Nshapita wa 77

Tshilumbu tshia bumpianyi

ANU mudibi bimueneka, bantu mbumvue se: Yezu mmuye kudia kua Mufarizeyi. Nunku, badi bunguila pambelu binunu bivule ne bindila bua apatuke. Bishilangane ne Bafarizeyi badi balundukila Yezu ne bakeba bua kumukuata ku mêyi biambaye bualu bubi, bantu badi bamuteleja ne ntema ne dianyisha.

Ukudimuka diambedi kudi bayidi bende, Yezu udi wamba ne: “Nudimuke bua ntuntumuna wa Bafarizeyi, mumue ne: budingidiji.” Anu muvuabi bileja dîba dia didia, ndongoluelu mujima wa ntendelelu wa Bafarizeyi mmuwule tente ne budingidiji. Kadi, nansha bubi buabo busokokibue kudi ditshina Nzambi dia ku mêsu patupu, ndekelu wa bionso nebutandudibue. “Kakuena bualu busokoka bu mudibi,” ke mudi Yezu wamba, “buapanga kusokolodibua, ne bualu busokoka buapanga kumanyika.”

Yezu udi utungunuka pa kuambulula makankamija avuaye mupeshe bapostolo 12 pakabatumaye bua kufila bumanyishi mu Ngalileya. Udi wamba ne: “Kanutshinyi aba badi bashipa mubidi ne pashishe kabayi ne bukole bua kuenza bukuabu bualu.” Bu mudi Nzambi kayi upua muoyo nansha mushamusha umuepele, Yezu udi ujadikila bamulondi ne: Nzambi kakubapua muoyo nansha. Udi wamba ne: “Payabo nenu kumpala kua misumba ya bantu, kua bena mbulamatadi ne kua bakokeshi, . . . spiritu munsantu neanulongeshe pa dîba adi mene malu anudi ne bua kuamba.”

Muntu kampanda udi wela lubila mu musumba. “Mulongeshi,” ke mudiye ulomba, “ambila muanetu wa balume abanyangane nanyi bumpianyi.” Mikenji ya Mozese idi yamba ne: muan’a bute udi ne bua kupeta bitupa bibidi bia bumpianyi, nunku matandu kaena ne bua kujuudibua. Kadi bidi bimueneka se: muntu eu udi ujinga bivule kupita bidiye ne bua kupeta bilondeshile mikenji.

Ne kabingila, Yezu udi ubenga kudibueja mu tshilumbu etshi. “Muntu we, nnganyi udi munteke ku mutu kuenu bu mulumbuluishi anyi muabanyi?” ke mudiye webeja. Pashishe, udi upesha musumba didimuija edi dia mushinga: “Tabalayi ne nudimuke bua lukuka lua mishindu yonso, bualu, nansha bikala muntu ne bintu bibodiame, muoyo wende kawena ne mpokolo mu bintu bidiye nabi.” Eyowa, nansha yeye ne bintu bungi kabuyi kuamba, ndekelu wa bionso, muntu neafue ne neabishiye bionso. Bua kuzangika muanda eu ne kuleja bupote bua dilengulula kudienzela dîna dilenga ku mêsu kua Nzambi, Yezu udi utumika ne mufuanu kampanda. Udi umvuija ne:

“Maloba a mubanji kampanda akapatula bintu bia bungi. Pa nanku, wakatuadija kuelangana meji munda muende, wamba ne: ‘Nengenze tshinyi mpindieu, tshiena ne muaba wa kusangisha biakunowa bianyi?’ Ke kuambaye ne: ‘Nengenze nunku: nengupule mayeba anyi, ngibake makuabu mapite bunene, ne nensangishemu ntete yanyi yonso ya bukula ne bintu bianyi bionso bilengele; ne nengambile anyima wanyi ne: “Anyima wanyi, udi ne bintu bilengele bia bungi bilama bua bidimu bivule; wikishe biebe, udie, unue, wondoloke.”’ Kadi Nzambi kumuambila ne: ‘Mupote we, butuku ebu mene badi bakulomba anyima webe. Nunku, nnganyi washala ne bintu biwudi munguije?’”

Bua kukomesha, Yezu udi umvuija ne: “Ke mudibi bua muntu udi udiunguijila mabanji, kadi kayi mubanji ku mêsu kua Nzambi.” Nansha mudi bayidi kabayi mua kukuatshibua mu buteyi kudi bupote bua didiunguijila mabanji, badi mua kubuejibua bipepele mu ditanaja kudi ntatu ya buatshiabuatshia ne kupanga kusadila Yehowa ne anyima wabu mujima. Nunku, pin’apu Yezu udi ubambuluila mubelu mulenga uvuaye mufile kukadi tshidimu ne tshitupa mu Muyuki wende wa pa Mukuna. Ukudimuka kudi bayidi bende, udi wamba ne:

“Ke bualu kayi ndi nnuambila ne: Kanusumpakanyi bua anyima yenu bua binuadia, peshi bua mibidi yenu bua binuavuala. . . . Nutangile bimpe se: nyunyi ya bikololo kayena ikuna mamiinu anyi inowa, ne kayena nansha ne diyeba anyi tshilaminu, pabi Nzambi udi uyidiisha. . . . Tangilayi bimpe mudi bilongo bia kapapankole bikola; kabiena bikuata mudimu mukole anyi biluka; pabi, ndi nnuambila, Nansha Solomo muine, mu butumbi buende buonso, kakavuala bu tshimue tshia kudibi. . . .

“Nunku, lekelayi kukeba binudi mua kudia ne binudi mua kunua, ne kanusumpakanyi; bualu bionso ebi mbintu bidi matunga a bukua-bantu akeba ne lukuka, kadi Tatuenu mmumanye ne: nudi dijinga ne bintu ebi. Tshidibi, tungunukayi ne kukeba bukalenge buende, ne bintu ebi nebanusakidilebi.”

Bidi bikengela kuangata miaku ya Yezu eyi ne mushinga mukole nangananga dîba dia dikondakana dia mianda ya mabanji. Muntu udi usumpakana wela kalele bua bintu bia ku mubidi bidiye ukengela ne utuadija kuteketa mu nyuma udi uleja, kabiyi mpata, dipanga ditabuja mu bukole bua Nzambi bua dipetesha basadidi Bende bintu bidibo bakengela. Luka 12:1-31, NW; Dutelonome 21:17.

▪ Bua tshinyi, imue misangu, muntu eu udi ulomba Yezu bua kukosa tshilumbu tshia bumpianyi buabu, ne ndidimuija kayi didi Yezu ufila?

▪ Mmufuanu kayi udi Yezu utumika nawu, ne ndilongesha kayi didiwu uzangika?

▪ Mmubelu kayi udi Yezu wambulula, ne bua tshinyi mbikumbanyine?