Dilongesha dia 13

Mmunyi muwatandula tshitendelelu tshilelela?

Bitendelelu bionso bidi bisankisha Nzambi, anyi peshi kudi anu tshimue? (1)

Bua tshinyi kudi bitendelelu bivule nunku bìdì bidiamba mudibi bia Buena-nkristo? (2)

Mmunyi muudi mua kujingulula bena nkristo balelela? (3-7)

1. Yezu wakatuadija ne tshitendelelu tshimue tshia Buena-nkristo. Nunku lelu’eu kudi ne tshia kuikala anu tshisaka tshimue, peshi tshisumbu tshimue, tshia batendeledi balelela ba Yehowa Nzambi. (Yone 4:23, 24; Efeso 4:4, 5) Bible udi ulongesha ne: anu bantu bakese ke badi mu njila mubumbakane wa muoyo.​—Matayo 7:13, 14.

2. Bible ukavua mumane kuamba se: panyima pa lufu lua bapostolo, malongesha a dishima ne ngenzelu ikena ya Buena-nkristo bivua ne bua kubuela ku kakese ku kakese mu tshisumbu tshia bena nkristo. Bantu bavua ne bua kukoka bena kuitabuja bua babalonde buobu pamutu pa Kristo. (Matayo 7:15, 21-23; Bienzedi 20:29, 30) Ke bua tshinyi tudi tumona bitendelelu bìdì bidiamba mudibi bia Buena-nkristo bikale bivule nunku. Mmunyi mutudi mua kujingulula bena nkristo balelela?

3. Tshimanyinu tshitambe bunene tshia bena nkristo balelela tshidi se: badi ne dinanga dilelela munkatshi muabu. (Yone 13:34, 35) Kabena babalongesha bua kuela meji ne: mbapite bantu ba dikoba dikuabu peshi mubidi wa mushindu mukuabu. Ne kabidi kabena babalongesha bua kukina bantu bena matunga makuabu. (Bienzedi 10:34, 35) Nunku kabatu babuelakana mu mvita. Bena nkristo balelela badi bangatangana umue ne mukuabu bu bana ba muntu.​—1 Yone 4:20, 21.

4. Tshikuabu tshimanyinu tshia tshitendelelu tshilelela tshidi se: benamu badi ne kanemu kondoke bua Bible. Badi bamuanyisha bu Dîyi dia Nzambi ne badi bitabuja tshidiye wamba. (Yone 17:17; 2 Timote 3:16, 17) Badi bangata Dîyi dia Nzambi ne mushinga mukole kupita ngenyi peshi bilele bia bantu. (Matayo 15:1-3, 7-9)  Badi badienzeja bua kulonda Bible mu nsombelu wabu wa dituku dionso. Nunku kabena balongesha tshimue tshintu ne pashishe benza tshikuabu.​—Tito 1:15, 16.

5. Tshitendelelu tshilelela tshidi kabidi ne bua kunemeka dîna dia Nzambi. (Matayo 6:9) Yezu wakamanyisha dîna dia Nzambi, Yehowa, kudi bakuabu. Bena nkristo balelela badi ne bua kuenza bia muomumue. (Yone 17:6, 26; Lomo 10:13, 14) Mbanganyi mu tshinsanga tshienu batu bambila bakuabu pa bidi bitangila dîna dia Nzambi?

6. Bena nkristo balelela badi ne bua kuyisha pa bidi bitangila Bukalenge bua Nzambi. Ke muakenza Yezu. Uvua amu wakula pa bidi bitangila Bukalenge ebu. (Luka 8:1) Wakatumina bayidi bende dîyi bua kuyisha mukenji umue umu’au pa buloba bujima. (Matayo 24:14; 28:19, 20) Bena nkristo balelela badi bitabuja ne: amu Bukalenge bua Nzambi ke buafila ditalala ne dikubibua bilelela pa buloba ebu.​—Musambu wa 146:3-5.

7. Bayidi ba Yezu kabena ne bua kuikala bena mu bulongolodi bubi ebu to. (Yone 17:16) Kabena babuelakana mu malu a tshididi a mu bulongolodi ebu ne mu milandu ya mu tshinsanga. Badi bepuka nsombelu, ngenzelu, ne mmuenenu mibi bìdì bitangalakangane mu bulongolodi ebu. (Yakobo 1:27; 4:4) Udiku mua kujingulula tshisumbu tshia malu a Nzambi mu tshinsanga tshienu tshidi ne bimanyinu ebi bia Buena-nkristo bulelela anyi?

[Bimfuanyi mu mabeji 26, 27]

Bena nkristo balelela badi banangangana umue ne mukuabu, banemeka Bible, ne bayisha pa bidi bitangila Bukalenge bua Nzambi