DILONGESHA DIA 55
Ambuluisha tshisumbu tshienu
Pa buloba bujima, bantu miliyo ne miliyo badi benzela Yehowa mudimu ne disanka mu bisumbu binunu ne binunu. Badi ne dianyisha bua malongesha ne bulombodi budibu bapetamu, ne badi bambuluisha bisumbu biabu ne muoyo mujima mu mishindu mivule. Ke tshiutu pebe wenza mu tshisumbu tshienu anyi?
1. Udi mua kuambuluisha tshisumbu ne dîba diebe ne makanda ebe mushindu kayi?
Yonso wa kutudi udi mua kuambuluisha tshisumbu. Tshilejilu, mu tshisumbu tshienu kamuenaku bakulakaje nansha balema anyi? Kuenaku mua kubambuluisha bua kubafikisha mu bisangilu anyi? Kuena nansha mua kuya kubuudila bintu mu tshisalu anyi kubenzela tumidimu tua kumbelu anyi? (Balayi Yakobo 1:27.) Tudi kabidi mua kudifila bu badisuile bua kuteka mankenda ku Nzubu wetu wa Bukalenge ne kuikala kumutabalela. Kakuena udi utuenzeja bua kuenza malu aa to. Dinanga ditudi banange nadi Nzambi ne bana betu ke didi ditusaka bua ‘kudifila ku budisuile.’—Misambu 110:3.
Bantemu bakadi babatijibue badi mua kuambuluisha tshisumbu mu mishindu mikuabu kabidi. Bana betu ba balume badi bakumbaja malu adi Bible ulomba badi mua kuambuluisha bu basadidi ba mudimu, ne pashishe kuluabu bakulu. Bena Kristo balume ne bakaji bonso badi mua kuambuluisha mu mudimu wa diyisha ne bukole buonso bobu benza mudimu wa bumpanda-njila. Bantemu bakuabu pabu badi mua kuambuluisha mu midimu ya luibaku lua miaba yetu ya ntendelelu, anyi kuya muaba udi tshisumbu tshikuabu tshikengela diambuluisha diabu.
2. Tudi mua kuambuluisha tshisumbu ne bintu bietu bikuabu mushindu kayi?
Tudi mua ‘kutumbisha Yehowa ne bintu bietu bia mushinga.’ (Nsumuinu 3:9) Tutu tumona ne: ndiakalenga patudi tufila makuta ne bintu bietu bikuabu bua kuambuluisha tshisumbu tshietu ne kukuatshisha mudimu wa diyisha udi wenzeka pa buloba bujima. (Balayi 2 Kolinto 9:7.) Bintu bitudi tufila abi, badi kabidi benza nabi mudimu wa diambuluisha badi bipupu bishiye mu ntatu. Bana betu ba bungi batu pa tshibidilu balongololaku tshintu tshidibu mua kufila, badianjila ‘kuditekelatshi ku luseke.’ (Balayi 1 Kolinto 16:2.) Bua kufila dipa dietu, tudi mua kudiela mu tushete tua mapa tudi miaba yetu ya ntendelelu anyi kudifidila ku Enternete mu adrese wa donate.jw.org. Yehowa mmutupeshe mpunga wa kuleja mutudi bamunange patudi tuitaba bua kufila bintu bietu bitudi nabi.
BUELA MU BUONDOKE
Tumonabi malu audi mua kuenza bua kuambuluisha tshisumbu.
3. Tudi mua kufila bintu bietu
Yehowa ne Yezu mbanange muntu udi ufila bintu biende ne muoyo wa disanka. Tshilejilu, Yezu wakanyisha mukaji mukamba mupele wakadienzeja bua kufila tuende tukese tuvuaye natu kudi Yehowa. Balayi Luka 21:1-4, pashishe nuandamune nkonko eyi:
-
Bidi bikengela tuikale tufila anu makuta a bungi menemene bua kushisha kusankisha Yehowa anyi?
-
Mmunyi mutu Yehowa ne Yezu bumvua patudi tufila mapa ne muoyo wa budisuile?
