Nshapita wa 27

Kubikidibua kua Matayo

KATUPA kîpi panyima pa diondopa muena tuneke, Yezu udi umuka mu Kapernaume ne uya ku Mbuu wa Ngalileya. Misumba ya bantu idi ilua tshiakabidi kudiye, ne udi utuadija kuyilongesha. Mu kuendakana kuende, udi umona Matayo, udi ubikidibua kabidi ne: Lewi, musombe ku biro bia dilambuisha bitadi. “Vuaku mundondi,” ke mudi Yezu umubikila.

Bidi bimueneka ne: Matayo ukadi muibidile ne malongesha a Yezu, anu muvua Petelo, André, Yakobo ne Yone pakababikilabu. Anu bu buobu, Matayo udi witaba diakamue ku dibikila edi. Udi ujuka ne ulekela majitu ende a mulambuishi wa bitadi, ne ulonda Yezu.

Pashishe, imue misangu bua kuenza tshibilu tshia kubikidibua kuende, Matayo udi ulongolola didia dinene mu nzubu wende. Pa kumusha Yezu ne bayidi Bende, binende ba Matayo ba kumpala badiku pabu. Pa tshibidilu, bantu aba batu babadiwula kudi bana babo bena Yuda, bualu badi balambuisha bitadi bua bakokeshi bena Roma bakinyibue. Kabidi, batu baleja dipanga bululame misangu mivule pa kulomba bantu mfranga mipite pa mushinga wa bitadi mujadika pa tshibidilu.

Padi Bafarizeyi bamona Yezu mu difesto ne bantu bu nunku, badi bebeja bayidi bende ne: “Bua tshinyi mulongeshi wenu udi udia ne balambuishi ba bitadi ne bena mpekatu?” Pa kumvua lukonko elu, Yezu udi wandamuna Bafarizeyi ne: “Badi bakengela munganga ki mbadi ne makanda a mubidi nansha, apo mbabedi. Nunku, ndayi, nulonge tshidi mêyi aa umvuija: ‘Ndi musue dibuikidila mpekatu, kadi ki mmulambo.’ Bualu ndi muvue kubikila, ki mbakane, kadi benji ba mpekatu.”

Bidi bimueneka ne: Matayo mmubikile balambuishi ba bitadi aba kuende bua bamone mua kuteleja Yezu ne kupeta luondapu lua mu nyuma. Nunku, Yezu udi udisangisha nabu bua kubambuluisha bua kudiabo malanda masheme ne Nzambi. Yezu kêna upepeja bantu ba mushindu’eu, bu mudibo benza kudi Bafarizeyi badiambi mudibu bakane nansha. Kadi, musaka kudi luse, udi usadila bu munganga wa [masama abu a] mu nyuma.

Bienzedi bia Yezu bia dibuikidila benji ba mpekatu kabiena biumvuija dibuikila mêsu pa mpekatu yabu, kadi ndileja nyanji ya dinanga anu muvuaye muleje kudi babedi ba masama a ku mubidi. Tshilejilu, vuluka muvuaye muolole tshianza ne luse luonso dimue dituku ne mulenge muena nsudi, wamba ne: “Ndi musue. Ukezudibue.” Tulejayiku petu luse lua muomumue pa kukuatshisha aba badi bashikile, nangananga pa kubatuadila diambuluisha dia mu nyuma! Matayo 8:3; 9:9-13; Mâko 2:13-17; Luka 5:27-32, NW.

▪ Mmuaba kayi udi Matayo dîba didi Yezu umumona?

▪ Mmudimu kayi udi Matayo wenza, ne bua tshinyi bantu bu nunku mbapepejibue kudi bena Yuda bakuabu?

▪ Mmunyi mudibu batobolola Yezu, ne ndiandamuna kayi didiye walukija?

▪ Bua tshinyi Yezu udi udisangisha ne benji ba mpekatu?