Patshivua Yezu mu Yelushalema bua Tshibilu tshia Nzubu ya ntenta (anyi tshia Bitanda), wakatungunuka ne kuyisha bulelela bua mushinga. Bamue bena Yuda bavua mu tshibilu atshi bakamuambila ne: “Tuetu tudi bana ba Abalahama, katutu banji kuikala bapika.” Yezu wakabandamuna ne: “Ndi mumanye ne: nudi bana ba Abalahama, kadi nudi nukeba kunshipa bualu dîyi dianyi kadiena ne muaba munda muenu. Ndi ngakula malu amvua mumone pantshivua kudi Tatu, nunku nuenu enzayi malu anuvua bumvue kudi tatu wenu.”​—Yone 8:33, 37, 38.

Mêyi a Yezu aa mmapepele: Tatuende mmushilangane ne tatuabu. Bu muvua bena Yuda kabayi bamanye tshivua Yezu wamba, bakambulula bualu ebu bamba ne: “Abalahama ke tatuetu.” (Yone 8:39; Yeshaya 41:8) Badi ndelanganyi yende ya ku mubidi. Nunku bakamona ne: badi ne ditabuja dia muomumue ne divua nadi Abalahama mulunda wa Nzambi.

Kadi Yezu wakabapesha diandamuna divua dibatonde dia ne: “Bu nuenu bikale bana ba Abalahama, nuvua mua kuikala nuenza bienzedi bia Abalahama.” Bushuwa muana mulelela utu widikija tatuende. Yezu udi utungunuka wamba ne: “Kadi mpindieu nudi nukeba bua kunshipa meme muntu udi munuambile bulelela bumvua mumvue kudi Nzambi. Abalahama kavua muenze nunku to.” Pashishe wakamba tshiambilu tshikole tshivuabu kabayi bumvue etshi: “Nuenu nudi nuenza bienzedi bia tatuenu.”​—Yone 8:39-41.

Bena Yuda ki mbajingulule anu muntu uvua Yezu wakuila to. Badi badiamba mudibu bana ba mu lubanza, baleja ne: “Katuvua baledibue mu buendenda to; tudi ne Tatu umue, Nzambi.” Kadi mu bulelela Nzambi ke Tatuabu anyi? Yezu wakabambila ne: “Bu Nzambi muikale Tatu wenu, nuvua mua kunnanga, bualu mvua mufume kudi Nzambi ne ndi muaba eu. Tshiena mudiluile mu meme nkayanyi to, kadi Yeye au uvua muntume.” Yezu udi wela lukonko ne uluandamuna nkayende ne: “Bua tshinyi kanuena nujingulula malu andi ngamba? Bualu kanuena mua kuteleja dîyi dianyi to.”​—Yone 8:41-43.

Yezu wakateta kuleja tshivua mua kufikila bantu bavua bamubenga. Kadi mpindieu udi wamba patoke ne: “Nuenu nudi bafume kudi tatuenu Diabolo, ne nudi basue kukumbaja majinga a tatuenu.” Tatuabu mmuntu wa mushindu kayi? Yezu udi umuela patoke wamba ne: “Yeye au uvua mushipianganyi pakabangaye, kakimana bikole mu bulelela.” Yezu udi usakidila ne: “Muntu udi mufume kudi Nzambi udi uteleja mêyi a Nzambi. Ke bualu kayi kanuena nuteleja, bualu kanuena bafume kudi Nzambi to.”​—Yone 8:44, 47.

Mêyi mashile aa akafiikisha bena Yuda munda, kuandamunabu ne: “Katuena tuambilamu patudi tuamba ne: ‘Wewe udi muena Samalea ne udi ne demon’ anyi?” Padibu babikila Yezu ne: “muena Samalea” badi bamupetula. Kadi Yezu udi ulengulula dipetu diabu edi, ubandamuna ne: “Tshiena ne demon to, kadi ndi nnemeka Tatu wanyi, nuenu kanuena nunnemeka to.” Bua kuleja muvua bualu ebu ne mushinga wa bungi, Yezu wakafila mulayi wa mushinga wa ne: “Muntu yeye mutumikile dîyi dianyi kakumona lufu nansha kakese.” Kavua usua kuamba ne: bapostolo ne bantu bakuabu bavua bamulonda kabakufua lufu luetu luena dîna elu to. Kadi uvua wamba ne: kabakubutuka bua kashidi, mmumue ne: “lufu luibidi” kabayi ne ditekemena dia kubishibua to.​—Yone 8:48-51; Buakabuluibua 21:8.

Kadi Bena Yuda bakangata mêyi a Yezu mu ngumvuilu wa buntu bamba ne: “Mpindieu tudi bajadike ne: udi ne demon. Abalahama wakafua ne baprofete kabidi, kadi wewe udi wamba ne: ‘Muntu yeye mutumikile dîyi dianyi kakulabula lufu nansha kakese.’ Wewe kuena munene kupita tatuetu Abalahama wakafua to, ki mmuomu? Wewe udi udiangata bu nganyi?”​—Yone 8:52, 53.

Bidi bimueneka patoke ne: Yezu mmuleje mudiye Masiya. Kadi pamutu pa yeye kuandamuna buludiludi lukonko luabu bua tshivuaye, udi ubambila ne: “Bingikala nditumbisha nkayanyi, butumbi buanyi budi tshianana. Tatu wanyi ke udi untumbisha, yeye unudi nuamba ne: n’Nzambi wenu. Penu kanuena bamumanye to, kadi meme ndi mumumanye. Meme muambe ne: tshiena mumumanye, nengikale muena dishima bu nuenu.”​—Yone 8:54, 55.

 Yezu udi mpindieu wakula bua tshilejilu tshia nkambua wabu wa lulamatu, wamba ne: “Abalahama tatuenu wakasanka bikole bua ditekemena dia kumona dituku dianyi, wakadimona, kusankaye.” Eyowa, bu muvua Abalahama muitabuje mulayi wa Nzambi eu, uvua mutekemene dilua dia Masiya. Bena Yuda badi bandamuna Yezu ne mêyi a dipanga ditabuja bamba ne: “Kuena muanji kukumbaja nansha bidimu 50 to, Abalahama ke uukadi mumone?” Yezu wakabambila ne: “Bulelela, bulelela, ndi nnuambila ne: kumpala kua Abalahama kuikalaku, meme mvuaku.” Uvua wakula bua muvuaye muanjelu wa bukole wa mu diulu kumpala kua kuluaye pa buloba bu muntu.​—Yone 8:56-58.

Bu muvua bena Yuda bafiike munda bua muvua Yezu muambe ne: uvua ne muoyo kumpala kua Abalahama, bakadilongolola bua kumuasa mabue. Kadi Yezu udi umbuka kayi mupetangane ne njiwu.