Kutala Kalunga mwechelela vatu vatwaleho lika kulishinyinyika mwavomwavo nakunongesa vatu vosena tahi? Nduma. Nganomu tunashimutwila, Kalunga mwakakumisa ukalu naluyanjisa vanamononga vatu hamyaka yayivulu. Shikaho, Kalunga uze atengele vatu namavu ali nakusaka mutachikize nge lwola mwakalinga ngocho lunapandama. Jila muka eji kuzachisanga mangana amilweze vyuma kanevi vyavilemu?

Tutalenu hachakutalilaho chino: Shimbu kanda muyenga kuchihela kuze kamwatachikizako, mweji kuvangilanga kuhulisa vamilweze vinjikizo vize navimikafwa mukahete kanawa kuchihela kana. Kahomu namuwana vinjikizo kana, namufwelela chikupu ngwenu muli kwakamwihi nachihela kana. Chochimwe nawa, Kalunga atuhana Mazu enyi aze eji kutulwezanga vyuma vili nakusoloka mukaye. Omu natumona vyuma kana, twatela kufwelela ngwetu kukuma chakaye chinapandama.

Mbimbiliya yahanjikile chimweza vyalwola luze mukaye namukasoloka vyuma vyakulipwila, vyavilemu vize navikalingisa kukuma chakaye chikeze. Halwola kana nakukasoloka vyuma vize kanda visolokengaho lyehi mukuyoya chavatu mukaye kosena. Tutalenu vinjikizo vahanjikile chimweza muMazu aKalunga.

1. PINDANGANO MUKAYE KOSENA Upolofweto vasoneka hali Mateu kapetulu 24 wavulukile vyuma navikasoloka hamavu vize navikapwa chinjikizo chakutachikijilaho kukuma chakaye. Chinjikizo kana chikiko nachikasolola nge tuli ‘kuchikukulwishi chakatwamino kamyaka yino’ nakutulweza nawa lwola ‘nachikeza kukuma.’ (Vesi 3, 14) Vinjikizo kana shina jijita, nazala, namindenda kuvihela vyeka navyeka, nakuvula chaupapwoki, nakuhona kulizanga, navatwamina vamukwitava vaze navakahungumwisa vatu. (Vesi 6-26) Vyuma kana vinapunga vene nakusoloka hamyaka yayivulu. Oloze omu kukuma chili nakupandama, vyosena vili nakusoloka mumyaka yino yayikalu. Nakukasoloka nawa vinjikizo vikwavo vitatu.

2. VILINGA VYAVATU Mbimbiliya yamba ngwayo “hamakumbi akukuminyina,” vatu navakapwa navilinga vyavipi. Yamba ngwayo: “Vatu navakapwa vaka-kulizanga vavene, vaka-kuzanga jimbongo, vaka-kulitukwojola, vaka-kulitohwesa, vaka-kusaula, vaka-kulikanga kuli visemi, vaka-kuhona kusakwilila, vaka-kuhona kushishika, vaze kavazanga vakwavoko, vaze kaveshi kwitavila vivwasanoko, vaka-kuvangila vakwavo, vaka-kuhona muchima wakulikanyisa vavene, vaka-ukenya, vaze kavazanga vyuma vyamwazako, vaka-kusolola vakwavo, vaka-kunjinjavala, vaka-kulivwimba, vaka-kuzanga viseke muchishishisa chakuzanga Kalunga.” (WaChimoteu 2, 3:1-4) Numba tuhu kunyima vatu kavavumbikilenga vakwavoko, oloze ‘hamakumbi ano akukuminyina’ vilinga vyavatu vinapihi nyi kuya muze. Kahechi chili nakusolola nge luno ‘hilwola lwalukalu’ chikupu. Kutala muli nakumona omu vilinga vyavatu vili nakupihilako makumbi ano tahi?

3. VATU VALI NAKWENYEKA MAVU Mbimbiliya yamba ngwayo Kalunga ‘mwakenyeka nawa vaze veji kwenyekanga mavu.’ (Kusoloka 11:18) Uno vatu vali nakwenyeka ngachilihi mavu? Mbimbiliya yahanjika mazu wowamwe hakuvuluka vyuma vyasolokele mumakumbi aNowa. Yamba ngwayo: “Hamavu hapihile kumeso aKalunga wamuchano, kaha hosena hapwilenga ulyanyi lika. Kalunga atalile hamavu, kaha amwene ngwenyi hanapihi.” Ngocho Kalunga ahanjikile ngwenyi: “Nanguvanongesa.” (Kuputuka 6:11-13) Kutala muli nakumona omu ulyanyi unavulu mukaye tahi? Kaha nawa vatu makumbi ano vali nangolo jakulinga vyuma vyakulipwila: Vanahase chikupu kwenyeka mavu hakulalisa vatu vosena vatwamaho mwomwo vali nakutunga vitwa vyangolo chikuma. Vatu vali nakwenyeka nawa mavu mujila  yeka. Vali nakuzachisa mujila yakuhenga vyuma vyahamavu vize vyakundwiza kuyoya, vyakufwana nge peho, natunyama, namitondo natulungalwiji.

