UDI ubuela mu Nzubu wenu wa Bukalenge, ne kuena umanya kabidi muaba au to. Utu misangu yonso udiumvua bua nzubu eu. Udi mua kuikala utshidi uvuluka amue malu mimpe a tshikondo tshiuvua muambuluishe bua kumuibaka kukadi kupita ndambu wa bidimu. Kadi mu mushindu kampanda, udi udiumvua mpindieu bikole, bualu mbavuije Nzubu wa Bukalenge eu muaba wa diambuluishila bantu bua tshitupa tshîpi. Panyima pa tshipepele tshikole tshia mvula tshivua tshipasalaje mâyi ne tshinyangakaje bintu muaba uudi musombele mu matuku mashale emu, Komite wa filiale wakalongolola malu lukasa lukasa bua bantu bavua tshipupu tshikuate bapete biakudia, bilamba, mâyi mimpe, ne diambuluisha dikuabu. Mapa adibu bafila bua kuambuluishangana nawu mmateka bimpe mu bulongame. Bana betu ba balume ne ba bakaji badi babuela, bangata bidibu nabi dijinga, ne misangu ya bungi, bakupula binsonji bia disanka ku mêsu abu.

Yezu wakamba ne: tshimanyinu tshinene tshia bantu bende tshivua ne bua kuikala tshia kunangangana. (Yone 13:34, 35) Mu tshitupa etshi netukonkonone mudi dinanga dia bena Kristo dimuenekela mu midimu ya luibaku ne midimu ya diambuluishangana idi Bantemu ba Yehowa benza. Dinanga dia nunku didi tshijadiki tshia bukole tshidi tshileja ne: tudi ku bukokeshi bua Bukalenge bua Yezu.