Nshapita wa 118

Ditungila ne dikuatshibua

MUNDANKULU mmumane kupita padi Yudase ulombola musumba munene wa basalayi, bakuidi bamfumu ne Bafarizeyi, ne bakuabu too ne mu budimi bua Njetsemanyi. Bakuidi mbapunge dîyi bua kufuta Yudase bitshiele 30 bia tshiamu tshitoke bua kufilaye Yezu.

Musangu mushale pakamuipatabu ku didia dia Pasaka, anu mudibi bimueneka, wakaya buludi ne kudi bakuidi bamfumu. Bine aba bakasangisha diakamue tupita tuabu pamue ne musumba wa basalayi. Pamu’apa, Yudase uvua muanji kubalombola ku muaba uvua Yezu ne bapostolo bende benzele difesto dia Pasaka. Pa kumona se: bakadi bumbuke, musumba eu munene muambule bia-mvita, mukuate miendu ne bimunyi udi ulonda Yudase pambelu pa Yeruzaleme ne ukosolola Tshibanda tshia Kedrone.

Yudase udi ulombola mulongolongo eu ku Mukuna wa Olive bualu mmushindike se: mmumanye muaba wa kupetela Yezu. Mu lumingu lushale, pavua Yezu ne bapostolo bende batambakana pa kuya ku Yeruzaleme ne pa kualukila ku Betaniya, bavua misangu mivule biimana mu budimi bua Njetsemanyi bua kuikisha ne kuyukila. Kadi, mpindieu bu mudi Yezu pamu’apa kayi umueneka mu bufike bua muinshi mua mitshi ya olive, mmunyi muamusunguluja basalayi? Pamu’apa ki mbanji kumumonaku musangu nansha umue. Nunku, Yudase udi ubapesha tshimanyinu, wamba ne: “Ungatua mishiku awu nyeye, numukuate, nuye nende bamulame bimpe.”

Yudase udi ulombola musumba eu munene mu budimi, mudiye umona Yezu pamue ne bapostolo bende, ne udi uya buludi too ne kudiye. “Muoyo Mulongeshi!” (Muanda mulenga lelu) Padiye wamba nunku, udi umuela mu tshitupa pa kumutua mishiku ne diengeleka.

“Muena dianyi, udi apa bua kipatshila kayi?” ke mudi Yezu wandamuna. Pashishe, udiandamuina ku lukonko, udi wamba ne: “Yudase, udi utungila Muana wa muntu pa kumutua mishiku anyi?” Bua mupangidi eu, kuende kuâpu! Yezu udi wenda mutangile kumpala mu butoke bua bimunyi bidi bilakuka ne bua miendu, ne ukonka ne: “Nudi nukeba nganyi?” (NW)

“Yezu wa mu Nazarete,” ke diandamuna diabu.

‘Mmeme ewu,’ ke mudi Yezu wandamuna pa kuimana ne dikima kumpala kuabu buonso. Pa kukema bua bukitu buende ne kabamanyi tshidi mua kuenzeka pashishe, balumiana badi bapingana tshianyima ne badishinda panshi.

‘Nkadi munuambile ne: Mmeme ewu,’ ke mudi Yezu utungunuka ne mutukije. “Panuikala nunkeba meme, nulekele aba baye.” Kukadi lupolo luîpi mu tshibambalu tshia kuulu, Yezu uvua muambile Tatuende mu disambila ne: uvua mulame bapostolo bende ba lulamatu ne nansha umue wa kudibu kavua mujimine “pa kumbusha muana wa kabutu.” (NW) Nanku, bua dîyi diende kukumbanadi, udi ulomba bua balekele bamulondi baye.

Padi basalayi batabuluka, bimana kuulu ne batuadija kusuika Yezu, bapostolo badi bajingulula tshikadi pa kuenzeka. ‘Mukalenge, tutape ne miele anyi?’ ke mudibu bebeja. Kumpala kua Yezu kuandamuna, Petelo udi utuula umue wa ku miele ya nkanza ibidi ivua bapostolo batuale, ubundula Malkuse, mupika wa muakuidi munene. Kutapa kua Petelo kudi kupangila mutu wa mupika, kadi udi ukosa ditshi diende dia balume.

“Lekela, biakumbanyi nanku,” ke mudi Yezu wamba bua kubasunga. (NW) Udi ulenga ditshi dia Malkuse, wondopa mputa wende. Pashishe, udi ufila dilongesha dia mushinga mukole, pa kutumina Petelo dîyi ne: “Pingaja muele webe mu tshibubu, bualu bonso badi batula muele, nebafue ku muele. Udi wela meji ne: tshiena mua kulomba kudi Tatu wanyi, yeye kuntumina amu mpindiewu [lejon ya banjelu, NW] mipite pa dikumi ne ibidi anyi?”

Yezu mmusue kudifila bua bamukuate, bualu udi umvuija ne: “Mmunyi muakumbana [Mifundu, NW] idi yamba ne: bidi ne bua kuenzeka nanku?” Ne udi usakidila ne: “Lupanza luvua Tatu mumpeshe, mu mishindu yonso meme tshiakulunua anyi?” (NW) Mmuanyishe bushuwa bua disua dia Nzambi dimukumbanyine.

Pashishe, Yezu udi wakula mutangile kudi musumba. “Nudi bapatuke ne miele ya nkanza ne bibonge bu bavuile muibi bua kunkuata anyi?” ke mudi Yezu webeja. “Ku dituku ku dituku mvua nsomba mu ntempelo ndongesha, pabi kanuakankuata. Kadi, bionso ebi bienzeki bua mifundu ya baprofete ikumbane.” (NW)

Pa kumvua mêyi aa, musumba wa basalayi, mfumu wa basalayi ne tupita tua bena Yuda badi bakuata Yezu ne bamusuika. Padibu bamona nunku, bapostolo badi bashiya Yezu ne banyema. Kadi, nsongalume kampanda​—pamu’apa mmuyidi Mâko—​udi ushala yeye mu musumba. Muine eu uvua imue misangu ku nzubu kuvua Yezu muenzele difesto dia Pasaka ne pashishe mulonde musumba kumukila aku. Pabi, mpindieu badi bajingulula mpala wende, ne badi bateta bua kumukuata. Kadi udi ushiya tshilamba tshiende tshia lin ne unyema. Matewuse 26:47-56; Markuse 14:43-52; Lukase 22:47-53; Yowanese 17:12; 18:3-12, MMM.

▪ Bua tshinyi Yudase mmushindike se: neasangane Yezu mu budimi bua Njetsemanyi?

▪ Mmunyi mudi Yezu uleja ditabalela diende bua bapostolo bende?

▪ Mmuanda kayi udi Petelo wenza bua kuluila Yezu, kadi Yezu udi wambila Petelo tshinyi?

▪ Mmunyi mudi Yezu usokolola ne: mmuanyishe bushuwa bua disua dia Nzambi dimukumbanyine?

▪ Padi bapostolo bashiya Yezu, nnganyi udi ushala, ne ntshinyi tshidi tshimuenzekela?