LIKUMBI limwe Ndevola alwezele maswalale javaIsalele valikungulwile haPili yaTavole. Ndevola evwile kuwaha chikuma hakumona ava maswalale vanalikungulwila hapili kana. Apwile nakushinganyeka hakuhamuka chavo nalufwelelo asolwele kapitau kavo Mbalake. Numba tuhu ava maswalale vapwile 10,000, oloze vapwile mucheseko halikumbi lize. Vapwile nakuya nakulwa namaswalale vavavulu chikuma kaha nawa vangolo vaze vapwile navitwa vyangolo kuhambakana vakiko.

Achishinganyekenu Ndevola nemana naMbalake hapili oku uvwalo wenyi uli nakulekumuka, kaha vali nakutala mwahichile chana chosena. Pili yaTavole yapwile yakusalama helu. Yasuwile kafwe jimita 400. Nge mutu ali hapili kana, amwenenga Chana chaEsdraelon kusulo. Muchana kana mwahichile Kalwiji Kishone uze akawililile haKalungalwiji Wamunene kuPili yaKalamele. Halwola kanelu meya te anomu lyehi muchana, oloze Ndevola naMbalake navatu javo vamwene miteleleji hachana. Hapwile maswalale jaShisela vaze vapwile nakwiza valihumangane namaswalale javaIsalele oku vanambate vitwa vyafwelu. Miteleleji kana yafuminenga kumatemba ajita kafwe 900 aze apwile najipoko jamikwale kutufumbo twawo. Shisela afwililile kunongesa maswalale javaIsalele mukapyapya kakandende kaha.

Ndevola atachikijile ngwenyi Mbalake namaswalale jenyi vapwile nakumuvandamina avalweze mwakulingila. Kutala ikiye kaha pwevo apwile kuze tahi? Apwile nakwivwa ngachilihi hakumuhana mulimo waunene ngana? Kutala atachikijile vyuma apwile nakulinga kuze tahi? Eyo. Yehova Kalunga ikiye amulwezele aputuke kulwa jita. Amulwezele nawa ngwenyi mwakazachisa pwevo akakumise jita kana. (Vaka-kuyula 4:9) Vyuma muka natulinangula halufwelelo lwaNdevola namaswalale javaIsalele vakuhamuka?

Mbimbiliya yajimbula Ndevola ngwayo apwile “kapolofweto.” Echi chapwa chakulipwila chikuma. Chipwe ngocho, Ndevola keshi ikiye kaha kapolofweto wapwevo vavuluka muMbimbiliyako. * Ndevola apwile namulimo ukwavo. Ayulilenga vihande vyavaIsalele nakuvivatula kweseka nomu amulwezelenga Yehova.—Vaka-kuyula 4:4, 5.

Ndevola apwilenga kungalila yaEfwalime yajipili yize yapwilile mukachi kaLama naMbetele. Atwaminenga mwishi yamukoma nakuyula vaIsalele kweseka nomu amulwezelenga Yehova. Numba tuhu mulimo kana wapwile waukalu, oloze kalitwaminyine kuuzatako mwomwo wakafwilenga chikuma vatu. Kutwala muze, vamuhwiminyine asoneke mwaso uze wahanjikile havyuma vyavipi valingile vausoko wenyi vaIsalele. Asonekele ngwenyi: “Vasakwile tulunga veka ngocho kuvikolo vyavo kwapwile jita.” (Vaka-kuyula 5:8) Hakuwana nge vaIsalele vasezele Yehova nakuzachila tulunga veka, ngocho Yehova naikiye avasezele vavayanjise kuli vaka-kole javo. Mwangana waKanane Yavine azachishile lunga wangolo Shisela nakuvafungulula.

