“Pantshivua muana, tutuanyi uvua untuta dituku dionso ne umpenda. Pakanselabu, mamuenanyi wakatungunuka ne kunkengesha. Yeye ne tatuanyi muenu bavua bangenzela malu bu mupika. Ngakela meji a kudishipa.”—Madhu, a wa mu Inde.

 Bulongolodi budi butangila malu a makanda a mubidi pa buloba budi bujadika ne: “Dikengesha bantu bakaji ndivulangane pa buloba bujima.” Budi butshinka ne: muntu mukaji umue pa basatu udi utata bua mututu anyi badi benda nende masandi ku bukole.

 Pikalabi bikadi bikufikile pebe, udi mua kuikala utshina ne: badi mua kukukengesha ne mututu, bipendu, anyi kuenda nebe masandi ku bukole muaba wonso udi mua kuya. Bu mudibu benza malu ne tshikisu ne banuenzela malu mabi anu bualu nudi bantu bakaji, udi mua kudiambila ne: bantu ba bungi badi bela meji ne: ‘Bantu bakaji kabena ne mushinga to.’ Kadi Nzambi utu wangata bantu bakaji ne mushinga anyi?

 Mvese: “[Nzambi] wakabafuka mulume ne mukaji.” —Genese 1:27.

 Diumvuija: Nzambi wakafuka mulume ne mukaji. Udi ubamona bonso babidi bu bantu badi bakumbene kanemu. Bualu bukuabu, udi ulomba mulume bua “kunanga mukajende bu mudiye mudinange,” kayi umuenzeja malu ku bukole, anyi umuamba mêyi mabi peshi umuenzela malu ne tshikisu to. (Efeso 5:33; Kolosayi 3:19) Bimueneka ne: kukuba bantu bakaji kudi ne mushinga kudi Nzambi.

 “Pantshivua muana, bakenda nanyi masandi ku bukole kudi balela banyi. Pamvua ne bidimu 17, mfumuanyi wa mudimu uvua untshinyisha bua kungipata ku mudimu meme tshiyi muende nende masandi to. Pangakakola, bavua bampuekesha milongu kudi bayanyi, baledi banyi, ne kudi bena mutumba banyi. Kadi pashishe ngakalonga malu adi atangila Mufuki wetu Yehowa. b Meme kumanya ne: utu unemeka bantu bakaji. Bualu ebu buakajandikila ne: mmunange ne udi ungangata ne mushinga.”—Maria, wa mu Argentine.

 Mvese: “Kudi mulunda udi ulamata bikole kupita muanabu ne muntu.”—Nsumuinu 18:24.

 Diumvuija: Mulunda mulelela neakuambuluishe. Wewe mumone ne ki mbibi, udi mua kuambila muntu uudi weyemena muudi udiumvua.

 “Tshivua muambile muntu nansha umue munkatshi mua bidimu 20 ne: bavua bende nanyi masandi ku bukole to. Bua bualu ebu, ngakakola tshiyi ne disanka, mvua anu ne kanyinganyinga, ne mubungame. Kadi pangakambila muntu uvua mudiakaje bua kuteleja malu anyi, ngakapeta disulakana dia katshia.”—Elif, wa mu Turquie.

 Mvese: ‘Nupuile Nzambi ntatu yenu yonso, bualu yeye udi unutabalela.’—1 Petelo 5:7.

 Diumvuija: Paudi usambila, Nzambi udi uteleja bushuwa. (Misambu 55:22; 65:2) Bu mudiye ukutabalela, udi mua kukuambuluisha bua kumanya muudi ne mushinga.

 “Kulonga malu a Yehowa kuakatuadija kungambuluisha bua kumvua bimpe ku kanyinganyinga kamvua naku. Mpindieu ndi mua kusambila, ngambila Nzambi mundi ndiumvua. Udi bu mulunda udi mumanye mundi diumvua.”—Ana, wa mu Bélize.

 Mvese: ‘Yehowa neakose biakane tshilumbu tshia bana badi bafuishe batatuabu ne bantu badibu bazaze, bua muntu ufuafua wa pa buloba kamonyi mua kubatshinyisha kabidi nansha.’—Misambu 10:​17, 18.

 Diumvuija: Nzambi ukadi pa kujikija malu mabi onso, too ne tshikisu ne dikengesha dia bantu bakaji.

 “Kumanya ne: Yehowa ukadi pa kujikija dikengesha dia bamamu ne bana ba bakaji, kuvua anu bu buanga buakanguondopa. Ngakapeta ditalala dia mu lungenyi.”—Roberta, wa mu Mexique.

 Bua kumanya malu makuabu a mudi Bible ufila ditekemena, bua tshinyi udi mua kuitaba milayi idimu, ne mudi Bantemu ba Yehowa bafila diambuluisha dia mu Bible lelu, lomba bua balue kukutangila.

 Ambula tshiena-bualu etshi tshianana.