Wavaka-Kolinde 2 11:1-33
11 Ngunasake kachi ngwami mungutalilile chikoki hakukaluhwisa chindende muchima wami. Kaha ngunamono ngwami muli nakungutalilila chikoki vene.
2 Mwomwo nguli nakumivwila lisungu lyakuli Kalunga,* mwomwo ami ngwamishikile kukamihangisa kuli lunga umwe, mangana ngukamimike kumeso aKulishitu+ nge pwevo utoma uze kanda achilisavaleho lyehi nalunga.
3 Oloze nguli nawoma, ngwami pamo nge muze linoka atangishile Eve nakulunguluka chenyi,+ mukiko pamo munavalumbula navishinganyeka vyenu nawa vifume kukushishika nakukutoma vize vyatela Kulishitu.+
4 Mwomwo kachi nge mutu weka mweza nakwambulula Yesu weka keshi nge uze twambulwileko, chipwe nge mwaminehela shipilitu yeka keshi nge yize mwatambwileko, chipwe mujimbu weka keshi nge uze mwetavilileko,+ enu mweji kumwivwililanga.
5 Mwomwo ami ngunalimono ngwami kangwakuminamoko hakungwesekesa kuli vaze vaposetolo jenu vakukangana.+
6 Mwomwo numba tuhu kangweshi nauhashi wakuhanjikako,+ olozenyi ngukwechi chinyingi. Chikupu vene tunamisolwelacho lyehi mwosena muvyuma vyosena.
7 Kutala ngwalingile shili hakulinyisa mangana ngwami enu vakamitohwese, hakumyambulila mujimbu wamwaza waKalunga nakuwahilila chakuhona enu kungufweta tahi?+
8 Vikungulwilo vyeka ngwavisezele mukukalikiza hakutambula vyuma vyakulikafwa navyo vize vanguhanyine, mangana ngumizachilenga enu.+
9 Kahomu ngwakalikijile halwola ngwapwile nayenu, kangwapwile nguchiteli kuli mutuko, mwomwo vandumbwami vaze vafumine kuMasetonya vanguhanyine vize ngwasakile.+ Chikupu vene ngwalilaminenga mwosena kuchina nangupwa nguchiteli kuli enu, kaha nangulinganga lika ngocho.+
10 Ngunakuhanjika muchano waKulishitu ou watwama muli ami ngwami, kangweshi kulitwamina kulisashila+ hajingalila jaAkayako.
11 Mwomwo ika? Mwomwo kangwamizangako tahi? Kalunga atachikiza ngwenyi ngwamizanga.
12 Oloze ovyo nguli nakulinga nanguvilinganga lika,+ mangana nguhonese makuli avaze vali nakusakanga kengililo* kakuzanga kuteseka hamwe nayetu muvyuma vize* veji kulisashilanga.
13 Mwomwo vatu vangocho vanapu vaposetolo vamakuli, vaka-kuzata vamakuli, vaze veji kulyonganga kupwa vaposetolo jaKulishitu.+
14 Aha kaheshi vyakulikomokelako, mwomwo naSatana eji kulyalumunanga ivene kupwa kangelo kamusana.+
15 Shikaho kacheshi hichuma chakukomwesako kachi nge vaka-kumuzachila navalyalumunanga nawa kupwa vaka-kuzachila kwoloka. Oloze kukuma chavo nachikapwa kweseka namwaya vilinga vyavo.+
16 Nangwamba cheka ngwami, kanda nakupwa mutu umwe mwashinganyeka ngwenyi ngunakaluhwisa muchimako. Oloze kachi nge munashinganyeka ngocho, kaha ngwitavilenu nge mutu uze nakaluhwisa muchima, mangana nayami nawa, nguhase kulisasako chachindende.
17 Ovyo nguli nakuhanjika, kangweshi nakuvihanjika hakulondezeza Mwatako, oloze nge mutu uze nakaluhwisa muchima, nakulisasa hakulifwelela ivene.
18 Hakuwana nge vavavulu vali nakulisasa kweseka nomu mwaya mujimba,* nayami nawa nangulisasa.
19 Hakuwana nge enu “kamwakaluhwisa michimako,” ngocho mweji kwitavilanga nakuwahilila vatu vaze vakaluhwisa michima.
20 Chikupu vene enu mweji kwitavilanga weshowo mwamikwata undungo, weshowo mwamilila luheto lwenu, weshowo mwamitambula vyuma vyenu, weshowo mwalitohwesa hali enu, weshowo mwamiveta kumeso.
21 Ngunahanjika ngocho mangana tulisawise etu vavene, mwomwo nachisoloka kwijiva nge tuvakuhehela.
Oloze kachi nge veka navomika, nayami nawa nangumika, ngunahanjika nakukaluhwisa muchima.
22 Uno vanapu vaHepeleu tahi? Nayami nawa ngukaHepeleu.+ Uno vanapu vaIsalele tahi? Nayami nawa ngukaIsalele. Uno vanapu vaka-tanga* yaApalahama tahi? Nayami nawa ngumuka-tanga yaApalahama.+
23 Uno vanapu vaka-kuzachila Kulishitu tahi? Nangukumbulula nge ngumutu wakuzaluka ngwami ami ngunahambakanamo chikuma: Ami ngunazate chikuma mulimo,+ vanangukasenga kakavulu mutumenga,+ vananguvetenga kakavulu, ngunalitalasananga nakufwa kakavulu.+
24 Mapapa katanu, vaYuleya vanguvetele vikote 39,+
25 vanguvetele jimbwechi+ mapapa katatu, vangwashile malolwa+ kamwe, ngwavombele nawato+ mapapa katatu, ngwapwile hakachi kakalungalwiji ufuku umwe namusana umwe,
26 ngwapwile muungeji kakavulu, mujiponde hatulwiji, mujiponde kuli vihwanga, mujiponde kuli vatu jami,+ mujiponde kuli vaka-mafuchi eka,+ mujiponde munganda,+ mujiponde mupambo, mujiponde hakalungalwiji, mujiponde kuli vandumbwami vamakuli,
27 mukukilikita nakufulyangila, mukuhona kusavala tulo kakavulu,+ muzala nalipwila,+ mukuhona kupwa navyakulya kakavulu,+ namukufwa chishika namukutwama nauvu.*
28 Kaha kuhakila kuvyuma vyosenevi ngunavuluka lyehi, kuli nawa chuma chikwavo chili nakungushindakanya hakumbi hakumbi, chuma kana shina kulizakamina havikungulwilo vyosena.+
29 Iyaze nazeye chakuzeneka ami kuzeya? Iyaze nahukana chakuzeneka ami kupihilila?
30 Kachi nge ngwami ngulisase, kaha nangulisashila havyumevi vyasolola kuhehela chami.
31 Kalunga, Ise yaMwata Yesu, Uze nawa vatela kwalisanga haya myaka yosena, natachikiza ngwenyi kangweshi nakulyongako.
32 Nguvulu uze apwile mwishi yamwangana Aleta muNdamashiku, apwile nakulama nganda yavaka-Ndamashiku mangana ngwenyi angukwate,
33 oloze vanguhakile mumutonga nakungulondwesa munjanena yahakembwe yanganda nakunguzezumwina kusali,+ kaha ngwapululukile mumavoko enyi.
Kwinyikila Chamwishi
^ Hela., “twima yaKalunga.”
^ Chipwe “nakusakanga kanyinyilo.”
^ Chipwe “mumulimo uze.”
^ Kulumbununa, kweseka navishinganyeka vyautu.
^ Hela., “mbuto.”
^ Hela., “namukutwama uselesele.”
