatu yamakuli. Mako naYowano vambile ngwavo Yesu vamukwichile “nalatu hayohayo.”—Mak 14:3; Yow 12:3.

• Ndalakima.

  MuVisoneka VyachiHelase vyaVaka-Kulishitu, lizu ndalakima lyatalisa kulumbongo lwapalata lwachichele lwavaHelase luze lwalemene jingalamu 3.4 halwola luze. Kaha MuVisoneka VyachiHepeleu, vavulukamo Ndalakima yaulu yamumakumbi avaPeleja yize yatesekele hamwe nandalike. (Neh 7:70; Mat 17:24)—Tala Chihande B14.

• Ndalike.

  Lumbongo lwaulu lwachichele lwavaPeleja luze lwalemene jingalamu 8.4. (1Mi 29:7)—Tala Chihande B14.

• Ndando yakusokola.

  Ndando yize veji kufwetanga mangana vasokole mutu muufunge, nakushili, nakukuyanda, chipwe vahone kumuzangamisa. Ndando kana kayapwilenga jimbongo kahako. (Isa 43:3) Ndando yakusokola vayihanyinenga mujijila jakulisezaseza. Chakutalilaho, vatwatwa vamalunga vosena, chipwe vatwatwa vatunyama muIsalele vapwilenga vaYehova. Ngocho vatelelele kuhana ndando yakusokola, chipwe ndando yakukula numbanyi vatwatwa kana vavasokole kufuma kukuvazachisa kumulimo waYehova. (Kla 3:45, 46; 18:15, 16) Kachi nge mutu apwile nangombe wakutenuka, oloze mwahona kumulama, kaha uze ngombe mwajiha mutu, uze mwenyangombe vamulwezele kufweta ndando yakusokola mangana vazeneke kumujiha. (Klo 21:29, 30) Oloze mutu uze ajihile mukwavo chakusakula mumuchima wenyi, kavamwitavishile kufweta ndando yakusokolako. (Kla 35:31) Mbimbiliya yashindakanya chikuma handando yakusokola yize Kulishitu ahanyine omu afwile mangana asokole vatu vakwononoka kushili nakukufwa.—Ji 49:7, 8; Mat 20:28; Efw 1:7.

• Ndangone.

  Apwa kalunga kavaFwilishite. Kwafuma lizu kana kavatachikizakoko, oloze vaka-kulinangula vamba ngwavo lyapwa lizu lyachiHepeleu dagh (ishi).—Kuy 16:23; 1Sa 5:4.

• Ndekapole.

  Jinganda javaHelase, hakavanga japwilenga 10 (kufuma kulizu lyachiHelase deʹka, kulumbununa “likumi,” kaha poʹlis, kulumbununa “nganda”). Lyapwile nawa lijina lyangalila yakumututuko waKalungalwiji waNgalileya naKalwiji Yotau mwomwo kukiko kwapwilenga jinganda kana. Mujinganda kana mukiko valinangwililenga chisemwa chavaHelase namilimo yavo. Yesu ahichile mungalila kana, oloze kakwatwama mujimbu wakusolola nge Yesu ayile nakujinganda kanako. (Mat 4:25; Mak 5:20)—Tala Chihande A7 na B10.

• Ndenali.

  Lumbongo lwapalata lwachichele lwavaLoma luze lwalemene jingalamu 3.85. Lumbongo kana lwapwile namutwe waKesale kusali yimwe. Ndenali yimwe yapwile ndando vafwetelenga mutu uze azachile milimo likumbi lyamuundu, kaha nawa yikiko vaLoma vateleselenga vaYuleya “mitelo.” (Mat 22:17; Luk 20:24)—Tala Chihande B14.

• Nehilote.

  Lizu lize lyatwama hamazu akujimbula ahali Samu 5, oloze kavatachikiza ulumbunwiso walyoko. Vamwe vamba ngwavo lyapwa chisaji chakwimbila, mwomwo valyesekesa kulizu lyachiHepeleu lyakwamba ngwavo cha·lilʹ (panda). Oloze linahase kulumbununa lumbendo.

• Ngalila yaJipili yaLevanone.

  Ngalila yimwe hajingalila jivali jize jatwama najipili mulifuchi lyaLevanone. Ngalila yajipili yaLevanone yapwila kumulauko, kaha ngalila yakuzeneka jipili yaLevanone yapwila kumututuko. Kaha hakachi hatwama chinema chawilo chize chahandununa jingalila kaneji jivali. Ngalila yajipili yaLevanone yafuma kwakamwihi nangenge yakalungalwiji waMendetelenya, kaha yazezuka helu najimita jakufuma ha 1,800 nakuheta ha 2,100. Kushikulu, Levanone yapwilenga namitondo yamishitale yize vamwenenga kupwa yayilemu kuli vaka-mafuchi aze ahachileko. (Lus 1:7; Ji 29:6; 92:12)—Tala Chihande B7.

• Nganda yaNdavichi.

  Lijina valukile nganda yaYevuse omu alingile Ndavichi hanayifungulula lyehi nakutungamo nganda yenyi yawangana. Vayivuluka nawa ngwavo Zeyone. Yatwamina kumututuko waYelusalema, kaha nawa hingalila yinashimbula chikuma muYelusalema.—2Sa 5:7; 1Mi 11:4, 5.

• Ngehena.

  Lijina lyachiHelase lyakuvuluka Chinema chaHinome, chize chapwilile kumulauko waYelusalema yakushikulu. (Yel 7:31) Chihela kana  vachivulukile muupolofweto ngwavo kukiko navakambilanga mijimba yakufwa. (Yel 7:32; 19:6) Kakwatwama unjiho wasolola nge tunyama chipwe vatu vavambililenga vavatonyi muNgehena mangana vayekelenga muzeko. Shikaho, Ngehena kayapwa chihela chize vatu kavamona namesoko, chize veji kuyanjishilanga myono yavatu hakuvayekelesa mukakahya haya myaka yosenako. Oloze Ngehena vayizachishile kuli Yesu natumbaji twenyi kwimanyinako kuzangamisa chahaya myaka yosena, chikiko “kufwa chamuchivali,” kulumbununa kunonga chahaya myaka yosena.—Kus 20:14; Mat 5:22; 10:28.

• Ngela.

  Pezu yakuheta mujingalamu 0.57. Ngela yimwe yesekele hamwe najishekele 1/20. (Lev 27:25)—Tala Chihande B14.

• Ngichite.

  Lizu lyavaka-kwimba myaso lize vatu kavatachikiza kanawa omu lyalumbunukilako. Oloze chasoloka nge lyafuma kulizu lyachiHepeleu gath. Vatu vamwe vashinganyeka ngwavo lyapwa lizu lyamyaso lize lyatalisa kukukela vinyo, mwomwo lizu gath lyalumbununa chikamwino.—Ji 81:Maz.

• Ngileyate.

  Yapwile ngalila yawilo yakumututuko waKalwiji Yotau yize yahetele kunote nakusulo yaChinema chaYavoke. Shimbu jimwe, lizu kana lyatalisa nawa kungalila yavaIsalele yosena yakumututuko waYotau, kuze kwatwaminenga miyachi yaLuvene, naNgate, nachimbwa chamuyachi waManase. (Kla 32:1; Yos 12:2; 2My 10:33)—Tala Chihande B4.

• Nguvulu.

