Nshapita wa 125

Disumpakana ne lufu pa mutshi

BIVI babidi badi balombodibua pambelu pamue ne Yezu bua kushipibua. Kabiyi kule ne tshimenga, musumba udi wimana pa muaba udibu babikila ne: Golgota, peshi Muaba wa Kabalubalu.

Badi bavula bena buloko bilamba biabu. Pashishe badi bapeshibua mvinyo musambakaja ne myrrhe. Anu mudibi bimueneka, muine eu mmulamba kudi bakaji ba mu Yeruzaleme, ne bena Roma kabena bakandika dinuisha aba badi bapopela pa mitshi mulungu eu mupoleshi wa bisama. Kadi, padi Yezu umulabula, udi ubenga bua kunua. Mbua tshinyi? Kabiyi mpata, mmusue kuakama diteta edi dipite bukole dia ditabuja diende pa kutumika ne makokeshi ende a diela meji mu tshiuwidi tshiawu tshijima.

Badi mpindieu balongamija Yezu pa mutshi, bianza biteka muulu mua mutu wende. Pashishe basalayi badi bapopela misonso minene mu bianza ne ku makasa. Udi utandabala bua bisama padi misonso yenda itubula musunyi ne mijilu. Padibu bimanyika mutshi, bisama bidi bisunsula mutshima, bualu bujitu bua mubidi budi bupanda mputa ya misonso. Pabi, pamutu pa kukana, Yezu udi usambila bua basalayi ba bena Roma ne: “Tatu, ubafuile luse, [bualu, NW] kabena bamanye tshidibo benza.”

Pilato mmulamike kabaya ku mutshi kafunda ne: “Yezu wa mu Nazarete, [Mukalenge, NW] wa bena Yuda.” Anu mudibi bimueneka, pa kufunda miaku eyi udi usua kuleja, ki ng’anu kanemu kadiye wambika Yezu, apo kabidi kapeja kende bua bakuidi bena Yuda bavua bamutshintshimike bua kutula dîyi dia dikosela Yezu tshibawu tshia lufu. Nunku, bua bavule kubalabu miaku idi pa kabaya, Pilato mmuyifundishe mu miakulu isatu​—mu tshiena-Ebelu, mu muakulu wa mbulamatadi wa Latin, ne mu tshiena-Greke tshidi buonso bakula.

Bakuidi bamfumu, pamue ne Kayifase ne Ana, badi balubakana ne lungenyi. Dimanyisha edi dinenke didi ditundubija ditshimuna diabu. Nunku, badi batontolola ne: “Kufundi ne: ‘Mukalenge wa bena Yuda,’ kadi ufunde ne: uvua muambe ne: ‘Ndi Mukalenge wa bena Yuda.’” (NW) Ufika munda muvua bakuidi bamuenzeje malu ne budimu, Pilato udi wandamuna ne dipetu dionso ne: “Tshindi mumane kufunda, ndi mumane kufunda.” (NW)

Bakuidi, pamue ne musumba munene, mbasangile mpindieu pa muaba wa tshishipelu, ne bakuidi badi babenga bujadiki budi pa dibaya. Badi bambulula bujadiki bua dishima buvuabu bafile diambedi kumpala kua Sanhedrin. Nunku, kabiena bikemesha padi bapitakanyi batuadija kuakula bibi, bakupa mitu ne kuseka, bamba ne: ‘Wewe mupudi wa ntempelo ne mumuibaki mu matuku asatu udisungile: biwikala muana wa Nzambi, utuluke ku mutshi wa tshinyongopelu!’

“Yeye wakadi usungila bakuabo, kena mumanye mua kudisungila!” ke mudi bakuidi bamfumu ne bena kuitabuja babu bapelesha. ‘Yeye udi Mukalenge wa Izalele; atuluke biende ku mutshi wa tshinyongopelu, netumuitabuje! Yeye udi weyemena Nzambi; Nzambi amusungile, bikalaye mumusue; bualu bua yeye wakamba ne, Ndi Muana wa Nzambi.’

Pa kulonda ngenzelu wa muomumue, basalayi badi pabu baseka Yezu. Badi bamupesha mvinyo wa buanji ne dimuseka, pamu’apa pa kumuteka pabuipi ne mishiku yende miuminyine ne nyota. ‘Biwikala mukalenge wa bena Yuda,’ ke mudibu bamuela nsenda, ‘udisungile.’ Nansha bivi pabu​—umue mupopela pa mutshi ku dia balume dia Yezu, ne mukuabu ku dia bakaji diende—​badi bamuseka. Anjibi kuela meji! Muntu mutambe bunene wa katshia ne katshia, ee, mueleshanganyi wa maboko ne Yehowa mu difuka dia bintu bionso, udi wanyisha ku budisuile tshinyangu tshia mushindu’eu!

Basalayi badi bangata bilamba bia pa mutu bia Yezu ne babitapulula mu mafuka anayi. Badi bela nshobo bua kumanya aba bangata mafuka aa. Kadi tshilamba tshia muinshi tshia mushinga mukole katshiena tshiotshi ne mutelu. Nunku, basalayi badi bambilangana ne: ‘Katutshi[p]andi, tutshielele nshobo né tshikala tshia nganyi.’ Pa kuenza nunku, kabayi bamanye, badi bakumbaja mufundu udi wamba ne: “Bakabanyangana bilamba bianyi bia pa mutu, ne bakelela tshivualu tshianyi nshobo.” (NW)

Ndekelu wa bionso, umue wa ku bivi udi ufika ku dijingulula se: Yezu udi ne bua kuikala mukalenge bushuwa. Nunku, udi ukanyina muinende, wamba ne: ‘Wewe kuena utshina Nzambi anyi? Wewe udi mu dipiila diodimue. Mbakose tshilumbu tshietu bimpe; tuetu tudi tuangata difutu bu mutuakuenza, kadi muntu eu kena muenze bualu bubi.’ Pashishe, udi ukudimuka kudi Yezu, ne wenza dilomba edi ne: ‘Pawabuela mu bukalenge buebe, umvuluke.’

“Bushuwa ndi nkuambila lelu’eu ne: Newikale nanyi mu Mparadizu,” (NW) ke mudi Yezu wandamuna. Dilaya edi nedikumbane padi Yezu utuadija kukokesha bu Mukalenge mu diulu ne ubiisha muenji wa malu mabi munyingaladi eu bua kuikalaye ne muoyo pa buloba mu Mparadizu wikala bapanduki ba ku Armagedon pamue ne binabu ne bua kupeshibua muabi wa kudima. Matayo 27:33-44; Mâko 15:22-32; Luka 23:27, 32-43; Yone 19:17-24.

▪ Bua tshinyi Yezu udi ubenga bua kunua mvinyo musambakaja ne myrrhe?

▪ Bua tshinyi, anu mudibi bimueneka, kabaya nkalamika ku mutshi wa Yezu, ne mmilandu kayi idiku kajudija pankatshi pa Pilato ne bakuidi bamfumu?

▪ Ntshinyangu kayi tshikuabu tshidi Yezu wakama pa mutshi, ne ntshinyi tshidi tshimueneka bu tshitshikebeshi?

▪ Mmunyi mudi mulayi kampanda ukumbajibua ku tshidibu benza ne bilamba bia Yezu?

▪ Ndishintuluka kayi didi umue wa ku bivi wenza, ne mmunyi muamukumbajila Yezu dilomba diende?