1-3. (a) Nkuepi kudi buenzeji bua tshinyangu budi buteka dîku mu njiwu bufumina? (b) Mmuenenu kayi wa nkatshinkatshi udi baledi bakengela mu kukuba kua dîku diabu?

 UKADI pa kutuma muanebe mukese wa balume mu kalasa, ne mvula udi uloka. Ntshinyi tshiudi wenza mu nsombelu eu? Udi umulekela udiela pambelu kayi tshia kudikuba natshi ku mvula anyi? Peshi udi umuvuadika bilamba bivule bia dimukuba nabi bidi mua kumupangisha kuenda bimpe anyi? Bushuwa, kuakuenza malu aa abidi to. Udi umupesha anu tshidiye ukengela bua kabodi mvula.

² Bia muomumue, baledi badi ne bua kukeba mushindu muakanyine wa kukuba dîku diabu ku buenzeji bua tshinyangu budi budituta bufumine ku mpokolo mivule​—kumpanyi ya bia kujikija nabi lutetuku, tudiomba ne bikandakanda, binabu, ne tulasa mene imue misangu. Bamue baledi badi benza bikese anyi kabena benza tshintu nansha tshimue bua kukuba dîku diabu. Bakuabu, bamona buenzeji kana buonso bua pambelu pa dîku bu bubi, badi bafimpakaja bana bikole ne bine aba badi bafika ku diumvua bu badi ne tshipuidiji. Kudiku mua kuikala ngenzelu mutshintshikila anyi?

³ Eyowa, udiku. Kuikala munekeshi kakuena kupatula bipeta ne kudi mua kuvudija njiwu. (Muambi 7:16, 17) Kadi mmushindu kayi udi baledi bena nkristo bapeta butshintshikidi buakane mu dikuba dîku diabu? Konkonona bintu ebi bisatu: malonga, malunda, ne didiolola.

4. Mmunyi mudi baledi bena nkristo ne bua kuangata malonga?

⁴ Baledi bena nkristo badi bangata malonga ne mushinga mukole. Badi bamanye ne: kalasa kadi kambuluisha bana bua kubala, kufunda, ne kuyukidilangana, pamue ne  kujikija ntatu. Kalasa kadi ne bua kubalongesha kabidi mushindu wa kulonga. Dimanya didi bana bapeta mu tulasa didi mua kubambuluisha bua kulubuluka nansha mudiku ntatu ya mu bulongolodi bua lelu’eu. Kusakidila apu, dimanya mukanda bimpe didi mua kubambuluisha bua kuenza mudimu mulenga.​—Nsumuinu 22:29.

5, 6. Mmunyi mudi bana mua kuanyikibua ku mamanyisha makonyangale pa bidi bitangila bitupa bia lulelu mu tulasa?

⁵ Nansha nanku, kalasa kadi kabidi kasangisha bana pamue ne bana bakuabu​—bavule ba kudibu bikale ne mmuenenu mikonyangale. Tshilejilu, tangila mmuenenu yabu pa bitupa bia lulelu ne malu a tshitembu. Mu tulasa tua bikadilu mu Nigeria, nsongakaji ngenda-masandi uvua ne tshibidilu tshia kubela balongi nende pa bidi bitangila ditumika ne bitupa bia lulelu. Bavua bamuteleja ne lubatshi, nansha muvua ngenyi yende miûle ne malu mapumbakane avuaye usangana mu mikanda idi ileja bantu butaka. Bamue bansongakaji bakatumikila mibelu yende. Bu tshipeta, nsongakaji umue wakimita kayi ku dibaka ne kufuaye pa ditula difu.