Vatu muIsalele vevwilenga chikuma woma Shisela. Kwitava chavaKanane nachisemwa chavo chapwile chaukenya chikuma. Vatu valumbilenga vana nakulinga ujila. Vyuma muka vyasolokele omu Shisela  namaswalale jenyi vafungulwile lifuchi lyaIsalele? Mwaso waNdevola wasolola nge vatu vevwilenga woma kutambuka mulifuchi, kaha nawa vachinyinenga hamembo avo. (Vaka-kuyula 5:6, 7) Atela vaIsalele vevwilenga woma nakuswama muviputa nakujipili, kaha kavaliminenga chipwe kutwama hamembo akuzeneka jikembweko. Vevwilenga woma kutambuka mumikwakwa ngwavo navavalukuka, nakuvatambula vana vavo, nakupika mapwevo javo. *

VaIsalele vatwaminenga muchiwomawoma hamyaka 20, palanga nomu Yehova amwene ngwenyi vatu jenyi vanapihilila nakwalumuka. Mwaso waNdevola naMbalake wahanjika ngwawo: “Palanga nomu ngwakatukile ami Ndevola nakuvakafwa, nomu ngwapwile ngunevo yavaIsalele.” Katwatachikizako numba nge Ndevola pwevo lyaLapitote, apwile chikupu vene nevo yavaIsalele. Oloze awa mazu vawazachisa mujila yachifwanyisa. Yehova atongwele Ndevola akinge vaIsalele ngana mwachisemi. Amulwezele asanyike Muka-kuyula Mbalake, lunga wangolo kaha nawa walufwelelo mangana alwenga jita naShisela.—Vaka-kuyula 4:3, 6, 7; 5:7.

Yehova alweze Mbalake kuhichila muli Ndevola ngwenyi: “Yako kuPili yaTavole.” Ngocho Mbalake akungulwile malunga 10,000 vakumiyachi yivali yavaIsalele. Kufumaho, Ndevola amulwezele vyuma avashikile Kalunga ngwenyi navanongesa Shisela namatemba enyi ajita 900. Mbalake alikomokelele hamazu kana mwomwo vaIsalele kavapwile namaswalale vavavulu navitwa vyangoloko. Chipwe ngocho, Mbalake etavilile kuya kujita. Oloze asakile kuya hamwe naNdevola kuPili yaTavole.—Vaka-kuyula 4:6-8; 5:6-8.

Vatu vamwe vashinganyeka ngwavo Mbalake kapwile nalufweleloko hakusaka kuya hamwe naNdevola. Oloze omu keshi mukikoko, mwomwo kalombele Kalunga avahane vitwako. Mbalake afwelelele Kalunga nakushinganyeka ngwenyi chapwile chachilemu kuya namutu uze eji kwimanyinangako Yehova mangana amukolezeze hohamwe navatu jenyi. (WavaHepeleu 11:32, 33) Kaha Yehova etavishile Ndevola ayenga hamwe naMbalake. Chipwe ngocho, Yehova ahwiminyine Ndevola apolofwete ngwenyi jita mwaya nakulwa Mbalake kayeshi kukamunehela ulemuko. (Vaka-kuyula 4:9) Kalunga ajinyine ngwenyi pwevo ikiye mwakanongesa lunga wakuhuka Shisela.

Makumbi ano, mapwevo vali nakumona ukalu mwomwo yavilinga vyakuhengesa chiyulo, naulyanyi, naluyanjisa. Kakavulu mapwevo kavavavumbika ngana muze avavumbika Kalungako. Oloze Kalunga amona malunga namapwevo kupwa vavalemu, kaha vosena eji kuvevwilanga uselewa.  (Wavaka-Loma 2:11; Wavaka-Ngalesha 3:28) Chakutalilaho chaNdevola chatunangula nge Kalunga eji kuhananga namapwevo milimo yayilemu yize yasolola nge avafwelela nakuvevwila kuwaha. Ngocho twatela kulihenda kuvishinganyeka vyakukaye vyakumonanga mapwevo kupwa vamokomoko.

