Nshapita wa 72

Yezu udi utuma bayidi 70 mu buambi

BIDI mpindieu muvu wa bimuma wa 32 B.B., bidimu bisatu bulubulu katshia Yezu watambuishibua. Kudi matuku makese, yeye ne bayidi bende bavua mu difesto dia Mitàndà, ne bidi bimueneka se: batshidi ku mpenga kua Yeruzaleme. Bushuwa mivule ya ku ngondo isambombo idi mimushadile, Yezu udi uyipitshishila mu mudimu wende mu Yudeya peshi anu dishiya dia Musulu wa Yordane, mu distrike dia Pereya. Teritware eu udi pende ukengela kukumbudibua wonso.

Bushuwa, kunyima kua Pasaka wa mu 30 B.B., Yezu uvua mupitshishe ngondo mitue ku muanda-mukulu mu buambi mu Yudeya. Kadi katshia bena Yuda bakeba kumushipa mu Pasaka wa mu 31 B.B., wakapitshisha tshidimu tshijima ne tshitupa tshiakalonda pa kulongesha nangananga mu Ngalileya. Mu tshikondo atshi, wakafumba bulongolodi bunene bua bamanyishi balongesha bimpe, muanda uvuaye kayi muenze diambedi. Mpindieu, udi uditua mu kampanye ka ndekelu ne kakole ka bumanyishi mu Yudeya.

Bua kutuadija kampanye aka, Yezu udi usungula bayidi 70 ne ubatuma babidi babidi. Nunku, bungi busanga bua tusumbu tua bamanyishi ba Bukalenge badi ne bua kutumika mu teritware budi 35. Bine aba badi badianjila mu bimenga ne miaba yonso idi Yezu upangadija bua kuya, anu mudibi bimueneka, pamue ne bapostolo bende.

Pamutu pa kutumina bayidi aba 70 dîyi bua kuyabo mu nsunagoga, Yezu udi ubambila bua kubuela mu nzubu ya bantu, umvuija ne: “Muaba wonso unuabuela mu nzubu, diambedi nuambe ne: ‘Nzubu eu ikale ne ditalala.’ pikalamu munangi wa ditalala, ditalala dienu nedishale kudiye.” Mmukenji kayi udibo ne bua kumanyisha? “Nutungunuke ne kubambila,” ke mudi Yezu wamba, “bukalenge bua Nzambi buasemenyi pabuipi nenu” Pa bidi bitangila mudimu wa bayidi 70, mukanda wa Matthew Henry’s Commentary udi ulonda ne: “Anu bu Mfumuabo, miaba yonso ivuabo bakumbula, bavua bamanyisha ku nzubu ne ku nzubu.”

Ngenyi-miludiki ivua Yezu mupeshe bayidi 70 mmifuanangane ne eyi ivuaye mupeshe bapostolo 12 pakabatumaye mu kampanye ka bumanyishi mu Ngalileya kukadi bu tshidimu tshijima. Kêna amu udimuija bayidi aba 70 bua buluishi buvuabo ne bua kupetangana nabu, kubalongolola pa mushindu wa kumanyisha mukenji kudi bena nzubu, kadi udi ubapuijila kabidi bukole bua kuondopa babedi. Nunku, pafika Yezu katupa kîpi pashishe, bantu ba bungi nebikale bazukila bua kumonangana ne Mfumu muena bayidi badi ne makokeshi a kuenza malu a dikema a mushindu’eu.

Bumanyishi bua bayidi 70 ne mudimu udi Yezu ukumbaja pa kubatua munyima bidi binenga anu lupolo luipi. Mu katupa kîpi, tusumbu 35 tua bamanyishi ba Bukalenge tudi tutuadija kupingana kudi Yezu. “Mukalenge,” ke mudibo balonda ne disanka, “ne ba-demon bine badi batukokela patudi tutumika ne dîna diebe.” Luapolo lulenga lua mudimu lua mushindu’eu ludi bushuwa luzawukija Yezu, bualu udi wandamuna ne: “Mvua mutuadije kumona Satana mumane kupona bu mupenyi ufumina mu diulu. Monayi! Ndi munupeshe bukokeshi bua kudiatakaja nyoka ne tuminyiminyi.”

Yezu mmumanye ne: panyima pa diledibua dia Bukalenge bua Nzambi mu tshikondo tshia ku nshikidilu, Satana ne ba-demon bende badi ne bua kuipatshibua mu diulu. Kadi mpindieu, dipatshibua edi dia ba-demon bakena bamueka kudi bantu bena-dîna ntshijadiki tshia pa mutu tshia se: muanda eu newenzeke bushuwa. Pa nanku, Yezu udi wakula bua dipona ditshivuavua dia Satana mufume mu diulu bu muanda muenzeke ukena kuela mpata. Nunku, mu ngakuilu wa tshimfuanyi, bayidi 70 badi bapeshibua bukokeshi bua kudiatakaja nyoka ne tuminyiminyi. Pabi, Yezu udi wamba ne: “Kanusanki bua padi ba-spiritu banukokela, kadi nusanke bua mudi mêna enu mafundibue mu muulu.”

Yezu udi ukuatshika milowo ne udi usamuna Tatuende patoke bua mudiye mutumike ne basadidi aba bapuekele pa kubapuijila bukole buende. Ukudimuka kudi bayidi bende, udi wamba ne: “Mêsu adi amona malu anudi numona aa ng’a disanka! Bualu, ndi nnuambila, baprofete ne bakalenge bavule bakajinga kumona malu anudi numona aa, kadi kabakaamona, ne kumvua malu anudi numvua aa, kadi kabakawumvua.” Luka 10:1-24; Matayo 10:1-42; Buakabuluibua 12:7-12, NW.

▪ Mmuaba kayi uvua Yezu mufile bumanyishi mu bidimu bisatu bia kumpala bia mudimu wende, ne nteritware kayi uvuaye mukumbule wonso mu ngondo isambombo ya ndekelu?

▪ Nkuepi kudi Yezu utuma bayidi 70 bua kukumbula bantu?

▪ Bua tshinyi Yezu udi wamba ne: uvua mumona Satana mumane kupona ufuma mu diulu?

▪ Mmu ngumvuilu kayi mudi bayidi mua kudiatakaja nyoka ne tuminyiminyi?