  Mukulwane wangalila uze vazachishilenga kuZango yaJishimbi javaLoma. Apwile nangolo jakuyula ngalila yosena, najeji jakuyula maswalale, oloze milimo yenyi vayihehwojwele kuli vaze vakuZango yaJishimbi.—Vil 13:7; 18:12.

• Nyisane.

  Lijina lyalihya lyakakweji Avive. Apwile kakweji wakulivanga wavaYuleya wakalenda yajila, kaha nawa hilijina lyakakweji wakusokesa 7 wakalenda yavaka-mafuchi eka, lize vazachishilenga vatu omu vafumine muufunge muMbavilone. Lwola kana lwaputukile hakachi kakakweji waMarch nakuheta hakachi kakakweji waApril. (Neh 2:1)—Tala Chihande B15.

P

• Palachise.

  Milemba yamwaza, chipwe litepa lyakufwana nge milemba. Etene yikiko yapwile chihela chatete kupwa palachise, kaha Yehova ayihakileko mangana mutwamenga vatu vatete vavali. Omu Yesu ahanjikile kuli chihwanga uze apwile kwakamwihi naikiye hachitondo chakuyanjishila, asolwele nge mavu nawakapwa palachise. Hali Wavaka-Kolinde 2, 12:4, lizu palachise lyatalisa kupalachise yakulutwe, kaha hali Kusoloka 2:7 lyatalisa kupalachise yamwilu.—Mwa 4:13; Luk 23:43.

• Panda yajila yamalolwa.

  Panda yakwimana, yize vatungile chikumanyi namalolwa. Kaha chasoloka nge vayifwanyishile kuulunga waMbale chipwe kuulunga watulunga veka vamakuli.—Klo 23:24.

• Panda yajila yamutondo.

  Lizu lyachiHepeleu (ʼashe·rahʹ) lyalumbununa (1) panda yajila yamutondo yize yemanyinyineko Ashela, kalunga wapwevo wavaKanane walusemo, (2) chifwanyisa chakalunga ivene wapwevo Ashela. Jipanda kana japwile chikumanyi jamitondo kaha vajijikilenga hamavu. Chasoloka nge japwilenga jipanda jakuzeneka kusonga chipwe vene mitondo.—Lus 16:21; Kuy 6:26; 1My 15:13.

• Panda.

  Panda yakwimika, chipwe cheshocho chuma chalifwanyine nanguji. Jipanda jimwe vajimikile mangana vanukenga vyuma vimwe vyalingiwile kushikulu. Jipanda jakwimika vajizachishile kutembele nakujizuvo jawangana atungile Solomone. Vaka-mafuchi eka vemikile jipanda jajila jakuzachisa mukwitava chavo chamakuli, kaha shimbu jimwe navaIsalele valingile vyuma kana. (Kuy 16:29; 1My 7:21; 14:23)—Tala MUTWE.

• Paseka.

  Chiwanyino chize valingilenga kamwe hamwaka halikumbi lyakusokesa 14 lyaAvive (vavulukile jino ngwavo Nyisane) chakwanuka likumbi vasokokele vaIsalele kufuma muEjipitu. Hachiwanyino kana, vajihilenga mukoko (chipwe pembe) nakumwocha, kaha vamulile navisakwola vyavisasu nambolo yakuzeneka chimbalwila.—Klo 12:27; Yow 6:4; 1Ko 5:7.

• Peleja; VaPeleja.

  Lifuchi navatu jalyo vaze kakavulu vavulukila hamwe navaMete. Kushikulu, vaPeleja vatwaminenga kaha kungalila yakumulauko waIran. Jino muchiyulo chaKuluse Wamunene (uze vavuluka kuli vaka-kulinangula mijimbu yakushikulu ngwavo ise apwile wakuPeleja, kaha naye apwile wakuMete), vaPeleja vapwilenga nangolo hali vaMete, numba tuhu mawangana osena avali apwilenga lika nakuyula. Kuluse afungulwile Wangana waMbavilone mu 539 B.C.E., kaha etavishile vaYuleya vaze vapwile muufunge vakinduluke kulifuchi lyavo. Wangana waPeleja wayulilenga ngalila yakufuma kuKalwiji waIndus kumututuko nakuheta kuKalungalwiji waAegean kumulauko. VaPeleja vayulilenga vaYuleya palanga nomu Alekesande Wamunene avafungulwile mu 331 B.C.E. Ndanyele amwene ou Wangana waPeleja muchakumwenesa, kaha nawa vauvuluka muMbimbiliya mumukanda waEzela, naNehemiya, naEseta. (Eza 1:1; Nda 5:28)—Tala Chihande B9.

• Pendekoseta.

  Chiwanyino chamuchivali haviwanyino vyavinene vitatu vize malunga vavaYuleya vosena valingililenga muYelusalema. Pendekoseta lyapwa lizu lize lyalumbununa “Likumbi lyaKusokesa 50.” Lyapwa lijina vazachisa muVisoneka  VyachiHelase vyaVaka-Kulishitu, kaha muVisoneka VyachiHepeleu valivuluka ngwavo Chiwanyino chaKwaha chipwe Chiwanyino chaVyalumingo. Chiwanyino kana vachilingilenga halikumbi lyakusokesa 50, kulava kufuma haNyisane 16.—Klo 23:16; 34:22; Vil 2:1.

• Pili yaAlese.

  Pili yayisuku yamuAtene, kumulauko waAkulopole. Lyapwile nawa lijina lyazango yakusopela. Vaka-Shitoke navaka-Epikule vaze valinangwile mangana akaye vatwalile Paulu kuPili yaAlese mangana akalumbunune vyuma afwelelele.—Vil 17:19.

• Pimu.

  Yapwa pezu, kaha nawa ndando yize vaFwilishite vafwetesele vatu hakuvahotwela vinoma vyavo. Malolwa akupezalisa amavulu vavumbwile muIsalele apwile nalizu lyavasona vakushikulu vachiHepeleu ngwavo “pimu.” Pezu yalilolwa limwe yapwile jingalamu 7.8, yesekele hamwe navimbwa vivali vyashekele vyakusokesa muvimbwa vitatu.—1Sa 13:20, 21.

• Poneya.—

  Tala UJILA.

• Pulime.

  Chiwanyino chize valingilenga ha 14 na 15 mukakweji waAtale. Chiwanyino kana chapwile chakwanukilaho kuyovoka chavaYuleya omu vambile kuvajiha mulwola lwaLisano Eseta. Lizu pu·rimʹ lize kalyapwa lyachiHepeleuko lyalumbununa ngwavo “tutachikijilo.” Chiwanyino chaPulime, chipwe Chiwanyino chaTutachikijilo, chafuma havyuma alingile Hamane uze azachishile Pule (Katachikijilo) hakusakula likumbi ajinyine kunongesa vaYuleya.—Ese 3:7; 9:26.

S

• Samaliya.

  Nganda yayinene yawangana wakunote wamiyachi likumi yavaIsalele hamyaka 200. Lyapwile nawa lijina lyangalila yawangana wavo yosena. Nganda kana vayitungilile hapili yaSamaliya. Mulwola lwaYesu, Samaliya yapwilenga lijina lyangalila yavaLoma yize yapwile hakachi, oku Ngalileya yili kunote, kaha Yuta yili kusulo. Kakavulu Yesu akanyinenga kwambulwila mungalila kana, oloze shimbu jimwe omu ahichilengamo ahanjikile navatu vaze vatwaminengamo. Petulu azachishile sapi yamuchivali yachifwanyisa yakuWangana omu vaSamaliya vatambwile shipilitu yajila. (1My 16:24; Yow 4:7; Vil 8:14)​—Tala Chihande B10.

