BITU bikuenza disanka paudi wenza bualu buudi musue anyi? Kudiku bikondo biutu ujinga bua muntu kakuambidi tshia kuenza anyi? Mpindieu, ngambila bulelela meji audi nawu.​—

Kadi buebe wewe, ntshinyi tshidi tshitambe buimpe? Mbimpe bua kuenza tshionso tshiudi musue bua kuenza anyi? Peshi malu adi atamba kulengela paudi utumikila tatuebe ne mamuebe anyi?​— Nzambi udi wamba ne: udi ne bua kutumikila baledi bebe, nunku kudi bualu buimpe budi bukulomba bua kubatumikila nanku. Tumonebi ni tudi mua kumvua bua tshinyi bidi bikengela kutumikila.

Udi bukole kayi wewe?​— Udi mumanye bidimu bia tatuebe anyi?​— Kadi bidimu bia mamuebe ne bia kakuebe mukaji peshi kakuebe mulume udi mubimanye anyi?​— Bakadi balale panu bidimu bia bungi menemene kukupita wewe. Padi muntu ulala bidimu bia bungi, udi ne dîba divule dia kumanya malu a bungi. Udi uteleja malu a bungi, umona malu a bungi ne wenza kabidi makuabu a bungi tshidimu tshionso etshi. Nunku bansonga badi mua kulongela anyi kumanyina malu kudi bantu bakulumpe.

Udiku mumanye muntu udi muana kuudi anyi?​— Udi mumanye malu a bungi kumupita anyi?​— Bua tshinyi wewe udi mumanye malu a bungi kumupita?​— Mbualu ukadi mulale matuku kumupita yeye. Udi mupete tshikondo tshile tshia kumanya malu a bungi kupita muntu udi muana kuudi.

 Nnganyi ukadi ne matuku a bungi mulala muboboke kukupita wewe, kumpita ne meme ne muntu mukuabu kayi yonso?​— Yehowa Nzambi. Mmumanye malu a bungi kukupita wewe, mmumanye kabidi a bungi kumpita ne meme muine. Padiye utuambila bua kuenza bualu ni bualu buonso, tudi ne bua kuikala bajadike ne: bualu abu mbualu buakane bua kuenza, nansha buobu mua kumueneka buikale bukole bua kubuenza. Udi mumanye ne: umue musangu biakakolela nansha Mulongeshi Munene eu bua kutumikila anyi?​—

Dimue dituku Nzambi wakalomba Yezu bua kuenzaye bualu bukuabu bukole menemene. Yezu wakasambila bua bualu abu, anu mutudi bamumone wenza mu tshimfuanyi etshi. Wakasambila ne: “Pawikala musue, ungumbushile dikopo edi.” Mu disambila nunku, Yezu wakaleja ne: kabivua misangu yonso bipepele bua kuenza disua dia Nzambi to. Kadi Yezu wakajikija disambila diende ne mêyi kayi? Udi mumanye anyi?​—

Yezu wakadijikija ne mêyi aa: “Kadi kabienzeki mundi musue meme, bienzeke anu muudi musue wewe.” (Luka 22:41, 42, MMM) Bushuwa, uvua musue bua disua dia Nzambi dienzeke, kadi ki ndiende yeye to. Wakaya kumpala ne kuenzaye tshivua Nzambi musue pamutu pa kuenza tshivuaye yeye wela meji ne: ke tshimpe menemene.

Ntshinyi tshitudi mua kulongela pa bualu ebu?​— Tudi tulonga ne: misangu yonso mbimpe kuenza tshidi Nzambi wamba, nansha biobi kabiyi mua kuikala bipepele bua kuenza. Kadi tudi tulonga bualu bukuabu. Udi mubumanye anyi?​— Tudi tulonga ne: Nzambi ne Yezu ki mmuntu umue to, bu mutu bamue bantu bamba. Yehowa Nzambi mmukulumpe ne mmumanye malu a bungi kupita Muanende Yezu.

Patudi tutumikila Nzambi, tudi tuleja ne: tudi bamunange. Bible udi wamba ne: ‘Edi ndinanga dia Nzambi, bua tuetu tutumikile mikenji yende.’ (1 Yone 5:3) Mpindieu si udi mumone ne: tuetu bonso tudi ne  bua kutumikila Nzambi. Udi pebe musue kumutumikila, ki mmuomu anyi?​—

Tubulule mu Bible bua tumone tshidi Nzambi wambila bana bua kuenzabu. Netubale tshidi Bible wamba mu Efeso nshapita 6, mvese wa 1, 2 ne 3. Udi wamba ne: ‘Bana, tumikilayi baledi benu mu Mukalenge; bua bualu ebu budi buakane. Unemeke tatu webe ne mamu webe (eu udi mukenji wa kumudilu udi ne mulayi), bua wewe wikale ne [diakalenga] ne wikale ne [matuku a bungi] pa buloba.’

