Mateu 10:1-42
10 Jino Yesu asanyikile tumbaji twenyi 12, avahanyine ngolo jakufungulula vashipilitu vavapi+ mangana vahase kuvalovola nakuka misongo yosena nakuviza chosena vavijilenga vatu.
2 Awa akiko majina avaposetolo vaze 12:+ Watete ikiye Shimona uze vavuluka nawa ngwavo, Petulu,+ nandumbwenyi Andelei,+ naYakova mwanaZevete, nandumbwenyi Yowano,+
3 naFwilipu, naMbalaTolomeu,+ naTomase,+ naMateu+ uze muka-kutambula mitelo, naYakova mwanaAlefweu, naTateu,
4 naShimona uze watwima,* naYuta Isakalyote uze jino asolwele Yesu.+
5 Yesu avatumine ava 12 nakuvahana jindongi eji ngwenyi:+ “Kanda namuya mujila yavaka-mafuchi ekako, kaha nawa kanda namwingila munganda yavaSamaliya numba yimweko.+
6 Oloze yenunga kaha kuli mikoko vakujimbala vakuzuvo yaIsalele.+
7 Kahomu namuya, ambululenunga ngwenu: ‘Wangana wamelu unapandama kwakamwihi.’+
8 Ukenunga vaka-kuviza,+ sangulenunga vafu, tomesenunga vaka-mbumba, lovolenunga vandemone. Mwatambwile chawana, hanenunga nawa chawana.
9 Kanda kumbata ulu, chipwe palata, chipwe unengu muvikapa vyenu vyajimbongoko,+
10 chipwe lipakumuna lyavyakulya haungeji wenu, chipwe uvwalo uvali,* chipwe mendelo, chipwe mukomboko,+ mwomwo muka-kuzata atela kumuhana kulya chenyi.+
11 “Mweshomwo munganda chipwe mwimbo namwingila, tondenu weshowo atela, kaha twamenu vene muze palanga nomu namukafumamo.+
12 Omu namwingila muzuvo, menekenu vatu vakuzuvo kana.
13 Kachi nge vatu vakuzuvo kana vatela, kaha kuunda chenu namuvavulukila chipwenga hali vakiko.+ Oloze nge kavatelako, kaha kuunda chenu chikinduluke cheka kuli enu vavene.
14 Weshowo mwakana kumitambula, chipwe kwivwilila kumazu enu, hakufuma muzuvo kana, chipwe munganda kana, kalitotomonenu lukungu kumahinji enu.+
15 Chamuchano vene nangwamba kuli enu ngwami, kuzangamisa navakazangamisa nganda kana haLikumbi lyaKusopesa nachikatohwa chikuma kuhambakana chalifuchi lyaSotome naNgomola.+
16 “Ivwenu! Ami nguli nakumituma nge mikoko mukachi katungunge. Shikaho pwenunga muvakuvanguluka nge manoka, oloze muvakuunda nge mayembe.+
17 Zangamenunga navatu, mwomwo navakamitwalanga kujizango jakusopela milonga,+ kaha navakamiveta vikote+ mujisunangonga javo.+
18 Navakamitwalanga nawa kumeso avanguvulu navamyangana+ mwomwo yayami, mangana ukapwe unjiho kuli vakiko nakuli vaka-mafuchi.+
19 Oloze omu navakamihana kuli vakiko, kanda namukalizakamina mwakuhanjikila chipwe vyuma namukahanjikako, mwomwo vyuma namukahanjika navakamihanavyo haola vene yize,+
20 mwomwo keshi yenu namukahanjikako, oloze shipilitu yaSenu yikiko nayikahanjikanga kuhichila muli enu.+
21 Kaha nawa mutu mwakahana ndumbwenyi vakamujihe, ise yamutu mwakahana mwanenyi, kaha vana navakafumbukila visemi javo nakuvajihisa.+
22 Navakamihunganga kuli vatu vosena mwomwo yalijina lyami,+ oloze ou mwakakachila palanga nakusongo navakamulwila.+
23 Omu navamiyanjisa munganda yimwe, chinyinenu munganda yikwavo,+ mwomwo chamuchano vene nangwamba kuli enu ngwami, mwanamutu mwakamiwana shimbu kanda mukumise kujinguluka jinganda jaIsalele josena.