• Sambata.

  Lizu kana muchiHepeleu lyalumbununa “kuhwima” chipwe “kulitwamina.” Lyapwa likumbi lyakusokesa 7 muchalumingo chavaYuleya (kufuma hakulauka chalikumbi haChitanu nakuheta hakulauka chalikumbi haSateli). Makumbi eka aviwanyino mumwaka, vawavulukilenga nawa ngwavo jisambata, kuhakilako namwaka wakusokesa 7 nawou wakusokesa 50. Halikumbi lyaSambata, vatu kavazachilenga milimoko. Vapilishitu kaha vakiko vazachilenga milimo muchihela chajila. Hamyaka yaSambata, mavu kavawaliminengako, kaha vaHepeleu kavakanjikijile vakwavo vaHepeleu vafwete mikuliko. MuJishimbi jaMose, jishimbi jakupandama kuSambata kajakaluhwileko, oloze vatwamina vamukwitava vaputukile kuhakilako chindende chindende. Kaha kuheta kumakumbi aYesu chapwile chachikalu kukavangiza jishimbi kana.—Klo 20:8; Lev 25:4; Luk 13:14-16; Kol 2:16.

• Samu.

  Mwaso wakwalisa Kalunga. Jisamu japwile myaso yize vembilenga vaka-kulemesa Kalunga, kaha vayimbilenga kuvatu vaze vakungulukilenga valemese Yehova Kalunga kutembele yenyi muYelusalema.—Luk 20:42; Vil 13:33; Yak 5:13.

• Satalape.

  Muhato chipwe nguvulu wangalila muwangana waMbavilone nawou waPeleja. Satalape vamutongwelenga kuli mwangana apwenga twamina wamunene.—Eza 8:36; Nda 6:1.

• Satana.

  Lizu lyachiHepeleu lize lyalumbununa ngwavo “Muka-kulikanga.” Mumalimi akulivanga, eli lizu muka-kulikanga lyatalisa kuli Satana Liyavolo, Muka-kole wamunene waKalunga.—Yop 1:6; Mat 4:10; Kus 12:9.

• Sela.

  Lizu lize lyatalisa kukwimba myaso, chipwe kukuhituluka mumyaso lize lyatwama mumukanda waJisamu naHambakuke. Linahase kulumbununa kuhwimina hakwimba myaso yamazu, chipwe myaso yavisaji, chipwe hosena havali, mangana mutu alihulike nakushinganyeka, chipwe alingise mazu nembi evwakane. MuSeptuagint YachiHelase lizu di·aʹpsal·ma, valivuluka ngwavo “mwaso wakwimba hashimbu yayindende.”—Ji 3:4; Ham 3:3.

• Senge yaSolomone.

  Mumakumbi aYesu, yapwile jila yakuhichila yakutembele yize yapwile namulungu helu kumututuko wachipango chakuweluka. Vatu vafwelela ngwavo yapwile senge yize yalitulileko kutembele atungile Solomone. Yesu atambukilenga musenge kana “hangonde yachishika,” kaha mukiko nawa valiwanyinyinenga vaka-Kulishitu mangana valemese Kalunga. (Yow 10:22, 23; Vil 5:12)—Tala Chihande B11.

• Sepelete.

  Yapwa muyachi watiliku (Triticum spelta) uze kawapwa wamwaza chikumako, kaha manona awo apwa amakalu kuwahandununa kumuzungu.—Klo 9:32.

• Shekele.

  Lilolwa lyavaHepeleu lyakupezalisa, kaha nawa ndando yajimbongo. Shekele yimwe yalemene jingalamu 11.4. Kaha hanjikiso yakwamba ngwavo “shekele yamuchihela chajila” yasolwele nge lilolwa lyakupezalisa lyatelele kupwa lyakwoloka, chipwe lyatelele kupwa napezu yoyimwe nalilolwa lyakupezalisa valaminyinenga mutavanaku. Chasoloka nge kwapwile nawa shekele yamwangana (yize yalihandunwine najishekele  jeka), chipwe lilolwa lyakupezalisa lize valaminyinenga kuzuvo yamwangana.—Klo 30:13.

• Sheminyite.

  Lizu lyavaka-kwimba myaso lize lyalumbununa ngwavo “wakusokesa 8.” Kaha lyatalisa kumwaso wachivumo chamwishi. Nge kutalisa kuvisaji, kaha lyatalisa kujisambo jize jeji kulovolanga chivumo chachinene. Oloze nge kutalisa kumwaso wamazu, kaha lyatalisa kumwaso wakwimba navisaji vyachivumo chamwishi.—1Mi 15:21; Ji 6:Maz; 12:Maz.

• Shevate.

  Lijina lyakakweji wakusokesa 11 wavaYuleya wakalenda yajila, kaha nawa hilijina lyakakweji wamuchitanu wakalenda yavaka-mafuchi eka, lize vazachishilenga vatu omu vafumine muufunge muMbavilone. Kakweji kana aputukile hakachi kakakweji waJanuary nakuheta hakachi kakakweji waFebruary. (Zek 1:7)—Tala Chihande B15.

• Sheyole.

  Lizu lyachiHepeleu lize lyatwama naulumbunwiso woumwe nalizu lyachiHelase “Hetese.” Lizu kana vanalyalumuna ngwavo “Fuka” (lizu lize vanatohwesa sopelo wa F), mangana lihane ulumbunwiso wafuka yavatu vosena, muchishishisa chafuka yamufu umwe.—Kup 37:35; Ji 16:10; Vil 2:31 (vinyikilo vyamwishi).

• Shipilitu yajila.

  Ngolo jize Kalunga eji kuzachisanga hakutesamo vyuma ajina. Ngolo kana japwa jajila mwomwo jeji kufumanga kuli Yehova uze apwa utoma, wakwoloka chikuma, kaha nawa jikiko eji kuzachisanga Kalunga mangana atesemo vyuma vyajila.​—Luk 1:35; Vil 1:8.

• Shipilitu.

  Lizu lyachiHepeleu ruʹach nalizu lyachiHelase pneuʹma, aze valumuna kakavulu ngwavo “shipilitu” atwama naulumbunwiso wauvulu. Osena atalisa kuvyuma vyakuzeneka kumona, kaha nawa asolola ngolo jize jili nakuzata. Awa mazu achiHepeleu nachiHelase vawazachisa kutalisa (1) kupeho, (2) kungolo jize jatwama muvyuma vyakuyoya vyahamavu, (3) kungolo jize jeji kufumanga mumuchima wamutu wachifwanyisa nakumulingisa ahanjike chipwe alinge vyuma vimwe, (4) kumazu vahwima akufuma kuvyuma vyakuzeneka kumona, (5) kuvatu vakushipilitu, (6) nakungolo jaKalunga, chipwe shipilitu yajila.—Klo 35:21; Ji 104:29; Mat 12:43; Luk 11:13.

• Shivane.

  Lijina lyakakweji wamuchitatu wavaYuleya wakalenda yajila, kaha nawa hilijina lyakakweji wakusokesa 9 wakalenda yavaka-mafuchi eka, lize vazachishilenga vatu omu vafumine muufunge muMbavilone. Kakweji kana aputukile hakachi kakakweji waMay nakuheta hakachi kakakweji waJune. (Ese 8:9)—Tala Chihande B15.

• Shiya.

