Mateu 20:1-34
20 “Mwomwo Wangana wamelu unafwane nge mwenyazuvo uze ayile chimenemene nakukamba vaka-kuzata muwande wenyi wamivinyo.+
2 Omu alingile nalivwasana lyehi navaka-kuzata kuvafweta ndenali* yimwe halikumbi, avatumine muwande wenyi wamivinyo.
3 Kahomu ayile cheka kafwe haola yamuchitatu,* amwene veka vanemana chakuzeneka milimo kuchilanjilo.
4 Kaha ambile kuli vakiko ngwenyi, ‘Nayenu nawa yenu muwande wamivinyo, kaha nangumihana yeshoyo fweto yinatemo.’
5 Ngocho vayile. Cheka nawa, ayile haola yakusokesa 6,* nahaola yakusokesa 9,* kaha alingile mwomumwe nawa.
6 Kukuminyinako, ayile kafwe haola yakusokesa 11,* awanyine veka nawa vanemana, kaha avehwile ngwenyi, ‘Ika munemanyina lika hano likumbi lyosena chakuzeneka milimo?’
7 Vakiko vamukumbulwile ngwavo, ‘Mwomwo kakweshi mutu natukambeko.’ Kaha ambile kuli vakiko ngwenyi, ‘Nayenu nawa yenu muwande wamivinyo.’
8 “Omu kwatokele, uze mwenyawande wamivinyo ambile kuli muka-kumulamina vyuma vyenyi ngwenyi, ‘Sanyika vaka-kuzata uvahane fweto yavo,+ kuputukila kuli vaze vakukuminyina nakuneha kuli vaze vakulivanga.’
9 Omu vejile vaze akambile haola yakusokesa 11, vatambwile mutu himutu ndenali* yimwe.
10 Jino omu vejile vaze vakulivanga, vashinganyekele ngwavo navatambula fweto yayinene, oloze navakiko nawa vavafwetele ndenali* yimwe.
11 Hakuyitambula vaputukile kuyayavala kuli uze mwenyazuvo
12 nakwamba ngwavo, ‘Ava vakukuminyina vanazate mulimo waola yimwe kaha. Oloze unavahane fweto yakuteseka hamwe nayetu tunakilikita likumbi lyosena nakuwema namusana wakaza.’
13 Oloze ikiye akumbulwile minavo umwe ngwenyi, ‘E lunga, ami kangwalingile chuma chachipi kuli oveko. Ngwetu wetavilanga kukuhana ndenali* yimwe, nyi mweka?+
14 Mbata fweto yove uyenga. Nguli nakusaka nguhane ou wakukuminyina fweto yakuteseka hamwe nayeyi ngunakuhane ove.
15 Uno kangweshi nangolo jakulinga mweshomwo ngunasake kulinga navyuma vyamiko nyi? Nyi pamo unevu kupihya* ami hakulinga mwamwaza?’*+
16 Shikaho vaze vakukuminyina navakapwa vakulivanga, kaha vakulivanga navakapwa vakukuminyina.”+
17 Omu Yesu apwile nakukanduka kuYelusalema, ahanjikile natumbaji twenyi 12 kupenge ngwenyi:+
18 “Talenu! Tuli nakukanduka kuYelusalema, kaha Mwanamutu navakamuhana kuli vapilishitu vavakulwane nakuli vaka-kusoneka. Navakamusopesa nakumutongwela kufwa,+
19 kaha navakamuhana kuvatu vakumafuchi eka mangana vakamuhende nakumuveta vikote nakumusukika hachitondo.+ Oloze halikumbi lyamuchitatu navakamusangula.”+
20 Jino nevo yavana vaZevete+ vamalunga, apandamine kuli Yesu navana venyi hamwe, kaha alifukwile kuli ikiye. Asakile kumulomba chuma chimwe.+
21 Yesu amwihwile ngwenyi: “Uli nakusaka ika?” Kaha ikiye amukumbulwile ngwenyi: “Vetavile ava vana vami vavali vakatwamenga ou kulivoko lyove lyachilyo, ou kulivoko lyove lyachimoswe muWangana wove.”+
22 Yesu akumbulwile ngwenyi: “Enu kamwatachikijile chuma muli nakulombako. Uno munahase kunwa lupasa elu nguli nakusaka kunwa kalinwomu nyi?”+ Vakiko vambile kuli ikiye ngwavo: “Eyo, tunahase.”
23 Ikiye ambile kuli vakiko ngwenyi: “Lupasa lwami munahase kulunwa vene,+ oloze kutwama kulivoko lyami lyachilyo nakulivoko lyami lyachimoswe keshi yami ngweji kuchihanangako, oloze Tata ikiye eji kuchihananga vaze nawahishila.”+
24 Jino vaze vakwavo 10 hakwivwa ngocho, vapihililile navaze vasongo namutu.+
25 Oloze Yesu avasanyikile nakwamba ngwenyi: “Enu munatachikiza ngwenu vaka-kuyula vaka-mafuchi veji kulilingisanga kupwa vakaka javo, kaha vatu vavalemu veji kusololanga ngolo javo hali vakiko.+
26 Oloze enu kamwatela kulinga ngochoko.+ Weshowo mwasaka kupwa wamulemu hali enu apwenga muka-kumizachila,+
27 kaha weshowo mwasaka kupwa watete hali enu apwenga ndungo yenu.+
28 Chochimwe nawa, Mwanamutu kejile mangana vamuzachilenga milimoko, oloze mangana azachile vatu milimo+ nakuhana mwono wenyi kupwa ndando yakusokola vavavulu.”+
29 Jino omu vapwile nakufuma muYeliko, liyongomena lyalinene lyamukavile.
30 Kaha kukulo yajila kwatwamine tupuputa vavali. Kahomu vevwile ngwavo Yesu ali nakuhita, vatambakanyine ngwavo: “Ove Mwata, ove MwanaNdavichi,+ tuteteleko!”
31 Lize liyongomena lyavakanjile vahole kulu, oloze vakiko vaswezele jino kutambakana ngwavo: “Ove Mwata, ove MwanaNdavichi, tuteteleko!”
32 Ngocho Yesu emanyine, kaha avasanyikile nakwamba ngwenyi: “Vyuma muka muli nakusaka ngwenu ngumilingile?”
33 Vambile kuli ikiye ngwavo: “Ove Mwata, tonesa meso etu.”
34 Yesu avevwilile keke, avakwachile hameso avo,+ kaha hahaze vene vatonene, ngocho vamukavangijile.
Kwinyikila Chamwishi
^ Tala Chihande B14.
^ Kafwe 9:00 yachimene.
^ Kafwe 12:00 yamusana.
^ Kafwe 15:00.
^ Kafwe 17:00.
^ Tala Chihande B14.
^ Tala Chihande B14.
^ Tala Chihande B14.
^ Hela., “pamo liso lyove lyalipi; pamo liso lyove lyakuhuka.”
^ Chipwe “mwalikoji.”
