Nshapita wa 132

Ku tshianza tshia balume tshia Nzambi

DIPONGOLOLA dia spiritu munsantu dia Pentekoste ntshijadiki tshia se: Yezu mmupingane mu diulu. Tshikena-kumona tshipetesha muyidi Etiene lupolo luîpi pashishe tshidi tshijadika patshi se: mmufike muine amu. Lupolo luîpi kumpala kua dimuasa mabue bua bumanyishi buende bua lulamatu, Etiene udi utua tshikemu ne: “Monayi! Ndi mmona diulu dibululuke, ne Muana wa muntu muimane ku tshianza tshia balume tshia Nzambi.” (NW)

Ku tshianza tshia balume tshia Nzambi kudiye, Yezu mmuindile dîyi-dituma edi dia kudi Tatu: “[Ndaku, NW] ukokeshe biebe munkatshi mua badi nebe lukuna.” Kadi mu lupolo elu, patshidiye muindile bua kupulumukila bena lukuna bende, Yezu udi wenza tshinyi? Udi ne bumfumu, anyi bukokeshi, pa bayidi bende bela manyi, ubaludika mu mudimu wabu wa bumanyishi ne ubalongolola bua kuluabu, ku dibiishibua, bakalenge beleshanganyi nende ba maboko mu Bukalenge bua Tatuende.

Tshilejilu, Yezu udi usungula Saul (mutambe kumanyika pashishe ku dîna diende dia bena Roma dia Paulo) bua kuluaye ntunga-mulongo mu mudimu wa divuija bayidi mu matunga makuabu. Saul udi ne tshisumi bua Mikenji ya Nzambi, kadi mmupambuisha kudi bamfumu ba malu a Nzambi bena Yuda. Bu tshipeta, kêna anu wanyisha kushipibua kua Etiene, apo udi uya kabidi ku Damase ne bukenji bua muakuidi munene Kayifase bua kusuika ne kutuala mu Yeruzaleme balume ne bakaji buonso badiye usanganaku bu balondi ba Yezu. Kadi, padi Saul mu njila, butoke budi bumukenkela diakamue bu mupenya ne udishinda panshi.

“Saul, Saul, udi unkengesha bua tshinyi?” ke mudi dîyi difumina ku muaba ukêna umueneka dimuebeja. “Mukalenge, wewe udi nganyi?” ke mudi Saul webeja.

“Meme ndi Yezu uudi ukengesha,” ke diandamuna didi difidibua.

Yezu udi wambila Saul mumana kufofomija mêsu kudi butoke bua tshishima bua kubuelaye mu Damase ne kuindila mêyi-mashidimunyi. Pashishe, Yezu udi umueneka mu tshikena-kumona kudi Ananias, umue wa ku bayidi bende. Pa bidi bitangila Saul, Yezu udi wambila Ananias ne: “Muntu ewu ndi mumusungule bu tshiamu tshia mudimu, bua kumanyisha dina dianyi mu bukua bisamba, kudi bamfumu ne kudi bena Izalele.”

Bushuwa, batua mpanda kudi Yezu, Saul (mumanyike mpindieu bu Paulo) ne bakuabu bamanyishi ba Evangeliyo badi balubuluka bia kukatshila mu mudimu wabu wa difila bumanyishi ne dilongesha. Nunku, bidimu bitue ku 25 panyima pa dimueneka dia Yezu kudiye mu njila wa ku Damase, Paulo udi ufunda ne: “lumu luimpe [luakamanyishibua, NW] munkatshi mua bifukibua bionso [bidi] muinshi mua diulu.”

Bidimu bia bungi bimane kupita, Yezu udi utumina mupostolo wende munanga, Yone, mulongolongo wa bikena-kumona. Bushuwa, ku diambuluisha dia bikena-kumona ebi bidi Yone umvuija mu mukanda wa mu Bible wa Buakabuluibua, yeye muine mmushale ne muoyo bua kumona Yezu upingana mu bukole bua Bukalenge. Yone udi wamba ne: “ku buenzeji bua spiritu” wakambuibua too ne mu tshikondo tshitshivua kumpala tshia “dituku dia Mukalenge.” Ke “dituku” kayi edi?

