Ngwakolelele munganda yaAlicante, kumusamuko waSpain. Tanga yetu yapwile yaliwayanga, kaha lwola lwosena ngwapasalilenga mumukwakwa. Kwakamwihi nazuvo yetu kwapwile chitanda chakuwahishila tufumbo twajiminyau. Kaha ngwalikachile naJosé María uze azachililenga kuchitanda kana. José apwile mutu wachisambo kaha nawa angukafwilenga kuhambakana vaka-tanga yami. Lwola lwosena angukafwilenga nge nguli muukalu. Apwile chikupu sepa lyami wamwenemwene numba tuhu anguhambakanyine namyaka 20 mukusemuka.

José María aputukile kulinangula Mbimbiliya naVinjiho jaYehova. Azangile chikuma Visoneka, kaha kakavulu angunangwilenga muchano. Numba tuhu ngwamwivwilililenga, oloze muchima wami wafwililile vyuma vyeka vyaukweze. Chipwe ngocho, kwapwile chuma chimwe changulingishile ngwalumuke.

Kangwasaka kuhanjika haponde yize yangusolokeleleko. Kuhuka chikiko changulingishile ngwingile muponde kana. Chiyoyelo chami chalumukile mulikumbi lyangongo. Ngwapwilenga ngumukweze wangolo, oloze ngwatengukile jino nakutwama muchipatela hatando yayisuku. Chapwile chachikalu kusuuluka nautonji wami. Ngwashinganyekelenga ngwami, ‘Nakufwa chinawahe kuhambakana kuyoya.’

Omu Sepa lyami José María ejile nakungumenekela, alwezele washiwashi Vinjiho jaYehova vezenganga nakungumenekela muchipatela. Kaha vangumenekelelenga lwola lwosena, ngocho ngwawahililile chikuma. Omu vangufumishile mukapete kavaka-kuviza misongo yakufwa nakuyoya, ngwaputukile kulinangula Mbimbiliya. Echi changukafwile ngutachikize jino ovyo vyalingisa vatu vayande nakufwa, novyo Kalunga echelela vyuma vyavipi visolokenga. Ngwalinangwile nawa vyuma ashika Kalunga vyakukalingisa hamavu hosena hakatwame vatu vakukupuka mwosena vaze kaveshi kukamba ngwavo: ‘Tuli nakukola.’ (Isaya 33:24) Elu lukiko lwapwile lwola lwatete kulinangula vyalutalililo kana.

Omu vangulukulwile muchipatela, ngwazovolokele chikuma mukulinangula chami Mbimbiliya. Ngwazachishilenga chitwamo chakulipwila chakushindumuna hakuya kuZuvo yaWangana nahakwazana mumulimo wakwambulula. Kuheta ha 5 November, 1988, vangumbapachishile halilonga lyalinene lyakusanyina. Halwola kana ngwapwile namyaka 20. Yehova Kalunga angukafwile ngumone kuyoya mujila yamwaza. Vyuma muka ngwalingile mangana ngusakwilile Kalunga hakungukafwa?

Ngwafwililile kutwalaho lika kuzachila Yehova nakuzovoloka kushipilitu chamokomoko nautonji wami. (WaChimoteu 1, 4:15) Hakavanga chapwile chachikalu. Tanga yami yangufumbukililenga mwomwo yavyuma ngwafwelelele. Oloze vandumbwami vakushipilitu vangukolezezelenga. Vangukafwilenga nguyenganga kukukunguluka namumulimo wakwambulula lwola lwosena.

Kutwala muze, musongo wami watohweleleko, ngocho ngwasakiwile kunguzakama mujila yakulipwila. Ngwaputukile kutondatonda chihela chamwaza chakulamina vitonji, kaha ngwachiwanyine munganda yaValencia, yize yapwilile kuNote yaAlicante tunda yajikilomita 160. Oku kukiko ngwalukilile.

Numba tuhu ngwatwama muluuta, oloze ngwafwila kutwalaho lika kuzachila Yehova. Ngwalanda kopyuta najimbongo vanguhanyinenga vaka-fulumende navambwembwa, kaha vayisokeka kwakamwihi nakahela kami. Ngwalanda nawa shinga. Kaha hakumbi hakumbi muka-kungulama eji kungusokwelelanga kopyuta nashinga yami. Nge nguli nakusaka kuzachisa kopyuta, ngweji kunangika mulungu wami kuchinoma chimwe vasokeka kukopyuta chize cheji kungukafwanga nguwane vyuma hakopyuta. Kaha nawa ngweji kuzachisanga kachitondo kakulipwila kaze ngweji kuhakanga kukanwa. Kachitondo kana keji kungukafwanga ngunyachike jinambala jakopyuta nashinga.