  Chesekelo chakupimina vyuma vyaumu. Chesekelo kana chapwile jilita 7.33, hakuchesekesa nachesekelo chambate chakupimina vyuma vyameya. (2My 7:1)—Tala Chihande B14.

• Sulute.

  Mihongi yayinene yivali yize yatwama kungenge yakalungalwiji wakuLibya, kuNote yaAfrica. Mihongi kana yevwishilenga vatu vakushikulu woma chikuma mwomwo yapwilenga nachisekeseke chize chanungwojokelenga kakavulu napeho. (Vil 27:17)—Tala Chihande B13.

• Sulya; vaSulya.—

  Tala ALAME; VAALAME.

• Sunangonga.

  Lizu lize lyalumbununa ngwavo “kulikungulula hamwe” chipwe “lizavu.” Oloze muvisoneka vyavivulu, lizu kana lyatalisa kuchihela chipwe kuzuvo valikungulwililenga vaYuleya mangana vatange Visoneka, nakutanga jishimbi, nakunangula, nakulomba. Mumakumbi aYesu, mbongi himbongi muIsalele yapwilenga nasunangonga yayo, kaha jinganda jajinene japwilenga najisunangonga jajivulu.—Luk 4:16; Vil 13:14, 15.

• Sunendeline.

  Zango yayinene yavaYuleya yamuYelusalema. Mumakumbi aYesu, eyi zango yapwilenga navatu 71, kuhakilako nakapilishitu wakulitulaho, naveka vaze vapwile vapilishitu vakulitulaho kunyima, navatu vakujitanga javapilishitu vakulitulaho, navakulwane, navatwamina vamiyachi, namitwe yajitanga, navaka-kusoneka.​—Mak 15:1; Vil 5:34; 23:1, 6.

T

• Talende.

  Lilolwa lyavaHepeleu lyalinene lyakupezalisa, lize lyapwile nawa ndando yajimbongo. Talende yalemene jikilongalamu 34.2. Talende yavaHelase yapwile yayindende, yalemene kafwe jikilongalamu 20.4. (1Mi 22:14; Mat 18:24)—Tala Chihande B14.

• Tamuze.

  (1) Lijina lyakalunga uze valilile mapwevo vavaHepeleu vaze valikangile kuli Kalunga muYelusalema. Chasoloka nge Tamuze apwile mwangana, kahomu afwile vamulemeselenga jino kupwa kalunga. Mulilimi lyavaka-Samelya, Tamuze vamuvuluka ngwavo Ndamuze, kaha vamulumbununa ngwavo apwa lunga lyakalunga wapwevo walusemo Inana (Ishita wavaka-Mbavilone). (Eze 8:14) (2) Lijina lyakakweji wamuchiwana wavaYuleya wakalenda yajila, kaha nawa hilijina lyakakweji wakusokesa 10 wakalenda yavaka-mafuchi eka, lize vazachishilenga vatu omu vafumine muufunge muMbavilone. Kakweji kana aputukile hakachi kakakweji waJune nakuheta hakachi kakakweji waJuly.—Tala Chihande B15.

• Tanganyika wachimene.—

  Tala LITOTA.

• Tataluse.

  MuVisoneka VyachiHelase vyaVaka-Kulishitu, lizu kana lyatalisa kuchihela chachifwanyisa muze vambilile vangelo vakulikanga vamumakumbi aNowa, chihela chize chapwa nge kamenga. Hali WaPetulu 2, 2:4, lizu tar·ta·roʹo (“kumbila muTataluse”) kalyalumbununa nge  “vangelo vaze valingile shili” vavambilile muTataluse yize vafwelela mukwitava chamakuliko, (yize yapwa njele yamumavu, chihela chamilima chatulunga vamokomoko). Oloze mazu kana asolola nge Kalunga avatambwile ulemu hakuvafumisa muvihela vyavo vyamwilu nahamilimo yavo, nakuvalingisa vapwenga mumilima yayinene yakuzeneka kutachikiza vyuma ajina Kalunga. Eyi milima nawa yalumbununa nge navakanonga haya myaka yosena, hohamwe natwamina yavo Satana Liyavolo kweseka namuze vahanjika muVisoneka. Ngocho Tataluse yemanyinako chihela chachifwanyisa chakuzeneka ulemu chavaze vangelo vakulikanga. Tataluse kayapwa “wina wakuzeneka kukuma” uze vahanjika hali Kusoloka 20:1-3 koko.

• Tavanaku.

  Mbalaka yakunungwojola yize vazachishilenga vaIsalele hakulemesa Kalunga kufuma halwola valovokele muEjipitu. Mutavanaku mwapwile chikasha chalushiko lwaYehova, chize chasolwele nge Kalunga ali navakivo. Kaha nawa yapwile chihela chakuhanyina vimuna vakuvatula nakulemesela Kalunga. Vachivuluka nawa ngwavo “mbalaka yakuliwanyina.” Vayitungile navipamba vize vafwikile namahina akusona vakeluve. Yapwile natupete vavali, katete vakavulukilenga ngwavo muze Mwajila, kaha kamuchivali ngwavo muze Mwajila Chikuma. (Yos 18:1; Klo 25:9)—Tala Chihande B5.

• Telafwime.

  Tulunga chipwe tuponya vamutanga vaze vazachishilenga lwola lumwe hakutaha. (Eze 21:21) Vamwe vivuvu vyavo vyapwilenga nge vyavatu, oloze veka vyapwilenga vyavandende. (Kup 31:34; 1Sa 19:13, 16) Vyuma vawana vaka-kuvumbwojola muMesopotamya vyasolola nge kupwa navatelafwime chikiko chalingishilenga mutu kutambula uswana mutanga. (Echi chikiko pamo chalingishile Lakele ambate vaze vatelafwime vaise.) Oloze omu keshi mukiko chapwilenga namuIsaleleko, numba tuhu vatu vazachishilenga vatelafwime mumakumbi avaka-kuyula. Ava vatelafwime vavanongesele hohamwe navyuma vyeka vize vanongesele kuli Mwangana wakushishika Yoshiya.—Kuy 17:5; 2My 23:24; Hoz 3:4.

• Tembele.

  Zuvo yamuYelusalema yize yashishile tavanaku yakunungwojola. Yapwile chihela chavaIsalele chakulemesela Kalunga. Tembele yatete vayitungile kuli Solomone, kaha vayinongesele kuli vaka-Mbavilone. Tembele yamuchivali vayitungile kuli Zeluvavele omu vatu vafumine muufunge muMbavilone, kaha vayitungulwile kuli Helote Wamunene. Tembele vayivulukilenga kakavulu muVisoneka ngwavo “zuvo yaYehova.” (Eza 1:3; 6:14, 15; 1Mi 29:1; 2Mi 2:4; Mat 24:1)—Tala Chihande B8 na B11.

• Tengi.

  Muka-kutenga jindeho jaunonga, namalonga, navitenga vyeka vyaunonga. Lizu lyachiHepeleu vavuluka ngwavo tengi lyalumbununa ngwavo “muka-kuumba.” Ngolo jize atwama najo muka-kutenga haunonga vajesekesa kakavulu kungolo jaYehova jakuyula vatu namafuchi.—Isa 64:8; Lom 9:21.

• Tevete.

