1, 2. Ntshinyi tshitudi ne bua kumanya bua Satana ne bademon bende?

NSOMBELU mu bulongolodi bupiabupia bua Yehowa neikale muimpe be! Kamana kamana, netuikale ne nsombelu uvua Nzambi musue bua tuikale nende. Kadi bua mpindieu tudi mu bulongolodi budi Satana ne bademon bende bakokesha. (2 Kolinto 4:4) Nansha mutudi katuyi tubamona, badiku ne badi ne bukole bua bungi.

² Mu nshapita eu, netumone tshitudi mua kuenza bua kushala pabuipi ne Yehowa ne kudikuba kudi Satana. Yehowa udi utulaya ne: neatuambuluishe. Kadi tudi ne bua kumanya mayele adi Satana ne bademon bende bakuata nawu mudimu bua kutudinga ne kutuluisha.

3. Ntshinyi tshidi Diabolo musue kutuenzela?

³ Satana udi wamba mudi bantu batendelela Yehowa anu bua kupeta masanka, wamba kabidi ne: nebalekele kumutendelela malu wowu malue kukola bikole. (Bala Yobo 2:4, 5.) Padi muntu uleja dijinga dia kumanya Yehowa, Satana ne bademon bende badi bamona, ne badi bateta bua kumupangisha. Badi bumvua tshiji padi muntu udilambula kudi Yehowa ne bamubatiza. Bible udi ufuanyikija Diabolo ne “ntambue udi ukungula, ukeba bua kudia muntu.” (1 Petelo 5:8) Satana mmusue kushipa malanda etu ne Yehowa.—Misambu 7:1, 2; 2 Timote 3:12.

4, 5. (a) Ntshinyi tshidi Satana kayi mua kuenza? (b) “Kukandamena Diabolo” kudi kumvuija tshinyi?

⁴ Kadi katuena ne bua kutshina Satana ne bademon bende to. Yehowa ki mmubanyishile bua kuenza malu onso to. Yehowa mmulaye ne: “musumba munene” wa bena Kristo balelela newupanduke ku “dikenga dinene.” (Buakabuluibua 7:9, 14) Kakuena tshintu nansha tshimue tshidi Diabolo mua kuenza bua kupangisha bualu ebu to, bualu Yehowa udi ulama bantu bende.

⁵ Tuetu bashale pabuipi ne Yehowa, Satana kena mua kushipa malanda etu nende to. Dîyi dia Nzambi didi  ditujadikila ne: “Yehowa udi nenu misangu yonso inudi nushala nende.” (2 Kulondolola 15:2; bala 1 Kolinto 10:13.) Bantu ba bungi ba lulamatu ba kale bu mudi: Abele, Henoka, Noa, Sala, ne Mose bavua bakandamene Diabolo pa kushala pabuipi ne Yehowa. (Ebelu 11:4-40) Tudi petu mua kuenza bia muomumue. Dîyi dia Nzambi didi ditujadikila ne: “Kandamenayi Diabolo, ne yeye neanunyeme.”—Yakobo 4:7.

6. Mmunyi mudi Satana utuluisha?

⁶ Nansha mudi Satana mumanye ne: Yehowa ki mmumuanyishile bua kutuenzela tshionso tshidiye musue, neikale anu wenza tshionso tshidiye mua kuenza bua kutekesha malanda etu ne Nzambi. Lelu, Diabolo udi uluisha bantu mu mishindu mishilashilangane, ne udi ukuata mudimu ne mayele akadiye mukuatakuate nawu mudimu bidimu bia bungi menemene. Amue a kudiwu mmayele kayi?

7. Bua tshinyi Satana udi uluisha bantu ba Yehowa?

⁷ Mupostolo Yone wakafunda ne: “Ba pa buloba bonso badi ku bukokeshi bua mubi.” (1 Yone 5:19) Bulongolodi bubi ebu budi ku bukokeshi bua Satana, ne mmusue kukokesha kabidi bantu ba Yehowa. (Mika 4:1; Yone 15:19; Buakabuluibua 12:12, 17) Diabolo mmumanye ne: katshiena kabidi ne dîba dia bungi to, ke bualu kayi udi utatshisha yonso wa kutudi bikole bua apange lulamatu kudi Nzambi. Kudi misangu idi Diabolo uluisha bantu buludiludi, kadi mikuabu misangu udi ubaluisha muinshi muinshi.