 ⁶ Bia dibungama bua kubiakula, amue a ku mamanyisha mabi pa bitupa bia lulelu mu tulasa adi afuma, ki nkudi bana, kadi nkudi balongeshi. Baledi bavule badi ne buôwa padi bilongelu bilongesha bana pa bidi bitangila bitupa bia lulelu eku kabiyi bifila mamanyisha pa mêyi-makulu a tshitembu ne majitu adi masuikakajaku. Mamuende wa nsongakaji kampanda wa bidimu 12 wakamba ne: “Tudi muaba udi bantu batambe kunanga malu a Nzambi, balame malu a kale, pabi anu mu tulasa tua bikadilu tua muaba eu, badi bapesha bana tundundu tua kapote!” Yeye ne bayende bakasumpakana bikole pakamanyabu ne: bana ba balume ba bidimu bimue ne bia muanabu wa bakaji bavua bamuebeja bua kumuangatabu bu mukajabu. Mmunyi mudi baledi mua kukuba dîku diabu ku buenzeji bubi bua mushindu’eu?

7. Mmushindu kayi utudi mua kukanda bimpe mamanyisha mabi pa bitupa bia lulelu?

⁷ Mbitambe bulenga bua kuepula bana ku ditela kayi dionso dia malu a bitupa bia lulelu anyi? Tòo. Mbitambe buimpe kulongesha bana bebe pa bidi bitangila bitupa bia lulelu wewe nkayebe. (Nsumuinu 5:1) Bushuwa, mu bimue bitupa bia ku Mputu ne bia ku Amerike wa ku Nord, baledi bavule badi babutshika tshiena-bualu etshi. Bia muomumue, mu amue matunga a mu Afrike, baledi batu bayukila mu mpukapuka ne bana babu pa bitupa bia lulelu. “Kabitu nanku to mu nshidimukilu wetu,” ke mudi tatu kampanda wamba mu Sierra Leone. Bamue baledi badi bela meji ne: kulongesha bana pa bidi bitangila bitupa bia lulelu nkubapesha ngenyi yabafikisha ku tshiendenda! Kadi mmuenenu wa Nzambi udi tshinyi?

8, 9. Mmamanyisha kayi malenga pa bidi bitangila bitupa bia lulelu adi asanganyibua mu Bible?

⁸ Bible udi uleja patoke ne: ki mbia bundu bua kuyukila pa bitupa bia lulelu mu mushindu muakanyine. Mu Izalele, bavua bambile bena tshisamba tshia Nzambi bua kudisangisha pamue, kukongoloja ne “bana bakese,” bua kuteleja dibala ne dîyi dikole dia Mikenji ya Mozese. (Dutelonome 31:10-12; Yoshua 8:35)  Mikenji ivua itela bushuwa malu mavule a bitupa bia lulelu, pamue ne diya ku mashi, dipatuka dia mâyi a bulume, masandi a bajike, a babake, diangatangana dia balume ne balume ne bakaji ne bakaji, diangatangana dia bena dîku dimue, ne diangatangana ne nyama. (Lewitiki 15:16, 19; 18:6, 22, 23; Dutelonome 22:22) Kunyima kua dibala dia mushindu’eu baledi bavua ne bua kumvuija bana babu bavua ne nkonko malu mavule.

⁹ Kudi mifundu mu nshapita muitanu, muisambombo, ne wa muanda mutekete ya mu Nsumuinu idi ifila mibelu ya buledi ne ya dinanga pa njiwu ya tshiendenda tshia masandi. Mvese eyi idi ileja ne: tshiendenda tshidi mua kumueneka tshimpe imue misangu. (Nsumuinu 5:3; 6:24, 25; 7:14-21) Kadi idi ilongesha ne: tshiendenda ntshibi ne tshidi tshituala bipeta bia njiwu, ne idi ifila buludiki pa mushindu wa kuambuluisha bansonga bua kuepuka njila ya tshiendenda. (Nsumuinu 5:1-14, 21-23; 6:27-35; 7:22-27) Kabidi, tshiendenda ntshileja tshishilangane ne disankishibua didi difuma ku diangatangana mu nsombelu mukumbanyine, munda mua dibaka. (Nsumuinu 5:15-20) Ntshitembelu kayipu bulenga tshia ndongeshilu tshidi baledi mua kulonda!

