Mateu 23:1-39
23 Jino Yesu ahanjikile kumayongomena nakuli tumbaji twenyi ngwenyi:
2 “Vaka-kusoneka navaFwaliseu vanatwame muchitwamo chaMose.
3 Shikaho vyuma vyosena navamilweza, vilingenu nakuvilama, oloze kanda namulinga mwaya vilinga vyavoko, mwomwo veji kuhanjikanga kaha, oloze kaveshi kulingamoko.+
4 Veji kukasanga viteli vyavilemu nakuvitwika havifwiji vyavatu,+ oloze vavene kaveshi kusaka kuvikwata namunwe wavoko.+
5 Milimo yosena veji kuzatanga, veji kuyizatanga mangana vavamone kuli vatu,+ mwomwo veji kutohwesanga tuvikasha twavisoneka tuze veji kuvwalanga kupwa nge mukingo,+ nakusuhwisa jizombo jauvwalo wavo.+
6 Vasaka vihela vyaulemu chikuma kukulya chachingoloshi, navitwamo vyakulutwe* mujisunangonga,+
7 nakuvamenejeka kuvilanjilo, nakuvavulwojoka kuli vatu ngwavo, Lapi.*
8 Oloze enu kanda vamivuluka ngwavo, Lapiko mwomwo Muka-kuminangula+ apwa umwe kaha, kahenu muvosena mwapwa muvandumbu.
9 Kaha nawa kanda namuvulukanga mutu hano hamavu ngwenu senuko, mwomwo Senu+ apwa umwe kaha, Uze wamwilu.
10 Kanda vamivuluka nawa ngwavo, vatwaminako, mwomwo Twamina yenu apwa umwe kaha, Kulishitu.
11 Oloze mutu wamulemu hali enu atela kupwa muka-kumizachila.+
12 Weshowo mwalitohwesa ivene navakamwinyisa,+ kaha weshowo mwalinyisa ivene navakamutohwesa.+
13 “Lamba kuli enu vaka-kusoneka nayenu vaFwaliseu, enu vaka-kulyonga! Mwomwo mweji kusokanga kuvikolo vyaWangana wamelu kuchina vatu navengilamo. Enu vavene kamweshi kwingilamoko, kaha vaze nawa vali nakusaka kwingilamo kamweshi kuvetavisako.+
14 *——
15 “Lamba kuli enu vaka-kusoneka nayenu vaFwaliseu, enu vaka-kulyonga!+ Mwomwo mweji kutambwojokanga hakalungalwiji nahatunda mangana mwalumune mutu umwe kupwa kaYuleya, kaha nge nalumuka lyehi, mweji kumulingisanga atengamo kwingila muNgehena* mapapa kavali kumihambakana enu.
16 “Lamba kuli enu vatwamina vatupuputa,+ enu mweji kwambanga ngwenu, ‘Kachi nge mutu mwalishinga tembele, chamokomoko tuhu, oloze nge mutu mwalishinga ulu wamutembele, kaha atela kutesamo lushingo nalishingi.’+
17 Enu vileya, enu tupuputa, uno chachilemu chimwe chilihi, ulu tahi, nyi tembele yize yinalingisa ulu kupwa wajila?
18 Mweji kwambanga nawa ngwenu, ‘Kachi nge mutu mwalishinga lijiko lyakulumbila, chamokomoko tuhu, oloze nge mutu mwalishinga wana uze uliho, kaha atela kutesamo lushingo nalishingi.’
19 Enu tupuputa, uno chachilemu chimwe chilihi, wana tahi, nyi lijiko lyakulumbila lize lyeji kulingisanga wana kupwa wajila?