8. Ntshinyi tshidi muena Kristo yonso ne bua kumanya?

⁸ Tudi tubala mu Efeso 6:12 ne: “Tudi tuluangana [“tuluangana mvita ya bibula,” dimanyisha kuinshi kua dibeji] . . . ne bisumbu bia nyuma mibi bidi mu miaba ya mu  diulu.” Muena Kristo yonso eu udi uluangana ne Diabolo ne bademon bende. Tudi ne bua kumanya ne: bantu bonso badi badilambula kudi Yehowa badi mu mvita eyi. Mu mukanda uvua mupostolo Paulo mufundile bena Kristo ba ku Efeso, uvua mubalombe bua ‘kukandamana’ anyi “kuikala bashindame.”—Efeso 6:11, 13, 14.

9. Ntshinyi tshidi Satana ne bademon bende bakeba kutuenzela?

⁹ Satana ne bademon bende badi bakeba kutudinga mu mishindu mishilashilangane. Tuetu bakandamene Satana mu bualu kampanda kabiena biumvuija ne: kakutupita bukole mu bualu bukuabu to. Diabolo udi ujinga kumanya miaba itudi ne butekete bua amone mua kutusunguila buteyi bua kutukuata nabu. Kadi katuena anu ne bualu bua kukuatshibua to, bualu Bible udi utuleja mateyi a Diabolo. (2 Kolinto 2:11; tangila Dimanyisha dia ku ndekelu dia 31.) Bumue bua kudiwu mmalu a bademon.

10. (a) Malu a bademon ntshinyi? (b) Mmunyi mutu Yehowa umona malu a bademon?

¹⁰ Mu malu a bademon mudi malu atu kaayi enzeka ku buntu adi afikisha muntu ku dibuelakana ne bademon, bu mudi lubuku, mupongo, dilowangana, anyi kuteta kuyukila ne bafue. Bible udi utuambila ne: malu a bademon ‘mmabi’ ne katuena mua kubuelakana nawu eku tuenda tutendelela Yehowa to. (Dutelonome 18:10-12; Buakabuluibua 21:8) Bena Kristo badi ne bua kuepuka malu a bademon mu mishindu yawu yonso.—Lomo 12:9.

11. Dijinga kumanya malu atu kaayi enzeka ku buntu didi mua kutufikisha ku tshinyi?

¹¹ Satana mmumanye ne: malu atu kaayi enzeka ku buntu wowu atusankisha, nebikale bipepele bua kutukokaye  mu malu a bademon. Mushindu kayi wonso wa malu a bademon newushipe malanda etu ne Yehowa.

12. Mmunyi mudi Satana musue kunyanga lungenyi luetu?

¹² Satana udi uteta kufila tshibuejakaji mu mitu ya bantu. Ku kakese ku kakese udi ubueja dielakana mu mitu yabu too ne padibu bafika ku dimona ne: ‘bualu buimpe mbubi, bualu bubi mbuimpe.’ (Yeshaya 5:20) Diabolo udi utungunuja lungenyi lua ne: mibelu ya mu Bible kayitu yambuluisha to, kabidi ne: netuikale ne disanka tuetu katuyi tutumikila mikenji ya Nzambi.

13. Mmunyi mudi Satana mutete kufila dielakana mu mitu ya bantu?

¹³ Kufila dielakana mu mitu ya bantu ngumue wa ku mishindu itu Satana utamba kukuata nayi bantu. Ukadi mukuatakuate nawu mudimu bidimu bia bungi. Mu budimi bua Edene wakapesha Eva dielakana pavuaye mumukonke ne: “Nzambi uvua muambe bulelela ne: kanuena ne bua kudia mitshi yonso idi mu budimi ebu anyi?” (Genese 3:1) Pashishe mu matuku a Yobo, Satana wakakonka Yehowa mu mêsu mua banjelu ne: “Yobo udi utshina Nzambi bua tshianana anyi?” (Yobo 1:9) Bobu bamane kubatiza Yezu, Satana wakamuteta wamba ne: “Biwikala muana wa Nzambi, ambila mabue aa andamuke mampa.”—Matayi 4:3.

