Yopa 38:1-41
38 Jino Yehova ambile kuli Yopa mupeho yanyamanganda+ ngwenyi:
2 “Iyaze ali nakusaka kusweka punga yami,Nakuhanjika chakuzeneka chinyingi?+
3 Lizange ngana mwachingazule chalunga,Nangukwihula, kahove ungukumbulule.
4 Wapwile kulihi omu ngwalile chihela chamavu?+Ngulweze, kachi nge unatachikiza.
5 Iya apimine seteko yawo, kachi nge unamutachikiza,Chipwe kukanyikilaho mukole wakupimisa?
6 Manevo amavu vawajikile haka?Iya alile lilolwa lyamumbango yawo,+
7 Omu vatanganyika vachimene+ vawahililile nakutwa hamwe jingunda,Nomu vana vaKalunga* vosena+ vaputukile kulikuwa nakusakwilila jikushi?
8 Iya akingile kalungalwiji navijilo,+Omu alovokele kufuma mujimo,
9 Nomu ngwamuvwikile mavwi,Nakumufwika namilima yakwilava wi,
10 Nomu nawa ngwamutongwelele seteko yakukumina,Nakumuhakila tupachiso navijilo?+
11 Kaha ngwambile ngwami, ‘Twaya ukumine hano, kanda uhambakana hanoko.Hano hakiko nawakuminanga makimba ove.’+
12 Uno walwezaho lyehi chimene,Chipwe lungulungu lyakucha+ vitachikize kuvihela vyavyo,
13 Mangana vikahete kujisongosongo jamavu,Nakuhanga vaka-kuhuka kuvihela vyavyo numba?+
14 Mavu vanawalumuna nge unonga uze uli heshi yakatachikijilo,Kaha vyuma vyatwamaho vyeji kusolwesangaho kanawa kwijiva nge uvwalo wamwaza.
15 Kumunyika chavaka-kuhuka vanavatambulacho,Kaha mavoko avo aze vanazundula helu vanavahokolawo.
16 Uno wengilaho lyehi mutuvweluvwelu twakalungalwiji,Chipwe kuya nakutambwojoka mumwambe wameya numba?+
17 Uno vakusolwelaho lyehi vikolo vyakutwala kukufwa,+Chipwe kumona vikolo vyakuya kumilima* numba?+
18 Kutala watachikiza omu atohwa mavu numba?+Ngulweze numba nge watachikiza vyuma vyosenevi.
19 Uno kumunyika cheji kufuminyinanga kuli,+Nachihela chamilima nawa chatwamina kulihi,
20 Numba uvitwale kuvihela vyavyoNakwijiva jijila jakuya kumahyavyo?
21 Uno wapwile hiunasemuka lyehi halwola luze, chipwe kutwama myaka* yayivuluNumba utachikize vyumevi tahi?
22 Uno wengilaho lyehi muvisete vyambundu,+Chipwe kumona visete vyapeho yanyamanganda,+
23 Vize ngunalamina lwola lwavihuli,Chipwe likumbi lyandombo najita nyi?+
24 Uno kumunyika cheji kufumanga kulihi,Peho yakumututuko yize yeji kuhuhwilanga hamavu yeji kufuminyinanga kulihi?+
25 Iya napulu kapila kakuhichila meya alivajiChipwe jila yamikalateta namavwi avula,+
26 Mangana anokese vula kuvihela kwakuzeneka vatu,Mupambo muze kamwatwama vatuko,+
27 Nakuwahisa vihela vize vinalyenyekaNakusokesa mwila hamavu?+
28 Uno vula yatwama naise tahi?+Iya asemene lyume?+
29 Uno mujimo lyeya mwafumine meya akulikonda?Nyi iya asemene meya akulikonda akufuma mwilu,+
30 Omu meya vawafwikile kwijiva nge vanawafwiki nalilolwa,Nomu helu lyamwambe halikwachile maundu?+
31 Kutala unahase kukasa vinjomoto vyavatanganyika vavuluka ngwavo Kimale,Chipwe kukasununa jifungo havinjomoto vyavatanganyika vavuluka ngwavo Keshile numba?+
32 Uno unahase kutetekela chinjomoto chavatanganyika hangonde yacho,Chipwe kutwaminyina chinjomoto chavatanganyika vavuluka ngwavo Ashi navana vacho hamwe numba?
33 Uno watachikiza jishimbi jize jayula melu nyi?+Kutala unahase kujilingisa jiyule namavu tahi?
34 Kutala unahase kutambika mavwi,Mangana anehe livaji likufwike numba?+
35 Uno unahase kutuma miveso nyi?Kutala yinahase kukinduluka kuli ove nakwamba ngwayo, ‘Yetu vano!’ nyi?
36 Iya ahanyine mavwi* mangana,+Chipwe vyuma vyamuutangatanga* kunangakana?+
37 Mutu muka ali namangana akuhasa kulava mavwi?Iya mwahasa kumwanga jimbekete jameya jamwilu,+
38 Nakulingisa lukungu lupwenga ulova,Namavu nawa alikwate mikamo?
39 Uno nauhasa kujiha kanyama nakumuhana ndumba alyenga,Chipwe kuunjisa zala yamyevu javandumba,+
40 Omu navautama mumauku avo,Chipwe kuswama kuusavalo wavo nyi?
41 Iya eji kuhananga makololo vyakulya+Omu vana vavo veji kutetanga kuli Kalunga avakafweNakulumbwangila mwomwo yakuzeneka vyakulya?
Kwinyikila Chamwishi
^ Hanjikiso yachiHepeleu yize yalumbununa vangelo jaKalunga.
^ Chipwe “kumona muvwimbimbi wakufwa.”
^ Hepe., “makumbi.”
^ Chipwe pamo, “mutu.”
^ Chipwe pamo, “Chipwe vishinganyeka.”
