DILONGESHA DIA 17
Yezu utu mushindu kayi?
Patudi tumanya malu avua Yezu muambe ne muenze pa buloba, tudi tujingulula bikadilu bidi bitukoka kudiye ne kudi Yehowa Tatuende. Mbikadilu kayi abi? Mmunyi mutudi mua kuidikija Yezu?
1. Yezu mmufuanangane ne Tatuende ku tshinyi?
Pavua Yezu mu diulu, wakamona Tatuende wa dinanga, kulongaye malu kudiye munkatshi mua bidimu miliyare ya bungi. Ke bualu kayi, utu wela meji, umvua, ne wenza malu anu bu Yehowa. (Balayi Yone 5:19.) Bushuwa, bu mudiye widikija bikadilu bia Tatuende bimpe menemene, wakamba ne: “Muntu yonso udi mummone mmumone kabidi Tatu.” (Yone 14:9) Wewe ulonga bikadilu bia Yezu, neufike ku dimanya Yehowa bimpe. Tshilejilu, mushindu uvua Yezu utabalela bantu udi uleja mudi Yehowa ukutabalela.
2. Mmunyi muvua Yezu muleje ne: mmunange Yehowa?
Yezu wakamba ne: “Bua ba pa buloba kumanya ne: ndi munange Tatu, ndi ngenza anu mudi Tatu mungambile bua kuenza.” (Yone 14:31) Pavuaye pa buloba, wakaleja ne: uvua munange Tatuende bikole pavuaye umutumikila nansha pavuabi bikole. Yezu uvua musue kabidi kuambila bakuabu malu a Tatuende ne kubambuluisha bua kudia nende bulunda.—Yone 14:23.
3. Mmunyi muvua Yezu muleje ne: mmunange bantu?
Bible udi wamba ne: Yezu ‘mmutambe kunanga nangananga bukua bantu.’ (Nsumuinu 8:31, dimanyisha) Wakaleja ne: uvua munange bantu pavuaye ubakankamija ne ubambuluisha ne muoyo mujima. Wakenza bishima bua kuleja muvuaye ne bukole ne luse. (Mâko 1:40-42) Wakenzela bantu malu malenga kayi usunguluja to. Mêyi ende akakolesha bantu bonso ba muoyo muakane bavua bamuteleja ne akabapetesha ditekemena. Yezu wakitaba bua kukenga ne kufua bualu mmunange bukua bantu buonso. Kadi mmunange nangananga badi batumikila malongesha ende.—Balayi Yone 15:13, 14.
BUELA MU BUONDOKE
Mona malu makuabu adi atangila bikadilu bia Yezu. Neumone muudi mua kunanga bantu ne kuikala tshipapayi anu bu Yezu.
4. Yezu mmunange Tatuende
Tshilejilu tshia Yezu tshidi tshitulongesha mua kunanga Nzambi. Balayi Luka 6:12 ne Yone 15:10; 17:26. Panudi nubala mvese ne mvese yonso, nuandamune lukonko elu:
-
Anu bu Yezu, mmunyi mutudi mua kuleja ne: tudi banange Yehowa?
Yezu uvua munange Tatuende wa mu diulu ne uvua umusambila pa tshibidilu
5. Yezu uvua utabalela bakengi
Yezu uvua uteka majinga a bakuabu kumpala kua ende. Nansha pavuaye mutshioke, uvua ufila dîba diende ne makanda ende bua kuambuluisha bantu. Balayi Mâko 6:30-44, pashishe nuandamune nkonko eyi:
-
Bilondeshile mvese eyi, mmalu kayi avua Yezu muenze bua kutabalela bakuabu?—Tangila mvese wa 31, 34, 41, ne wa 42.
-
Ntshinyi tshivua tshisaka Yezu bua kuambuluisha bantu?—Tangila mvese wa 34.
-
Bu mudi Yezu widikija bikadilu bia Yehowa, bidi bikulongesha tshinyi bua Yehowa?
-
Mmalu kayi atudi mua kuenza bua kuleja ne: tudi tutabalela bakuabu anu bu Yezu?
6. Yezu udi tshipapayi
Yezu uvua tshipapayi nansha muvuaye kayi ne bintu bia bungi bia ku mubidi, ne udi utukankamija petu bua tuikale ba tshipapayi. Balayi Bienzedi 20:35, pashishe nuandamune lukonko elu:
-
Bilondeshile Yezu, ntshinyi tshidi mua kutupetesha disanka?
Tangilayi FILME, pashishe nuandamune lukonko ludi lulonda.
-
Ngimue mishindu kayi itudi mua kufila nansha tuetu katuyi ne bintu bia ku mubidi bia bungi?
Udi mumanye anyi?
Bible udi utulongesha bua kulomba Yehowa mu disambila mu dîna dia Yezu. (Balayi Yone 16:23, 24.) Patudi tusambila nanku, tudi tuleja dianyisha bua tshidi Yezu mutuenzele bua tulue balunda ba Yehowa.
BAMUE BATU BAMBA NE: “Nzambi kena ne tshidiye wenza bua ntatu yetu to.”
-
Bu mudi Yezu widikija bikadilu bia Tatuende, mmunyi mudibi bitujadikila ne: Yehowa udi ututabalela?
TSHIA KUKUATA
Yezu mmunange Yehowa ne bantu. Bu mudi Yezu mufuane Tatuende, paudi wenda umumanya, neufike kabidi ku dimanya Yehowa.
Diambulula
-
Anu bu Yezu, mmunyi mutudi mua kuleja ne: tudi banange Yehowa?
-
Anu bu Yezu, mmunyi mutudi mua kuleja ne: tudi banange bantu?
-
Ntshikadilu kayi tshia Yezu tshidi tshikusankisha bikole?
BIA KUTANGILA KABIDI
Mona bikadilu bia Yezu bitudi mua kuidikija.
“Bua kuidikija Yezu, ikala . . .” (Yezu udi njila ne bulelela ne muoyo, dibeji dia 317)
Mona bua tshinyi tudi ne bua kusambila mu dîna dia Yezu.
“Bua tshinyi tudi ne bua kusambila mu dîna dia Yezu?” (Tshibumba tshia Nsentedi 1/4/2008)
Bible utuku wamba bualu kampanda bua tshimuenekelu tshia Yezu anyi?
“Yezu uvua ne tshimuenekelu kayi?” (Tshiena-bualu tshia mu jw.org)
Mushindu uvua Yezu wenzela bantu bakaji malu udi utulongesha tshinyi?
“Kulejangana kanemu ne bunême ndisua dia Nzambi” (Tshibumba tshia Nsentedi 1/9/2012)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