10. Bua tshinyi dipesha bana dimanya dia Nzambi pa bidi bitangila bitupa bia lulelu kadiena dibafikisha ku tshiendenda?

¹⁰ Ndongeshilu wa mushindu’eu udiku ufikisha bana ku dienza buenzavi anyi? Bishilangane, Bible udi ulongesha ne: ‘Bantu bakane nebapandishibue ku lungenyi.’ (Nsumuinu 11:9) Kuenaku musue bua kusungila bana bebe ku buenzeji bua bulongolodi ebu anyi? Tatu kampanda wakamba ne: “Biangatshile patshivua bana bapuekele bikole, tuvua tuteta bua kubambila bulelela menemene pa bidi bitangila bitupa bia lulelu. Mu mushindu’eu, padibu bumvua bakuabu bana bakula pa bitupa bia lulelu, kabena bajinga kumanya. Ki mbualu busokoka to.”

11. Mmunyi mudi bana mua kulongeshibua ku kakese kakese pa bidi bitangila malu a nsombelu wa muntu pa nkayende?

¹¹ Bu muvuabi bileja mu nshapita ya kumpala, dikela pa bitupa bia lulelu didi ne bua kutuadija kumpala kua dîba.  Paudi ulongesha bana bua kutela bitupa bia mubidi, kutupiki bitupa bia lulelu bu bidi mu mushindu kampanda bia bundu. Ubalongeshe mêna makane abi. Padi matuku enda apita, malongesha pa bidi bitangila nsombelu wa muntu nkayende ne imue mikalu adi ne mushinga. Mbitambe bulenga bua baledi bonso babidi balongeshe bana babu bua se: bitupa ebi bia mubidi bidi bia pa buabi, kabiena pa tshibidilu ne bua kulengibua kudi bakuabu anyi kulejibua kudi bakuabu, ne kabiena nansha musangu umue ne bua kuikala tshiena-bualu tshia diyukidilangana mu mushindu mubi. Padi bana benda bakola, badi ne bua kumanya mushindu udi muntu mulume ne mukaji bafika pamue ku dipeta muana. Mu tshikondo tshidi mibidi yabu buobu bine ituadija kubuela mu bunsonga, badi ne bua kuikala bamane kumanya bimpe mashintuluka adi mubidi wenza. Bu muvuabi biamba mu Nshapita 5, dikela edi didi kabidi mua kuambuluisha bua kukuba bana ku dibambidikibua bua masandi.​—Nsumuinu 2:10-14.

12. Mmuenenu kayi mikonyangale itu ilongeshibua misangu mivule mu tulasa?

¹² Baledi badi bakengela kuikala badiakaje bua kujikila ngenyi ya dishima idi mua kulongeshibua mu tulasa​—nkindi ya bulongolodi ebu bu mudi didimenena dia bintu, buena muabu bunekesha, peshi lungenyi lua se: kakuena malelela a tshishiki. (1 Kolinto 3:19; fuanyikija ne Genese 1:27; Lewitiki 26:1; Yone 4:24; 17:17.) Banene ba tulasa bavule bena muoyo muimpe badi batua malonga mabandile mushinga munekesha. Nansha mudi tshilumbu tshia malonga a pa mutu tshikale disungula dia muntu nkayende, bamue balongeshi badi bamba ne: adi njila umuepele bua dilubuluka kayi dionso dia muntu. a​—Musambu wa 146:3-6.