20 Shikaho, weshowo mwalishinga lijiko lyakulumbila ali nakulishingila kumwe navyuma vyosena nawa vize viliho.
21 Kaha weshowo mwalishinga tembele ali nakulishingila kumwe naUze nawa atwamamo.+
22 Kaha weshowo mwalishinga melu ali nakulishingila kumwe nalitanda lyaKalunga naUze nawa atwamaho.
23 “Lamba kuli enu vaka-kusoneka nayenu vaFwaliseu, enu vaka-kulyonga! Mwomwo mweji kuhananga chakusokesa mulikumi chalwenyi, namuseki, nakumine,+ oloze munaleununa vyuma vyavilemu kuJishimbi, vikiko vene chiyulo chakwoloka+ nakutetela+ nakushishika. Vyuma kanevi mwatela kuvilinga vene, oloze navyevi vikwavo nawa kamwatela kuvileununako.+
24 Enu vatwamina vatupuputa,+ mweji kukembulanga kangunungunu,+ oloze mweji kuminanga ngamela.+
25 “Lamba kuli enu vaka-kusoneka nayenu vaFwaliseu, enu vaka-kulyonga! Mwomwo mweji kutomesanga kuweluka walupasa nalilonga,+ oloze mutulo munazale nachipululu+ namuchima wakundupukila muvyuma vafwila.+
26 Ove kaFwaliseu wakapuputa, vangila kutomesa mutulo yalupasa nalilonga, numbanyi kuweluka walwo kutome.
27 “Lamba kuli enu vaka-kusoneka nayenu vaFwaliseu, enu vaka-kulyonga!+ Mwomwo mwapwa nge jifuka jakukwita pemba+ jize jeji kusolokanga kupwa jamwaza kuweluka, oloze mukachi munazale navifuwa vyavafu namajilo.
28 Ngocho nayenu nawa, kuweluka mweji kusolokanga kupwa muvakwoloka kuvatu, oloze mujitulo jenu munazale kulyonga naupapwoki.+
29 “Lamba kuli enu vaka-kusoneka nayenu vaFwaliseu, enu vaka-kulyonga!+ Mwomwo mweji kutunganga jifuka javapolofweto, nakuwahisa vimbumbe* vyavaka-kwoloka,+
30 kaha mweji kwambanga ngwenu, ‘Kachi nge twayoyelele mumakumbi avakakuluka jetu, kachi katwazanyine navo mumulonga wakumwanga manyinga avapolofwetoko.’
31 Ngocho muli nakulisolola hatoma ngwenu mwapwa muvana vavaze vajihile vapolofweto.+
32 Ngocho nayenu nawa zalisenu chesekelo chavakakuluka jenu.
33 “Enu manoka, enu vana vaviyenge,+ kusopesa chaNgehena*+ namukachichina ngachilihize?
34 Shikaho, ami nguli nakumitumina vapolofweto+ navaka-mangana navaka-kunangula.+ Vamwe namukavajiha+ nakuvasukika havitondo, kaha vakwavo namukavaveta vikote+ mujisunangonga jenu nakukavayanjisa+ munganda hinganda,
35 mangana manyinga avaka-kwoloka osena aze vanamwange hano hamavu akeze hali enu, kufuma vene kumanyinga amutu wakwoloka Avele+ nakuheta kumanyinga aZekaliya mwanaMbalakiya, uze mwajihilile mukachi kachihela chajila nalijiko lyakulumbila.+
36 Chamuchano vene nangwamba kuli enu ngwami, vyuma vyosena evi navikeza hachisemunwino chino.
37 “Ove Yelusalema, ove Yelusalema, ove muka-kujiha vapolofweto, ove muka-kwasa malolwa vaze vanatumu kuli ove.+ Ngwasakile mapapa kakavulu kukungulula vana vove nge omu chali eji kukungulwilanga vana venyi mumavava enyi. Oloze enu kamwasakileko.+
38 Talenu! Zuvo yenu vanamiselayo.*+
39 Mwomwo nangwamba kuli enu ngwami, chikupu vene kamweshi kungumona chekako kufuma oholili palanga nomu namukamba ngwenu, ‘Vakisula ou mweza mulijina lyaYehova.’”*+
Kwinyikila Chamwishi
^ Chipwe “vyamwaza.”
^ Chipwe “Muka-kunangula.”
^ Tala Chihande A3.
^ Tala Mukana waMazu.
^ Chipwe “vimbumbe vyakwanukila.”
^ Tala Mukana waMazu.
^ Chipwe pamo, “vanamiselayo kupwa ngundu.”
^ Tala Chihande A5.