Uno makina kana anangukafwe ngachilihi? Eji kungukafwanga nguhehwojole mijimbu hakeyala yetu ya jw.org nahaCHISETE CHAMIKANDA CHAHAINTERNET. Vinoma kana vinangukafwe chikuma. Hakumbi hakumbi ngweji kulinangulanga nakuhehwojola mikanda yahanjika haMbimbiliya mangana ngutwaleho lika kutachikiza Kalunga navilinga vyenyi vyamwaza. Kaha nge ngunevu uli chipwe nge ngunahombo, ngweji kutanganga vihande hakeyala yetu ya jw.org vize vyeji kungukafwanga chikuma.

Kopyuta yeji kungukafwanga nawa ngwivwilile kuvihande navahanjika kukukunguluka nakukumbululaho. Ngweji kukumbululanga, nakulomba, nakuhanjika vihande, nakutanga Kaposhi Kakutalila nge vanangulweze kulinga ngocho. Numba tuhu kangwahasa kuya kuZuvo yaWanganako, oloze ngweji kwivwanga lika ngwami ngwapandama kuchikungulwilo.

Shinga nakopyuta vinangukafwe nawa ngwazane mumulimo wakwambulula. Numba tuhu kangweshi kwambulwila kuzuvo hizuvoko, oloze echi kachanguhonesa kwambululako. Makina kana eji kungukafwanga ngwambulile vatu vyuma ngwafwelela. Hakuwana nge ngwasaka kushimutwila navatu hashinga, ngocho vakulwane muchikungulwilo vangutongola ngutwaminyine mulimo wakwambulula kuzachisa shinga. Echi chinakafwe navandumbwami veka muchikungulwilo chetu vaze kavahasa kutambuka nakuya muwande vahase kwambulula.

 Kangwapendamina kaha hashinga nahakopyutako. Hakumbi hakumbi, masepa jami veji kwizanga nakungushikamisa. Veji kwizanga navausoko wavo navenyembo javo vaze vafwila kulinangula Mbimbiliya. Kaha kakavulu veji kungulwezanga ngushimutwile vyaMbimbiliya navatu kana. Shimbu jimwe jitanga javandumbwami jeji kungutambukilanga mangana tulingile hamwe chilongesa chakulemesa Kalunga mwatanga. Ngweji kwivwanga kuwaha hakumona vanyike vanatwame kukahela kami nakungulweza ovyo vazangila Yehova.

Veji kungutambukilanga kuvatu vavavulu, kahechi cheji kungusuulwisanga chikuma. Mukapete kami mweji kuzalanga vatu namasepa jami vaze veji kwizanga nakungumona kufuma kuvihela vyakulisezaseza. Kaha vaka-kulama vaveji hachihela kana veji kulikomokelanga chikuma. Ngweji kusakwililanga Yehova hakumbi hakumbi hakungukafwa ngulikate navatu vazangi.

Omu vatu veji kungwihulanga chihindu, ngweji kuvalwezanga ngwami, “Yami uno vene, nguchili lika nakupindasana nautonji.” Ngwatachikiza ngwami keshi yami kaha nguli nakulipika naukaluko. Numba nge tuli muukalu chipwe chiku, oloze vaka-Kulishitu vosena vali nakulwa “jita yamwenemwene yalufwelelo.” (WaChimoteu 1, 6:12) Vyuma muka vinangukafwe ngutwaleho lika kumika hamyaka yayivulu? Ngweji kulombanga kuli Yehova hakumbi hakumbi nakumusakwilila hakungukafwa ngupwenga wakuwahilila mukuyoya. Kaha nawa ngweji kuzachilanga Kalunga kweseka noho hakumina ngolo jami, nakutalilila vyuma vyamwaza atushika.

Kakavulu ngweji kushinganyekanga kaye kakahya omu nangukalikangula nakulaha nakutumbwojoka cheka. Shimbu jimwe tweji kusesekanga nasepa lyami José María uze aviza musongo wakalepa ngwetu likumbi limwe natukazana mukulaha chakulitapa. Kaha ngweji kumuhulisanga ngwami, “Iya mwakatapa mukwavo?” Eji kukumbululanga ngwenyi, “Oho kaheshi ukaluko. Chuma chachilemu shina kupwa muPalachise mangana tukalahe.”

Chinapunga chachikalu kusuuluka nautonji wami. Ngwatachikiza ngwami omu ngwapwile ngumukweze ngwahukile chikuma, kahechi changunehela utonji. Oloze ngweji kusakwililanga chikuma Yehova hakuhona kunguseza. Nanguhane vyuma vyavivulu vyakufwana nge tanga yayinene yakushipilitu, nalutalililo lwamwenemwene, nakungukafwa ngusuuluke mukuyoya, nakukafwa vatu vatachikize muchano. Mukavatu nangulumbununa ngwami chikupu vene Yehova nanguhane vyuma vyavivulu mukuyoya chami.