14. Mmunyi mudi Satana mua kufikisha bantu ku dielakana bua njiwu ya malu a bademon?

¹⁴ Lelu Diabolo udi utungunuka ne kufila dielakana mu mitu ya bantu. Udi uteta kufikisha bantu ku didiebeja bikala malu a bademon mmabi bulelela mutubu bamba padiye uvuija amue a kudiwu bu adi kaayi ne bualu. Too ne bamue bena Kristo kabatshiena bamona njiwu ya malu aa to. (2 Kolinto 11:3) Nunku ntshinyi tshitudi mua  kuenza bua kudikuba? Mmunyi mutudi mua kumanya ne: Satana kena utudinga ne mayele ende? Tumone malu abidi adiye mua kutudinga nawu: dipitshisha kapepe ne luondapu.

15. Mmunyi mutudi mua kufika ku dibuelakana ne bademon mu dipitshisha dietu dia kapepe?

¹⁵ Lelu eu, filme ya bungi, video, ndongamu ya ku televizion, manaya a ku ordinatere, ne site ya Enternete bidi ne malu atu bademon benza, malu a majimbu, ne malu atu kaayi enzeka ku buntu. Bantu ba bungi badi bamona malu aa bu malu a kupitshisha nawu kapepe adi kaayi ne bualu ne kabena bamona njiwu ya kulekela bademon babuela mu nsombelu yabu to. Muntu udi kabidi mua kubuelakana mu malu a bademon ku diambuluisha dia malu bu mudi: lubuku lua mabulunge, diumvuija mishonyi ya mu tshianza, tuarte tua lubuku, ne mmuenu ya kubuka nayi. Diabolo udi usokoka njiwu ya malu a bademon ne uteta kuenza bua amueneke bu malu a dikema, adi akoka ntema, ne asankisha. Muntu udi mua kufika too ne ku diela meji ne: bu mudiye kayi wenza malu a bademon, nansha yeye mutangile bualu kampanda budi ne malu a bademon anyi budi ne malu atu kaayi enzeka ku buntu ki mbibi to. Bua tshinyi kuela meji nunku nkubi?—1 Kolinto 10:12.

16. Bua tshinyi tudi ne bua kubenga dipitshisha kapepe didi ne malu atu kaayi enzeka ku buntu?

¹⁶ Satana ne bademon bende kabena mua kumanya malu adi mu meji etu to. Kadi badi mua kufika ku dimanya malu atudi tujinga ne tuelela meji padibu batangila mapangadika atudi tuangata buetu tuetu ne bua dîku dietu, too ne adi atangila dipitshisha dietu dia kapepe. Tuetu tusungula bua kutangila filme, kuteleja mizike, anyi  kubala mikanda bidi ne malu a bena mbuku, a dilowangana, a bantu badi ne nyuma mibi, a baloji, a bakishi, anyi bidi ne malu a mushindu eu, Satana ne bademon bende nebamanye ne: tudi basue kumanya malu abu. Dîba adi badi mua kuteta kutubuejakaja mu malu a bademon bikole.—Bala Galatiya 6:7.

17. Mmunyi mudi Satana mua kubuelela pa dijinga dietu dia kuikala ne makanda a mubidi?

¹⁷ Satana udi kabidi mua kubuelela pa dijinga dietu dia kuikala ne makanda a mubidi. Lelu, bantu ba bungi badi basama. Muntu udi mua kudiondopesha mu mishindu mishilashilangane, kadi kayi umvua anu bimpe to. (Mâko 5:25, 26) Udi nansha mua kushikila, ukadi witaba  tshionso tshidi tshimueneka anu bua kumvuaye bimpe. Kadi tuetu bena Kristo tudi ne bua kuikala ne budimu bua kubenga luondapu luonso ludi ne “malu a mupongo.”—Yeshaya 1:13.