Mpindieu si udi mumone ne: Yehowa Nzambi nkayende ke udi ukuambila bua kutumikila tatuebe ne mamuebe. ‘Kubanemeka’ kudi kumvuija tshinyi? Mmuomumue ne: udi ne bua kubangata ne mushinga. Nzambi udi ulaya ne: wewe utumikila baledi bebe, ‘newikale ne diakalenga.’

Teleja nkulondele bualu bua bantu bakuabu bakapanduka bualu bavua ne butumike. Bantu abu bavua ne muoyo kukadi kupite mpindieu bidimu bia bungi, bavua basombele mu musoko munene wa Yelushalema. Bantu ba bungi ba mu musoko au kabavua bateleja Nzambi to, nunku Yezu wakabadimuija e kubambila ne: Nzambi neabutule musoko wabu. Yezu wakabambila kabidi mushindu uvuabu mua kuepuka kabutu aku buobu bikale banange malu makane. Wakamba ne: ‘Panudi numona bena mvita banyunguluke musoko wa Yelushalema, numanye ne: dibutuka diawu dikadi disemene. Apu ke dîba dia kupatuka mu Yelushalema ne kunyemena mu mikuna.’​—Luka 21:20-22.

Nunku anu muvua Yezu muambe, basalayi bakalua kuluisha Yelushalema. Basalayi ba bena ditunga dia Lomo bakela musoko au munkatshi. Pashishe bakumbuka bua bualu budi kabuyi bumanyike. Bantu ba bungi bakela meji ne: njiwu ayi yakapita. Nunku bakashala mu musoko. Kadi Yezu uvua mubambile ne: bavua ne bua kuenza tshinyi?​— Wewe uvua mua kuenza tshinyi bu wewe muikale musombele mu Yelushalema dîba adi?​— Bavua bitabuja malu avua Yezu mubambile bakashiya nzubu yabu e kunyemenabu mu mikuna ya kule ne Yelushalema.

Tshidimu tshijima tshiakapita, bualu nansha bumue kabuvua buenzeke mu Yelushalema. Mu tshidimu tshibidi, bualu nansha bumue  kabuvua buenzeke. Mu tshidimu tshisatu kabidi, kakuvua bualu. Bantu bakuabu bavua mua kuikala bele meji ne: bantu bavua bashiye nzubu yabu nunku eu bavua batshimbakane. Kadi mu tshidimu tshinayi, basalayi ba bena Lomo bakapingana. Bakajingila kabidi musoko wa Yelushalema. Mpindieu mushindu wa kunyema kauvuaku kabidi to. Musangu au basalayi bakabutula musoko. Bantu ba bungi bavuamu bakafua ne bakuabu bakaya nabu mu bupika.

Kadi ntshinyi tshiakafikila aba bavua batumikile tshivua Yezu mubambile?​— Bakapanduka. Bavua muaba mule ne Yelushalema. Ke bua tshinyi kabakapeta njiwu to. Ditumikila diakabakuba.

Wewe muikale ne butumike, nebukukube pebe anyi?​— Baledi bebe badi mua kukuambila ne: kunayidi mu njila to. Bua tshinyi badi bamba nanku?​— Bualu badi mua kukudiata ku mashinyi. Kadi dimue dituku udi mua kudiambila ne: ‘Kakuena mashinyi mu njila mpindieu to.  Kabakundiata to. Bana bakuabu si batu banayila mu njila, tshitu muanji kumona babadiate to.’

Ke muvua bantu ba bungi ba mu Yelushalema bela meji nanku. Pakumbuka basalayi ba bena Lomo, kuakamueneka bu kudi ditalala. Bakuabu bavua bashale basombe mu musoko. Nunku buobu pabu kushalabu. Bavua babadimuije, kadi kabavua bateleje to. Ndekelu wa bionso bakafua.

Tuangatayi tshilejilu tshikuabu. Ukadiku mutete kunaya ne tutshi tua alimeta anyi?​— Bidi mua kumueneka bu dinaya dimpe dia kutapa katshi ka alimeta ne kunaya ne kapia padiku katema. Kadi kunaya ne alimeta kudi mua kukeba njiwu. Nzubu mujima udi mua kuoshika ne wewe kufua!

Vuluka ne: kutumikila anu imue misangu ne kubenga kutumikila mikuabu ki nkukumbane to. Kadi wewe utumikila misangu yonso, nebikukube bulelela. Nganyi udi ukuambila ne: “Bana, tumikilayi baledi benu”?​— Nzambi. Kupu muoyo bua ne: udi wamba nanku bualu mmukunange.