Pa buloba bujima, bantu ba bungi badi bamba mudibu balonda Yezu Kristo mbaditue mu malu a tshididi bikole menemene. Bamue batu batua bena tshididi anyi bisumbu kampanda bia tshididi mpanda, bua kutuma malongesha ne malu a bikadilu atu tshitendelelu tshiabu tshilongesha kumpala. Ne pashishe, bena malu a tshididi batu bakuila bikole malu a bikadilu bia bantu ne batu balaya bua kubapetesha nsombelu muimpe bua bena bitendelelu kubatuabu mpanda. Nunku mbipepele bua kusungulabu balombodi ba bitendelelu kampanda bua kuikala ne muaba mu malongolodi a tshididi. Mu amue matunga, badi mua kupesha tshitendelelelu tshidi tshidiamba tshia “bena Kristo” muaba munene, mmumue ne: tshilua tshitendelelu tshia ditunga anyi tshia mbulamatadi.

 Buebe wewe, Bena Kristo badi ne bua kubuelakana mu malu a tshididi anyi? Udi mua kupeta diandamuna wewe mukonkonone tshilejilu tshia Yezu Kristo. Wakamba ne: “Ndi munushile tshilejilu, bua nuenu nuenze penu anu bu mundi munuenzele.” (Yone 13:15) Ntshilejilu kayi tshivua Yezu mutushile pa bidi bitangila malu a tshididi?

 Tòo. Yezu kavua ubuelakana mu malu a tshididi a panu to.

 Kavua ukeba bukokeshi mu malu a tshididi to. Pavua Satana mumuambile bua kukokesha “makalenge onso a pa buloba” a bana ba bantu, wakabenga. (Matayi 4:8-10) a Musangu mukuabu pakamona bantu babungi ne: Yezu uvua ne bikadilu bimpe bivua mua kuenza bua ikale mukokeshi muimpe bakateta bua kumusaka mu malu a tshididi. Kadi Bible udi wamba ne: “Bu muvua Yezu mumanye ne: bavua bakeba kulua kumukuata bua kumuteka mukalenge, wakumbuka kabidi kuyaye ku mukuna anu yeye nkayende.” (Yone 6:15) Yezu kavua muitabe bua kuenza tshivua bantu basue atshi nansha, wakabenga bua kubuela mu malu a tshididi.

 Kavua mulamate tshisumbu kampanda tshia tshididi to. Tshilejilu mu tshikondo tshia Yezu, bena Yuda bavua bakine difuta bukalenge bua bena Lomo bitadi ne bavua bamona kuenza nanku kakuyi kuakane to. Pakatetabu kusaka Yezu ku diakula malu a bitadi, kakabuelakana mu miyuki ya malu a tshididi ayi to. Wakabambila ne: “Nufute Kaisa bintu bia Kaisa, kadi nufute Nzambi bintu bia Nzambi.” (Mâko 12:13-17) Wakashala kayi ne luseke lua tshididi luvuaye mulamate, kadi wakamba anu ne: bivua bikengela kufuta bitadi bivua Kaisa ulomba, tuambe ne: bivua bakokeshi ba bena lomo balomba bua kufuta. Dîba adi wakamba kabidi ne: muntu kena ne bua kutumikila malu onso adi bakokeshi bamba bua enze to. Muntu kavua ne bua kupesha mbulamatadi tshintu tshidi tshikumbene anu Nzambi nkayende, bu mudi kumulamata ne kumutendelela.​—Matayi 4:10; 22:37, 38.

 Yezu wakalongesha bakuabu anu bua Bukalenge bua Nzambi. (Luka 4:43) Yezu uvua mumanye ne: anu Bukalenge bua Nzambi ke buakumbaja disua dia Nzambi bua buloba ki mmakalenge a bantu nansha, ke bualu kayi kavua ubuelakana mu malu a tshididi to. (Matayi 6:10) Uvua mumanye bimpe ne: Bukalenge bua Nzambi kabuakukuata mudimu ne makalenge a bana ba bantu nansha, kadi nebuapingene onso.​—Danyele 2:44.

 Tòo. Bayidi ba Yezu bakatumikila mukenji wende wa kubenga kuikala “ba pa buloba.” (Yone 15:19) Bakalonda tshilejilu tshiende ne kabakabuelakana mu malu a tshididi a panu to. (Yone 17:16; 18:36) Pamutu pa kubuelakana mu malu a tshididi, bayidi ba Yezu bobu bakatumikila mukenji wa kuyisha ne kulongesha lumu luimpe lua Bukalenge bua Nzambi.​—Matayi 28:18-20; Bienzedi 10:42.

 Bena Kristo ba mu bidimu lukama bia kumpala bavua bateke ditumikila Nzambi pa muaba wa kumpala mu nsombelu wabu, tshibi bavua bamanye ne: bavua ne bua kunemeka bakokeshi ba mbulamatadi. (Bienzedi 5:29; 1 Petelo 2:13, 17) Bavua batumikila mikenji ne bafuta bitadi. (Lomo 13:1, 7) Nansha muvuabu kabayi babuelakana mu malu a tshididi au, bavua bapeta bukubi bufile kudi mikenji, ne malu makuabu avua mbulamatadi wenza avua abambuluisha.​—Bienzedi 25:10, 11; Filipoyi 1:7.

 Bible udi uleja patoke ne: nansha Yezu, anyi bayidi bende ba kumpala, kabavua babuelakane mu malu a tshididi nansha. Bua bualu ebu, Bantemu ba Yehowa pa buloba bujima bu mudibu bena Kristo kabena babuelakana mu malu a tshididi to. Anu bu bena Kristo ba mu bidimu lukama bia kumpala, Bantemu ba Yehowa badi benza mudimu uvua Yezu mubatumine dîyi, wa kuyisha “lumu luimpe elu lua Bukalenge.”​—Matayi 24:14.