Bikadilu bilenga bidi bienda bikepela. Babedi badi kabayi ne bukalanga badi batandisha badoktere; bantu badi basumba mu restoran badi bapuekesha badi babatuadila bintu mulongo; bantu badi bapange malu batu benza luendu mu ndeke batu baluangesha bambuluisha ba mu ndeke, balongi ba mutu mukole batu baseka balongeshi, babakanyina, ne babunda; bamue bena tshididi badi babuelakana mu bienzedi bibi menemene padi bakuabu badienzeja bua kuleja mudibu bobu ne bikadilu bilenga.

 Bible mmukanda utu ufila bulombodi buimpe bua bikadilu bilenga. Udi utumvuija kabidi bua tshinyi bikadilu bilenga bidi bienda bikepela lelu.

 Dikepela dia bikadilu bilenga, mmumue ne: bikadilu bimpe bitudi ne bua kuikala nabi, didi dienda dimueneka pa buloba bujima.

•    Bilondeshile luapolo lua tshiapu tshia Gallup lua matuku mashale aa, bantu ba mu Amerike mbamone ne: bikadilu bilenga mbikepele mu États-Unis kupita muvuabi bidimu 22 bishale.

•    Mu bantu bakuabu bapite pa 32 000 bavuabu bele nkonko mu matunga 28, bia pa lukama 65 bia bantu abu mbaleje ne: bantu mbakepeshe bikadilu bilenga lelu bu mutubu katshia kabayi banji kumona to.

 Bible ukavua mudianjile kumanyisha bua bikadilu bitudi tumona lelu.

•    ‘Palua matuku a kunshikidilu, malu makole nealue. Bantu nebikale badisui, banangi ba biuma, baditumbishi, badileji, bapendi ba Nzambi, kabayi batumikila mêyi a baledi babu, kabayi ne kusakidila, bena luonji.’—2 Timote 3:1-3, Mukanda wa Nzambi.

 Bua kumanya malu makuabu a mudi dîyi dia buprofete edi dienda dikumbana lelu, bala tshiena-bualu tshia “La Bible a-​t-​elle prédit la mentalité et la conduite des gens de notre époque?”

 Pa buloba bujima padi bikadilu bilenga bienda bikepela, bantu miliyo ya bungi mbafike ku dimona ne: Bible udi mua kubalombola bua kuikala ne bikadilu bilenga. Mibelu ya bikadilu ituye ufila itu ‘misangu yonso mijalame, mpindieu ne bua kashidi.’ (Misambu 111:8) Mona bilejilu bikese patupu:

•    Tshidi Bible wamba: “Malu onso anudi basue bua bantu banuenzele, nudi ne bua kubenzelawu penu.”​​—Matayi 7:12.

   Diumvuija: Tudi ne bua kuenzela bantu bakuabu malu mimpe ne kubanemeka, anu bu mutudi basue bua batuenzele petu.

•    Tshidi Bible wamba: “Mpindieu unukadi balekele dishima, yonso wa kunudi ambile mukuende bulelela.”​​—Efeso 4:25.

   Diumvuija: Tudi ne bua kuikala bena bululame mu malu onso atudi tuamba ne tuenza.

 Bua kumanya malu a bungi adi atangila tshiena-bualu etshi, suaku ubale:

•    Tshibumba tshia Nsentedi tshia ne: “Nkuepi kuudi mua kupetela mikenji ya kueyemena?”

•    Tshiena-bualu tshia “Mudi Bible mua kutuambuluisha bua kumvuilangana.”