Mateu 19:1-30
19 Omu Yesu akumishile kuhanjika vyumevi, afumine kuNgalileya nakwiza kujingiza jaYuleya musali yaYotau.+
2 Kaha mayongomena amanene amukavile, kaha avokile kuze.
3 Jino vaFwaliseu vejile kuli ikiye mangana vamweseke. Vamwihwile ngwavo: “Uno vetavisa lunga kulukulula* pwevo lyenyi hakala mulonga tahi?”+
4 Ikiye avakumbulwile ngwenyi: “Uno kanda mutangengaho lyehi ngwavo ou avatangile kufuma vene kumaputukilo avatengele lunga napwevo+
5 nakwamba ngwenyi: ‘Shikaho lunga mwakaseza ise nanaye nakukalipanjika napwevo lyenyi, kaha ava vavali navakapwanga mujimba umweko’ nyi?+
6 Ngocho kaveshi cheka vavaliko, oloze mujimba umwe kaha. Shikaho chuma chize Kalunga nanungu hamwe* mutu kanda achihandununako.”+
7 Kaha vambile kuli ikiye ngwavo: “Mwomwo ika Mose ahanjikilile vyakuhana mukanda wakuhanga pwevo nakumulukulula?”+
8 Ikiye ambile kuli vakiko ngwenyi: “Hakukaluhwa chamichima yenu, hakiko amitavilile Mose kulukulula mapwevo jenu,+ oloze kachapwile ngocho kufuma kukuputukako.+
9 Nangwamba kuli enu ngwami weshowo mwalukulula pwevo lyenyi chakuzeneka mulonga waujila* nakumbata weka, mwalinga ukoji.”+
10 Tumbaji vambile kuli ikiye ngwavo: “Nge mukiko chapwa kuli lunga napwevo lyenyi, kahanyi kachawaha kumbatako.”
11 Ikiye ambile kuli vakiko ngwenyi: “Keshi nge vosena vanahase kulinga ngochoko, shina vaze kaha vatwama nawana kana.+
12 Mwomwo kwatwama vatu vakuheuka vaze vaheuka kufuma kukusemuka chavo, kaha kwatwama vatu vakuheuka vaze vahewishile kuli vakwavo vatu, kaha nawa kwatwama vatu vakuheuka vaze valihewisa vavene mwomwo yaWangana wamelu. Ou mwahasa kutwama ngocho atwame vene ngocho.”+
13 Jino vamunehelele vana vavandende mangana avasalike mavoko enyi nakuvalombela, oloze tumbaji vavakanjile.+
14 Yesu ambile ngwenyi: “Vechenu vana vavandende, kanda namuvakanyisa kwiza kuli amiko, mwomwo Wangana wamelu unapu wavava vangana.”+
15 Avasalikile mavoko enyi, kaha afumine kuze.
16 Jino mutu umwe ejile kuli ikiye nakumwihula ngwenyi: “Ove Muka-kunangula, vyuma muka vyamwaza ngwatela kulinga mangana ngukayoye haya myaka yosena?”+
17 Ikiye amwambile ngwenyi: “Mwomwo ika uli nakungwihwila havyuma vyamwaza? Kuli umwe kaha apwa wamwaza.+ Kachi nge uli nakusaka kutambula kuyoya, kaha lamanga lika jishimbi.” +
18 Ikiye amwihwile ngwenyi: “Jishimbi muka?” Yesu amukumbulwile ngwenyi: “Kanda mukajiha mutuko,+ kanda mukalinga ukojiko,+ kanda mukevako,+ kanda mukambulula unjiho wamakuliko,+
19 vumbikenunga masenu namanenu,+ zangenunga vakwenu nganomu mwalizanga enu vavene.”+
20 Uze mukweze walunga ambile kuli ikiye ngwenyi: “Vyosena evi ngunavilamenga. Nyi vyeka vika nawa ngwatela kulinga?”
21 Yesu ambile kuli ikiye ngwenyi: “Kachi nge uli nakusaka kupwa uwakukupuka, yako ukalanjise vyuma vyove nakuhana jimbongo kuli vaka-kuhutwa, kaha naukapwa naluheto mwilu.+ Kufumaho twaya upwenga umuka-kungukavangiza.”+
22 Omu uze mukweze walunga evwile mazu kana, ayile nakunyengetela, mwomwo apwile naluheto lwaluvulu.
23 Kaha Yesu ambile kuli tumbaji twenyi ngwenyi: “Chamuchano vene nangwamba kuli enu ngwami nachikapwa chachikalu kuli muka-luheto kwingila muWangana wamelu.+
24 Nangwamba cheka kuli enu ngwami, Chinapu chachashi kuli ngamela kuhita muliso lyandongo kuhambakana muka-luheto kwingila muWangana waKalunga.”+
25 Omu tumbaji vevwile ngocho, valikomokelele chikuma nakwamba ngwavo: “Kaha iyaze navakalwila?”+
26 Yesu avashishikile nakwamba kuli vakiko ngwenyi: “Echi kachapwa chachashi kuli vatuko, oloze kuli Kalunga vyuma vyosena vyapwa vyavyashi.”+
27 Jino Petulu ambile kuli ikiye ngwenyi: “Tala! Etu tunaseze vyuma vyosena nakukukavangiza, vyuma muka natukawanyinaho?”+
28 Yesu ambile kuli vakiko ngwenyi: “Chamuchano vene nangwamba kuli enu ngwami, omu navakalingisa vyuma kupwa vyavihya, omu Mwanamutu mwakatwama halitanda lyenyi lyaupahu, enu munangukavenga namukatwamanga hamatanda 12, nakuyulanga miyachi yavaIsalele 12.+
29 Kaha weshowo naseze jizuvo, chipwe vandumbwenyi vamalunga, chipwe vamapwevo, chipwe ise, chipwe naye, chipwe vana, chipwe mande mwomwo yalijina lyami, mwakatambula vyuma vyavivulu chikuma, kaha mwakaswana nawa kuyoya chahaya myaka yosena.+
30 “Oloze vavavulu vaze vanalivange navakapwa vakukuminyina, kaha vakukuminyina navakapwa vakulivanga.+
Kwinyikila Chamwishi
^ Chipwe “kutumbika.”
^ Hela., “nahake mutoka yimwe.”
^ MuchiHelase, por·neiʹa. Tala Mukana waMazu.
