Kulava 11:1-35
11 Jino vatu vaputukile kuyayavala chikuma kuli Yehova haukalu wavo. Omu Yehova evwileko, akwachile matoto, kaha kakahya kakufuma kuli Yehova kepukile muli vakiko, kochele vamwe kusembwa yachilombo.
2 Kahomu vatu vaputukile kuteta kuli Mose, Mose alembelelele Yehova,+ kaha kaze kakahya kajimine.
3 Shikaho valukilile chihela chize ngwavo Tavela,* mwomwo kakahya kakufuma kuli Yehova kepukile muli vakiko.+
4 Jino vatu veka*+ vaze vejile navaIsalele vapwile namuchima wakufwila vyakulya,+ kaha vaIsalele navakiko vaputukile kulila nakwamba ngwavo: “Iya mwatuhana nyama tulyenga?+
5 Tunanuka navaishi vawana twalilenga kuEjipitu, namatende, namahapwa, najisapwola jakulisezaseza, natulumingu.+
6 Mijimba yetu* kuno yinominyina. Katwamona vyuma vyekako shina mana+ kaha.”
7 Mana+ yapwile nge manona akolyande,*+ kaha yasolokelenga nge ulilila wandelyume.
8 Vatu valimwangilenga nakuya nakuyinonojola, vayichekelenga hamalolwa chipwe kuyitwa mumayanda. Vayitelekelenga mujindeho chipwe kuyocha jimbolo jamujingulule,+ kaha yayemenenga kwijiva nge mbolo yiyekemena yamaji.
9 Omu lyume lyawililenga hachilombo naufuku, namana nawa yawililenga hachilombo.+
10 Jino Mose evwile vatu vali nakulila mujitanga javo, mutu himutu kuchikolo chambalaka yenyi. Ngocho Yehova akwachile matoto,+ kaha naMose nawa apihililile.
11 Mose ambile kuli Yehova ngwenyi: “Ika uli nakunguyanjishila ami ngamba yove? Ika ngunazenekela kuwana uselewa kumeso ove, numba ungutwike chiteli chakuzakama vatu vosena ava?+
12 Uno yami nevo numba? Ami yami ngwavasemene numba ungwambe ngwove, ‘Vambate hatulo yove, nge omu ngamba* eji kumbatanga kemba ali nakwamwa,’ mangana uvatwale kulifuchi walishingile kuhana kuli vakakuluka javo nyi?+
13 Kulihi nanguwana nyama yakuhana vatu vosena ava? Mwomwo vali nakulila kumeso ami ngwavo, ‘Tuhane nyama tulyenga.’
14 Kangweshi kuhasa kuzakama vatu vapwaha uka wamiko. Mulimo kana unangutohwela.+
15 Nge omu mukiko naulinga kuli ami, kaha ngujihe hahano vene.+ Oloze kachi nge unangwivwila uselewa, kaha kanda ungumwenesa lupi chekako.”
16 Yehova ambile kuli Mose ngwenyi: “Ngukungulwile malunga 70 hali vakulwane javaIsalele, vakulwane javatu navilolo javo vaze watachikiza kanawa.+ Vatwale kumbalaka yakuliwanyina, vemane nayove hamwe kuze.
17 Nangwiza+ nakuhanjika nayove kuze.+ Nangumbata shipilitu+ yimwe hali ove nakuyihaka hali vakiko, kaha navakukafwa kumbata chiteli chakuzakama vatu kanava, mangana uzeneke kuchimbata uka wove.+
18 Hanjika kuli vatu ngwove, ‘Lijilikenu mutalilile kulikumbi lyahamene,+ mwomwo namukalya chikupu nyama, hakuwana nge munalilila kumeso aYehova+ ngwenu: “Iya mwatuhana nyama tulyenga? Twatwaminenga kanawa muEjipitu.”+ Yehova mwamihana nyama, kaha namulya.+
19 Kamweshi kuyilya likumbi limwe, chipwe makumbi avali, chipwe makumbi atanu, chipwe makumbi 10, chipwe makumbi 20 koko.
