Bantemu ba Yehowa ne bantu miliyo ne miliyo badibu babikila pa buloba bujima batu badisangisha bua kusekelela Tshivulukilu tshia lufu lua Yezu musangu umue ku tshidimu, anu muakatumaye dîyi. (Luka 22:19) Tshibilu etshi tshidi tshituambuluisha bua kumvua mushinga udi nawu tshivua Yezu muenze pavuaye mufile muoyo wende bua bukua bantu. Tshidi kabidi tshileja tshidi mulambu wende mua kutuenzela mpindieu ne mu matuku atshilualua.​—Yone 3:16.

 Nansha wewe mubuele mu Tshivulukilu tshidimu etshi anyi kuyi mubuelamu, ntshinyi tshiudi mua kuenza bua mulambu wa Yezu ukuambuluishe? Yezu wakalongesha ne: tudi ne bua kuenza malu abidi a mushinga aa:

1.  1. Longa malu a Nzambi ne a Yezu. Yezu wakalomba Tatu wende mu disambila; kuambaye ne: “Bualu ebu budi bumvuija muoyo wa tshiendelele: bende bakumanya wewe, Nzambi umuepele mulelela, ne yeye uuvua mutume, Yezu Kristo.”​—Yone 17:3.

2.  2. Tumikila malu audi ulonga. Yezu wakaleja mudibi ne mushinga bua tuetu kutumikila malongesha ende mu nsombelu wetu. Tshilejilu, wakajikija muyuki wende wa pa mukuna udi muende lumu ne mêyi a kuela nawu muntu yonso udi “umvua mêyi [ende] ne uenza” kalumbandi. (Luka 6:46-48) Bia muomumue, wakamba musangu mukuabu ne: “Nuenu bamanye malu aa, nudi ba diakalenga binuaenza.”​—Yone 13:17.

 Udi musue kumanya malu a bungi adi atangila Nzambi ne Yezu anyi? Udi musue kupeta mibelu mimpe ya muudi mua kutumikila malu audi ulonga anyi? Mona imue mishindu idi mua kukuambuluisha.

 Programe wetu wa dilonga dia Bible dia nuenda nuyukila kuyi ufuta makuta, ukadi muambuluishe bantu ba bungi bua kulonga Bible ne kutumikila bidiye wamba mu nsombelu wabu.

•   Tangila dibeji dia Dilonga dia Bible dia ulonga ne mulongeshi bua kumanya malu a bungi adi atangila programe au.

•   Tangila filme wa Tudi tukujingila dilonga dia Bible dilenga bua kumona mushindu utu dilonga dia Bible ne Bantemu ba Yehowa dienzeka.

 Bantemu ba Yehowa batu badisangisha misangu ibidi lumingu luonso muaba wabu wa ntendelelu utubu babikila ne: Nzubu wa Bukalenge. Mu bisangilu abi, tutu tukonkonona malu adi Bible ulongesha ne mushindu utudi mua kuatumikila.

 Muntu yonso udi mua kubuela mu bisangilu abi; kabiena bikengela ne: wikale anu Ntemu wa Yehowa bua wewe kubuelamu to. Bilondeshile nsombelu wa muaba uudi, pamuapa udi mua kubuela mu bisangilu batuilangane bonso kaba kamue anyi udi mua kubilondela ku biamu bia nuenda numonangana.

•   Tangila filme wa Tshitu tshienzeka ku Nzubu wa Bukalenge ntshinyi? bua kumona kadiosha ka mutu bisangilu abi bienzeka.

•   Tangila dibeji dia Bisangilu bia tshisumbu bia Bantemu ba Yehowa bua kukeba muaba udibi bienzekela pabuipi nenu.

 Filme ne biena-bualu bia bungi bidi mu site eu bidi mua kukuambuluisha bua kumanya malu a bungi adi atangila malongesha a Yezu ne mushinga udi nawu lufu luende.

 Tshilejilu, bua kumanya mudi lufu lua muntu umue luambuluisha bantu miliyo ne miliyo, bala tshiena-bualu tshia “Jésus sauve: comment?” ne tshia “Bua tshinyi Yezu wakakenga ne kufua?” anyi tangila filme wa Bua tshinyi Yezu wakafua?