KAZUBU KA 19A
Misulu ya mabenesha a kudi Yehowa
Tukonkonone imue mvese ya mu Bible idi yakula bua “musulu” anyi “mâyi” bua kuleja mabenesha a kudi Yehowa. Kubala mvese yonso eyi kudi kutukolesha bualu idi ituleja mudi Yehowa utuambuluisha. Tshilejilu:
YOELE 3:18 Mêyi a buprofete aa adi akula bua mushimi wa mâyi ufumina ku muaba munsantu wa mu ntempelo. Uvua utuma mâyi au mu “Tshibandabanda tshia Mitshi ya misese” tshivua tshiume. Nunku, Yoele ne Yehezekele badi bamona musulu wa mâyi ufululula buloba bume. Bubidi buabu badi bamona musulu ufumina mu nzubu wa Yehowa, anyi ntempelo wende.
ZEKÂYA 14:8 Muprofete Zekâya wakamona “mâyi a muoyo” afumina mu tshimenga tshia Yelushalema. Tshia bibidi tshiawu tshitangile mu mbuu wa ku est, anyi Mbuu Mufue, ne tshia bibidi tshiawu tshikuabu mu mbuu wa ku ouest, anyi Mbuu wa Mediterane. Yelushalema uvua ‘tshimenga tshia Mukalenge munene,’ Yehowa Nzambi. (Mat. 5:35) Nunku padi Zekâya utela tshimenga atshi, bidi bituvuluija muikala Yehowa ne bua kukokesha buloba bujima kumpala eku. Mâyi adibu batele mu mêyi a buprofete aa adi aleja ne: Yehowa neabeneshe bisumbu bibidi bia bantu ba lulamatu bikala mu Mparadizu, tshia bantu bapita ne muoyo mu dikenga dinene ne tshia bantu balua Nzambi kubisha ku lufu.
BUAKABULUIBUA 22:1, 2 Mupostolo Yone udi umona musulu wa mu tshimfuanyi mufuanangane bikole ne uvua Yehezekele mumone. Kadi wowu kawena ufumina ku ntempelo to, udi ufumina ku nkuasa wa bukalenge wa Yehowa. Nunku tshikena kumona etshi ntshifuanangane ne tshia Zekâya bualu tshidi patshi tshileja mabenesha a kudi Yehowa atuapeta mu Bukokeshi bua bidimu tshinunu.
Bushuwa, kudi anu dishilangana dikese pankatshi pa mabenesha adi afumina ku bukokeshi bua Yehowa ne adi musulu uvua Yehezekele mumone mu tshikena kumona uleja. Mabenesha onso au adi afuma kudi Yehowa, apeta bantu bende bonso ba lulamatu.
MISAMBU 46:4 Mona mudi mvese umue eu wakula bua ntendelelu ne bua bukokeshi. Kudi musulu udi usankisha “tshimenga tshia Nzambi,” anyi Bukalenge ne bukokeshi, usankisha kabidi “ntenta munene wa tshijila wa tshitendelelu wa Mutambe Bunene,” anyi ntendelelu mukezuke.
Mvese yonso eyi idi itujadikila ne: Yehowa neabeneshe bantu bende ba lulamatu mu mishindu ibidi. Wa kumpala nku diambuluisha dia bukokeshi buende, ne muibidi nku diambuluisha dia malu adiye mulongolole bua ntendelelu mukezuke. Nunku, tudisuikayi kutuadijila ku mpindieu bua kutungunuka ne kunua “mâyi a muoyo” adi Yehowa Nzambi ne Muanende batupesha, tuambe ne: malu onso adibu balongolole bua tupete muoyo wa tshiendelele!—Yel. 2:13; Yone 4:10.