  Lijina lyakakweji wakusokesa 10 wavaYuleya wakalenda yajila, kaha nawa hilijina lyakakweji wamuchiwana wakalenda yavaka-mafuchi eka, lize vazachishilenga vatu omu vafumine muufunge muMbavilone. Lwola kana lwaputukilile hakachi kakakweji waDecember nakuheta hakachi kakakweji waJanuary. Kakavulu kakweji kana vamuvuluka kaha ngwavo “kakweji wakusokesa 10.” (Ese 2:16)—Tala Chihande B15.

• Tishili.—

  Tala ETANYIME naChihande B15.

• Toka.

  Chitondo vahakilenga hachifwiji chamutu chize vazezelekelenga viteli kujisongo josena jivali. Chapwa nawa chitondo veji kuhakanga hajishingo jatunyama vavali (chikumanyi vangombe) hakukoka litemo chipwe litemba. Hakuwana nge vandungo vazachishilenga chikuma jitoka hakumbata viteli vyavilemu, ngocho lizu toka valizachisa kwimanyinako undungo chipwe kuliluula kuli mutu, kaha nawa lyemanyinako luyanjisa nakuyanda. Kufumisa toka chipwe kuyihokola chemanyinyineko kusokoka muundungo namuluyando.—Lev 26:13; Mat 11:29, 30.

• Tumalonga twakukwachila kakahya.

  Tuvinoma vatengele naulu, chipwe napalata, chipwe naunengu. Vatuzachishilenga kutavanaku nakutembele, valumbililileho vize vyalivumba lyamwaza, nakwokwelaho kakahya halijiko lyakulumbila, nakumbachilaho uto wakumuhya wakuchitumbikilo chamanongo. Tumalonga kana vatuvulukilenga nawa ngwavo viloso.—Klo 37:23; 2Mi 26:19; Hep 9:4.

• Tutachikijilo.

  Tumalolwa chipwe tuvitondo tuze vazachishilenga hakuwana mwakulingila. Tutachikijilo vatuhakilenga mujisweko jauvwalo chipwe mumilondo, kaha vatunyengumwinenga. Kaha katachikijilo kaze kalivangile kuholoka chipwe kaze vanonele kakiko vasakwile. Vatu valombelenga hakulinga chuma kana. Lizu “katachikijilo” lyalumbununa “chazano” chivene, chipwe “chazano” chachifwanyisa.—Yos 14:2; Ji 16:5; Vis 16:33; Mat 27:35.

• Tuzola twamanongo.

  Vinoma vyaulu napalata vize vazachishilenga kutavanaku nakutembele. Vinoma kana vyalifwanyine navikele, kaha vaviteteselenga mihya yakumanongo.—2My 25:14.

• Twamina wamunene.

  Yapwa vulukiso yaYesu yakulumbununa chihela vamuhana mangana asokole vatu vakushishika kushili nakuvalingisa vakapwe nakuyoya chahaya myaka yosena.​—Vil 3:15; 5:31; Hep 2:10; 12:2.

•  Twatwa.

  Chikumanyi apwa mwana walunga wamukulwane uze vasema kuli chisemi walunga (keshi twatwa uze vasema kuli chisemi wapwevoko). Mulwola vyasolokelenga vyuma vasoneka muMbimbiliya, mwana walunga watwatwa apwile nachihela chachinene mutanga, kaha ikiye apwilenga mutwe watanga kachi nge sevo nafu. Lizu kana lyazata nawa kuli vimuna vavilunga vakulivanga kusemuka.—Klo 11:5; 13:12; Kup 25:33; Kol 1:15.

U

• Ujila.

  Lizu lize lyafuma kulizu lyachiHelase por·neiʹa, kaha lyalumbununa mwamuvulu kutalisa kukulisavala chize kavetavisako. Lizu kana lyazata nakuukoji, nakuuhule, nakukulisavala chavatu vaze kavalimbatako, nakukulisavala chavatu vausonyi umwe, nakukulisavala nakanyama. Lizu kana valizachisa mujila yachifwanyisa mumukanda waKusoloka hakuvuluka muka-ujila wamukwitava “Mbavilone Yayinene.” Vamuvuluka ngocho mwomwo nalikate navatwamina vakaye mangana vamuhane ngolo naluheto. (Kus 14:8; 17:2; 18:3; Mat 5:32; Vil 15:29; Nga 5:19)—Tala MUKA-UJILA.

• Ukoji.

  Wapwa kulisavala chalunga uze ambata chipwe pwevo uze asomboka namutu weka uze kapwa muka-mahyenyiko.—Klo 20:14; Mat 5:27; 19:9.

• Ulime naTumime.

  Vyuma vize azachishilenga kapilishitu wakulitulaho. Avizachishilenga nge muze vazachishilenga tutachikijilo hakusaka kutachikiza mwayile muchima waKalunga, omu vasakile ngwavo Yehova avakumbulule hachihande chimwe chachilemu. Ulime naTumime vavihakilenga muchipwiko chahatulo chakapilishitu wakulitulaho omu engililenga mutavanaku. Chasoloka nge mulimo wavyo wakumine omu vaka-Mbavilone vanongesele Yelusalema.—Klo 28:30; Neh 7:65.

• Unjiho.

  Lizu “Unjiho” kakavulu valizachisa hakuvuluka Jishimbi Likumi jize vasonekele hamalolwa avali akuya muuhanda aze vahanyine Mose.—Klo 31:18.

• Upolofweto.

  Apwa mazu vahwima akusolola mwaya muchima waKalunga kuhichila muchakumwenesa, chipwe mukuvilika mazu kana. Upolofweto unahase kupwa kunangula chamwenemwene chize vahwima, chipwe jishimbi jaKalunga namazu enyi akuyula, chipwe luvila lwavyuma navikeza kulutwe.—Eze 37:9, 10; Nda 9:24; Mat 13:14; 2Pe 1:20, 21.

• Uze wakuhuka.

  Vulukiso vahana Satana Liyavolo uze emanyina Kalunga nakole nakwimanyina nawa jishimbi jenyi jakwoloka.—Mat 6:13; 1Yo 5:19.

V

• VaFwaliseu.

  Lizavu lyalilemu lyakulimanyina lyamukwitava chavaYuleya lize lyapwileko mulikulukaji lyamyaka lyakulivanga C.E. Kavapwilenga vatu vamutanga yavapilishituko, oloze vakavangijilenga chikuma Jishimbi mutuvyuma twatundende. Kaha vyuma vyachisemwa vanangwilenga vavimwenenga kupwa vyavilemu chikuma. (Mat 23:23) Vahungile visemwa vyavaHelase vyosena, kaha vapwilenga chikuma nangolo hali vatu mwomwo valinangwile chikuma Jishimbi navyuma vyachisemwa. (Mat 23:2-6) VaFwaliseu vamwe vapwilenga nawa vatu vamuSunendeline. Vahungilenga Yesu hachihande chakujilila Sambata, navilika vyachisemwa, nahakulikata navaka-shili navaka-kutambula mitelo. Vamwe valumukile kupwa vaka-Kulishitu, kuhakilako naSaulu wakuTalasu.—Mat 9:11; 12:14; Mak 7:5; Luk 6:2; Vil 26:5.

• Vaka-Epikule vaze valinangwile mangana akaye.

  Vaka-kukavangiza Epikule, kaHelase uze alinangwile mangana akaye (341-270 B.C.E.). Valinangwilenga ngwavo viseke vikiko vyuma vyavilemu mukuyoya chamutu.​—Vil 17:18.

• Vaka-kulama Mwangana.