Bua kumanya tshitubu benza ne makuta atutu tufila, tangilayi FILME. Pashishe nuandamune lukonko ludi lulonda.
-
Ntshinyi tshitubu benza ne mapa etu bua kuambuluishawu bisumbu bia buloba bujima?
4. Tudi mua kudifila tuetu bine
Ku kale, batendeledi ba Yehowa bavua benza mudimu wa tshisumi bua kulama miaba yabu ya ntendelelu bimpe ne kuyilongolola. Kadi mudimu au kauvua ubalomba anu kufila makuta patupu to. Balayi 2 Kulondolola 34:9-11, pashishe nuandamune lukonko elu:
-
Muena Isalele yonso wakafila diende diambuluisha mushindu kayi mu mudimu wa ditabalela nzubu wa Yehowa anyi muaba wa ntendelelu?
Bua kumanya mudi Bantemu ba Yehowa balonda tshilejilu tshidi mu Bible atshi, tangilayi FILME. Pashishe nuandamune nkonko idi ilonda.
-
Bidi bikengela bua tuetu kulama Nzubu wetu wa Bukalenge ne mankenda kayi munyanguke bua tshinyi?
-
Ndiambuluisha kayi diudi pebe mua kufila?
5. Bana betu ba balume badi mua kulumbila midimu mikuabu
Bible udi ukankamija bena Kristo balume bua balumbile bua kuenza tshionso tshidibu mua kuenza bua kuambuluisha tshisumbu. Bu tshilejilu, tangilayi FILME. Pashishe nuandamune lukonko ludi lulonda.
-
Mu filme eu, mmushindu kayi uvua Ryan wipatshila mudimu wa diambuluisha tshisumbu bimpe menemene?
Bible udi uleja ngikadilu idibu balomba bana betu ba balume bua kuluabu basadidi ba mudimu anyi bakulu. Balayi 1 Timote 3:1-13, pashishe nuandamune nkonko eyi:
-
Mmalu kayi adibu balomba muanetu wa balume udi wipatshila bua kulua musadidi wa mudimu anyi mukulu?
-
Mmalu kayi adi ba mu dîku diende ne bua kukumbaja?—Tangilayi mvese 4 ne wa 11.
-
Padi bana betu ba balume badienzeja bua kukumbaja malu malomba aa, mmushindu kayi udibi biambuluisha muntu yonso mu tshisumbu?
MUNTU YEYE MUKUEBEJE NE: “Nkuepi kutu Bantemu ba Yehowa bapetela makuta atubu benza nawu midimu yabu?”
-
Udi mua kumuambila tshinyi?
TSHIA KUKUATA
Yehowa udi ne dianyisha dia bungi patudi tudienzeja bua kufila dîba dietu, makanda etu, ne bintu bietu bua kuambuluisha tshisumbu.
Diambulula
-
Tudi mua kufila dîba dietu ne makanda etu mushindu kayi bua kuambuluisha tshisumbu?
-
Tudi mua kufila makuta etu ne bintu bietu mushindu kayi bua kuambuluisha tshisumbu?
-
Mmalu kayi audiku musue kuenza bua kuambuluisha tshisumbu?
BIA KUTANGILA KABIDI
Mona bua tshinyi Nzambi katshitu ulomba batendeledi bende tshia dikumi.
“Ntshinyi tshidi Bible wamba bua tshia dikumi?” (Tshiena-bualu tshia mu jw.org)
Mona tshidi ‘kuipatshila’ midimu ya mu tshisumbu kumvuija.
“Udiku ‘wipatshila mudimu’ anyi?” (Tshibumba tshia Nsentedi, 15/9/2014)
Mona Bantemu ba dikima batu badifila bua kuya kuambuila bena Kristo nabu mikanda ya malu a mu Bible.
Mushindu ututu tupeta makuta a kuendesha nawu midimu yetu mmushilangane ne wa bitendelelu bikuabu ku tshinyi?
“Nkuepi kutu Bantemu ba Yehowa bapetela makuta a mudimu wabu?” (Tshiena-bualu tshia mu jw.org)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