18. Nngondapilu kayi idi muena Kristo ne bua kubenga?

¹⁸ Mu Isalele wa kale, kuvua bantu bavua ne “mupongo.” Yehowa wakabambila ne: “Panudi nuolola bianza bienu, ndi nnusokoka mêsu anyi. Nansha munudi nuenza masambila a bungi, tshiena nteleja to.” (Yeshaya 1:15) Anji elabi meji! Yehowa kavua nansha uteleja masambila abu to! Tudi tuepuka bua kuenza bualu buonso budi mua kunyanga malanda etu ne Yehowa, bimupangisha mua kutuambuluisha, nangananga patudi tusama. (Misambu 41:3) Ke bualu kayi tudi ne bua kuanji kumanya bikala luondapu lutudi tujinga luikale mu diumvuangana ne malu a bademon anyi atu kaayi enzeka ku buntu mu mushindu kampanda anyi kansanga. (Matayi 6:13) Bikalabi ne: ludi mua kuikala mu diumvuangana ne malu aa, tudi ne bua kulubenga.—Tangila Dimanyisha dia ku ndekelu dia 32.

19. Ntshinyi tshidi tshifikishe bantu ba bungi ku ditshina Diabolo?

¹⁹ Kudi bantu badi bela meji ne: Diabolo ne bademon bende mbantu ba mu mianu, kadi bua bakuabu bobu, bilondeshile malu akadi mabafikile, mbamanye ne: badiku. Bantu ba bungi batu batshina nyuma mibi bikole ne badi ku bupika bua bitabataba bia bilele bia kuabu. Bakuabu bobu badi basakangana ku ditshina bademon padibu balondelangana malu mabi a dikema atu bademon benzela bantu. Misangu ya bungi, malu aa atu atamba kukoka ntema ya bantu ne atu abasunsuma bua kualondela bakuabu. Malu aa atu atamba kufikisha bantu ku ditshina Diabolo.

20. Mmunyi mutudi mua kufika ku ditangalaja mashimi a Satana?

²⁰ Anji elabi meji: Satana mmusue bua bantu bikale bamutshina. (2 Tesalonike 2:9, 10) Mmuena dishima udi mumanye mua kunaya ne lungenyi lua bantu badi malu a bademon akoka ne udi ubafikisha ku ditaba malu adi kaayi anu malelela to. Bantu abu badi mua kulonda malu adibu bela meji ne: mbamone anyi mbumvue. Padi bantu benda baalondelangana pabu, adi angata luidi lukuabu. Ki mbimpe kulondelangana miyuki ya nunku to, tshianana tudi tuambuluisha Satana bua kufikisha bantu ku dimutshina.—Yone 8:44; 2 Timote 2:16.

21. Pamutu pa kulondelangana malu atu bademon benza, tudi mua kulondelangana malu kayi?

²¹ Bikala Ntemu wa Yehowa uvua mubuelakane ne bademon kale, kena mua kulondela bakuabu bualu abu to. Bantemu ba Yehowa kabena ne bua kutshina bualu nansha bumue budi Diabolo ne bademon bende mua kuenza to. Kadi tudi ne bua kutuishila mêsu kudi Yezu ne ku bukole budi Yehowa mumupeshe. (Ebelu 12:2) Yezu kavua ulondela bayidi bende malu atu bademon benza to. Uvua muimanyine pa mukenji wa Bukalenge ne pa “malu mimpe menemene a Nzambi.”—Bienzedi 2:11; Luka 8:1; Lomo 1:11, 12.

22. Udi mudisuike bua kuenza tshinyi?

²² Katupu muoyo ne: kipatshila ka Satana nka kushipa malanda etu ne Yehowa. Neenze muende muonso bua akumbaje kipatshila kende aka. Kadi tudi bamanye mayele a Diabolo ne tudi badisuike bua kubenga kubuelakana mu mishindu yonso ya malu a bademon. ‘Katuakupesha Diabolo mpunga’ wa kutekesha dipangadika dietu edi to. (Bala Efeso 4:27.) Bushuwa, tuetu bakandamene Diabolo, katuakukuluka mu mateyi ende to, ne netuikale mu bukubi bua Yehowa.—Efeso 6:11.