  Lizavu lyamaswalale javaLoma vaze vapwile vaka-kulama mwangana wavaLoma. Lizavu kana lyapwilenga nangolo muvihande vyamapolitiki nakuhasa kukundwiza mwangana chipwe kumukatumuna.—Fwi 1:13.

• Vaka-Kulishitu.

  Lijina lize Kalunga ahana vaka-kukavangiza Yesu Kulishitu.—Vil 11:26; 26:28.

• Vaka-kusopa milonga.

  Mufulumende yaMbavilone, vaka-kusopa milonga vamwe vapwile vaka-kuzata mufulumende vaze vatachikijile jishimbi, oloze kavapwile nangolo josena jakuyulako. Kujingalila kuze vayulilenga vaLoma, vaka-kusopa milonga vakwavo vakivo vapwilenga vaka-kutwaminyina mufulumende. Milimo yavo yapwilenga yakwolola vyuma, nakutala vyajimbongo, nakusopesa vaka-kuzombwojoka jishimbi, nakuzangamisa vaka-kuhengesa.​—Nda 3:2; Vil 16:20.

• Vaka-kuyula.

  Malunga vaze atongwele Yehova mangana vayovolenga vatu jenyi shimbu kanda lwola lwavamyangana vavatu luhete.—Kuy 2:16.

• Vaka-lizavu lyaHelote.—

  Tala HELOTE.

• Vaka-Shitoke vaze valinangwile mangana autu.

  Shikola yavaHelase yavaka-kulinangula mangana autu. Vafwelelele ngwavo kuwahilila chamutu chapendamina hakukavangiza munayi vishinganyeka vyenyi. Kweseka nakushinganyeka chavo, mutu wamangana katela kuhaka mangana kukuviza chavatu chipwe kukuwahilila chavoko.​—Vil 17:18.

• Vakeluve.

  Vangelo vaze vatwama nachihela chachinene, vaze vazata milimo yakulipwila. Vakeluve valihandununa kuli vaselafwe.—Kup 3:24; Klo 25:20; Isa 37:16; Hep 9:5.

•  Vambimba.

  Vambimba kana shina vaze veji kutukanga mumazavu amanene akulisezaseza. MuJishimbi jaMose, vambimba kana vavetavishile kuvalya. Kaha vambimba vaze vatukilenga mumazavu amanene nakwenyeka chikuma vyuma muze vayilenga, vavavulukilenga ngwavo chipupu.—Klo 10:14; Mat 3:4.

• VaMete; Mete.

  Vatu vakutanga yaMatai mwanaYafwete. Vatu kana vatwaminenga mungalila yajipili yaIlane yize yapwile jino lifuchi lyaMete. VaMete valifutwile navaka-Mbavilone mangana vafungulule Asulya. Halwola luze, ngalila yaPeleja yapwilenga muchiyulo chalifuchi lyaMete, oloze Kuluse alikangile. Kaha lifuchi lyaMete valiwanyishile nalifuchi lyaPeleja nakupwa jino Wangana waMeto-Peleja uze wafungulwile Wangana waNeyo-Mbavilone mu 539 B.C.E. VaMete vapwile muYelusalema haPendekoseta mu 33 C.E. (Nda 5:28, 31; Vil 2:9)—Tala Chihande B9.

• Vana vaAlone.

  Vaka-tanga yamuzukulu lyaLevi, Alone, uze vasakwile kupwa kapilishitu wakulitulaho wakulivanga muJishimbi jaMose. Vana vaAlone vazachilenga milimo yaupilishitu kutavanaku nakutembele.—1Mi 23:28.

• Vandemone.

  Vaka-kuyoya vakushipilitu vakuhuka vaze katwamonako, vaze vatwama nangolo kuhambakana vatu. Kavavatengele vakuhukako, mwomwo hali Kuputuka 6:2 vavavuluka ngwavo “vana vaKalunga wamuchano,” kaha hali WaYuta 6 vavavuluka ngwavo “vangelo.” Vapwile vangelo vaze valilingishile vavene kupwa vaka-kole jaKalunga hakulikanga kuli ikiye mumakumbi aNowa. Kaha valikundwijile naSatana nakulikanga kuli Yehova.—Lus 32:17; Luk 8:30; Vil 16:16; Yak 2:19.

• VaNechine.

  Vangamba chipwe vaka-kuzata vakutembele vaze kavapwile vaIsaleleko. Lizu livene lyachiHepeleu lyalumbununa ngwavo “Ava Vakuhana,” kusolola nge vavahanyine vazate milimo yakutembele. Chasoloka nge vaNechine vavavulu vapwile malunga vavaka-Ngeveyone, vaze Yoshuwa alingishile kupwa “vaka-kuchavila lizavu lyavaIsalele jikunyi, nakuvaswichilanga meya. Vachavilenga nawa jikunyi nakuswitanga meya akulijiko lyaYehova lyakulumbila.”—Yos 9:23, 27; 1Mi 9:2; Eza 8:17.

• VaNefwile.

  Vatu vaukenya vaze vasemukile kuli vangelo vaze vavwalile mijimba yautu. Vavasemene navana vamapwevo hano hamavu shimbu kanda Livaji.—Kup 6:4.

• Vangelo.

  Lizu kana lyafuma kulizu lyachiHepeleu mal·ʼakhʹ nalizu lyachiHelase agʹge·los. Awa mazu avali alumbununa “muluwa,” oloze vawasoneka ngwavo “kangelo” nge vali nakuvuluka muluwa wakushipilitu. (Kup 16:7; 32:3; Yak 2:25; Kus 22:8) Vangelo vapwa vaka-kuyoya vakushipilitu vangolo vaze atengele Kalunga shimbu kanda atenge vatu. MuMbimbiliya vavavuluka nawa ngwavo “mayongomena ajila,” “vana vaKalunga,” “vatanganyika vachimene.” (Lus 33:2; Yop 1:6; 38:7) Kavavatengele nangolo jakusemako, oloze vavatengele umwe naumwe. Kaha vapwa vavavulu chikuma. (Nda 7:10) Mbimbiliya yasolola nge vatwama namajina navilinga vyavo vyakulihandununa. Oloze veji kukananga kuvalemesa, kaha vavavulu veji kukananga kujimbula majina avo. (Kup 32:29; Luk 1:26; Kus 22:8, 9) Vatwama navihela vyakulisezaseza namilimo yakulihandununa, kuhakilako namilimo yakuzachila kulitanda lyaYehova, nakwambulula mijimbu yaKalunga kuvatu, nakukafwa vangamba jaYehova vahamavu, nakuzachila Kalunga mulimo wakusopesa, nakukundwiza kwambulula mujimbu wamwaza. (2My 19:35; Ji 34:7; Luk 1:30, 31; Kus 5:11; 14:6) Kulutwe navakakafwa Yesu hakuzunga ndombo yaAlamangetone.—Kus 19:14, 15.

• VaSamaliya.

  Hakavanga vaSamaliya vapwile vaIsalele vamuwangana wakunote wamiyachi likumi, oloze omu vaAsulya vafungulwile Samaliya mu 740 B.C.E., vulukiso kana yatalishile nakuli vaka-mafuchi eka vaze vavanehele kuli vaAsulya. Mulwola lwaYesu, vulukiso kana kayatalishile kuvatu vakumuyachi umwe chipwe kungolo jakuyula lifuchiko, oloze yatalishile kuvatu vamuliuka lyakuhanduka lyakwitava vaze vatwaminenga mungalila yaShekeme yakushikulu naSamaliya. Vaka-liuka kaneli vafwelelele vyuma vimwe vize vyalihandunwine chikuma nakwitava chavaYuleya.—Yow 8:48.