13. Mmunyi mudi bana badi baya mu tulasa mua kukubibua ku ngenyi mibi?

 ¹³ Bua baledi kujikilabu malongesha mabi ne ngenyi mikonyangale, badi ne bua kumanya bimpe dishidimuna didi bana babu bapeta. Nunku baledi, vulukayi ne: nudi penu ne mudimu kumbelu! Lejayi ntema ne muoyo mujima bua malonga a bana benu. Nuyukile nabu kunyima kua bamane kupatuka mu tulasa. Nubebeje bidibu balonge, bidibu basue bikole, ne bidibu bamona bibakolele. Nutangile midimu ya kumbelu mibapa mu tulasa, bidibu bafunde, ne bipeta bia mateta. Nutete bua kumanya balongeshi babu. Numanyishe balongeshi ne: nudi nuanyisha mudimu wabu ne nudi basue bua kufila diambuluisha mu mushindu kayi onso bilondeshile makokeshi enu.

14. Bua tshinyi mbia mushinga bua se: bana bena Nzambi basungule bimpe balunda babu?

¹⁴ “Nkuepi kuuvua mumanyine bine abi?” Mbaledi bungi munyi bakadi bele lukonko elu, bikale ne buôwa bua bualu budi muanabu muambe anyi muenze ne budi bumueneka bushilangane menemene? Ne mmisangu bungi kayi itu diandamuna ditela mulunda kampanda mupiamupia wa mu tulasa anyi wa ku bena mutumba? Eyowa, banyanetu batu ne buenzeji buondoke kutudi, nansha bituikala bansonga anyi bakulumpe. Mupostolo Paulo wakadimuija ne: “Kanudingibu. Malunda mabi adi anyanga bikadilu bimpe.” (1 Kolinto 15:33, NW; Nsumuinu 13:20) Bansonga mu mushindu wa pa buawu mbena butekete badi mua kupambuishibua ku buenzeji bua binabu. Kabatu pa tshibidilu bajadike tshia kuenza ne bimue bikondo badi mua kudiumvua bakokeshibue kudi dijinga dia kusankisha ne kukemesha balundu babu. Nunku mmunyipu mudibi bia mushinga bua kusungulabu balunda bimpe!

15. Mmunyi mudi baledi mua kulombola bana babu mu disungula balunda?

¹⁵ Anu bu mudi muledi yonso mumanye, bana kabakuenza misangu yonso disungula dimpe; badi bakengela buludiki kampanda. Kabiena bikengela kubasunguila  balunda. Kadi, padibu benda bakola, ubalongeshe busunguluji ne ubambuluishe bua kutandula ngikadilu idibu ne bua kuangata ne mushinga kudi balunda. Ngikadilu wa mushinga mukole ndinanga dia Yehowa ne dia kuenza tshidi tshilulame ku mêsu kuende. (Mâko 12:28-30) Ubalongeshe bua kunanga ne kunemeka aba badi ne bululame, bulenga, kalolo, ne tshisumi. Mu dilonga dia mu dîku, wambuluishe bana bua kusungulujabu ngikadilu eyi kudi bantu batela mu Bible ne pashishe kukeba bikadilu bimue bimue ebi kudi bakuabu mu tshisumbu. Ufile tshilejilu pa kutumika ne malu amue amue aa mu disungula balunda bebe wewe muine.

16. Mmunyi mudi baledi mua kukontolola disungula balunda dia bana babu?

¹⁶ Udiku mumanye aba badi balunda ba bana bebe anyi? Bua tshinyi kubenga kuambila bana bebe bua balue nabu kumbelu bua ufike ku dibamanya bimpe? Udi kabidi mua kuebeja bana bebe tshitu meji a bakuabu bana pa balunda aba. Mbamanyike bu batu baleja muoyo mutoke buobu bine peshi mbu bena nsombelu wa mpala ibidi anyi? Bikalabu bamanyike bu bena mpala ibidi, ambuluisha bana bebe bua kuelabu meji ne kumona bua tshinyi ditantshilangana dia nunku didi mua kubenzela bibi. (Musambu wa 26:4, 5, 9-12) Biwamona mashintuluka akena mimpe mu bienzedi bia muanebe, mvuadilu, mmuenekelu, anyi ngakuilu wende, bidi mua kukengela bua wewe kuyukila nende pa bidi bitangila balunda bende ba balume anyi ba bakaji. Muanebe udi mua kuikala upitshisha dîba ne mulunda udi ne buenzeji bubi kudiye.​—Fuanyikija ne Genese 34:1, 2.

