Tangilabi muana udi mu tshimfuanyi etshi. Mmumueneke anu bu muntu nkaya udi ne buôwa, ki mmuomu? Ukadiku mudiumvue pebe mushindu au anyi?— Muntu yonso utuku anu pende misangu mikuabu udiumvua nanku. Mukanda wa Nzambi utu wakula bua balunda ba Yehowa bavua pabu badimone nkaya, bumvue ne buôwa. Umue wa kudibu diende uvua Eliya. Tuanji tumonabi malu adi amutangila.

Eliya mmuntu uvua mu Isalele kale, kumpala kua Yezu kuledibua. Ahaba, mukalenge wa bena Isalele, kavua utendelela Yehowa Nzambi mulelela to. Ahaba ne mukajende Yezabele bavua batendelela nzambi wa dishima, Bâla. Ke bantu bonso ba mu Isalele pabu kubanga kutendelelabu Bâla. Mukalenge mukaji Yezabele uvua muena muoyo mubi wa dikema! Uvua ujinga kushipa bantu bonso bavua batendelela Yehowa, too ne Eliya! Udi mumanye tshiakenza Eliya anyi?—

Eliya wakanyema! Kuyaye ntanta mule lua mu tshipela, yeye kusokoma mu lubuebue. Udi mumanye  ne: mbua tshinyi?— Mmuomu, bualu uvua mumvue buôwa. Pende yeye kavua ne bua kumvua buôwa nanku to! Bualu si uvua mumanye bimpe ne: Yehowa uvua mua kumuambuluisha. Yehowa si ukavua muleje Eliya bukole buende kumpalampala. Kumpala aku, Yehowa ukavua muitabe disambila dia Eliya mutume kapia panshi kumbukile mu diulu. Nanku, Yehowa uvua anu mua kuambuluisha Eliya kabidi musangu eu!

Pavua Eliya mu lubuebue apu, Yehowa wakamuebeja ne: ‘Udi wenza tshinyi muaba eu?’ Eliya kuandamuna ne: ‘Anu meme nkayanyi ngutshidi mushale ukutendelela. Ndi anu nkayanyi, nunku ndi ntshina bua kabalu kunshipa.’ Eliya uvua wela meji ne: bakavua bashipe batendeledi bakuabu bonso ba Yehowa. Kadi Yehowa wakambila Eliya ne: ‘Too, kabiena nanku to. Kutshidi bantu bakuabu 7 000 badi bantendelela. Ikala ne muoyo mukole! Ntshidi ne mudimu mukuabu wa bungi wa kukupesha!’ Buebe wewe, Eliya uvuaku musanke bua kumvua mêyi au anyi?—

Malu avua mafikile Eliya aa adi akulongeshaku tshinyi?— Ki mbimpe wewe kudimona nkaya, kumvua buôwa to. Udi ne balunda badi banange Yehowa, bakunange ne wewe muine. Kabidi Yehowa udi ne bukole bua bungi, nunku neikale anu ukuambuluisha! Kuenaku ne disanka dia kumvua ne: kutu anu nkayebe nansha anyi?—