Mateu 18:1-35
18 Halwola vene luze, tumbaji vapandamine kuli Yesu nakwamba ngwavo: “Uno iya chikupu wamulemu muWangana wamelu?”+
2 Ngocho asanyikile mwana wamundende, amwimikile mukachi kavo
3 nakwamba ngwenyi: “Chamuchano vene nangwamba kuli enu ngwami, kuvanga mwalumuke nakupwa nge vana vavandende,+ mokomoko kamweshi kukengila muWangana wameluko.+
4 Shikaho weshowo mwalinyisa nge ou mwana wamundende, ikiye wamulemu muWangana wamelu.+
5 Kaha weshowo mwatambula mwana wamundende nganou mwomwo yalijina lyami, nangutambula nayami nawa.
6 Oloze weshowo mwahukanyisa umwe hali ava vavandende vaze vangufwelela, nachiwaha kumukashilila lilolwa lyakuchekesa unga mushingo nge lize eji kunyengumunanga chimbulu, nakumulondomanyisa hamwambe wamukalungalwiji.+
7 “Lamba kuli kano kaye mwomwo yakupwa navimbunji vyakuhukanyisa! Chikupu vene vimbunji vyakuhukanyisa naviza, oloze lamba kuli mutu uze mwaneha chimbunji chakuhukanyisa!
8 Kachi nge livoko lyove, chipwe lihinji lyove lili nakukuhukanyisa, livatuleko nakulimbila.+ Chinawahe kuli ove kutambula kuyoya nakutenguka chove chipwe nautonji wove kuhambakana kukumbila mukakahya kahaya myaka yosena namavoko ove avali chipwe namahinji ove avali.+
9 Kaha nawa kachi nge liso lyove lili nakukuhukanyisa, litombongonyemo nakulimbila. Chinawahe kuli ove kutambula kuyoya naliso limwe kuhambakana kukumbila nameso ove avali muNgehena*+ yakakahya.
10 Nyingililenu nakumona ngwenu kamweshi nakulumbilisa umwe hali ava vavandendeko, mwomwo nangumilweza ngwami vangelo javo mwilu lwola lwosena veji kumonanga kumeso aTata uze ali mwilu.+
11 *——
12 “Munashinganyeka muka? Kachi nge mutu ali namikoko jenyi 100, kaha nahajimbala mukoko umwe,+ kutala keshi kuseza vaze 99 hajipili nakuya nakutondatonda uze umwe najimbalako nyi?+
13 Kachi nge namuwane, chikupu vene nangumilweza ngwami, mwawahilila chikuma hali uze umwe kuhambakana hali vaze 99 vaze kavajimbalileko.
14 Chochimwe nawa naTata* uze ali mwilu, kasaka kumona umwe hali ava vavandende mwanongako.+
15 “Kaha nawa kachi nge ndumbwove nalingi shili, yako ukamulweze mulonga wenyi* kwauka wenu naikiye kaha.+ Kachi nge mwakwivwilila, kaha unanganyala ndumbwove.+
16 Oloze nge keshi kukwivwililako, kaha mbatako mutu umwe chipwe vavali, mangana haunjiho wavatu* vavali chipwe vatatu, chihande chosena chihase kuzama mbe.+
17 Nge keshi kuvevwililako, kaha lweza chikungulwilo. Nge keshi kwivwilila nawa chikungulwiloko, kaha apwenga nge himutu muka-lifuchi lyeka kuli ove,+ chipwe nge himuka-kutambula mitelo.+
18 “Chamuchano vene nangwamba kuli enu ngwami, vyeshovyo namukakasa hamavu navikapwa vyakukasa lyehi namwilu nawa, kaha vyeshovyo namukakasununa hamavu navikapwa vyakukasununa lyehi namwilu nawa.
19 Chamuchano vene nangumilweza cheka ngwami, kachi nge vatu vavali hali enu hano hamavu navalivwasana chuma chimwe chachilemu chize vatela kulomba, kaha navavalingilacho kuli Tata ali mwilu.+
20 Mwomwo kuze kuli vavali chipwe vatatu vanakunguluka mulijina lyami,+ nayami kunguli vene kuze mukachi kavo.”
21 Jino Petulu ejile nakwamba kuli ikiye ngwenyi: “Ove Mwata, uno mapapa kangahi ngwatela kukonekela ndumbwami uze ali nakunguvulumuna? Uno mapapa 7 tahi?”
22 Yesu ambile kuli ikiye ngwenyi: “Nangwamba kuli ove ngwami, keshi mapapa 7 koko, oloze mapapa 77.+
23 “Shikaho Wangana wamelu unafwane nge mwangana uze asakile kuhituluka mumikuli yavandungo jenyi.
24 Omu aputukile kuhitulukamo, vamunehelele mutu umwe uze apwile namukuli wenyi wajitalende 10,000.*
25 Oloze hakuwana nge ahonene kukindulwisa uze mukuli, ngocho kaka yenyi ambile ngwenyi valandulule uze lunga napwevo lyenyi, navana venyi, navyuma vyosena ahetele mangana vifwike mumukuli.+
26 Ngocho uze ndungo alimbilile hamavu nakulifukula kuli ikiye. Ambile ngwenyi, ‘Ngutalilileko chikoki, nangukukindulwishila vyosena.’
27 Jino kaka yayauze ndungo amwivwilile keke, kaha amwechele nakujimbangana mukuli wenyi.+
28 Oloze uze ndungo ayile, kaha awanyine mukwavo ndungo uze apwile namukuli kuli ikiye wajindenali* 100, kaha amukwachile nakuputuka kumuchikita hamiliu nakwamba ngwenyi, ‘Ngukindulwishile vyosena vize watambwile.’
29 Kaha uze mukwavo ndungo alimbilile hamavu nakuputuka kumulembelela ngwenyi, ‘Ngutalilileko chikoki, nangukukindulwishila.’
30 Ikiye ketavilileko, oloze ayile nakumuhaka mukamenga palanga nomu mwakakindulwisa uze mukuli.
31 Omu vakwavo vandungo vamwene vyuma vyasolokele, vapihililile chikuma, kaha vayile nakulweza kaka yavo vyuma vyosena vyasolokele.
32 Jino kaka yenyi amusanyikile nakwamba kuli ikiye ngwenyi: ‘Ove ndungo wakuhuka, ami ngwajimbangananga mukuli wove wosena omu wangulembelelanga.
33 Kutala kawatelanga kutetela mukwenu ndungo ngana muze ngwakutetelangako nyi?’+
34 Ngocho kaka yenyi hakwivwa matoto, amuhanyine kuli vaka-kulama kukamenga palanga nomu mwakakindulwisa uze mukuli wosena.
35 Omu mukiko nawa mwakamilinga naTata wamwilu+ kachi nge namukana kulikonekelanga navandumbwenu kufuma kumichima yenu.”+
Kwinyikila Chamwishi
^ Tala Mukana waMazu.
^ Tala Chihande A3.
^ Chipwe pamo, “naSenu.”
^ Hela., “yako ukamuhanjikile.”
^ Hela., “mangana mutunwa twavinjiho.”
^ Jitalende 10,000 japalata japwile jindenali 60,000,000. Tala Chihande B14.
^ Tala Chihande B14.