Jino lihulisenu ngwenu, ‘Mulikulukaji lyamyaka linahichi kunyima, kutala vatu vanapunga nangolo jakulalisa vatu vosena tahi?’ Oloze oholyapwa vali nangolo jakulinga ngocho mwomwo vali nakutunga vitwa vyangolo nakwenyeka nawa mavu. Chinyingi chakutunga makina chinavulu chikuma kuhambakana chinyingi chakwivwishisa ukalu uli nakufumamo nakuuhonesa. Chipwe ngocho, vatu kaveshi nangolo jakuhonesa vyuma navikasoloka kulutwe hano hamavuko. Shimbu kanda vatu vanongesa vyuma vyakuyoya vyosena hano hamavu, Kalunga mwakanongesa vaze vali nakwenyeka mavu. Omu mukiko atufwelelesa.

4. MULIMO WAKWAMBULULA MUJIMBU MUKAYE KOSENA Chinjikizo chikwavo chakutachikijilaho kukuma chakaye shina mulimo wakulipwila wakwambulula mujimbu wamwaza. Mbimbiliya yamba ngwayo: “Kahou mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.” (Mateu 24:14) Ou mujimbu unalihandununa nauze vanambululanga vatu vamukwitava hamyaka yayivulu. Hamakumbi ano akukuminyina, vatu vali nakwambulula chikuma “mujimbu wamwaza waWangana.” Kutala mwatachikizako lizavu limwe lyavaka-kwitava lize lyeji kwambululanga chikuma mujimbu kana tahi? Numba tuhu kunahase kupwa vatu veka vaze vali nakwambulula mujimbu kana, kutala namungalila yenu muvatwama nyi? Uno vatu kana vali nakwambulula ‘hamavu hosena, nakupwa unjiho kuli vaka-mafuchi osena’ tahi?

Keyala yaVinjiho jaYehova ya www.jw.org yili nakuvilika “mujimbu wamwaza waWangana.” Hali mikanda yakulisezaseza yize yili nakuhanjika vyamujimbu kana mumalimi akuhambakana 700. Kutala mwatachikizako chinoma chikwavo chize chili nakuvilika mujimbu wamwaza waWangana mukaye kosena tahi? Shimbu kanda Internet yipwengako, Vinjiho jaYehova vanapunga nakwambulula chikuma mujimbu wamwaza waWangana waKalunga. Kufuma vene mu 1939, mangazini yaKaposhi Kakutalila yinapunga namazu halipapilo lyahelu akwamba ngwavo “Ali Nakuvilika Wangana waYehova.” Mukanda umwe uze wahanjika hakwitava wambile ngwawo, mulimo waVinjiho jaYehova wakwambulula mujimbu wamwaza “walihandununa chikuma kutalisa kujila vali nakuuzachilamo nomu unatoho.” Mulimo kana uli nakusolola nge Wangana waKalunga kalinwomu unehe “kukuma” chakaye.

Kutala munamono omu vinjikizo viwana vyamuMbimbiliya tunavuluka muchihande chino vinasolokanga mukuyoya chenu tahi? Hamyaka yakuhambakana likulukaji, yino mangazini yinalwezenga  vatu vyuma vili nakusoloka mukaye mangana yivakafwe vatachikize ngwavo kukuma chakaye chinapandama. Oloze vatu vamwe vakanengauli vanakanenga kufwelela vyuma kana nakwamba ngwavo vyuma kana vyapwa kaha vyakutaka nakufwila kukunyula vatu. Veji kwambanga nawa ngwavo chinyingi chakutunga makina akulivwasanyinamo chili nakuvula chikuma, kaha chikiko chili nakulingisa vyuma vipihileko mukaye. Chipwe ngocho, kuli unjiho wauvulu uze uli nakusolola nge tuli nakuyoyela kusongo yamakumbi akulipwila mukuyoya chavatu.

Vatu vamwe valinangula chikuma vanamono nge tuli nakupandama kulwola lwakwalumuna vyuma hano hamavu. Chakutalilaho, mu 2014, liuka lyaScience and Security Board of the Bulletin of the Atomic Scientists lyalwezele liuka lyaUnited Nations Security Council ngwalyo vatu vali muponde yayinene. Ava vaka-sayasi vahanjikile hatoma ngwavo: “Tunakekesa vyuma nakukulula nge ukalu uze uli nakufuma hachinyingi chakutunga makina unatoho chikuma.” Vatu vavavulu vanenjikiza chikupu ngwavo tuli nakuyoyela mulwola lwakulipwila. Vaka-kusoneka mangazini yino navatu vaze veji kuyitanganga kaveshi nakuhuhwasana ngwavo tuli nakuyoyela chikupu mumakumbi akukuminyina, kaha kukuma chakaye chinapandamako. Oloze muchishishisa chakwivwa woma vyuma navikasoloka kulutwe, mwatela kuwahilila. Mwomwo ika? Mwomwo munahase kukayovoka.