Dikonkonona milayi ya mu Bible ne lubatshi, pamue ne mulayi wa Yezu yeye muine pa bidi bitangila matuku a nshikidilu, didi disokolola ne: “dituku dia Mukalenge” diakatuadija mu tshidimu tshikena kupua muoyo tshia 1914. Nunku, mu 1914 ke muakapingana Yezu, mu mushindu ukena umueneka, kakuyi diela mpungi patoke ne anu basadidi bende ba lulamatu ke bajinguluile dipingana diende. Tshidimu atshi, Yehowa wakatumina Yezu dîyi dia kuya kukokesha munkatshi mua bena lukuna bende!

Utumikila dîyi-dituma dia Tatuende, Yezu wakakezula muulu pa kumushamu Satana ne ba-demon bende, kubimansha pa buloba. Yeye mumane kumona dienzeka dia muanda eu mu tshikena-kumona, Yone udi umvua dîyi difumina mu diulu dimanyisha ne: “Mpindieu lupandu ne bukokeshi ne bukalenge bia Nzambi wetu ne bumfumu bua Kristo wende biafiki!” Eyowa, mu 1914 Yezu wakatuadija kukokesha bu Mukalenge!

Ndumu luimpe kayipu elu bua batendeledi ba Yehowa badi mu diulu! Badi babasengelela ne: “Sankayi, nuenu muulu ne nuenu badi basombemu!” Kadi nsombelu udi munyi bua aba badi pa buloba? “Diakabi kudi buloba ne mbuu,” ke mudi dîyi didi difumina mu diulu ditungunuka, “bualu Diabolo wapueki kunudi muikale ne tshiji tshikole, bu mudiye mumanye ne: udi ne lupolo luîpi lua tshikondo.”

Tudi bushuwa mpindieu mu lupolo alu luîpi lua tshikondo. Bantu badi benda baleja bikalabu bakumbanyine bua kubuela mu bulongolodi bupiabupia bua Nzambi peshi kubutudibua. Bulelela budi se: kupanduka anyi kubutudibua kuebe nkayebe nkusuikakaja ku ngandamuinu webe ku lumu luimpe lua Bukalenge bua Nzambi ludi lumanyishibua pa buloba bujima ku bulombodi bua Kristo.

Yezu Kristo neatumike pashishe bu Tshiamu tshia mudimu tshia Nzambi bua kukezula buloba pa kumusha buenzeji bua ndongoluelu mujima wa malu wa Satana ne aba bonso badi bamutua nyama ku mikolo. Yezu neumushe bubi ebu buonso mu mvita idi ibikidibua mu Bible ne: Har–Magedon, anyi Armagedon. Pashishe, Yezu, Muntu mutambe bunene mu bukua-bifukibua mu nyima mua Yehowa Nzambi yeye muine, neakuate Satana ne ba-demon bende ne kubasuika bua bidimu tshinunu mu “dijimba,” didi dileja nsombelu wa dibotoloka mufuanangane ne lufu. Malu Menza 7:55-60; 8:1-3; 9:1-19; 16:6-10, MMM; Musambu wa 110:1, 2; Ebelu 10:12, 13; 1 Petelo 3:22; Luka 22:28-30; Kolosai 1:13, 23; Buakabuluibua 1:1, 10; 12:7-12; 16:14-16; 20:1-3; Matayo 24:14, NW.

▪ Panyima pa dibanda dia Yezu mu diulu, mpenyi padiye usanganyibua, ne ntshinyi tshidiye muindile?

▪ Yezu udi ukokesha banganyi panyima pa dibanda diende mu diulu, ne mmunyi mudi kukokesha kuende kumueneka?

▪ “Dituku dia Mukalenge” diakatuadija tshikondo kayi, ne ntshinyi tshiakenzeka ku mbangilu wadi?

▪ Mudimu wa bumanyishi udi wenjibua lelu’eu udi ne buenzeji kayi kudi yonso wa kutudi pa nkayende?

▪ Padi mudimu eu wa bumanyishi ufika ku ndekelu, mmianda kayi yenzeka pashishe?