DILONGESHA DIA 35
Mua kuangata mapangadika mimpe
Tuetu bonso tutu tuangata mapangadika. A bungi a kudiwu adi mua kutuenzela bimpe anyi bibi menemene ne kunyanga anyi kukolesha bulunda buetu ne Yehowa. Tshilejilu, tudi mua kupangadija bua kukeba mudimu, muaba wa kusombela anyi kubuela mu dibaka. Tuetu tuangata mapangadika mimpe, netupete disanka ne netusankishe Yehowa.
1. Mmunyi mudi Bible mua kukuambuluisha bua kuangata mapangadika mimpe?
Kumpala kua kuangata dipangadika, sambila bua Yehowa akuambuluishe, ne bala Bible bua kumanya mudiye umona malu. (Balayi Nsumuinu 2:3-6.) Mu imue nsombelu, Yehowa utu uleja tshia kuenza patoke. Dîba adi, kutumikila tshidiye muleje atshi ke dipangadika ditambe buimpe diudi mua kuangata.
Kadi tshia kuenza ntshinyi Bible yeye kayi muleje tshia kuenza patoke? Yehowa neakulombole anu “mu njila uudi ne bua kuendela.” (Yeshaya 48:17) Mushindu kayi? Udi mua kupeta mêyi manene adi mua kukulombola. Mêyi manene a mu Bible mbulelela bua nshindamenu budi buleja meji a Nzambi ne mudiye umvua. Misangu ya bungi, tudi tumanya mudi Yehowa umona amue malu patudi tubala bualu kampanda mu Bible. Patudi tujingulula mudiye umvua, tudi mua kuangata mapangadika adi amusankisha.
2. Mmalu kayi audi ne bua kuelela meji kumpala kua kuangata dipangadika?
Bible udi wamba ne: “Muntu mudimuke udi welangana meji a tshidia tshionso tshidiye wela.” (Nsumuinu 14:15) Bidi biumvuija ne: mbimpe kuanji kuela meji kumpala kua kuangata dipangadika. Patudi tuenda tuela meji, tudiebeje ne: ‘Mmêyi manene kayi a mu Bible adi atangila bualu ebu? Ndipangadika kayi didi mua kumpetesha ditalala mu muoyo? Nedienzele bakuabu tshinyi? Lukonko lua mushinga ludi ne: nedisankishe Yehowa anyi?’—Dutelonome 32:29.
Yehowa udi ne bukenji bua kutuambila tshidi tshimpe ne tshidi tshibi. Patudi tumanya mikenji ne mêyi ende manene bimpe ne tudisuika bua kuatumikila, tudi tuenda tulongesha kondo ketu ka muoyo. Kondo ketu ka muoyo mbukole budi munda muetu budi butuambila tshidi tshimpe ne tshidi tshibi. (Lomo 2:14, 15) Tuetu balongeshe kondo ketu ka muoyo bimpe netuikale tuangata mapangadika mimpe.
BUELA MU BUONDOKE
Mona mudi mêyi manene a mu Bible ne kondo ketu ka muoyo bituambuluisha bua kuangata mapangadika.
3. Bible ikale ukulombola
Mmunyi mudi mêyi manene a mu Bible mua kutulombola patudi tuangata mapangadika? Tangilayi FILME, pashishe nuandamune nkonko idi ilonda.
-
Budikadidi bua kudisunguila malu ntshinyi?
-
Bua tshinyi Yehowa mmutupeshe budikadidi bua kudisunguila malu?
-
Mmutupeshe tshinyi bua tuikale tuenza mudimu bimpe bitambe ne budikadidi buetu bua kudisunguila malu?
Balayi Efeso 5:15, 16. Mu mvese eyi mudi dîyi dinene dia mu Bible edi: ‘Enza malu bimpe bitambe ne dîba diebe.’ Mmunyi muudi mua kutumikila dîyi dinene edi bua . . .
-
kubala Bible pa tshibidilu?
-
kuikala muena dibaka muimpe, muledi muimpe, anyi muana muimpe?
-
kubuela mu bisangilu?
4. Longesha kondo kebe ka muoyo bua wikale wangata mapangadika mimpe
Mbipepele bua kuangata dipangadika dimpe padi Bible muele mukenji musunguluke. Kadi tshia kuenza ntshinyi padiku kakuyi mukenji wa nanku? Tangilayi FILME, pashishe nuandamune lukonko ludi lulonda.