• VaSatuse.

  Liuka lyakuhanduka lyalilemu lyamukwitava chavaYuleya lize lyapwile navatu valuheto, navapilishitu vaze vapwile chikuma nangolo hamilimo yakutembele. Vakanyine vyuma vyachisemwa vyavivulu vize valaminenga vaFwaliseu navize vafwelelelenga. VaSatuse kavafwelelele ngwavo vafu navakasangukako, kaha nawa vafwelelele ngwavo vangelo kavatwamakoko. Vemanyinyine Yesu nakole.—Mat 16:1; Vil 23:8.

• Vaselafwe.

  Vaka-kuyoya vakushipilitu vaze vajingilika litanda lyaYehova mwilu. Lizu lyachiHepeleu sera·phimʹ lyalumbununa “vaka-kwenya kakahya.”—Isa 6:2, 6.

• VaYuleya.

  Lizu vazachishilenga hakuvuluka vatu vakumuyachi waYuta kufuma hakufungulula wangana wavaIsalele wamiyachi likumi. (2My 16:6) Kufumaho valizachishile nawa hakuvuluka vaIsalele vakumiyachi yosena vaze vakindulukile kuIsalele kufuma muufunge muMbavilone. (Eza 4:12) Kutwala muze, valizachishilenga mukaye kosena hakuhandununa vaIsalele kuli Vaka-mafuchi eka. (Ese 3:6) Lizu kana valizachishile  nawa mujila yachifwanyisa kuli kaposetolo Paulu hakwamba ngwenyi muyachi wamutu kaweshi waulemuko muchikungulwilo chaVaka-Kulishitu.—Lom 2:28, 29; Nga 3:28.

• Vaze valumukile kupwa vaYuleya.

  MuVisoneka, vulukiso kana yatalisa kuli vaze vetavilile kwitava chavaYuleya, kaha malunga vasakiwilenga kuvajihana.—Mat 23:15; Vil 13:43.

• Vilinga vyakuzunguma.

  Yapwa hanjikiso yafuma kulizu lyachiHelase a·selʹgei·a, kaha yatalisa kuvilinga vyamilonga yayinene mwalinga mutu nakuhokola jishimbi jaKalunga, vize nawa navisolola muchima wakuzunguma chipwe wakuhamuka. Himuchima wakuhona kalemesa chipwe wakulikanga kuwata nakujishimbi. Evi kavyapwa vilinga vyavipi vyamilonga yayindendeko, nduma.—Nga 5:19; 2Pe 2:7.

• Vyakusokesa mumakumi.

  Vyuma vize vahanyinenga chipwe kufweta kupwa mulambu, chikumanyi kuvyuma vyamukwitava. (Mal 3:10; Lus 26:12; Mat 23:23) MuJishimbi jaMose, vyuma vyakusokesa mumakumi vyakumande avo, nakuvimuna javo vavihanyinenga kuli vaLevi mwaka himwaka mangana valikafwe navyo. Kaha vaLevi nawa vambachilengako vyakusokesa mumakumi nakuvihana kuli vapilishitu vakutanga yaAlone mangana valikafwe navyo. Kwapwilenga nawa vyuma vyeka vahanyinenga vyakusokesa mumakumi. Vaka-Kulishitu kavavalweza kuhananga vyakusokesa mumakumiko.

• Vyuma vyajila vyakusweka.

  Vyuma ajina Kalunga vize eji kusololanga halwola lwenyi asakula, kaha eji kuvisololanga kuli vaze kaha asakula ivene kuvalwezavyo.—Mak 4:11; Kol 1:26.

• Vyuma vyajita.

  Uvwalo uze vavwalilenga maswalale mangana valikinge nawo. Uvwalo kana shina litepa lyachikungo, nakahuma kachikungo, namuhya, namikingo yakumahinji, nakepwe.—1Sa 31:9; Efw 6:13-17.

• Vyuma vyakukomwesa; Milimo yangolo.

  Milimo chipwe vyuma vize vazata kuli vaze vahambakana vatu ngolo. Mazu akufwana nge “vinjikizo,” “milimo yakukomwesa,” “vyuma vyakukomwesa,” vawazachisa kupwa wowamwe muMbimbiliya.—Klo 4:21; Vil 4:22; Hep 2:4.

• Vyuma vyakupukula.

  Vikumba vyamutu, chipwe vimuna, chipwe vyuma vyeka vyavilemu vize veji kupukulanga kujita.—Yos 7:21; 22:8; Hep 7:4.

• Vyuma vyalivumba lyamwaza.

  Vyuma vize vasungile hakufutula ulilila walivumba lyamwaza nambalasamu. Vyuma kana vyawemenenga chikoki chikoki nakulovola livumba lyalupengopengo. Kwapwile vyuma viwana vafutwile hamwe hakusunga vyuma vyalivumba lyamwaza vize vazachishilenga kutavanaku nakutembele. Vyuma kana vavyochelenga chimene naufuku halijiko lyakulumbila vize vyalivumba lyamwaza mukapete muze Mwajila. Kaha haLikumbi lyaKulinga chaKufwika haShili, vavyochelelenga mukapete muze Mwajila Chikuma. Vyuma kana vyemanyinyineko kulomba chavangamba jaKalunga vakushishika chize vetavililile kuli Kalunga. Oloze vaka-Kulishitu kavasakiwa kuzachisa vyuma kanako.—Klo 30:34, 35; Lev 16:13; Kus 5:8.

W

• Wana.

  Vyuma vize mutu ahanyinenga Kalunga mangana asolole kusakwilila chenyi, chipwe kulitavila kuhenga chenyi, nakumulingisa apwenga cheka nausoko wamwaza naKalunga. Kuputukila kuli Avele, vatu vahanyinenga mawana akulisakila, kuhakilako navimuna, palanga nomu Lushiko lwaJishimbi jaMose lwambile ngwalwo chuma kana hilushimbi. Kufuma hakufwa chaYesu, omu ahanyine kuyoya chenyi kupwa chimuna wakuvatula wakukupuka, vaka-Kulishitu kavasakiwilenga cheka kuhananga vimuna vakuvatulako, numba tuhu vachili nakuhananga Kalunga vimuna vakuvatula vakushipilitu.—Kup 4:4; Hep 13:15, 16; 1Yo 4:10.

• Wana wahamulonga.

  Wana ahanyinenga mutu hajishili jenyi. Wana kana walihandunwine chachindende namawana eka ahashili mwomwo walingishilenga mutu uze nauhane, uze napihilila nakwalumuka ahase cheka kupwa nausoko wamwaza naKalunga. Kahechi chalingishile vazeneke kumuzangamisa.—Lev 7:37; 19:22; Isa 53:10.

• Wana wahashili.

  Wana uze vatu vahanyinenga hashili valingilenga chakuzeneka kutachikiza mwomwo yakuzeneka kukupuka mwosena. Vatu vahanyinenga vimuna vakulisezaseza, kuputukila kukakwilimba nakuheta kungombe, kweseka navyuma ahetele mutu uze valingilililenga chakufwika hashili.—Lev 4:27, 29; Hep 10:8.

• Wana wakuhungisa.

  Wana uze anehelenga mutu mumavoko. Kapilishitu ahakilenga mavoko enyi kwishi yamavoko ayauze mutu nakuhungisa uze wana noku noku. Lwola lumwe, wana kana vauhungishilenga kuli kapilishitu kaha. Chuma kana chasolwele nge wana kana vanauhane kuli Yehova.—Lev 7:30.