Mbalake akungulwile malunga vakuhamuka 10,000 mangana vayenga nakulukuka Shisela namaswalale jenyi. Omu Mbalake apwile nakukanduka haPili yaTavole namaswalale jenyi, awahililile hakupwa hamwe namutu uze mwavakolezeza. Mbimbiliya yahanjika ngwayo: “NaNdevola ayile nenyi hamwe.” (Vaka-kuyula 4:10) Achishinganyekenu kuwaha vevwile vaze maswalale hakuya hamwe nayou pwevo wakuhamuka kuPili yaTavole, uze alisuwile kuhaka mwono wenyi muponde mwomwo yakufwelela Yehova Kalunga!

Omu Shisela evwile ngwavo maswalale javaIsalele vanalikungulula mangana vamulukuke, naikiye alizangile washiwashi. Vamyangana vakuKanane valinungile hamwe naMwangana Yavine uze apwile wangolo chikuma kuhambakana vakiko. Matemba ajita aShisela alingishile mavu alinyike omu apwile nakulaha muchana. VaKanane vashinganyekele ngwavo navakotongola maswalale javaIsalele mukapyapya kakandende kaha.—Vaka-kuyula 4:12, 13; 5:19.

Vyuma muka alingile Mbalake naNdevola omu vaka-kole javo vapwile nakupandama? Numba nge vapwile haPili yaTavole, kachi vafungulwile kanawa maswalale javaKanane mwomwo matemba avava vaka-kole asakiwile kupwa muchana numba valwenga kanawa. Oloze Mbalake asakile Yehova amulweze mwakulwila jita kana, ngocho avandaminyine Ndevola amulweze vyakulinga. Kutwala muze, Ndevola ambile ngwenyi: “Yako uvalukuke, mwomwo likumbi lyalelo Yehova mwahana Shisela mumavoko ove. Yehova ali kulutwe lwove.” Kaha Mbimbiliya yatulweza ngwayo: “Mbalake ashikumukile kuPili Tavole navaze malunga vaka-jita 10,000.”—Vaka-kuyula 4:14. *

Maswalale javaIsalele vashikumukile kupili nakuya nakulihumangana navaka-kole javo vaze vapwile navitwa vyangolo. Kutala Yehova apwile kulutwe lwavo ngana muze avafwelelesele Ndevola tahi? Eyo. Mbimbiliya yamba ngwayo: “Mavu alinyikile, kaha mumelu mwafumine meya.” Yehova aluwanganyishile maswalale jaShisela. Kaha vula yaputukile kunoka. Nakushimbula chiku, chana chosena chazalile nameya. Kutwala muze matemba avo aze vafwelelele chikuma akakachilile mumalova, kaha kawahashile kutambukako.—Vaka-kuyula 4:14, 15; 5:4.

Mbalake namaswalale jenyi kavevwile woma wavulako mwomwo vatachikijile ngwavo yafumine kuli Kalunga. Hahaze vene valukukile maswalale vavaKanane nakunongesa maswalale jaShisela vosena. Kaha Kalwiji Kishone azalile nakuhungumwina mijimba yakufwa yavaka-kole javo vosena muKalungalwiji Wamunene.—Vaka-kuyula 4:16; 5:21.

Makumbi ano, Yehova keshi kutuma vangamba jenyi kuya nakulwa jitako. Oloze avalweza valwenga jita yakushipilitu. (Mateu 26:52; Wavaka-Kolinde 2, 10:4) Shikaho, nge natwononoka Kalunga mukaye kano kakuhuka, kaha tuli nakulwa jita yakushipilitu. Twatela kupwa vakumika mwomwo vosena vaze vali nakuzachila Kalunga makumbi ano vanahase kuvafumbukila kuli vaka-kole. Oloze Yehova Kalunga kalumukileko. Achili lika nakukinga vangamba jenyi vaze vamufwelela ngana muze Ndevola, naMbalake, navaze maswalale javaIsalele vakuhamuka vamufwelelele.

Shisela, muka-kole wamunene uze ayanjishilenga vatu jaKalunga achinyine kujita. Asezele maswalale jenyi vali nakuvajiha muulova, ikiye aselukile mulizavu lyamaswalale javaIsalele nakuchinyina kutunda mangana ayenga kuvatu alikachile navo vamukafweko. Apwile nakulekuka hachana oku ali nakwivwa woma ngwenyi maswalale javaIsalele navamukwata, kaha achinyinyine kumbalaka yaHevele kaKene uze ahandukile kuvatu jenyi nakuya nakutwama naMwangana Yavine kusulo.—Vaka-kuyula 4:11, 17.