17, 18. Kusakidila ku didimuija bua malunda mabi, ndiambuluisha kayi dikuatshishi didi baledi mua kufila?

¹⁷ Kadi ki mbikumbane bua kulongesha bana bebe patupu bua kuepuka balunda babi. Ubambuluishe bua kupeta balunda bimpe. Tatu umue udi wamba ne: “Misangu yonso tuvua tuteta kupingaja tshintu tshimue pa muaba wa tshikuabu. Nunku pakakeba tshilongelu tshia muanetu wa balume bua yeye kubuela mu tshisumbu tshia banayi ba ndundu, mukajanyi ne meme tuakasomba nende panshi ne  kuyukidilangana bua kumuleja bua tshinyi bualu abu kabuvua buimpe​—bua balunda bapiabapia bavuaye mua kupetangana nabu. Kadi pashishe tuakafila lungenyi lua kupetangana ne bamue bana ba mu tshisumbu ne kuya nabu mu lupangu bua kunaya ndundu. Ne ngenzelu eu wakamana bualu.”

¹⁸ Baledi bena meji badi bambuluisha bana babu bua kupetabu balunda bimpe ne pashishe bua kubabidilabu didiolola dilenga nabu. Nansha nanku, bua baledi bavule, tshilumbu etshi tshia didiolola tshidi ne yatshi ntatu.

19. Mbilejilu kayi bia mu Bible bidi bileja ne: kabiena mpekatu bua mêku kuzabawu?

¹⁹ Bible udi ubenga diela bilele anyi? Nansha kakese! Bible udi wamba ne: kudi “tshikondo tshia kuseka . . . ne tshikondo tshia kuja maja.” b (Muambi 3:4) Bantu ba Nzambi mu Izalele wa kale bavua bapetela masanka ku mijiki ne dija maja, manaya, ne tusumu tua dijandula nshinga. Yezu Kristo wakaya mu difesto dinene dia dibaka ne mu “difesto dinene dia disekelela” diakenza Matayo Lewi buende yeye. (Luka 5:29, NW; Yone 2:1, 2) Anu bu mudibi bimueneke patoke, Yezu kavua munyangi wa milowo ya bakuabu. Kuseka ne kuela bilele kabiangatshibu bu mpekatu kumbelu kuebe nansha kakese!

20. Ntshinyi tshidi baledi ne bua kulama mu lungenyi padibu baditua mu didiolola ne dîku?

²⁰ Yehowa udi “Nzambi wa disanka.” (1 Timote 1:11, NW) Nunku ntendelelu wa Yehowa udi ne bua kuikala mpokolo wa milowo, ki mbualu budi bupangisha disanka mu nsombelu. (Fuanyikija ne Dutelonome 16:15.) Pa tshibidilu bana batu ne disalu ne bapate ne bukole budibu mua kupatula mu manaya ne didiolola. Didiolola disungula bimpe kadiena anu bua kusekesha. Mmushindu wa muana kulongela malu ne kupia. Mfumu wa dîku udi ne bujitu bua kupetesha dîku diende bididi dikengela mu malu onso, kusakidila ne didiolola. Nansha nanku, mbilombibue kuikala ne nkatshinkatshi.

