DILONGESHA DIA 17
Mose udi usungula bua kutendelela Yehowa
Mu Ejipitu, bavua babikila bena mu dîku dia Yakoba ne: bena Isalele. Panyima pa lufu lua Yakoba ne Jozefe, Palô mupiamupia wakatuadija kukokesha. Uvua ne buôwa bua muvua bena Isalele benda balua ne bukole bua bungi kupita bena Ejipitu. Nunku Palô eu wakavuija bena Isalele bapika. Uvua ubenzeja mudimu wa kututa madioto ne ubenzeja midimu mikole menemene ku bukole mu madimi. Pavua bena Ejipitu benzeja bena Isalele midimu mikole ku bukole, ke pavua bena Isalele bavulangana bikole. Bu muvua bualu abu kabuyi busankisha Palô, wakatuma dîyi bua bashipe bana ba balume ba bena Isalele bonso bavua baledibua. Udiku mua kudifuanyikijila buôwa buvua bena Isalele ne bua kuikala bumvue anyi?
Mukaji kampanda muena Isalele, diende Yokebede, wakalela muana wa balume muimpe be! Bua kumukuba, wakamuteka mu tshisaka, kutshisokokaye mu malenge a ku Musulu wa Nile. Mîyama, yayende wa muana, wakashala pabuipi apu bua kumona tshivua mua kuenzeka.
Muana wa bakaji wa Palô wakalua ku musulu bua kuôwa mâyi, yeye kumona tshisaka atshi. Wakasanganamu muana udila, yeye kumumvuila luse. Mîyama wakamuebeja ne: ‘Nkukebele mamu udi mua kukuamushila muana eu anyi?’ Pakitaba muana wa bakaji wa Palô ne: eyowa, Mîyama wakalua ne mamuende Yokebede. Muana wa bakaji wa Palô wakamuambila ne: ‘Angata muana eu, umungamushile, nenkufute.’
Pakakola muana au, Yokebede wakaya nende kudi muana wa bakaji wa Palô wakamuinyika ne: Mose, ne wakamukolesha bu muanende mulela. Mose wakakola bu muana wa mukalenge ne uvua upeta tshionso tshivuaye natshi dijinga. Kadi Mose kakapua Yehowa muoyo nansha kakese. Uvua mumanye ne: uvua bushuwa muena Isalele, kavua muena Ejipitu to. Wakasungula bua kuenzela Yehowa mudimu.
Pakakumbaja Mose bidimu 40, wakangata dipangadika dia kuambuluisha bana babu. Pakamona Mose muena Ejipitu mukuabu ukuma mupika muena Isalele, wakakuma muena Ejipitu au bikole, yeye kufua. Mose wakasokoka tshitalu tshiende mu lusenga. Pakamanya Palô bualu abu, wakakeba bua kushipa Mose. Kadi Mose wakadiela lubilu mu buloba bua Midiyana. Yehowa wakamutabalela kuntu aku.
“Bua ditabuja . . . Mose wakabenga bua kumubikilabu muana wa muana wa bakaji wa Palô, usungula bua kukengeshibua ne tshisamba tshia Nzambi.”—Ebelu 11:24, 25
Mona bikuabu:
TSHIBUMBA TSHIA NSENTEDI
Mose uvua nganyi?
Bena Kristo, bena Yuda, ba-mizilman, ne bantu bakuabu batu banemeka Mose bikole. Udiku mumumanye anyi?