20 Oloze namuyilya kakweji wamuundu nomu nayikalovokela mumazulu enu nakuyivwila unyengwe,+ mwomwo munakane Yehova ou ali muli enu. Munalilila kumeso enyi ngwenu: “Mwomwo ika twafuminyine muEjipitu?”’”+
21 Mose ambile ngwenyi: “Vatu ava nguli navo vanapu malunga 600,000+ vakutambuka hamavu, oloze ove wambenga ngwove, ‘Nanguvahana nyama, kaha navayilya kakweji wamuundu.’
22 Kachi nge navavajihila mikoko navangombe vosena, kutala navavazuka numba? Chipwe nge navavajihila vaishi vamukalungalwiji vosena, kutala navavazuka numba?”
23 Jino Yehova ambile kuli Mose ngwenyi: “Kutala livoko lyaYehova lyalihi numba?+ Naumona jino numba nge vyuma ngunahanjika navilingiwa nyi chiku.”
24 Kaha Mose ayile nakulweza vatu mazu awa aYehova. Akungulwile malunga 70 vahali vakulwane javatu, avemikile kumbalaka jingulwishi.+
25 Yehova ejile mulivwi,+ kaha ahanjikile nenyi.+ Ngocho ambachile shipilitu+ yimwe hali ikiye nakuyihaka hali vaze vakulwane 70. Kahomu shipilitu yatwamine hali vakiko, vaputukile kulinga nge muze valingilenga vapolofweto.*+ Oloze kufumaho kavalingilemo chekako.
26 Jino kwapwile malunga vavali vasalile muchilombo. Majina avo vapwile vakiko Eletate naMetate. Shipilitu yatwamine hali vakiko hakuwana nge vapwile hali vaze vasonekele majina, oloze kavayile kumbalakako. Ngocho muze muchilombo vapwile, vaputukile kulinga nge muze valingilenga vapolofweto.
27 Mukweze umwe alahile nakulweza Mose ngwenyi: “Eletate naMetate vali nakulinga nge muze veji kulinganga vapolofweto.”
28 Kaha Yoshuwa+ mwanaNune, uze apwilenga muka-kuzachila Mose kufuma kuukweze wenyi, ambile ngwenyi: “Ove mwata wami Mose, kavakanyise.”+
29 Oloze Mose amwambile ngwenyi: “Uli nakwivwa lisungu hali ami tahi? Kanda nawivwa lisunguko. Ngunasake kachi vatu jaYehova vosena vapwenga vapolofweto, kaha Yehova kachi mwavahana shipilitu yenyi.”
30 Kaha Mose akindulukile muchilombo, hohamwe navakulwane javaIsalele.
31 Jino Yehova ahuhwishile peho, kaha yanehele vangwali kufuma kukalungalwiji nakuvamwangila muchilombo chosena jingulwishi.+ Kumutamba umwe wachilombo valimwangile kafwe tunda yakutambuka likumbi limwe, kaha kumutamba ukwavo nawa kafwe tunda yakutambuka likumbi limwe. Valumbamine kafwe jikuvite* jivali mukujindama helu.
32 Ngocho vatu vakungulwilenga vangwali musana uze wosena, naufuku uze wosena, nahakucha nawa musana wosena. Vosena vakungulwile vangwali vakuta mujihomele* 10 nakuya kwilu. Kaha vavalilenga hamavu muchilombo chosena jingulwishi.
33 Oloze omu yalingile nyama yichili kumazo avo, shimbu kanda vayitafunye, utenu waYehova wejile hali vakiko, kaha Yehova ajihile vatu vavavulu.+
34 Shikaho valukilile chihela chize ngwavo Kivilote-hatava,*+ mwomwo kuze kukiko vafunjilile vatu vaze vapwile namuchima wakufwila vyakulya.+
35 Vatu vafumine jino kuKivilote-hatava nakuya kuHazelote, kaha vatwaminenga kuze.+
Kwinyikila Chamwishi
^ Ulumbunwiso, “Kuwema,” kulumbununa kwepuka milangi.
^ Pamo vatu vaze kavapwile vaIsaleleko.
^ Chipwe “Myono yetu.”
^ Manona akolyande alifwanako namanona amasa.
^ Chipwe “ndeji walunga.”
^ Chipwe “vaputukile kupolofweta.”
^ Kuvite yimwe yapwile jisendimita 44.5. Tala Chihande B14.
^ Homele yimwe yapwile jilita 220. Tala Chihande B14.
^ Ulumbunwiso, “Mafuka aVaka-kufwila Vyakulya.”