-
Mu filme eu, ntshinyi tshivua Emma muenze bua kulongesha kondo kende ka muoyo ne kuangata dipangadika didi disankisha Yehowa?
Bua tshinyi katuena ne bua kulomba bakuabu bua batuangatshile mapangadika? Balayi Ebelu 5:14, pashishe nuandamune nkonko eyi:
-
Nansha mudibi mua kuikala bipepele bua kuebeja bakuabu tshidibu mua kuenza mu nsombelu udi mutufikile; ntshinyi tshitudi ne bua kudijinguluila nkayetu?
-
Ntshinyi tshidi mua kukuambuluisha bua kulongesha kondo kebe ka muoyo bimpe ne kuikala kuangata mapangadika mimpe?
Anu bu karte kadi kaleja njila, kondo ketu ka muoyo kadi katuambuluisha bua kuangata mapangadika mimpe
5. Nemeka kondo ka muoyo ka bakuabu
Tutu tuangata mapangadika mashilangane ne a bakuabu. Mmunyi mutudi mua kunemeka kondo ka muoyo ka bakuabu? Tuakule bua nsombelu ibidi eyi:
Nsombelu wa 1: Muanetu wa bakaji utu musue kuvuala bilengejilu udi umuangala uya mu tshisumbu mudi bana betu ba bakaji ba bungi bumvua bibi padibu bamona bakuabu ne bilengejilu.
Balayi Lomo 15:1 ne 1 Kolinto 10:23, 24, pashishe nuandamune nkonko eyi:
-
Bilondeshile mvese eyi, ndipangadika kayi didi muanetu wa bakaji au mua kuangata? Ntshinyi tshiudi mua kuenza paudi ne muntu udi ne kondo ka muoyo kamukandika tshintu tshidi kebe kakuanyishila?
Nsombelu 2: Muanetu wa balume mmumanye ne: Bible ki mmukandike dinua maluvu makole ne nkatshinkatshi to, kadi yeye nkayende mmudikandikawu. Bena Kristo netu mbamubikile bua kudia nende, kadi udi ubamona banua maluvu makole.
Balayi Muambi 7:16 ne Lomo 14:1, 10, pashishe nuandamune nkonko eyi:
-
Bilondeshile mvese eyi, ndipangadika kayi didi muanetu wa balume au mua kuangata? Ntshinyi tshiudi mua kuenza wewe mumone muanetu wenza tshintu tshidi kondo kebe ka muoyo kakukandika?
Bua kuangata mapangadika mimpe
1. Lomba Yehowa akuambuluishe bua kuangata dipangadika.—Yakobo 1:5.
2. Kebulula malu mu Bible ne mu mikanda yetu bua upete mêyi manene audi mua kutumikila. Udi kabidi mua kulomba lungenyi kudi bena Kristo bakadi bamonamone malu.
3. Keba bua kumanya tshikala dipangadika diebe mua kuenzela kondo kebe ka muoyo ne ka bakuabu.
BAMUE BATU BAMBA NE: “Ndi ne bukenji bua kuenza tshionso tshindi musue. Bionso bidi bantu bakula mmitoyi ya panyima pa mashinyi.”
-
Bua tshinyi tudi ne bua kuditatshisha bua mudi Nzambi ne bantu bakuabu bumvua?
TSHIA KUKUATA
Tudi tuangata mapangadika mimpe patudi tumanya mudi Yehowa umona malu ne tshidi bienzedi bietu mua kuenzela bakuabu.
Diambulula
-
Mmunyi muudi mua kuangata mapangadika adi asankisha Yehowa?
-
Udi mua kulongesha kondo kebe ka muoyo mushindu kayi?
-
Mmunyi mutudi mua kunemeka kondo ka muoyo ka bakuabu?
BIA KUTANGILA KABIDI
Mmunyi muudi mua kuangata mapangadika adi akolesha bulunda buebe ne Nzambi?
“Angata mapangadika adi atumbisha Nzambi” (Tshibumba tshia Nsentedi, 15/4/2011)
Mona malu makuabu a mudi Yehowa utupesha mibelu.
Mona malu avua mambuluishe muntu bua kuangata dipangadika dinene.
Mona malu makuabu a mua kuangata mapangadika adi asankisha Yehowa nansha padi Bible kayi uleja tshia kuenza.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