• Wana wakulumba.

  Vimuna vakuvatula vaze valumbilenga halijiko lyakulumbila kupwa wana wamuundu uze vahanyinenga Kalunga. Muka-kulemesa Kalunga kasezelenga chihanda chakanyama numba chimweko. Wana vahanyinenga shina vikuji javangombe, navizamba jamikoko, navizamba javapembe, natutela, navana vatukwilimba.—Klo 29:18; Lev 6:9.

• Wana wakusakwilila.

  Wana wakuneha kuunda uze vahanyinenga vatu wakwalisa Kalunga havyuma avahanyinenga nahazangi yenyi yakwilila.  Kaha valilenga nyama yachimuna vahanyinenga, nambolo yachimbalwila nayize yakuzeneka chimbalwila. Nyama kana vayililenga likumbi vene lize.—2Mi 29:31.

• Wana wakusolola kuunda.

  Wana uze vatu vahanyinenga kuli Yehova mangana vapwenga mukuunda naikiye. Muka-kulemesa Kalunga, navaze vakuzuvo yenyi, nakapilishitu uze avemanyinyineko hakuhana uze wana, navapilishitu vaze vazachilenga milimo halikumbi lize, vosena valile uze wana. Yehova autambwile, hakwivwa livumba lyalupengopengo lize lyafumine kumaji aze valumbile. Kaha vamuhanyine nawa manyinga aze emanyinyineko kuyoya. Chapwile kwijiva nge vapilishitu navaka-kulemesa vatwamine hamwe nakulya vyakulya naYehova, kusolola usoko wamwaza naikiye.—Lev 7:29, 32; Lus 27:7.

• Wana walushiko.

  Wana wakulisakila uze vahanyinenga nakulishika jishiko jimwe.—Lev 23:38; 1Sa 1:21.

• Wana wavinyo.

  Wana wavinyo uze vahingunwinyinenga halijiko lyakulumbila, uze vahanyinyinenga kumwe namawana eka akwavo. Paulu alyesekesele kuwana kana mujila yachifwanyisa mangana asolole muchima wenyi wakulihana kuzachila vakwavo vaka-Kulishitu.—Kla 15:5, 7; Fwi 2:17.

• Wangana waKalunga.

  Mazu kana atalisa kuwata waKalunga uze vemanyinako kufulumende yaMwanenyi Kulishitu Yesu.—Mat 12:28; Luk 4:43; 1Ko 15:50.

Y

• Yakova.

  MwanaIsaka naLaveka. Kutwala muze, Kalunga amulukile ngwenyi Isalele, kaha apwile kakuluka yavatu jaIsalele (vavavulukile nawa ngwavo vaIsalele, kaha kutwala muze ngwavo vaYuleya). Yakova ikiye asemene vana vamalunga 12 vaze vavuluka hamwe navaka-tanga yavo ngwavo miyachi 12 yavaIsalele. Lijina lyaYakova valizachishilenga lika hakuvuluka muyachi chipwe vatu vaIsalele.—Kup 32:28; Mat 22:32.

• Yehova.

  Lizu lyaLuvale lyakufuma kuvasona vaTetalangalamatoni (vasona vawana vachiHepeleu valijina lyaKalunga), lize lyasoloka mapapa akuhambakana 7,000 muMbimbiliya yino.—Tala Chihande A4 na A5.

• Yelutune.

  Lizu lize lyatwama hamazu akujimbula ahali Jisamu 39, 62, na 77, oloze ulumbunwiso walyo kavautachikizako. Chasoloka nge awa mazu akujimbula apwa jindongi jamwakwimbila myaso, pamo yimbiso yamyaso chipwe mwakwimbila chisaji. Kuli vaLevi kwapwile muka-kwimba umwe vavulukilenga ngwavo Yelutune, ngocho eyi yimbiso yamyaso kana, chipwe yachisaji, pamo vayipandamishile kuli ikiye, chipwe kuli vana venyi.

• Yufwalate.

  Kalwiji wamusuku, wamulemu chikuma wakumulauko waAja, kaha nawa hikalwiji umwe hatulwiji vavanene vavali vamuMesopotamya. Vamuvuluka chatete hali Kuputuka 2:14 ngwavo apwa kalwiji wamuchiwana wamuEtene. Kakavulu vamuvuluka kaha ngwavo “Kalwiji.” (Kup 31:21) Kalwiji kana apwile ngiza yakunote yangalila vahanyine vaIsalele. (Kup 15:18; Kus 16:12)—Tala Chihande B2.

• Yuta.

  MwanaYakova wamuchiwana uze asemene napwevo lyenyi Leya. Omu Yakova apwile kwakamwihi nakufwa, apolofwetele ngwenyi twamina wamunene, wahaya myaka yosena mwakafuma kutanga yaYuta. Yesu apwile wakutanga yaYuta omu apwile hano hamavu. Lijina lyakwamba ngwavo Yuta valizachishile hakuvuluka muyachi, kufumaho valizachishile hakuvuluka wangana. Wangana wakusulo, waYuta, wapwile wavaIsalele vakumuyachi waYuta naMbenjamine, kuhakilako navapilishitu navaLevi. VaYuta vapwililile kusulo yalifuchi, kuze kwapwile Yelusalema natembele.—Kup 29:35; 49:10; 1My 4:20; Hep 7:14.

Z

• Zangi yakwilila.

  Lizu lize valumuna kufuma kulizu lyachiHepeleu cheʹsedh, kaha lyatalisa kuzangi yize yapendamina havilinga vyakufwana nge kulihana, nakulonga, nakulyononona, nakukakachila. Kakavulu lyatalisa kuzangi yize Kalunga eji kusolwelanga vatu, oloze lwola lumwe lyatalisa nawa kuzangi veji kulisolwelanga vatu vavene.—Klo 34:6; Lut 3:10.

• Zeuse.

  Lijina lyakalunga kavaHelase. Vatu vamuLusutala vashinganyekele ngwavo Mbalanape ikiye Zeuse. Havyuma vyakushikulu vavumbwile kwakamwihi naLusutala vawanyine vanasonekaho ngwavo “vapilishitu jaZeuse” kaha nawa ngwavo “Zeuse, kalunga wamusana.” Wato atambukilile Paulu kufuma kulitungu lyaMelita wapwile nakatachikijilo kakusoneka ngwavo “Vana vaZeuse,” vaKashito naPolushe vaze vapwile vapasa.—Vil 14:12; 28:11.

• Zeyone; Pili yaZeyone.

  Lijina lyanganda yaYevuse yize yapwile nganda yakukingiwa yavaYevuse, yize yapwilile kusulo yapili yaYelusalema. Omu Ndavichi ayitambwile, atungilemo zuvo yenyi, kaha vayivulukilenga jino ngwavo “Nganda yaNdavichi.” (2Sa 5:7, 9) Zeyone yapwile jino pili yajila kuli Yehova omu Ndavichi atwalilemo Chikasha. Kutwala muze, ngalila yize yapwile natembele haPili yaMoliya nayikiko vayivulukile ngwavo Zeyone, kaha shimbu jimwe nanganda yaYelusalema yosena vayivulukile mwomumwe. MuVisoneka VyachiHelase vyaVaka-Kulishitu, Zeyone vayizachisa kakavulu mujila yachifwanyisa.—Ji 2:6; 1Pe 2:6; Kus 14:1.