21. Mmateyi kayi adi mu didiolola lelu’eu?

²¹ Mu ‘matuku a nshikidilu’ aa masaluke, nsangilu wa bantu mmuule ne ‘banangi ba masanka, kabayi banangi ba Nzambi,’ anu bu muvua Bible mubilaye. (2 Timote 3:1-5) Bua bavule, didiolola ke tshintu tshia kumpala mu nsombelu. Kudi bia dijikija nabi lutetuku bipite bungi bidi bipepele mua kuangata muaba wa malu a mushinga.  Kabidi, malu a tshiendenda, a tshikisu, a dinua bintu bia lulengu, ne ngenzelu mikuabu mibiamibi ke bidi bisanganyibua mu bia dijikija nabi lutetuku bivule lelu. (Nsumuinu 3:31) Ntshinyi tshidi mua kuenjibua bua kukuba bana ku didiolola dibi?

22. Mmunyi mudi baledi mua kushidimuna bana babu bua kuangatabu mapangadika a meji pa bidi bitangila dijikija lutetuku?

²² Baledi badi bakengela bua kuteka mikalu ne mikandu. Kadi kupita apu, bidi bikengela balongeshe bana babu mua kusunguluja didiolola dibi ne kumanya bualabale bua didiolola budi bupite tshipimu. Dishidimuna edi didi dikulomba dîba ne madikolela. Tangila tshilejilu kampanda. Tatu kansanga muena bana babidi wakamona ne: muanende wa balume mubandile uvua uteleja kadiomba kapiakapia pa tshibidilu. Dimue dituku pavuaye wendesha  kaminyo kende mutangile ku mudimu, tatu eu wakakangula kine kadiomba aku. Imue misangu uvua wimana ne ufunda mêyi a imue misambu. Kunyima wakasomba ne bana bende ne kuyukila nabu pa tshivuaye muteleje. Wakebeja mmuenenu wabu, utuadija ne: “Nudi nuela meji munyi?” ne kutelejaye mandamuna abu ne lutulu. Kunyima kua diela meji pa bualu ebu ne ditumika ne Bible, bana ba balume bakitaba bua kubenga kuteleja kadiomba aku.

23. Mmunyi mudi baledi mua kukuba bana babu ku bia dijikija nabi lutetuku bikena biakane?

²³ Baledi bena nkristo badi ne meji batu bakontolola mijiki, programe ya televizion, tusete tua video, mikanda ya bimfuanyi bizola, manaya a ku video, ne filme bidi bikoka ntema ya bana babu. Badi batangila bimfuanyi bia pa tshizubu, mêyi a misambu, ne tshizubu tshine, ne badi babala diumvuija dia misambu ne filme difunda mu bikandakanda ne babandila bitupa biayi. Bavule badi banyingalala padibu bamona bimue bintu “bia dijikija nabi lutetuku” bienzela bana lelu’eu. Aba badi basue kukuba bana babu ku buenzeji bubi badi basomba ne mêku abu ne bayukidilangana pa njiwu, pa kutumika ne Bible ne mikanda miashila pa Bible, bu mudi mukanda wa Les jeunes s’interrogent​—Réponses pratiques ne biena-bualu bia mu bibejibeji bia Tshibumba tshia Nsentedi ne Réveillez-vous! c Padi baledi bateka mikalu mishindika, ikena ishintuluka ne mitshintshikila, pa tshibidilu batu bamona bipeta bimpe.​—Matayo 5:37; Filipoi 4:5.

24, 25. Ngimue mishindu kayi milenga ya didiolola idi mêku mua kubabidila pamue?

