Tulweze liuka lyakwitava wapwilemo kunyima.

Tata asemukilile mulifuchi lyaIndia, kaha mama asemukilile muUganda numba tuhu visemi jenyi vapwile vamuIndia. Visemi jami vakavangijilenga kwitava chavaHindu mukuyoya chavo chosena. Twasemuka tuvatatu, kaha ami yami wamuchivali. Twapwile nakutwama munganda yaNairobi mulifuchi lyaKenya. Twalihachile navaHindu.

Vyuma muka vyakulingishile ufwile kulinangula sayasi?

Ngwazangile chikuma tunyama, kaha kakavulu ngwayilenga hamwe namasepa jami mangana tukatale tunyama vakulisezaseza. Ngwafwililile kupwa ngundotolo watunyama. Oloze omu ngwakumishile shikola muNairobi, ngwayile jino haYunivesiti yaLondon mulifuchi lyaEngland ngukalinangule vyuma vyeji kunehanga misongo. Kutwala muze, ngwaputukile kulinangula kaha vyawongo wavatu.

Uno vyuma walinangwile vyalumwine vyuma wafwelelele tahi?

Eyo. Omu ngwalinangwile chikuma sayasi chapwile jino chachikalu kufwelela vyuma vanangwilenga vaHindu navisemwa vyavo vyakufwana nge kulemesa tunyama namakombelo.

Vyuma muka vyakulingishile ufwelele ngwove vyuma vyalijilile vivene?

Omu ngwapwile ngukanyike, vatu vavavulu vaze ngwalihachile navo vahanjikilenga ngwavo kuyoya chavatu chaputukilile muAfrica, kaha nawa twashimutwililenga chihande kanechi kushikola. Valongeshi navaze valinangula chikuma vatulwezelenga ngwavo vaka-sayasi vosena vafwelela ngwavo vyuma vyalijilile vivene.

 Kutwala muze waputukile kushinganyeka okwo kwafuma kuyoya. Mwomwo ika?

Ngunalinangulanga havyuma vyakuyoya namijimba yavatu natunyama hamyaka yayivulu, kaha mukwetu muka-shikola umwe angulwezele vyuma apwile nakulinangula muMbimbiliya naVinjiho jaYehova. Kaha ngwasakile chikuma kulinangula vyavivulu. Kahomu Vinjiho vapwile nakukunguluka chachihanda hashikola yetu muNairobi nayami ngwakungulukile navo. Kufumaho vamishonali vavali vaze vapwile Vinjiho vangulumbunwinyine vyuma vimwe yanangula Mbimbiliya. Kufwelela chikuma muka-Kutenga Wamunene uze eji kukumbululanga vihula vyavilemu vyamukuyoya, chasolokele kupwa chakutamo. Ngwamwene vyuma kana kupwa vyamuchano.

Uno chinyingi chasayasi wapwile nacho chakulingishile uhone kufwelela nge vyuma valingile vyakutenga tahi?

Nduma. Omu ngwalinangwilenga mujimba wamutu natunyama, ngwamwene nge vyuma vyakuyoya vavitenga mujila yakukomwesa. Ngocho kushinganyeka havyuma ngwalinangwile changulishile ngumone vyuma vimwe yahanjika sayasi kupwa vyamokomoko.

Vuluka chakutalilaho chimwe.

Ngunalinangulanga wongo wamutu kufuma vene muji 1970, oloze chihanda kanechi noholyapwa hanga changukomwesa lika. Vishinganyeka vyatwama muwongo, kaha nawa wongo weji kutalanga hamilimo yeji kuzatanga vihanda vikwavo vyamumujimba. Kaha nawa mwatwama vihanda vyosena vize vyeji kutukafwanga twivwenga nakutachikiza vyuma vize vinakulingiwa mumijimba yetu navize vinahase kusoloka kumijimba yetu.

Wongo wetu weji kuzatanga chikuma mwomwo yamishisa yimwe yakwata kuwongo yize yapwa yayilemu chikuma. Wongo wamutu watwama namishisa yakuheta kujimbiliyoni, yize yeji kulituminanga mijimbu nayikwavo kuhichila mutumishisa vavuluka ngwavo axons. Echi cheji kukafwanga mushisa umwe uzachile hamwe namishisa yayivulu chikuma kuhichila mumaselusi vavuluka ngwavo dendrites. Kahechi chalingisa mishisa yamuwongo yilinungasane chikuma. Kaha nawa mishisa kana yalitokejeka kanawa mujila yakulonga keshi kwijiva kaha kulisepasanako. Kulinungasana kana chapwa chakukomwesa chikupu.

Twalaho lika kulumbununa.

Echi kulinungasana kana cheji kuputukanga shimbu mwana achili mujimo. Mishisa vavuluka ngwavo neurons yeji kutumanga mijimbu kumishisa yikwavo yize yalisosoloka nayikwavo kafwe jisetimita jajindende kaha. Mushisa umwe weji kutumanga mijimbu kumuyachi umwe wamaselusi nakuchihanda chimwe chaliselusi.

Omu mushisa weji kutumanga mijimbu kumishisa yikwavo, mushisa kana veji kuulwezanga “wimane” chipwe “utambuke” chipwe “ukinduluke” palanga nomu nauhetesa mujimbu kumushisa ukwavo. Chakuzeneka kuyitwaminyina eyi mishisa yinahase kuhona kuhetesa mijimbu kumishisa yikwavo. Vyuma kana vyeji kuzatanga mujila yakulipwila yize valongesa kanawa, kuputuka vene najindongi jatwama muDNA.

Katwatachikiza chikuma omu wongo weji kuzatanga nomu weji kuhasanga kulama vyuma, nakulingisa mutu evwenga kuwaha chipwe kupihyako. Kutachikiza omu wongo weji kuzatanga nomu weji kulitunganga cheji kungulingisanga ngufwelele chikupu ngwami kwatwama mutu umwe wamangana chikuma uze autengele.

Chuma muka chakulingishile upwenga uChinjiho chaYehova?

Vinjiho vangukafwile ngutachikize ngwami Mbimbiliya yapwa chikupu Mazu aKalunga. Chakutalilaho Mbimbiliya kayapwa mukanda wasayasiko, oloze yahanjika mwakwoloka hamijimbu yasayasi. Kaha nawa yikwechi upolofweto wakwoloka. Yeji kwalumunanga nawa kuyoya chavatu vaze navazachisa vyuma navalinangula. Mbimbiliya yinangukafwe ngwalumune chiyoyelo chami. Kufuma vene mu 1973 muze ngwapwile jino nguChinjiho chaYehova Mbimbiliya yinangutwaminyinanga mukuyoya chami. Kahechi chinangukafwe ngupwenga wakuwahilila chikuma mukuyoya chami.