Dibaka ditu dienza dîku dipiadipia. Nunku, newikale misangu yonso munange baledi bebe ne ubanemeka, muena dibaka nebe ke udi mpindieu muntu udi ne mushinga wa bungi kuudi kupita bantu bonso ba pa buloba. Bidi mua kukolela bamue balela bebe bua kuitababu bualu ebu. Kadi mêyi a mu Bible adi mua kukuambuluisha bua kuikala ne nkatshinkatshi, mu mushindu wa ne: ulame ditalala ne balela bebe bu muudi uditatshisha bua kukolesha malanda a mu dîku diebe dipiadipia.

TSHIDI BIBLE WAMBA: “Nemeka tatu webe ne mamu webe.” (Efeso 6:2) Nansha wewe ne bidimu bungi kayi, udi mulombibue misangu yonso bua kunemeka baledi bebe. Umanye ne: muena dibaka nebe pende mulombibue bua kutabalela baledi bende. “Dinanga kadiena ne mukawu,” nunku kumvu bibi bua malanda adi nawu muena dibaka nebe ne bena mu dîku diabu to.—1 Kolinto 13:4; Galatiya 5:26.

TSHIUDI MUA KUENZA:

• Epuka mêyi mashile bu mudi: “bena mu dîku dienu batu misangu yonso bampuekesha milongo” anyi ne: “mamuebe katu musue bualu buonso bundi meme ngenza to”

• Keba bua kumona malu mu mushindu udi muena dibaka nebe uamona

TSHIDI BIBLE WAMBA: ‘Bua bualu ebu mulume neashiye tatuende ne mamuende, nealamate mukaji wende; bubidi buabu nebikale mubidi umue.’ (Genese 2:24) Paudi ubuela mu dibaka, baledi bebe badi mua kuela meji ne: utshidi anu ku bukokeshi buabu, badi mua kujinga bua kudibueja mu malu a mu dibaka diebe mudibi kabiyi bikengela to.

Nudi mua kumvuangana ne muena dibaka nebe bua mikalu inudi mua kubelela, pashishe nubalejayi ne dinanga dionso. Uyukile nabu malu onso patoke kuyi udileja muena malu makole to. (Nsumuinu 15:1) Didipuekesha, bupole ne lutulu nebikuambuluishe bua kuikala mu malanda mimpe ne balela bebe ne kutungunuka ne ‘kulekelelangana bilema mu dinanga.’—Efeso 4:2.

TSHIUDI MUA KUENZA:

• Wewe ne lutatu lua mudi balela bebe badibueja bikole mu malu ebe, uyukile ne muena dibaka nebe panudi bonso ne meji matalale

• Numvuangane bonso bua munudi mua kupita ne tshilumbu atshi