Shisela ahetele hembo lyaHevele oku nazeye chikuma. Oloze awanyine Hevele hembo wauchiho, hali kaha puwenyi Yayele. Shisela pamo ashinganyekele  ngwenyi Yayele mwamutambula mukuunda hakuwana nge lunga lyenyi Hevele atwaminenga mukuunda naMwangana Yavine. Katachikijile ngwenyi ou pwevo mwalinga vyuma vyekako. Chikupu vene Shisela katachikijile vyuma apwile nakushinganyeka Yayeleko. Ou pwevo amwene omu vaKanane vayanjishilenga vaIsalele. Chipwe ngocho, apwile navyuma vivali atelele kusakulaho kulinga. Atelele kukinga ou muka-kole ayanjishilenga vatu jaYehova, chipwe kumujiha mangana akundwize Yehova. Chuma muka asakwileho kulinga? Uno mwahasa kufungulula ngachilihi ou chindume muka-kwasa jita?

Yayele ashinganyekele washiwashi mwakulingila. Alwezele Shisela ayenga mumbalaka akanoke. Shisela alwezele Yayele ngwenyi nge nakwiza mutu nakumutonda, kaha amulweze ngwenyi wauchiko. Ngocho Shisela asavalile, kaha Yayele amufwikile lipayi. Kahomu amulombele meya akunwa, amuhanyine mavele. Nakushimbula chiku Shisela ayile mutulo. Kaha Yayele ambachile malitelo nalumbambo lwakumbalaka luze vazachishilenga mapwevo. Alivembele nakuswenya kuze asachilile Shisela mutwe nakumupapalila lumbambo mumbalakavachingule nakulingilako sambanjinga Yehova. Nge kanguhwishile kumujihako, kachi ou pwevo apwile muukalu. Kutala Yayele apwile nakushinganyeka hali vatu jaKalunga nomu avayanjishilenga ou lunga hamyaka yayivulu tahi? Nyi apwile nakushinganyeka hakutokwa apwile nacho chakukundwiza Yehova? Mbimbiliya kayatulweza mashina namasongoko. Oloze twatachikiza ngwetu ajihile Shisela.—Vaka-kuyula 4:18-21; 5:24-27.

Kutwala muze, Mbalake ayile kumbalaka yaHevele nakutonda muka-kole wenyi. Omu Yayele amulwekesele uze mufu nalumbambo lwenyi mumbalakavachingule, Mbalake atachikijile jino ngwenyi upolofweto waNdevola unatesamo. Pwevo ikiye ajihile Shisela chindume muka-kwasa jita. Numba tuhu makumbi ano vaka-kufwefulula, navaka-kukakasana vahanjika vyuma vyavipi hali Yayele, oloze Mbalake naNdevola vatachikijile kanawa vyuma vyalingiwile. Vavahwiminyine vembenga mwaso wakwalisa Yayele ngwavo apwa “wakukisula hali vakwavo mapwevo” mwomwo yakuhamuka chenyi. (Vaka-kuyula 4:22; 5:24) Ndevola apwile namuchima wamwaza. Kevwililile lwiso Yayeleko, oloze awahililile hakumona mazu aYehova anatesamo.

Omu Shisela afwile, Mwangana Yavine kapwilenga nangolo jakufungulula vaIsaleleko. VaKanane kavayanjishilenga cheka vaIsaleleko. MuIsalele mwapwile jino kuunda hamyaka 40. (Vaka-kuyula 4:24; 5:31) Yehova Kalunga akiswile Ndevola, naMbalake naYayele mwomwo vamufwelelele. Nge natulondezeza lufwelelo lwaNdevola hakukundwiza Yehova nakukolezeza vakwetu valinge mwomumwe, kaha Yehova mwatukafwa tufungulule vyeseko nakutwama mukuunda.