24 “Muka-kulinangula* kahambakana muka-kumunangulako, chipwe ndungo nawa kahambakana kaka yenyiko.+
25 Chapwa chakutamo kuli muka-kulinangula kupwa ngana mwamuka-kumunangula, nandungo nawa kupwa ngana mwakaka yenyi.+ Kachi nge vatu vanavuluka mwenyazuvo ngwavo Mbelezembule,*+ nyi ava vakuzuvo yenyi kaveshi kuhasa kuvavuluka ngochoko numba?
26 Shikaho kanda namuvevwa womako, mwomwo kakweshi chuma chakufwika navahona kufukununako, chipwe chuma chakusweka navahona kutachikizako.+
27 Vyuma nangumilweza mumilima, vihanjikenu musana weye, kahevi nangumiyevetela, vyambululenu helu lyajizuvo.+
28 Kanda namwivwa woma vaze navajiha mujimba, oloze navahona kujiha mwonoko.+ Oloze ivwenu woma uze nahase kunongesa mwono namujimba muNgehena.*+
29 Kutala tujilili vavali kaveshi kuvalanda nakalumbongo kamwe kachicheleko* numba? Chipwe ngocho, naumwe wauchi mwaholokela hamavu chakuzeneka Senu kutachikizako.+
30 Oloze enu najikambu jakumitwe yenu vajilava lyehi josena.
31 Ngocho kanda namwivwa womako. Enu mwapwa muvavalemu kuhambakana tujilili vavavulu.+
32 “Shikaho weshowo mwangwitavila kumeso avatu,+ nayami nawa nangukamwitavila kumeso atata uze ali mwilu.+
33 Oloze weshowo mwangukana kumeso avatu, nayami nangukamukana kumeso atata uze ali mwilu.+
34 Kanda namushinganyeka ngwenu ngwejile nakuneha kuunda hano hamavuko. Kangwejile nakuneha kuundako, oloze poko yamukwale.+
35 Ngwejile mangana ngunehe chihandwa muli mwana walunga naise, namuli mwana wapwevo nanaye, namuli nayewenu yamutu nanayewenu.+
36 Chikupu vene vaka-kole jamutu navakapwa vaze vakuzuvo yenyi.
37 Weshowo mwazanga chikuma ise chipwe naye kunguhambakana ami kangutela amiko, kaha weshowo mwazanga chikuma mwanenyi walunga chipwe wapwevo kunguhambakana ami kangutela amiko.+
38 Kaha weshowo keshi kumbata chitondo chenyi chakuyanjishila* nakungukavangiza, kangutela amiko.+
39 Weshowo mwakinga mwono* wenyi mwakaujimbalisa, kaha weshowo mwajimbalisa mwono* wenyi mwomwo yayami mwakauwana.+
40 “Weshowo mwamitambula enu nangutambula nayami nawa, kaha weshowo mwangutambula ami natambula nawa Uze angutumine.+
41 Weshowo mwatambula kapolofweto mwomwo apwa kapolofweto,+ mwakatambula fweto yakapolofweto, kaha weshowo mwatambula mutu wakwoloka mwomwo apwa mutu wakwoloka, mwakatambula fweto yamutu wakwoloka.
42 Kaha weshowo mwahana umwe hali ava vavandende lupasa lwameya atuta anwenga mwomwo yakupwa kambaji, chamuchano vene nangumilweza ngwami, ikiye keshi chikupu kukatokesa fweto yenyiko.”+
Kwinyikila Chamwishi
^ Chipwe “naShimona kaKanane.”
^ Chipwe “uvwalo ukwavo.”
^ Chipwe “Kambaji.”
^ Lijina kana lyatalisa kuli Satana uze apwa mwata chipwe muka-kuyula vandemone.
^ Tala Mukana waMazu.
^ Hela., “kuvalanda naasalyone yimweko.” Tala Chihande B14.
^ Tala Mukana waMazu.
^ Chipwe “kuyoya.”
^ Chipwe “kuyoya.”