²⁴ Bushuwa, dikandika mishindu mibi ya didiolola ntshitupa tshimuepele tshia diluangana. Didiolola dimpe didi ne bua kupingana pa muaba wa dibi, tshianana bana badi mua kuditua mu njila mubi. Mêku mavule a bena nkristo adi ne bivulukidi kabiyi kubala bia musangelu ne disanka bia dibabidila didiolola pamue​—diya kuloba, kuendakana lua makasa, diya kutula pa muaba bua kudia pamue, dizaba manaya ne dibidija mubidi, dienza ngendu bua kukumbula  balela anyi balunda. Bamue mbamone ne: kubala patupu ne dîyi dikole pamue bua kudiolola kudi mpokolo wa milowo ne disankishibua. Bakuabu batu balondelangana nsumuinu ne malu a bilele. Bakuabu kabidi batu benza tudimudimu pamue, tshilejilu, disonga mitshi ne tukuabu tudimu tua bianza, kabidi ne dimba biombelu bia mijiki, dizola, peshi dibandila bifukibua bia Nzambi. Bana badi bamanya kubabidila didiolola dia mushindu’eu badi bakubibua ku bia dijikija nabi lutetuku bivule bikena bikezuke, ne badi bamanya se: kudi mushindu wa kudiolola mupite kusomba patupu ne kubandila kuyi wenza bualu. Kubuela mu dizaba kudi ne milowo kupita kubandila patupu.

²⁵ Masangisha bua kupitshisha dîba pamue adi mua kuikala kabidi mushindu wa didiolola udi ne dikuatshisha. Padiwu malombola bimpe ne kaayi manene manekesha anyi kaayi adia dîba divule, adi mua kupetesha bana bebe bivule kupita dinaya nkayadi. Adi mua kuambuluisha bua kukolesha bisuikidi bia dinanga mu tshisumbu.​—Fuanyikija ne Luka 14:13, 14; Yuda 12.

26. Pa bidi bitangila dikuba dîku ku buenzeji bukena bulenga, nngikadilu kayi udi mutambe mushinga?

²⁶ Kabiyi mpata, kukuba dîku diebe ku buenzeji bua tshinyangu bua bulongolodi ebu kudi kulomba mudimu mukole. Kadi kudi tshintu tshimue tshiakumbaja tshipatshila etshi, kupita bikuabu bionso. Ndinanga! Malanda masheme mu dîku ne a dinanga neavuije dîku diebe tshisokomenu tshikena njiwu ne nealubuluje diyukidilangana, didi ne bukubi bunene ku buenzeji bubi. Kabidi, kudima dinanga dia mushindu mukuabu kudi mene kutambe mushinga​—dinanga bua Yehowa. Padiku dinanga dia mushindu’eu mu dîku, bana badi nangananga pamu’apa bakola ne dikina lungenyi mene lua kubungamija Nzambi pa kupona mu buenzeji bua bulongolodi ebu. Ne baledi badi banange Yehowa mu mutshima nebakebe kuidikija bumuntu buende bua dinanga, ditshintshikila,  ne nkatshinkatshi. (Efeso 5:1; Yakobo 3:17) Bikala baledi benza nanku, bana babu kabakuikala ne kabingila ka kumona ntendelelu wa Yehowa anu bu mulongo wa malu adi kaayi manyishibue kuenza peshi bu nsombelu ukena ne mazaba anyi tuseku, udibu basue kunyema ne lukasa luonso. Bishilangane, nebamone ne: kutendelela Nzambi ke nsombelu wa disanka ne wa disankishibua divule kupita nsombelu yonso mukuabu.

27. Mmunyi mudi dîku mua kutshimuna bulongolodi ebu?

²⁷ Mêku adi ashala masuikakane mu disadila Nzambi ne disanka ne mmuenenu wa nkatshinkatshi, enza madikolela ne mutshima mujima bua kushala ‘kaayi katoba, kaayi kadiwu’ bia ku buenzeji buoneshi bua mu bulongolodi ebu, adi mpokolo wa disanka kudi Yehowa. (2 Petelo 3:14; Nsumuinu 27:11) Mêku a nunku adi alonda mu makasa a Yezu Kristo, wakakandamena madikolela onso a bulongolodi bua Satana bua kumunyanga. Pabuipi ne ku ndekelu wa nsombelu wende pa buloba, Yezu uvua mua kuamba ne: “Ngatshimunyi bena mu bulongolodi ebu.” (Yone 16:33, NW) Dîku diebe didiku padi mua kutshimuna bulongolodi ebu ne kupeta muoyo wa kashidi!